John 20
20
Imiilnguq Lliveq
1Sivulighmi aghneghani santillghem, Mary Magdala‑ghmii lliveghtekaq salin mamlegluku. Esghaqaa uyghagrugllak iqilluni lliivghem paaynganeng. 2Enkaam ketanqusnaq aglaqaq Simon Peter‑munllu ilanganunllu maligsaaghtemun, Jesus‑em piniqegkaanun. Mary‑m pikakek, “Nuugsimaat Ataneq lliivghaneng. Nallukaghput navek llimatanga.”
3Enkaam Peter‑enkuk aallghallu maligsaaghta lliveghtekak 4ketanqusnaq. Aallgha Peter‑meng sukalnguq, enkaam sivukluni kaatkaq. 5Guughlluni qineghsalghiimi esghaqii qiipaghaat, iwernga iitghumangilnguq. 6Kingungiighhaaneng Simon Peter kaalluni iitqaq lliveghmun, esghaqii qiipaghaat tawani. 7Esghaqaallu allakaghmi qiipaghaq Jesus‑em naasqwakun iimgutngayalghii. 8Taagken aallgha maligsaaghta kaasuwhaaqaq lliveghmun iitqaq. Esghaghyamigu ugpeqegkaa Jesus. 9Salin esghallghilluki liigikumangitkangak Akuzitnilnguq Igaqegkaq unguvapestaaghyaghqaaniluku tuqulleghmeng. 10Taagken maligsaaghtek aglaqak nemegnun.
Jesus‑em Aliighvikegkanga Mary Magdala‑ghmii
11Iwernga lliveghmi Mary qiyiqegkaq. Qiyanqusiin guughlluni ilutmun qineghsalghiimi, 12esghaqakek maalghuk yaqulgek atkuyaalgek qatelghiimeng. Aqumgaftuk Jesus‑em yugusiin lliviksaqangakun, aallgha naasqwan nengakun, ilanga itegaan nengakun. 13Aaptekaak, “Aghnaq, sangavek qiyaaqsin?”
Kiimsiqakek, “Nuugsimaat Atanqa. Nallukaqa navek llimatangat.” 14Mary tawaten piluni qiivutkelluku esghaqaa Jesus nekevghalghii, iwernga nallukegkaa Jesus‑ngutanga.
15Jesus‑em aaptekaa, “Aghnaq, sangavek qiyaaqsin? Kina ivaghaqsigu?”
Mary‑m piitesighaghtenguniluku pikaqsaqanga, enkaam pikaa, “Yuguniiq, nusugumakuvgu ungipaatinga navek llimaten, enkaam aqfalleqaqa.”
16Jesus‑em pikaa, “Mary”.
Mary‑m qiivluku pikaa Hebrew‑stun, “Rabboni”. (Whaten pisiq, “Apeghtughista”.)
17Jesus‑em pikaa, “Saaftegpenanga, salin mayiigatunga Atamun. Iwernga aglaghluten anglegutemnun ungipaannaketen, ‘Mayughnaqunga Atamnun, elpesillu Atagpesinun, Kiyaghnemnun, elpesillu Kiyaghneghpesinun.’”
18Mary Magdala‑ghmii aglaghluni maligsaaghtenun pikii, “Esghaamaaqa Ataneq.” Enkaam ungipaatkiillu Jesus‑em ungipaatesqellghaneng.
Jesus Aliilghii Maligsaaghteminun
19Sivuliilghii aghnegha santillghem. Ighivgaani tawani maligsaaghtet qerngughutkat. Alingluteng Jews‑et igleghutistengitneng, amiget maghqatngastekiit. Jesus tagiluni akulangitgun nekevluni pikii, “Nekeggmelleq elpesinilli.” 20Tawaten piluni, kelgutkii iiggenillu saninillu, enkaam maligsaaghtet quyaghllakat esghaghluku Ataneq. 21Taagken Jesus‑em pilaataqii, “Nekeggmelleq elpesinilli. Katam tawaten Atam kayagtellghatun whanga, tawateghpigaq kayagtamsi.” 22Tawaten piluni, aneghziigluki pikii, “Tuguklightekek Agleghnalghiik Taghneghak. 23Seghevuskufsiki kinkut alngunak seghleghqellghitneng, Kiyaghneghem seghevulleqii. Seghevunneghilkufsiki, Kiyaghneghem seghevunnaanghitii.”
Jesus‑em Aliighvikegkanga Thomas
24Thomas, (aatghan aallgha Malghi) maligsaaghtenisimangilnguq Jesus‑em takwaaqngaki. Thomas qula maalghuk siipneqegkangat maligsaaghtet. 25Ilangita maligsaaghtet ungipaatkaat Thomas, “Esghaamaaghput Ataneq!”
Iwernga Thomas‑em pikii, “Ugpeqnaanghitaqa wetkuqun esghaqumki tuquuqallghi iigganilnguut. Ugpeqnaanghitaqallu wetkuqun saaftekumki tuquuqallghetlu, saninganilnguqlu panalleq.”
26Santilleq ataasiq atughluku maligsaaghtet tawanllaataqat mangteghami, Thomas‑llu tawanlenguq. Amiget maghqatngaghngaata Jesus‑em iteghvikluki nekevegkaq akulangitgun. Pikii, “Nekeggmelleq elpesinilli.” 27Taagken Thomas pikaa, “Esghaghluki iiggenka saaftiki, saaftigullu sanika. Aygughitiqefqaavegngam, ugpeghi.” 28Thomas‑em pikaa, “Atanemni, Kiyaghnemni!” 29Taagken Jesus‑em pikaa, “Ugpeqiiten qayughllak esghaqevnga. Quyanaghhalek tamaakut ugpelghiit esghaghpenanga.”
John‑em Igangllallghan Apallaa
30Jesus uglaghngaan allaaghlluwhaghtiighaataqaaguq esghaamanghitni maligsaaghtemi, igaqumangilnguugut ukuni igani. 31Iwernga ukut igaqngalghiit igaqegkaagut elpesinun ugpeqesqelluku Jesus, Christ‑angutanga, Ighnegha Kiyaghneghem. Ugpeqelleghpesigun unguvallengellequsi Aatghakun.
© 2018, Wycliffe Bible Translators, Inc. All rights reserved.