John 11
11
Tuqullgha Lazarus‑em
1Taawanguq yuuk, aatqelghii Lazarus‑meng qinuyukaq. Bethany‑mi kiyaghtengngulghii nayagegmini Mary‑nkugni Martha‑nkugni. 2(Taam Mary‑m taakwaningani Atanghem itegii kuuvikluki tepengllaasimeng nuyamineng sangigsaghqaqii. Mary‑m kuugqegkanga Lazarus qinuyulghii.) 3Mary‑nkuk Martha‑nkuk ungipaasaghtiisqegkaak Jesus, “Ataneq, piniqegkan qinuyuguuq.” 4Jesus ungipaasatni pikaq, “Qinuyullghan apallaa tuqullghunghituq iwernga usuqisiiluni Kiyaghneghmun pinguuq, esghiisqellukullu aghtughyaghqaanghilleghllaga Ighneghan Kiyaghneghem.”
5Jesus‑em piniqegkek Martha‑nkuk anglegutkullghiik, Lazarus‑llu. 6Iwernga nagaqughngaaghmigu Lazarus‑em qinuyullgha, paninang maalghuk aghneghek tamaantekaq. 7Taagken Jesus‑em maligsaaghteni pikii, “Judea‑nneqigtelta.” 8Maligsaaghtengita pikaat, “Apeghtughista, legan qantaghaqun Jews‑et tuqunnaqegkaqaaten milughpagaatameng. Whaa alla aglanqigsugsiin?” 9Jesus‑em kiimsiqii, “Aghneghem ataasim avellgha nighuguq. Kina alngunak igleghtekumi aghneghmi naaggnaanghituq, qayughllak esghaghaqaa tumeni nunam nighugakun. 10Iwernga kina alngunak igleghtekumi unugmi naagsaghqaaguq qayughllak nighugilnguq ilumini.” 11Jesus tawaten piluni pikiillu, “Ilakumtaaghput Lazarus qavaaguq, taghtughsaghtughnaqaqa.” 12Maligsaaghtengita pikaat, “Ataneq, qavaakumi piniighlleqaa.” 13Jesus‑em pinguyaqangi Lazarus tuqumaniluku, iwernga maligsaaghtengita sumeghtaghaatkegkaat Lazarus qavaaniluku. 14Enkaam Jesus‑em ungipaatngwaaqii, “Lazarus tuqumaaq. 15Quyaanga ellnganinneghitkaalghiinga tuqaaqngan. Apalluqaqa elpesinun ugpeqataghhiisqellunga. Tagitek, takulteggu.” 16Taagken Thomas‑em (Malghimengllu aatqelghiim) pikii maligsaaghtelgutni, “Whangkutallu tuqulgusighyaghtuulteggu.”
Jesus Tuqulleghmeng Unguvaghtellghuuqlu Unguvallghuuqlu
17Jesus‑em kaalluni Bethany‑mun nagaquqaa Lazarus tuqumaniluku, enmis estamagughtaqeftii aghneghet llivelleghmineng. 18Bethany qantaghanlenguq Jerusalem‑emeng, 19enkaam uglapiglleghhiit Jews‑et tagilaghaatkat ilutughsaghnalukek Martha‑nkuk Mary‑nkuk, kuugꞌghegkenka tuqullghaneng.
20Martha‑m nagaqughyamigu Jesus taginiluku paasqaa, Mary nemetkaq. 21Martha‑m pikaa Jesus, “Ataneq, maantekaayaquvek kuugqa tuqunayanghituq. 22Iwernga liisimakaqa, talwa maaten Kiyaghneghem tuunyaghqaqaaten sameng alngunak aaptekuvek.” 23Jesus‑em pikaa, “Kuugꞌghen unguvaghllequq unguvalleghmun.” 24Martha‑m pikaa, “Liisimakaqa unguvaghllequq tuqukat unguvaghtuuskata kingulighmi aghneghmi.” 25Jesus‑em pikaa, “Whanga tuqulleghmeng unguvaghtellghuungallu unguvallghuungallu. Kitum alngunak ugpeqegkuminga tuquyaghngaaghmi, unguvallelguyaghqaaguq. 26Enkaam kina alngunak kiyaghtekumi whangamni, ugpeqegkumingallu, tuqunaanghitngwaaghtuq. Martha, ugpeqsiguu taana?” 27Martha‑m kiimsiqaa, “Aa‑a Ataneq, ugpeqamken Christ‑anguuten, Ighnegha Kiyaghneghem. Elpenguuq tagiyaghqaanikaat nunamun.”
Jesus Qiyakaq
28Martha‑m tawaten piluku aglaqaq. Tuqlughluku anglegutni Mary, ellnginaaghulluku pikaa, “Apeghtughista kaasimaaq, aaptaqaaten.” 29Ungipaasatni, Mary nekefqaghtekaq Jesus‑mun pinaluni. 30(Jesus paninang neghpigaghmun agliigalnguq, salin Martha‑m nallaghviganilnguq.) 31Jews‑et Mary‑nkunilnguut ilutughsaghilghiit Mary‑meng esghapagluku nekefqaghlluni aanyan maligtekaat. Sumeghmeggni lliveghmun qiyayaghtughnaqniluku pikaat.
32Iwernga Mary aglaqaq Jesus‑mun. Esghaghyamigu sikmuulluni manungakun pikaa, “Ataneq, maantekaayaquvek kuugqa tuqunayanghituq.” 33Jesus‑em esghaghluku Mary qiyalghii, tamaakutlu Jews‑et maligutkat qiyaaghuullghiit elngaatall seghleliighllakaq. 34Aaptekii, “Nagun lliivghumasteggu?” Pikaat, “Ataneq, tagi, esghaghyaghtughhu.” 35Jesus qiyakaq. 36Enkaam Jews‑et pikat, “Esghaghhu tawateghllak piniqumaagu Lazarus.” 37Iwernga ilangi pikat, “Jesus‑em naallghusimakumigu ayaakaq, sangan Lazarus tuqunghitesnanightagu?”
Jesus‑em Unguvaghtekanga Lazarus
38Jesus lliveghmun aglaatkelluku alla seghleliinqigteghllakaq. Lazarus‑em lliivgha sufluulghii, uyghagrugllagmeng paaynga saapluni. 39Jesus pikaq, “Iqiteggu uyghak.” Martha‑m pikaa, “Ataneq, estamagughtii aghneghet tuqutmineng enkaam tepengeghllagtuq.” (Martha nayakegkanga tuqukam yugem.) 40Jesus‑em pikaa, “Ungipaatkaqamken ugpeghyaquvek esghaghlleqan Kiyaghneghem aghtughyaghqaanghillgha.” 41Taagken iqitkaat uyghak paaynganeng lliivghem. Jesus quulmun esghaghluni pikaq, “Ataay, iqamsiqayugvikamken nagataqegkevnga. 42Liisimakaqa quunpeng nagaqughaqaghpenga. Iwernga tawaten piinga yuget uvitemnilnguut apalluqluki, ugpeqesqelluku elpenun kayagtekaatka.” 43Jesus tawaten piluni, iglagtupiglluni pikaq, “Lazarus, aani.” 44Yuuk tuqukaayalghii aanegkaq. Iiggillu itegiillu iimguvikngalghiit qiipaghaghmeng, gginaallu qantaghluni allaneng qiipaghaghmeng. Jesus‑em pikii, “Qiipaghaat iikiteki enkaam igleghlli.”
Igleghutistet Agghitkat Tuqunnaluku Jesus
45Taakut Jews‑et maligutkat Mary‑mun esghapakaat Jesus unguvaghtilghii, enkaam uglapiglleghhiim ugpeqegkaat Jesus. 46Iwernga ilangi Jews‑et Pharisees‑enun pikat, ungipaatkiit Jesus‑em unguvaghtillghaneng. 47Taagken chief priest‑etlu, Pharisees‑etlu qerngughlluki agghistet aaptekiit, “Sanaqestangam? Taana yuuk allaaghlluwhaghtighllaguuq. 48Nagneghtestekumteggu tawaten, tamaghhaghmi ugpeqelleqaat. Enkaam Rome‑eghmiit tagiluteng naafqelleqaat Temple‑allu yuputlu.”
49Caiaphas‑llu tawanlenguq, high priest‑ngulghii tawani ayumiqulleghmi. Caiaphas‑em pikii, “Elpesi nallukngwaaghtusi! 50Itagnaghataghaghnayaghtuq ataasim yugem tuqumatkesaqumiki yuget, qamaglluteng yumta naafqelleghqiitneng. Iwernga elpesi liigikigataghsi taana.” 51Caiaphas ellmineng tawaten akuzimangilnguq, Kiyaghneghem akuzistekaqaa qayughllak high priest‑ngulghii tawani ayumiqulleghmi. Tawaten pilleghmikun uuknaliqutkegkaa Jesus‑mun tuqutkelleqniluki Jews‑et. 52Jews‑nginaat tuqutkegpenaki iwernga qamaglluki Kiyaghneghem avaqutii mingitngalghiit tamangani tuqutkesaghqaqii ataasiightesqelluki nengllugutkullghiit. 53Taagken aghneghmeng kenlanga Jews‑et igleghutistengita agghitkegkaat naten tuqutelleghqameng Jesus. 54Enkaam Jesus aliilluni alngunak igleghhnaniqaq Jews‑et akulngitni. Iwernga tamaaken aghulaqegkaq kilgaan tunganganun, nemun atilqelghii Ephraim. Maligsaaghtekullghiit tamaantekat.
55Jews‑et Neqenghaghqellghat Passover‑mun kaasaghtulghii, enkaam naken alngunak uglapiglleghhii yuuk aglaghtuutkaq Jerusalem‑emun. Tawani yataaghqegkat neqenghaghqelleghmun ukmangighsalleghmegteggun Liilightuusat pisqellghistun. 56Yuget ivaqaat Jesus enkaam qerngughusameng Temple‑mi aaptekiit ilateng, “Jesus‑llu taginaqaqaa Neqenghaghqemmun? Sumeghpesini sanaqa?” 57Chief priest‑etlu Pharisees‑etlu tugunaluku Jesus liilightuutkaqegkangat yugnun, “Nalighpesi liisimakegkumigu Jesus‑em naantulanga wataghllak ungipaannakefsikut.”
© 2018, Wycliffe Bible Translators, Inc. All rights reserved.