Acts 1
1
1-5Theophilus, igangllaqaqsuwhaamkun igaqegkaqaqa qamagtengngwaaghluku Jesus‑em qepghallghallu apeghtughillghallu, piinlighyuwhaallghaneng kenlanga Kiyaghneghem qilagmun mayughtesleghanun.
Sivukluni nakmiiqaaguq apostle‑kaghqameng enkaam apeghtughllakaqii uglapiglleghhiimeng aghtughyaghqaanghillghakun Agleghnalghiim Taghnegham. Taakwaningani anguyagita qaquuraghluku tuqutkaqaat iwernga pingayut aghneghet atughluki unguvaqaaguq.
Unguvalleghmi kingunganeng 40 aghneq nunametkaaguq, enkaam uglaapiglluku apostle‑enun esghaghtestaataqaaguq ipapestaaq unguvaamaniluni, aleghqughnalukillu Ataneghpagullghaneng Kiyaghneghem.
Allameng qerngughusata Jesus‑em liilightuqii apostle‑et, “Wataghllak aghulaqegpenasi Jerusalem‑emeng kenlanga allgeghtelleghpesinun Agleghnalghiik Taghneghak. Atama akequsaqegkaqaak tuunelleqnilukek elpesinun katam tawaten apellemtun. John paaptaayeghikaaguq meghqun, iwernga Atama paaptaayeyaghtungestaghiisi Agleghnalghiigneng Taghneghagneng.”
Taakusta igaqegkanka igangllaqaqsuwhaamkun.
Kiyaghneghem Mayughtestekanga Jesus
6Sivungiighhaani Jesus‑em mayulleghqaan qilagmun, apostle‑et qerngughusameng aaptekaat Jesus, “Ataneq, Israel‑em atanghutillgha pisneqiggnaqsiguu?” 7Jesus‑em pikii, “Atanginaghhaghma liisimakii qayughllak ellngan aghtughyaghqaanghilleghmikun uspeqegkaqii. Elpesi liisimaksaghqaqenghitasi sangwaat qakun pilleghqii. 8Iwernga aghtughyaghqaanghillengellequsi Agleghnalghiik Taghneghak iitqayek ilugpesinun. Taagken ungipaqelleqaghpesinga Jerusalem‑emi, Judea‑mi, Samaria‑mi, uyavaghpanillu nunani.” 9Akuzineghmeng taaqngan Kiyaghneghem mayughtestekaa qilagmun. Esghapagusimaluku qilawaaghem talughtekaa esghaamallghitneng.
10Apostle‑et quulmun esghapagtuusimaluki, maalghuk yugek qatelghiimeng aatkaqelghiik aliighaghtekak saaghwitgun. 11Pikiik, “Yugitni Galilee‑m, sangafsi quulmun esghapagtuutaqetsi? Taagna Jesus Kiyaghneghem mayughtestekanga ukigyaghqaaguq esghapalleghpesistungwaaq mayullghatun qilagmun.”
Nakmikegkangat Matthias
12Taagken apostle‑et uteghniqat Jerusalem‑emun Mount Olives‑meng. Mount Olives qantaghaghhanlenguq Jerusalem‑emeng. 13Peter‑enkut, John‑enkut, James‑enkut, Andrew‑nkut, Philip‑enkut, Thomas‑enkut, Bartholomew‑nkut, Matthew‑nkut, James, ighnegha Alphaeus‑em, Judas, ighnegha James‑em, Simon Zealot‑a, kaalluteng Jerusalem‑emun mayuqat qemtamun nayumeggnun. 14Taakut apostle‑et, aghnatlu ugpeqat, Mary‑llu Jesus‑em naanga, Jesus‑em anglegutangillu qerngughulluteng elngaatall ipapighqelluteng yughaghaqelghiit ataasistun.
15Taagken qafsinat aghneghet atughluki ugpeqat qerngughutkat, entaqun 120‑nguut. Tawani Peter‑em nekevluni pikii, 16-19“Ugpeqaalgutemni, neqamikaghsi qepghalgutfut Judas, Jesus‑em nakmikegkaa. Ayumirugllak Agleghnalghiim Taghnegham uuknaliqutkegkaqaa David‑kun. Taana uuknaliqelleq apeghiiqaaguq Judas‑em uveghpagutaqngagu Jesus. Jesus‑em tugiistengi Judas‑em maghyaghquqaqii, enkaam akileghtuusangegkaaguq manimeng. Taagken akileghtuusamineng nunangluni qemitkaaguq ellmineng tawani. Yugusii ifkaghyalghiimi quupaghtekaq repall ighneghii aanqaghlluteng. Jerusalem‑eghmiit nagaqughyamegteggu tuqumatanga tawani nunami, atiqaat taana nuna Akeldama‑meng, whaten pisiq, ‘Nuna aaghwqegkaq.’”
20Peter‑em nagneghutkii, “David whaten igaqaaguq Psalms‑mi:
‘Mangteghaa paaghqiilli,
allamengllu kina alngunak tawantefqaami pili.’
Igaqegkaalghiillu whaten,
‘Qepghaqaa kitumun tugusaqumi.’
21-22“Enkaam nakmiighelta apostle‑kaghqameng tugusqelluku Judas‑em qepghaqaqsaqanga. Kina nakmikelteggu maligsaaghikaq whangkunneng igleghalgusighaqngamteggu Jesus. Tawantekaalghii ima John‑em ungipaqellghaneng paaptaayelleq kenlanga Kiyaghneghem mayughtestellghanun Jesus qilagmun. Enkaam whangkunnun maligulluni ungipaghli ellminunllu esghaamaniluku Jesus unguvallghan kingunganeng.”
23Enkaam ugpeqat nakmikegkagket maalghuk yugek: Matthias‑enkuk, Joseph Justus‑enkuk, allameng atelek Barsabbas‑meng. 24-25Taagken yughaqat, “Ataneq, simighistekaghqangyugaqukut Judas‑mun, qayughllak uniskanga qepghaqani nekaghqaminun aglalghii. Qamaglluku umyugaq liisimakan. Enkaam naliq nakmiksigu apostle‑nguluku qepghaghtekaghqaq elpenun?” 26Taagken maalghuk uyghagek samun kanaghllukek aghulasaqmegteggu aallgha aanqaghsalghiimi Matthias‑nguftuq nakmikegkaq. Enkaam ilatkaq qula ataasiq siipneqluku apostle‑enun.
© 2018, Wycliffe Bible Translators, Inc. All rights reserved.