मत्ति 5
5
येसुना मटा पोरोडा करहाना
(लूका ६:२०-२३)
1येसु इद भीळतुन हुळस मटा पोरो अन्जुन उदितुर असके ओनोर चेलालोरक ओना हेरे वातुरक। 2अनि येसु ओरकुन इदाम उपदेश हियाला लागतुर: 3येसु इतुर, “मन्दे गरिब मन्तोरक ओर लोकुरक धन्य मन्तोरक बाक्याकि स्वरग राज्य ओराय मन्ता#५:३ आपुना साटि दुसरोना मदत जरुर पहाजे इदाम विचार किन्तोरक लोकुरक धन्य मन्तोरक बाक्याकि स्वरग राज्य ओराय मन्ता।। 4दुःख किन्तोरक ओर लोकुरक धन्य मन्तोर बाक्याकि ओरकुन शान्ति पुटार#यश ६१:२। 5नम्र मन्तोरक ओर लोकुरक धन्य मन्तोर बाक्याकि ओरक दरतिता वारिस आयनुरक#यश ३७:११। 6आपुना मेन्दुल साटि करवस्ता अनि एर उन्डावसता लेहका परमेस्वरना मुने येताना योग्य बुतो कियान साटि पकाय विचार किन्तोर ओर लोकुरक धन्य मन्तोरक बाक्याकि ओरक संतुष्ट आयनुरक#यश ५५:१-२। 7दया केवाल लोकुरक धन्य मन्तोरक बाक्याकि ओरकुन परमेस्वर दया कियानुर। 8मन शुद्ध मन्ता ओर लोकुरक धन्य मन्तोरक बाक्याकि ओरक परमेस्वरतुन हुळानुरक#भज २४:३,४ । 9लोकुरकुन मेल मिलेह किस दरतितिगा शान्ति बनेकेवाल ओर लोकुरक धन्य मन्तोरक बाक्याकि ओरकुन परमेस्वरनोर बालक इन्दानुरक। 10परमेस्वरना मुने येताना योग्य बुतो कियानाता कारण पकाय तकलिप सहेन किन्तोरक ओरक धन्य मन्तोरक बाक्याकि स्वरग राज्य ओराय मन्ता#१ पत ३:१४। 11नावा पोल्लो मानेमान्तोर ओद कारणते मानेय मिकुन अपमान कियानुरक अनि पकाय तकलिप हियानुरक अनि मिया विरोदते सबोय प्रकारता खराब पोल्लोंग खोटाल इन्दानुरक असके निमाट धन्य मन्तोरिट#१ पत ४:१४। 12स्वरगतिगा मिया प्रतिफळ पकाय हजोर मन्ता इन्जोर पकाय गिरदा किम्ट। ओरक मिया मुने मतोर ओरक परमेस्वरना पोल्लो वेहवालोकुरकुन वने इदे रितिते पकाय तकलिप किस मतोर#२ इति ३६:१६; बुतोंग ७:५२ ।”
निमाट दुनियाता हवोर अनि वेळिचि मन्तोरिट
(मर ९:५०; लूका १४:३४-३५)
13येसु असा ओरकुन इतुर, “निमाट दरतिता हवोर आन्दिट, मति हवोरता स्वाद बिगळेमात ते अदेन असा बोद चिजते हवोरता स्वाद बनेकियाकिट? अदेन बाहरो हरचियानुर अनि मानेयक अदेन ओवकानुरक दुसरो बोदे बुतोता आय परो#मर ९:५०; लूका १४:३४-३५। 14निमाट दुनियाता वेळिचि आन्दिट। मटा पोरो उदिता मन्ता सहेर मकिला परो#युह ८:१२; ९:५। 15अनि लोकुरक टिवरि पयटे किसुन दळिया अडिय इरोर मति अदेन कोपेलातिगा इरान्तोरक। असके अदेनते लोतोर सबोय लोकुरकुन वेळिचि अवान्ता#मर ४:२१; लूका ८:१६; ११:३३। 16अदामे दुसरो लोकुरक मिया सोबाय बुतोतुन हुळसुन स्वरगतिगा मन्तोर मिया बाबोना महिमा केविर इन्जोर मिया वेळिचि मानेयकना मुने मान्जि#१ पत २:१२।”
मूसाना नियमता महत्व
17येसु असा ओरकुन इतुर, “नना मूसाना नियम या परमेस्वरना पोल्लो वेहवालोरा पोल्लोतुन नाश कियाला वातोना इन्जोर समजेमायमाट; नाश कियाला आयो मति अदेन पुरा कियान साटि वातोना। 18बाक्याकि आबार अनि दरति बदलेमायार अचोवनाह मूसाना नियमता उन्दि काना या मात्रा बसकेय बदलेमायो आयार इन्जोर नना मिकुन खरोय इन्तोना#लूका १६:१७। 19इन्जोर बोरायि इव हुडलाताल हुडला आग्यातिगाडाल बोदे उन्दितुन मानेमायोर अनि अदामे करहानुर ओर स्वरग राज्यतिगा सबोयताल हुडलोर इन्दानुर; मति बोरायि इव आग्याता पालन कियानुर अनि अदेन करहानुर, ओरे स्वरग राज्यतिगा हजोर इन्दानुर। 20परमेस्वरना मुने येताना योग्य मन्ता मिया बुतो मूसाना नियमतुन करिहवालोर अनि परीसिलोरा सोबाय बुतोताल वने सोबाय आयवि आयकिट ते निमाट स्वरग राज्यतिगा बसकेय हनविट आयकिट इन्जोर नना मिकुन इन्तोना।”
येसु होंग अनि हव्कानाता विरोद करहान्तोर
21येसु असा ओरकुन इतुर, “हव्कमाट अनि बोरायि बोने हव्कानुर ओर कोरटतिगा दन्डता योग्य आयनुर इन्जोर पुरकातोर लोकुरकुन इतोर निमाट केन्जतोरिट#निर २०:१३; व्यव ५:१७। 22मति नना ते मिकुन इन्तोना, बोरायि आपुना तमोन होंग कियानुर ते ओर दन्डता योग्य आयनुर, अनि बोरायि आपुना तमोना अपमान कियानुर ते ओर हजोर सभातिगा दन्डता योग्य आयनुर, अनि बोरायि आपुना तमोन मुर्ख इन्दानुर ते ओर नरकता किसता दन्डता योग्य आयनुर। 23इन्जोर निया दान वेदिता हेरे ततोन असके निया तमोना मन्दिगा निया विरोदते बोदे पोल्लो मन्ता इन्जोर निमा आलिहकि, 24ते आपुना दान अगाय वेदि मुने इरसिम अनि पहले हन्जुन आपुना तमोन मिलेमाम अनि पजा हन्जुन परमेस्वरना मुने दान सोपे किम। 25निमा आपुना दुश्मनासंग हरितिगा मन्तोन असके सान्डेय ओन गोतियाल बनेहकिम आयो ते ओर निकुन न्याय केवालिन सोपे कियानुर अनि न्याय केवाल निकुन सिपायि लोकुरकुन सोपे केविर, अनि ओर निकुन जेहलदिगा वाटसियानुर। 26निमा जुरनामा पुरा-पुरा निहवि आयकि अचोनवनाह अगडाल बाहरो पसियवि आयकि इन्जोर नना निकुन खरोय इन्तोना।”
व्यभिचार केमाट
27येसु असा ओरकुन इतुर, “व्यभिचार केमाट इदाम इन्ज मतोर निमाट केन्जतोरिट#निर २०:१४; व्यव ५:१८ । 28मति नना ते मिकुन इन्तोना, बोरायि वासनाता इच्चाते आळदुन हुळान्तोर ओर सबोय लोकुरक आपुना मन्दिगा अदेनसंग व्यभिचार कितोर। 29निया तिन्दानबासाडा कोन्डा निकुन पाप कियाना कारण आयि ते अदेन टन्डस हरचिम; बाक्याकि निया सबोय मेन्दुल नरकतिगा हरचियानाताल निया मेन्दुलतिगाडाल उन्दि मेन्दुल नाश आयाना मिया साटि सोबाय मन्ता#मत्ति १८:९; मर ९:४७। 30निया तिन्दान कय निकुन पाप कियाना कारण आयि ते अदेन कदियस हरचिम, बाक्याकि निया सबोय मेन्दुल नरकतिगा हरचियानाताल निया मेन्दुलतिगाडाल उन्दि मेन्दुल नाश आयि ओद निया साटि सोबाय मन्ता#मत्ति १८:८; मर ९:४३।”
सोळ चिटिता बारेते
(मत्ति १९:९; मर १०:११-१२; लूका १६:१८)
31येसु असा ओरकुन इतुर, “बोने आपुना मुत्तेन तलाक हियाना इच्चा मन्ता, ते अदेन सोळ चिटि हेविर इन्जोर इन्ज मतोर#व्यव २४:१-४; मत्ति १९:७; मर १०:४। 32मति नना ते मिकुन इन्तोना बोरायि आपुना मुत्तेन व्यभिचारता सिवायि दुसरो बोदायि कारणते तलाक हिन्तोर ते ओर अदेन व्यभिचार किहिन्तोर, अनि बोरायि तलाक हितानसंग मरमिंग किन्तोर ते ओर व्यभिचार किन्तोर#मत्ति १९:९; मत्ति १०:११-१२; लूका १६:१८; १ कुरि ७:१०-११।”
खोटाल शपथ कियानाता विरोद उपदेश
33येसु असा ओरकुन इतुर, “ ‘खोटाल शपथ केमाट मति आपुना शपथुन प्रबुन साटि पुरा किम्ट#लेव्य १९:१२; गिन ३०:२; व्यव २३:२१’ इन्जोर पुरकातोर लोकुरकुन इन्ज मतोर निमाट केन्जतोरिट। 34मति नना ते इन्तोना बसकेय शपथ केमाट: स्वरगता पोरोयते शपथ केमाट बाक्याकि ओद परमेस्वरना सिंहासन आन्दु#याकु ५:१२; यश ६६:१; मत्ति २३:२२, 35दरतिता पोरोयते शपथ केमाट, बाक्याकि ओद ओना काल्कना जागा आन्दु, येरुसलेमता पोरोयते शपथ केमाट, बाक्याकि ओद हजोर राजाना सहेर आन्दु#यश ६६:१; भज ४८:२। 36आपुना तलाता पोरोयते शपथ तिनमा बाक्याकि निमा उन्दि वने कलकुन पान्डरि अनि कारयाल कियाला परवि। 37मति मियांग पोल्लो इंगो ते इंगो या आयो ते आयो मनिंग बाक्याकि बारायि इदेनते पकाय आन्ता ओद खराब केवाल सयतानताल वान्ता।”
खराबतुन खरोयते जिकाना
(लूका ६:२९-३०)
38येसु असा ओरकुन इतुर, “ ‘कोन्डाता बदला कोन्डा, अनि पलदा बदला पल#निर २१:२४; लेव्य २४:२०; व्यव १९:२१’ इन्जोर निमाट केन्जतोरिट। 39मति नना ते मिकुन इन्तोना खराब मानेयना विरोद केमाट; बोरायि निया तिन्दानबासाडा कोरवितिगा हेविर ते ओना मुने दुसरो कोरवि वने किम। 40नियागा केस किस बोरायि निया मनिला येताना इच्चा केविर ते ओन निया दुपटा वने हिसिम। 41बोरायि निकुन उन्दि कोसमेन्ड ताकिहिर ते ओनासंग रन्ड कोसक हन। 42बोरायि नियाकेडाल तलकिर ते ओन हिम अनि बोर नियाकेडाल उदार येताना इच्चा किन्तोर ओन आयो इन्मा।”
दुश्मनसंग मया किम
(लूका ६:२७-२८; ६:३२-३६)
43येसु असा ओरकुन इतुर, “ ‘निमा आपुना हेरेटोरकुन मया इरा, अनि आपुना दुश्मनसंग दुश्मनि#लेव्य १९:१८ ’ इन्जोर निमाट केन्जतोरिट। 44मति नना ते मिकुन इन्तोना, आपुनोर दुश्मनतुन मया किम्ट अनि आपुनतुन सतेह केवालोर साटि प्रार्थना किम्ट। 45अदेनते निमाट आपुनोर स्वरगतोर बाबोना बालक ठहरे मायकिट, बाक्याकि ओर दुष्ट अनि खरोय इवुरास पोरो पोळदता वेळिचि मान्जाहन्तोर। परमेस्वरना नियमतुन मानेमातोरक अनि परमेस्वरना नियमतुन मानेमायोर इदाम सबोय लोकुरा पोरो पिर अरहान्तोर। 46निया मया केवालिन निमा वने मया कियाकि ते निकुन बाताल प्रतिफळ पुटार? टाक्स येतवाल वने इदामे केवोर बहे?”
47येसु असा इतुर, “निमाट केवल आपुनोर तमोने नमस्कार कियाकिट ते निमाट बोद हजोर बुतो किन्तोरिट? यहुदि आयोर लोकुरक वने बाताल इदाम केविट बहे? 48इन्जोर मिवोर स्वरगतोर बाबो परिपूर्ण मन्तोर अदाम लेहका निमाट वने सबोय रितिते परिपूर्ण बनेमाम्ट#लेव्य १९:२; व्यव १८:१३।”
© (Active) Wycliffe Bible Translators, Inc. All rights reserved.