Лукастар 8
8
Ромня джян пало Ісус
1Пало ода Ісус преджялас пало фоврос те пало ґава, і вакєрелас Радишаґоскєро Гійрос пало Краліпе ле Девлескєро. Лега пгіренас дешудуй апостоли, 2а минґ варесаве ромня, саве есас сасарде ле налаче духендар і насвалібнендар: е Марія, саві есас про нав Магдаліна, андал саві авля аврі ефта дємони, 3те Іоанна, ромні Хузаскєрі, саво додикгєлас пало Іродоскєро кгєр, Сусанна і авер бутджяне, саве совґалінелас ленґє пескєра хулаїпнага.
Ісус вакєрел пало мануш, саво шіїнелас
4Андал сако фоврос ко Ісус авенас мануша. Кана кє Лесте іскіндепес бут мануша, Ов розвакєрдя ленґє єкг вакєрібе:
5— Авля аврі мануш те шіїнен дів. Кана ов шіїнелас, єкг попейля пажо дром і есас тапошіме, і чірікле нєбоскєре хале саворо опре. 6Авер попейля про баруно пгув, а кана авля аврі, шутіля, важ ода кай хібінелас лакє ціндіпе. 7Тріто попейля машкар кгандре, а кана кгандре баріле опре, на дине, гой дів те барол. 8Минґ авер попейля пре лачі пгув, а, кана баріля аврі, андя плодос про шелвар бутер.
Сар када пгендя, Ов додиня:
— Кас гін кгана те шунен, мі шунел!
9Сікаде пгучле ле Ісусостар:
— Со шай обозначінел када вакєрібе?
10Ов пгендя:
— Туменґє дино те джянен ґарувіпе пало Краліпе ле Девлескєро, а авренґє вакєрелпес андро вакєрібе, гой
«сар дикгєна, те на дикгєн,
і сар шунена, те на ахальон».
11Шунен, со обозначінел када вакєрібе: дів гіно Девлескєро лав. 12Ода, со пейля пажо дром, — гіне одала, саве шунен о лав; а паліш авел о бинґ і човрел о лав андал ленґєро їло, гой оне те на патян і те на авен ратиме. 13Дів, саво пейля про бара, — ода одала, саве шунен і ле радишаґога прелен о лав, та нане лен кореньос. Варесаві овра оне патян, а кана пробаліненпес аврі, акор отперен. 14Дів, саво пейля андро кгандре, — ода одала, саве шунде о лав, та сакодівесескєре заботи, барваліпе і тєлоскєрі жадоба тасавен о лав, і важ ода ленґєро плодос на добарол. 15А дів, саво пейля андре лачі пгув, — ода одала, саве шунен о лав, лікєрен лес андро жувжо лачо їло, і тийріпнага оне анен плодос.
На ґарувен тумаро шветлос
16Ніко залабарді лампа на тговел толо дийньос вай толо тган, а тговел ла опре, гой одала, саве авена андре, те дикгєн о шветлос. 17Бо нане ніч ґарудо, гой паліш те на увлялас пгутердо аврі, а ода, со запганло, гой те на доджянляласпес і на авлялас аврі, бо те авка ейла пгутердо аврі. 18Меркінен, сар тумен шунен; кас е гін, одалескє доделапес, а кас нане, одалестар одлелапес минґ те ода, со ов думінел, гой кє лесте гін.
Ко гіно чачуно файтос ле Ісусоскє
19Авля ко Ісус Лескєрі дай те лескєре пграла, і на бійріненас те подджян кє Лесте, важ ода кай паж Лесте есас бут мануша. 20Мануша дине Лескє те джянен:
— Овкєс Тийрі дай те о пграла тердьон аврі і камен Тут те дикгєн.
21Акор Ов ленґє отпгендя:
— Мійрі дай те Мійре пграла — ода одала, саве шунен і долікєрен Девлескєро лав.
Ісус ціхісарел е барвал
22Андре єкг дівес Ов заґейля Пескєре сікаденца андре шіфа і пгендя ленґє:
— Преландювага пре дуйто сийра панєскє.
Оне кєздинде те преландьон. 23Адик оне ландьонас, Ісус засувтя. Акор про пані ваздняпес іґєн барі барвал, і пані кєздиндя те зачорен ленґєрі шіфа, авка со оне ачіле андре барі біда. 24Сікаде подґейле, уштаде ле Ісус і пгенде Лескє:
— Танітов, Танітов! Мерас!
Ов ушіля опре і диня аврі ле барвалякє те ле панєскє те преачен. Оне преачіле, і ачіля ціхонес.
25Ісус пгендя ленґє:
— Кай тумаро патябен?
Оне ле дарага чудаліндепес і вакєренас єкг аврескє:
— Та ко Ов гіно Айсо, со ле панєскє те ле барвалякє дел аврі, а оне шунен Лес?
Ісус традел аврі нажувже духен андал о мануш
26Ісус те Лескєре сікаде преланділе кє пгув Герасінсько, кай гіні некі Галілєякє. 27Кана Ісус авля про брегос, некі Лескє авля єкг мануш андало ода фоврос, саво есас бут берша мучіме дємоненца. Ов іма чірла на гординелас голмі і джівелас на андро кгєр, а андро гробніці. 28Кана ов дикгля ле Ісус, пейля анґлал Лесте і зорале ганґога завріскіндя:
— Со Тукє кампел мандар, Ісус, о Ча ле Девлескєро Майопрунескєрес? Манґав Тут, на мучін ман!
29Важ ода Ісус диня аврі нажувже духоскє, мі джял аврі андал ода мануш. Дємон буталік мучінелас лес. Одалескє манушескє іспганденас ле ланценца о васта те о піндре, і меркіненас пре лесте. Та ов чінґєрелас о ланці, і дємон традкєрелас лес пало біманушенґєре тгана. 30Ісус лестар пгучля:
— Сар тукє нав?
Ов Лескє пгендя:
— Лєґіон!
Важ ода кай бут дємони заґейле андре лесте.
31Оне кєздинде Лес те манґєн, гой Ов те на традел лен андре бездна. 32Надур про брегос пасіненаспес бут баліча. Дємони манґєнас ле Ісус, гой Ов те домукєл ленґє те заджян андро баліча. Ов домукля ленґє. 33Акор дємони авле аврі ле манушестар і заґейле ко баліча. Акор одала бале чідепес тейле пало баро брегос андро пані і ташліле. 34Сар дикгле пастера, со обачіляпес, денашле і розвакєрде саворо андро фоврос те пало ґава. 35Авле о мануша, гой те дикгєн, со одя обачіляпес. Оне подавле ко Ісус і аракгле ле манушес, андал саво авле аврі о дємони, саво бешелас ле Ісусоскє пажо піндре, урадо і сасардя ґовдяга, і лен обхундя дар. 36А одала, саве дикгле ода, со пес обачіля, розвакєрде ленґє, сар есас сасардо захундо дємонога. 37Саворо нийпос герасінсько манґєлас ле Ісус, гой Ов мі джял гет лендар, важ ода кай барі дар авля пре ленде. Акор Ов бешля андре шіфа і вісаліля пале. 38Мануш, андал саво ґейле аврі дємони, манґєлас ле Ісус, гой мі лел лес Пега. Та Ісус одмукля лес і пгендя:
39— Вісар тут пале ко тийро кгєр і розвакєр, со кєрдя прекал туте о Дейл.
Ов ґейля і вакєрелас пал цейло фоврос, со кєрдя лескє Ісус.
Ісус джівдісарел ле Іаіроскєра чайора і сасарел ле ромня
40Кана Ісус вісаліля кє Галілєя, о нийпос палікєренас Лескє, бо саворе ужаренас пре Лесте. 41Акор авля єкг мануш про нав Іаір. Ов есас єкг баредер пре сінаґоґа. Ов пейля про коча анґлал Ісус і манґєлас Лес те заджян кє лесте андро кгєр. 42Кє лесте есас чак єкг оди чайорі, варекай дешудуй бершескєрі, і ой мерелас. Ісус джялас одя, і нийпос кікіделас Лес.
43Оде есас єкг ромні, кє саві іма дешудуй берш чулялас рат. Ой розкєрдя про доктора саворо, со ла есас, та те авка ніко на бійрінелас ла те сасарен. 44Ой подґейля ко Ісус палал і хундяпес ко аґор Лескєре голмендар, і єкгваресте рат преачіля латар те чулян.
45Ісус пгендя:
— Ко дохундяпес кє Манде?
Кана ніко на прінджяреласпес, Петро пгендя:
— Танітов! О нийпос обтерділе і кікіден Тут саворе сийрендар.
46Ісус пгендя:
— Вареко хундяпес кє Манде, бо Ме шундьом, сар зор авля Мандар аврі.
47Кана ромні дикгля, со ой на бійрінелпес те ґарувен, акор бара дарага подґейля, пейля анґлал Ісус і розвакєрдя Лескє анґлал саворо нийпос, соске дохундяпес кє Лесте і сар єкгваресте есас сасарді. 48Акор Ов лакє пгендя:
— Чайоріє, патябе тийро ратиндя тут! Джя ле мірога.
49Кана Ісус минґ вакєрелас, авля о мануш андало кгєр, саво есас єкг пгуредер пре сінаґоґа, і пгендя лескє:
— Чайорі тийрі мувля. Бутер на чалав ле Танітов.
50Кана Ісус шундя, акор пгендя Іаіроскє:
— На дара, чак патя, і ой сасарелапес аврі.
51Кана авля андро кгєр, на домукля нікас те заджян Пега. А Лега есас чак о Петро, Яков, те Іоанн і ле чайоракєро дад те е дай. 52Саворе іґєн ровенас, і барі жаля пал лате есас. Та Ісус пгендя:
— На ровен! Ой на мувля, а совел.
53Акор саворе кєздинде те асанпес Лестар, бо оне джяненас, со ой мувля. 54А Ов іля ла пало васт те пгендя лакє:
— Чайоріє, уші!
55І вісаліля лакєро духос андре лате, і ой єкгваресте ушіля. Ісус пгендя, гой мі ден лакє те хан. 56Радишаґостар о дад те е дай на джяненас, со те пгенен. Та Ісус диня аврі ленґє, гой нікаскє те на вакєрен пало ода, со пес обачіля.
© 2021 Pioneer Bible Translators