Ruth 3
3
Nakata
Ruth Malikhuni Israelmiun pitkuhinginik uikhakhiuktuk
1Kinguagun Naomium Ruth ukallautiyaa, “Uikhamik piplutin ihumayukhaugaluaktunga munagiyauhimakuplutin. 2Puiguktailiyyavan Boas, taffuma kivgain angnauyun havakatigikpagatin ilaa ilaguhegimaatigut. Unukpan mukpauyakhainik havangniaktuk. 3Takki uakpaglutin tipigiktumik atuglutin ilingnik annugaglutintauk pinektumik. Takki upaglugu Boas havagvianun #3:3 Mukpauyakhait nauthimayun kipiyaukpata havaktit kektukpagain mukpauyakhainat amiekuplugit. takupkaktailutilli ilingnik taffumunga negiguektinnagu. 4Hiniviginiaktaalu tautuglugu aahiin hinaakhilgaktillugu nallagin itigaita haniani ulikhimalutinlu. #3:4 Uvani Judeamiut pitkuhikakpaktun imaitumik, inuk nuliakhimayuk tukutpan nutagakangitillugu nulianga pitkuyauyuk uinikikuplugu uigiyagaluata nukaanik nutaganikuplugulu tukungayuk piyyutigilugu. Huliyakhangniglu ukagviginiaktaatin.”
5Ruth ukaktuk, “Ukaktangnik tamainik piniaktunga.”
6Talva Ruth havagvingmungaktuk hakiami ukaktainik malikhuni. 7Boaslu akeatugami kuviatakpiaktuk, mukpauyakhait katihimayun haangani hinigahualekhuni. Hinilektillugu Ruthium nipliyuitumik upaktaa nallapluni itigaita haniani. 8Unuk kitkani Boas tupaktitaugami makituk kuglukhuni takugamiuk angnak hiniktillugu itigami haniani. 9Ukaktuglu, “Kinauvin?” kiuyaa angnam, “Ruthiuyunga, ilaa ilaguhegigangma kanikiyamik munagiyakhagiyangma ihumaliuyyavutillu nulianikuplutin uvamnik.”
10Boas ukangmiyuk, “Atangum naamaktitpaglutin taimaitumik ukautigangma nakuutkiyauyutin tayya taffumanga hakian munagivagaluaktillugu, uikhakhiuniagunakhigavinli angunmik allamik kinamiglunin. 11Ihumaaluktailutin Ruth, Bethlehemiun tamarmik nakuunahugimaatin piyumayangnik pinialektunga. 12Itkumayuk ilaguhegigapkin munagiyakhagiyagin, angun hamanimiutagli kanikiyauyugaluak ilingnun uvamnin. 13Uvamnitlait tayya uplaakunlu tamna inuk ukaktaga ilaguhium piyakhaanik malingniakpan naamaktuk, taimaliungitpatli uvanga himaukhiniagiga. Takki nallagin aitailutin taakpiaktillugu.”
14Talva itigaita haniani nallangmiyuk makituni kaulgaktinnagu taffuminga Boas pitkuingman inuit ilihimakunagit angnak havagvigmungangman. 15Boasim pitkuyaa Ruth, “Kalikut kaityuk hamna ililugu.” Taimaliungman tatakpiaktaa mukpauyakhainik 50 paundnik nangmiutiplugu angilgaktuk angnak. 16Aahiin aigami hakiami apegimani, “Kanuitpakpin?” uniutiyaa tamainik angutim ikayukpangmagu, 17ukakhuni, “Tuniyanga ukuninga mukpauyakhainik tunihiviuhimaitumik utekunanga ilingnun.”
18Naomi kiuyuk, “Utakingnaglutin Ruth ilihimangniagavin piniaktukhauyumik Boas malingnialengman ihumagiyaminik.”
