Maliko 8
8
UYesu akulisya avantu 4,000
1-10: Mat. 15,32-39.
1Mumanda gugo, lwe havili vavunginʼavantʼavinjʼimpuga, lwe naṿimʼiṿwa kulya, pʼuYesu ahavitʼavasundikwa vakwe, ahavavuzya ahati: 2Mbapepelezizyʼinʼavantu ulupepelezyo lwe nkwenyʼimpugʼino, she valinzitʼamanda gatatu panapʼipa nakulya naṿimo. 3Inga nkuti vavale kumwavo kusitʼukuvalela naṿimo, pe vangagwʼulusyo mwidala. She vamo vafumilʼukutali. 4Avenʼavasundikwa vakwe vahamula vahati: Mwe tugaje kwi mulwugwʼumʼamakati aga kuvalela vonti vanava? 5Uwenʼahavavuzilizya ahati: Muli nago galingʼamakati? Vahati: Gasano nagavili. 6Ahavavuzyʼavantʼimpuga yonti ahati: Simutendame pansi. Pʼahasendʼamakati ge gasano nagavili gugo, ahasalifwa, ahagamensulanya, ahavaninchilizyʼavasundi-kwa vakwe, ahati: Muvatelamishilʼavantu. Pe vahavatelamishilʼimpuga yonti. 7Twope nutuswi vali natwo tumo. Twope ahatulota, ahati: Twope muvatelamishile. 8Pe vahalya, vahikuta. Pe vahavunganihʼutwalila twe twasyaye iṿitundu ṿisano naṿivili. 9Avene ve valiye vali 4,000. Pʼahavavwezya. 10Naluvilo uwenʼahayipashila mwivoti navasundikwa vakwe, ahalambʼukuvala munsi ya Dalimanuta.
Akupilila uvwantonko vwa vasundikwa
11-21: Mat. 16,1-12.
11PʼavaFalisayi vahavala pupo pʼali, vahandʼukudalinkana nawo, vahamulinga, vahati: Utupelele shimʼishimanyilo sha kumwanya. 12Uwenʼahalwilwinta muhati yakwe, ahati: Avantu va shinishʼiva vakwanza shashʼishimanyilo? Nalyoli, nkuvavuzyʼine nkuti: Avantu va shinishʼiva vatalishaga nashimʼishimanyilo. 13Pʼahavaleha pupo, ahayipashila mwivoti, ahalambʼukuvalʼisyila lila.
14Avenʼavasundikwa vakwe vahaluṿwʼukupayʼimpayo, vali numukati woka vwelele mwivoti. 15Uwenʼahavavuzya ahati: Simwenye nkani, musheve iṿiluzizyo ṿwa vaFalisayi niṿwa Helodi. 16Avene vahasiva vahavuzilizanya she vatali namakati. 17UwenʼuYesu lwʼavawenyi pʼahati: Zye mukusiva zyashi havili zye mutali namakati? Mushili ukumanyinsanya, mushili nashinishi ukuzyaganya? Amoyo ginyu gashili nashinishi gagomile? 18She muli nagʼaminso mutakwenya? She muli nagʼamakutwi mutakwiṿwa? Nukukumbuha mutakukumbuha ukuti: 19Pala pe nkavagavanyʼamakati gasano avantu ve vali 5,000, pe muhizuzyʼiṿiseje ṿilinga utwalila twe muvunganisile? Avene vahati: Ishumi naṿivili. 20Havili pala pe nkavagavanyʼamakati gasano nagavili avantu ve vali 4,000, pe muhizuzyʼi-ṿitundu ṿilinga utwalila twe mwavunganisile? Avene vahati: Visano naṿivili. 21Uwenʼahavavuzya ahati: Ilelo pe mushili mutakuzimanyinsanya vuli?
Akupozya uvwantonko vwa Betisayida
22Ilelo pe vahafiha mu-Betisayida. Pe vahamuleta kukwakwe uwantonko, vahamulambilizya ukuti amupalamansye. 23Pʼuwenʼahamulemʼumuhono uwantonko, ahamutetesya, ahafuma nawo muhaya, ahamuswilʼamati muminso, ahamuviha ninyove, ahamuvuzilizya ahati: Vuli, ishi Ukwenya shonu? 24Uwenʼahinuhʼahati: Nkwenyʼavantu, lwe vakujenda pe vali fwe ngati makwi. 25Pʼahonjezyʼukumuvihʼinyove paminso. Ilelo pʼahatontomelʼukwenya, ahazuzuvuha, ahalola twonti ahinza. 26PʼuYesu ahati: Valaga kumwinyu, kwe ndali ukugalushila munkayʼumu.
UPeteli akwitihʼukuti UYesu wu Chilisiti
27-9,1: Mat. 16,13-28. Luk. 9,18-27.
27PʼuYesu ahavala navasundikwa vakwe munkaya zyonti zya munsi ya Kesaleya-Filipi. Ilelo mwidala pʼahavavuzilizyʼavasundikwa vakwe ahati: Avantu lwe vakunjangʼine pe vakuti ne nanu? 28Avene vahamuvuzya vahati: Vamo vakuti we Yohani umwozyi, vamo vakuti we Eliya, vamo vakuti we mukuvwi wa vwelele. 29Pʼuwenʼahavavuzilizya ahati: Imwe lelo, imwe mukuti ne nanu? PʼahamulʼuPeteli ahati: We Chilisiti wenewe.
UYesu akukuvwa izya kufwa nukuzyuha kwakwe
30Pʼuwenʼahavapilila ahati: Zye mutamuvuzyaje numʼumuntu. 31Pʼahanda pupo ahavalanganizya ahati: UMwanamuntu akuvalʼakuyimṿilwa nkani. Navasongo navashiputʼavapiti navamanyakalata valimusamula, valimugoga, nkandi pisiku lya vutatu alizyuha. 32Ahayangʼapazelʼizwi linili. PʼuPeteli ahaseguha nawo, ahamupilila. 33Uwenʼahashevelʼavasundikwa vakwe, ahavenya, ahamupililʼuPeteli ahati: Galuha mwisinda, we Setano iwe, shʼutakusiva zye zya kwa Mulungu ndali, ukusiva zye zya vantu.
Ulwito lwa kuyihana weka
34Pʼahavavunganihʼavantʼimpuga yonti navasundikwa vakwe, ahavavuzya ahati: Umuntʼingʼakwanza ukundandatʼine mwisinda, wʼahayihanaje weka, nishihovenkanyo shakwe ayivegazye, pʼahandandatʼine. 35Shʼuno wʼakwanzʼukupulumusyʼuvulanzi vwakwe, wʼakuvutezya. Nkandʼuno wʼakuvutezyʼuvulanzi vwakwe pazyane napazyʼIvangeli, wʼakuvupulumusya. 36Nashengʼumuntu alonsile yontʼinsi, pe yamuvosya shonu, ingʼatezizye mumwʼuvulanzi vwakwe? 37Niṿwa kuvuhombola uvulanzi vwakwe angaṿwaga kwi? 38Uno wengʼakuva ninsoni kukwane nakumazwi gane muvantu va shinishʼiva, ve vakuvembuha nukutalʼamalandu, we wope nuMwanamuntu aliva ninsoni lwʼaliyinza muvumwamu vwa Yise navahavizyʼavafinjile.
Nyiha New Testament © British and Foreign Bible Society, 1965.