Maliko 16
16
Ukuzyuha kwa Yesu
1-8: Mat. 28,1-8. Luk. 24,1-12. Yoh. 20,1-10.
1Ilelo lwe lyasilʼisabati, pʼavaMaliya wa mu-Magadala nuMaliya unyina wa Yakobu, nuSalome vahavalʼukukalʼumulembo, vahati tuvalʼukumupaha. 2Vahalinga pisikʼitanzi lya pamulungu vahalavila lwe likwanda likutukulʼizuva. 3Vahavuzilizanya vahati: Unanu akutufupusizyʼivwe pashilyango sha mbipa? 4Ilelo lwe vakuti twenye, pe vahagʼivwe lifupushe; she lyali lipiti nkani. 5Pe vahinjila mumbipa, vahagʼumulumendo atendime kumuhonʼumulilo, azwayʼinkanzu intali inzelu. Pe vahaganduha. 6Uwenʼahati: Kwe ndali ukutetema. MukumwanzʼuYesu wa mu-Nazaleti, wʼahomelilwe pashihovenkanyo. Shʼazyusile, atalipʼumu. Yenyi, pe vamulambalisilʼipa. 7Simuvale lelo, muvavuzye navasundikwa vakwe nuPeteli, mutinji: Akulongolela ukuvala mu-Galilayi. Kwe mulimwenya inza shʼavavuzizye nzila. 8Pe vahafuma mumbipa, vahashimbila, she vahatetemaga ishitetemwi nulusukumilo lwavagwiliye nkani.
9. 10: Yoh. 20,11-18.
9UwenʼuYesu lwʼazyusile pisikʼitanzi lya pamulungu shanzanche, pʼahatalihʼukumwitushizyʼuMaliya wa mu-Magadala, Uno we mumwakwe afumizyʼimpepʼimbivi zisano nazivili. 10PʼuwenʼuMaliya ahavala ahavavuzya ve vali nawo shima, she vaswimililwe, vahakutʼamansozi. 11Ilelo lwe viṿuye ukuti: Mulanzi, amuwenyi, pe zihasita nukuvaholʼavene.
12. 13: Luk. 24,13-35.
12Pisinda ahaga vakujendʼidala vavili vakuvala mumagunda, Pe vope ahavitushizya. Ahava fwe wunji lwʼakuvitushizya. 13Pe vahavala vope ukuvavuzyʼavamwavo. Zyope nizya vanava zihasita nukuvaholʼavene.
14-18: Luk. 24,36-49. Yoh. 20,19-23.
14Pisinda havili vazile vatendimʼukulyʼavishumi nawoka, pʼahavitushizya, ahavapilila namaganigani gavo nuvugomu vwa moyo gavo, she zitavahozilʼavene zye vavavuzizye vuvo ve vamuwenyi ukuti azyusile.
15: Mat. 28,18-20.
15Ahavavuzya ahati: Muvale munsi yonti, muhavakumusizye vontʼavapelelwa Ivangeli. 16Uno wengʼali nulwitiho akuti nukwozelwa, wʼalipona, nkandʼuno wengʼatali nulwitiho, wʼalilongwa ilya kumutupula. 17Agene nyenʼamamfindango ge gakuvalandata vuvo venga vitisile ge gugo: Impepʼimbivi valizifumwa mwizina lyanʼine, valiyanga nimilʼimpwa, 18ninjoha valizilema, nashenga vangʼweleye ṿimʼiṿwa kuvagoga ṿitalivapota. Avayeyevazu valivavihʼinyove, ilelo pe valizuzuvuha.
19: Luk. 24,50-53.
19IlelʼuMwene uYesu lwʼayanzile navo, pʼahanyatulwa kumwanya, kwʼatendime kumuhonʼumulilo wa Mulungu. 20Pʼavene vahafuma pupo, vahavalʼukukumusya mwonti mwontʼinongwa; uMwene ahava pambombo yavo, izwi ahalipʼamaha, gʼahalipelela mumamfindango ge gavalandite.
Nyiha New Testament © British and Foreign Bible Society, 1965.