Luka 2
2
Ukupapwa kwa Yesu
1Ilelo pe pamwaha wuyo pʼuKesali wʼali wʼuAvugusiti izina, ahahomelezya uluhomelezyo ulwa kuti vavazilwajʼavantu munsi yakwe yonti vasimbwaje pakalata. 2Ukuvazilwa ukutanzʼuku vahavazilwa pala pʼuKileni ahava musungansi wa mu-Sili. 3Pe vahavala vonti ukusimbwa uno kunkaya yakwe, uno kunkaya yakwe. 4Pe wope nu Yosefu ahafuma munsi ya mu-Galilayi munkaya ya mu-Nazaleti, ahavala munsi ya mu-Yudayi, munkaya ya Davidi ye vakuti mu-Betelehemu izina, shʼafumile munyumba namuluho lwa Davidi; 5ukuti asimbwaje poka nuMaliya umuzinjilwa wakwe, wʼamwamile. 6Ilelo lwe vali pupo, pe lihinzʼisiku lya kupapʼumwana. 7Pʼahapapʼumwana uhatote umwanaṿuli. Ahamugwinchila namenda, ahamuviha mwisuva mwʼingʼombe zikulila, she patali napamʼapa kumuviha mwivanza.
8Ilelo valipo vope navadimangʼonzi munsi yiyo. Ve vadiliye mwilisyo, vahasungʼamadimo gavo pavusiku. 9Ve vahitushilʼuhavizya wa Mwene avimiliye, vahaga nuvumwamu vwa Mwene vukuvahozezya mwonti namwonti. Pe vahatetemʼishitetemwʼishipiti. 10Uwenʼuhavizya ahayanga navo ahati: Mutatetemaje, she mbaleteyʼinongwʼinyinza iya kuseshela nkanʼavantu vonti. 11Shʼapafilwʼumusanyʼuno uMuposhi winyu, uChilisiti uMwene, munkaya ya Davidi. 12Ishi she shimanyilo kulʼimwe: Muliyagʼumwana agwinchililwe namenda, alambalaye mwisuva mwʼingʼombe zikulila. 13Pe vahitushilʼapashezi, zili nawʼuhavizya impuga zya kumwanya inyinji, zye zikumutimʼuMulungu zikuti:
14Ulushindiho luvanje kwa Mulungu kumwanya,
nuvwihalo vuvanje munsi kuvantu vʼakuvashyela wuyo.
15Pe lelʼavahavizya lwe vazuva kumwanya, pʼavadimangʼonzi vahavuzanya vahati: Shushi tuvale lelo ku-Betelehemu, twenyʼinongwa zye zilolesile, zyʼatuvuzizyʼuMwene. 16Pe vahajendelezya luvilo luvilo ukuvala, vahaga nuMaliya nu-Yosefu numwana shʼalambalaye mwisuva mwʼingʼombe zikulila. 17Ilelo lwe vamuwenyi, pe vahajenda nukulikumusya mwontʼizwi lye viṿuye ilya pamwanʼuno. 18Pe vonti ve viṿuye vahasukumilʼamazwi ge vavavuzizyʼavadimangʼonzi. 19UwenʼuMaliya nyene wʼahaviha gontʼamazwʼiga, ahagasiva mumwoyo wakwe. 20Pe vahavalʼavadimangʼonzi vahamutinihʼuMulungu, vahamutima pali zyonti nazye vawenyi nazye viṿuye zizyo zye vavuzilwe.
21Ilelo lwe gashilinkinʼamanda umunana, lwe lyinzilʼilya kumuvola uvuvolwa, pe vahamupʼizina lya Yesu, lyʼalitasilʼuhavizya lwʼashilʼukuva muhati mwa nyina.
Ukumulolesyʼu Yesu mwa tempeli
22Ilelo lwe gasilʼamanda gavo ge galʼumwiho, gʼahomelezizyʼuMose, pe vahavala nawo mu-Yelusalemu umwana vahamulolesya kwa Mulungu, 23inza she lilyo lisimṿilwe munkomelezyo zya Mwene lye likuti: Twontʼutwanʼutwanaṿuli tutwo twe vakutotehʼavanyina, twe tutashilwaje mfinjile kwa Mulungu, 24ukuti valetaje niṿwa kufinjila inza she lilyo lyope lisimṿilwe munkomelezyo zya Mwene lye likuti: Nga ngugu zivili, ngʼimbondo zivili.
USimeyoni nulwimbo lwakwe lwe lukuti: “Ukumbwezya nulusankano”
25Ilelo mu-Yelusalemu mumwo mwʼali wokʼumuntu wʼali wʼuSimeyoni izina; umuntʼuno alʼumugolosu ahamunyilagʼuMulungu; shima ahagulilila ulusuvizyo lwa Yisilayili, wope nuMupepʼuMufinjile ahava papakwe. 26UMupepʼuMufinjile amuṿumbuliye atili: Utalilolʼukufwʼiwe lwe suti utamuwenyʼuChilisiti wa Mwene. 27Wʼahavala mwa tempeli lwʼamusogozizyʼuMupepʼuMufinjile. Ilelʼavapafi va Yesu lwe vakwinjila nawʼumwana lwe vakuti tulandate nawʼumwiho wa munkomelezyo, 28pʼuwenʼahamusenda munyove, ahatinihʼuMulungu ahati:
29Shinishi we Muhataṿwonti ne muntu waho
ukumbwezya nulusankano, inza she lilyo wayanzile.
30Shʼaminso gane gavuwenyʼuvuposhi vwaho,
31vwʼuvuyaninye lwe vakwenyʼavantʼinkolo zyonti;
32Uluhozyo lwa kuṿumbula kuvakunzi,
ulutiniho lwa kulutinihʼuluho lwaho lwa Yisilayili.
33Nuyise nunyina vahasukumilʼamazwʼiga gʼahayanga kukwakwe. 34PʼuSimeyoni ahavalota ahamuvuzyʼuMaliya unyina ahati: Yenya, wununo we wa kuvagwisya nukuvimiha ve vinji mwa Yisilayili umu, we wa kuvʼumumfindango wa kudalinkanila,— 35iwe nyene ishipanga shilikulasa mwe muvulanzi shili fumizanya—ukuti insivo zya vinji zilolehajʼapazelu.
UHana
36Ali mumwo numukuvwi umwantanda, izina lyakwe ali uHana, umwana wa Fanweli, uwa luho lwa Aseli. Wʼagosifile nkanʼuvugosi. Pamulume wakwe pʼadiliyʼamaha gasano nagavili, lwafumile kuvulindu. 37Ilelʼumuzishe wununo wʼamazilʼamahʼamashumi umunana nagane, ahava mwa tempeli shima ahasita nukufuma mumwo, mukufunga namukuputa ahamuvombelʼuMulungu nashamusanya nashavusiku. 38Wope wununo ahapalamila musanya wununo, ahamusalifwʼuMulungu, ahavavuzya vonti ve vahagulililagʼukupokwa kwa Yelusalemu inongwa zyakwe.
Uvulumendo vwa Yesu
39Ilelo lwe vamazile zyonti zyʼuMwene alajizizye munkomelezyo zyakwe, pe vahavwela munsi ya mu-Galilayi munkaya yavo ya mu-Nazaleti. 40Uwenʼumwana ahakula, ahagoma, ahizulʼinjele, vwope nuvwila vwa Mulungu vuha va nawo.
41Avene nyenʼavapafi vakwe vahajendaga shimʼamaha gonti ukuvala ku-Yelusalemu kwa chaka wa Pasa. 42Ilelo pʼuwene lwʼamazilʼamahʼishumi nagavili, pe havili vahazuvʼukuvala inza she vahavalaga shima pachaka. 43Ilelo lwe gasilʼamanda ga chaka, lwe vavusilʼukuvala kuhaya havili, pʼuwenʼumwanʼuYesu ahasyala mwe mu-Yelusalemu, avenʼavapafi vakwe lwe vatamanyile. 44Avene vahasiva vahati ingavangʼali navamwitu ve vajenzite navo. Ilelo lwe vajenzitʼidala lyʼisiku lyoka, pe vahamwanza namuvajenzi namuvamwavo ve va vamanyile. 45Pe vahaga numo, pe vahagaluhʼukuvala ku-Yelusalemu, mwe vahamulondola. 46Ilelo lwe vamulondoyʼamanda gatatu, Pe vahamwaga mwa tempeli, mwʼatendime navasambilizi, vamuvishe pahati, ahavatejelezya nukuvavuzilizya. 47Nkandi vonti ve vahamwiṿwa, vahasukumila mukumanyinsanyʼinongwa namukuzyamula kwakwe. 48Avene lwe vamuwenyi, pe vahayengwa. Unyina ahamuvuzya ahati: She shonu vovulo we mwana wane we? Yenya, nuso nane tukulondoye nahavwe. 49Uwenʼahamula ahati: Mwananzaga shonu? Mutamanyilʼukuti mwe nkondeye ukuva muzya Tata umu? 50Avene nyene vatahalyaganyʼizwi lyʼahayanga. 51Pʼahasogola navo vahihʼukuvala mu-Nazaleti. Uwenʼahasajilʼavapafi vakwe. Uwenʼunyina wʼahagaviha gontʼamazwi ganaga mumwoyo wakwe. 52UwenʼuYesu ahaṿula nazye njele navwe vukuzi navwe vwankundwa kwa Mulungu nakuvantu.
Nyiha New Testament © British and Foreign Bible Society, 1965.