Matalikilo 5
5
Lunyungu lwa Adamu
(1 Makani 1.1-4)
1Aaba mbabalunyungu lwa Adamu. Ciindi Leza naakalenga Adamu, wakamulenga mucikozyanyo cakwe mwini. 2Wakalenga mwaalumi amukaintu, wakabaleleka akubaita kuti mbantu. 3Lino Adamu naakaba aamyaka iili mwaanda amakumi otatwe yakuzyalwa, wakazyala mwana mulombe wakali kumukozya kapati wakamuulika kuti Seti. 4Kuzwa waawo, Adamu wakapona aimbi myaka iili myaanda iili lusele. Wakazyala abambi bana balombe abasimbi. 5Nkabela wakafwa kajisi myaka iili myaanda iili fuka amakumi otatwe.
6Seti mwana wa Adamu naakaba aamyaka iili mwaanda aisanu, wakazyala mwana mulombe uutegwa Enosyi. 7Nkabela Seti wakapona aimbi myaka iili myaanda iili lusele aciloba, wakazyala abambi bana balombe abasimbi. 8Wakafwa kajisi myaka iili myaanda iili fuka akkumi aibili.
9Lino Enosyi naakaba aamyaka iili makumi aali fuka, wakazyala Mwana mulombe uutegwa Kenani, 10eelyo wakapona aimbi myaka iili myaanda iili lusele akkumi aisanu. Wakazyala abambi bana alimwi, 11nkabela wakafwa kali aamyaka iili myaanda iili fuka aisanu.
12Lino Kenani naakaba aamyaka iili makumi aali ciloba, wakazyala mwana mulombe uutegwa Mahalaleli, 13eelyo wakapona aimbi myaka iili myaanda iili lusele amakumi one. Wakazyala abambi bana balombe abasimbi. 14Wakafwa kajisi myaka iili myaanda iili fuka akkumi.
15Mahalaleli naakaba aamyaka iili makumi aali cisambomwe aisanu wakazyala mwana uutegwa Jaledi. 16Eelyo wakapona aimbi myaka iili myaanda iili lusele amakumi otatwe. Wakazyala abambi bana balombe abasimbi, 17nkabela wakafwa kali aamyaka iili myaanda iili lusele amakumi aali fuka aisanu.
18Lino Jaledi naakaba aamyaka iili mwaanda amakumi aali cisambomwe aibili, wakazyala mwana uutegwa Enoki. 19Eelyo wakapona aimbi myaka iili myaanda iili lusele. Wakazyala abambi bana balombe abasimbi. 20Naakafwa, wakali aamyaka iili myaanda iili fuka amakumi aali cisambomwe aibili.
21Enoki naakaba aamyaka iili makumi aali cisambomwe aisanu, wakazyala mwana mulombe uutegwa Metusela. 22Enoki wakapona aimbi myaka iili myaanda yotatwe kayanzene a Leza. Eelyo wakazyala abambi bana balombe abasimbi, 23mane kusikila naakaba amyaka iili myaanda yotatwe amakumi aali cisambomwe aisanu. 24Enoki ooyo wakaliyanzene a Leza mubuumi bwakwe boonse, mpoonya taakacilimo munyika, nkaambo Leza wakamutola.
25Metusela naakaba aamyaka iili mwaanda amakumi aali lusele aciloba wakazyala mwana mulombe uutegwa Lameki. 26Wakapona aimbi myaka iili myaanda iili ciloba amakumi aali lusele aibili. Wakazyala abambi bana balombe abasimbi. 27Wakafwa kali aamyaka iili myaanda iili fuka amakumi aali cisambomwe afuka.
28Lameki naakaba aamyaka iili mwaanda amakumi aali lusele aibili, wakazyala mwana mulombe. 29Mpoonya wakati, “Ooyu mwana uyootugwasya kuti tulemununwe kuzwa kumulimo wesu muyumu anyika eeyo Mwami Leza njaakasinganya.” Aboobo wakamuulika kuti Nowa. 30Lameki wakapona aimbi myaka iili myaanda yosanwe amakumi aali fuka aisanu, eelyo wakazyala abambi bana balombe abasimbi. 31Wakafwa kali amyaka iili myaanda iili ciloba amakumi aali ciloba aciloba.
32Nowa naakaba amyaka iili myaanda yosanwe, wakazyala bana balombe botatwe, mbaaba: Syemu, Hamu, a Jafeti.
Tonga Bible © United Bible Societies, 1994.