मत्ती 16
16
सौरगा रै निशाणा री मांग
(मरकुस 8:11-13; लुका 12:54-56)
1फरीसीउ और सदुकिउऐ यीशु काऐ आशीयौ तेस परखुणा लै बोलौ, “आमुकै सौरगा री केज़ी इणी निशाणी देखाल़ कि यीशु परमेश्वरा कु आ आशौ औन्दौ।” 2यीशुऐ तिउंलै ज़वाब दैऔ, “ब्याल़ी तुमै बोलाई कि, ‘सौरग आच़्छ़ौ रौआ, कैलैकि सौरग रातौ आ,’ 3और दोउती उठीयौ तुमै बोलाई, ‘आज़ पाणी लागा, कैलैकि सौरग रातौ और धुंधलौ आ। तुमै सौरगा रै हालत देखीयौ तेसरौ भेद बोली सौका ई, पर बौगता री निशाणी रौ भेद कैलै नाईं बोली सौकदै? 4एज़ै जुगा रै बुरै और गान्दै काम कौरणै वाल़ै लोग निशाण लोड़ाई, पर योना रै निशाणी छ़ाड़ियौ तिउंलै औज़ौ कोई निशाणी नाईं दैंदै।’ ”
फरीसीउ और सदुकिऊ री शिक्षा रौ संज़ेड़ौ
(मरकुस 8:14-21)
5च़ेलै झ़िला कु पार पउंच़ै, पर सै रोटी निणै बिसरुई गौऐ थै। 6यीशुऐ तिउंलै बोलौ, “शुणौ, फरीसीउ और सदुकिऊ रै संज़ेड़ै कु बौच़ियौ रौऐ ऊ। 7यीशु रै च़ेलै आपु मांझ़िऐ चौपड़िंदै लागै, ‘आमुऐ रोटी नाईं आणी, तैबै बोलौ यीशुऐ इणौ।’ 8तिंउरै विच़ार ज़ाणियौ यीशुऐ तिउंलै बोलौ, ‘ओ धौतरी रै लोगुऔ, तुमै आपु मांझ़िऐ कैलै ई लागै औन्दै चौपड़िंदै कि आमुकै रोटी नाईं? 9का तुमै इबी झ़ांऊ नाईं सौमझ़दै? का तुमुकै सै पांज़ हज़ारा री पांज़ रोटी याद नाईं, और ना इणौ कि तुमुऐ केती छ़ाबड़ी च़ुंगी थी? 10और ना सै च़ार हज़ारा री सात रोटी, और ना इणौ कि तुमुऐ केती छ़ाबड़ै भौरै थै? 11तुमै कैलै नाईं सौमझ़दै कि मुंइऐ तुमुकै रोटी रै बारै दी नाईं बोलौ, पर हाऊं बोलु थौ तुमुलै इणौ कि तुमै फरीसीउ और सदुकिऊ रै बुरै विच़ार और शिक्षा कु बौच़ियौ रौएऊ।’ 12तैबै यीशु रै च़ेलेऊ कै सौमझ़ी दी आशौ कि यीशुऐ रोटी रै संज़ेड़ै कु नाईं, पर फरीसीउ और सदुकिऊ री शिक्षा कु बौच़ियौ रौणा लै बोलौ थौ।”
पतरसा रौ प्रभु यीशु मसीह मानणौ
(मरकुस 8:27-30; लुका 9:18-21)
13तैबै यीशु कैसरिया फिलिप्पी रै परदेशा दी आशौ, और आपणै च़ेलेऊ कु पुछ़दै लागौ, “लोग आदमी रै छ़ोहरु लै का बोलाई?” 14तिंउऐ बोलौ, “कुछ़ ता यहुन्ना बपतिस्मौ देणै वाल़ौ बोलाई, और कुछ़ बोलाई एलियाह, और कुछ़ यिर्मयाह या कोई दुजौ भविष्यवक्ता सौमझ़ा ई, ज़ुण मारीयौ ज़िउंदै हुऐ ई।” 15यीशुऐ तिउंलै बोलौ, “पर तुमै मुलै का बोलाई?” 16शमौन पतरसै ज़वाब दैऔ, “तुमै ज़िउंदै परमेश्वरा रौ छ़ोहरु मसीहा ई।” 17यीशुऐ तिउंलै ज़वाब दैऔ, “ओ शमौन, योना रै छ़ोहरु, तू भौलौ ई। कैलैकि केज़ै भी आदमीऐ नाईं, पर मैरै बाबै ज़ो सौरगा दी आ, एज़ी बूश ताऊं माथै पौगड़ी की आ। 18और हाऊं भी ताऊं कु बोलाऊ कि तू पतरस आ, और हाऊं एस ढोल़ा माथै आपणी कलिसिया चाणाऊ, और अधोलोका रै दार ताऊं माथै हक्क नाईं छ़ाड़ा लौ। 19हाऊं ताउंलै सौरगा रै राज़ा री कुंज़ी दिआऊ: और ज़ो कुछ़ तू धौतरी माथै बानालौ, सेऊ सौरगा दी बानिया लौ। और ज़ो कुछ़ तू धौतरी माथै खोलालौ, सेऊ सौरगा दी खुलालौ। 20तैबै यीशुऐ आपणै च़ेलै च़ितल़ाऐ कि कासी कै नाईं बोलीयौ कि हाऊं मसीह ऊ।”
आपणै मौरणै रै बारै दी यीशु रै बोलणौ
(मरकुस 8:31-33; लुका 9:22)
21सेज़ै बौगता कु यीशु आपणै च़ेलै लै बोलदै लागौ, “ज़ुरुरी आ कि हाऊं यरुशलेमा लै डेऊ, और स्याणेऊ, और बौड़ै याजकु, और शास्त्रिउ रै हाथा कु भौरी दुःख उठाऊ। और मुं पोरु झ़ांगाई। और चिजै दिनै ज़िउंदौ हुआ ऊ।” 22तैबै पतरसै यीशु एकी भिलै नियौं और तेसलै डांटियौ बोलौ, “ओ प्रभु, परमेश्वरै केबी ना च़ांई इणौ कियौ ताऊं आइलै इणौ केबी ना औन्दौ।” 23तैबै यीशुऐ पिछ़ाऊं मुड़ियौ पतरसा लै बोलौ, “ओ शैतान, मुकाऐ कु दूर डेऊ! तू मुलै ठोकरा रौ कारण आ। कैलैकि तू परमेश्वरा री बुशै माथै नाईं, पर आदमी री बुशै माथै मन ला ई।”
यीशु पिछ़ु आण्डणै रौ मतलब
(मरकुस 8:34; 9:1; लुका 9:23-27)
24तैबै यीशुऐ आपणै च़ेलेऊ लै बोलौ, “अगर कुण मुं पिछ़ु हाण्डणौ च़ाहा, ता आपणी इच़्छ़ा पोरु छ़ाड़ा लौ और आपणौ क्रूस च़ुंगियौ, मुं पिछ़ु हाण्डा लौ। 25कैलैकि ज़ुण-कुण आपणौ प्राण बौच़ाउणै च़ाहा लौ तेसलै परमेश्वरा आइलै सौदा री ज़िन्दगी नाईं मिलदी, पर ज़ो मुकालै और मैरै खुशी री खौबर शुणाउणै री वज़ाह कु आपणै प्राण दैणा लै तयार औलौ तेसलै परमेश्वरा आइलै सौदा री ज़िन्दगी मिला आ। 26अगर पुरी धौतरी री खुशी पाई बौल़ा ई, पर एथरौ का फाइदौ आ आपणौ प्राण खोआलौ पोरु? या आदमी आपणै प्राणा रै बौदल़ै का दिआ लौ? 27आदमी रौ छ़ोहरु आपणै पवित्र सौरगदूतु आइलै आपणै बाबा री शाना देखाइयौ आशा लौ, और सेज़ै बौगतै ‘सेऊ हर एकी लै तेसरै कामा रै मुताबिक मिनतानौ दिया लौ।’ 28हाऊं तुमुलै सौच़्च़ौ बोलाऊ कि ज़ो इदै इऐ खौड़ै लोग ई तिऊं मांझ़िऐ कु कुछ़ इणै ई कि सै ज़ेबी झ़ाऊं आदमी रौ छ़ोहरु तेसरै राज़्या दी आशदी बारै ना देखाल़ै तेबी झ़ाऊं नाईं मौरदै।”
This work is licensed under Creative Commons Attribution-ShareAlike 4.0 License.