MWAMBĨLĨLYO 2
2
1Na matu na nthĩ syathela kũmbwa, na nguthu yonthe yasyo. 2Na mũthenya wa mũonza Ngaĩ nĩwaminĩte wĩa wake ũla watethasya; nake athũmũa mũthenya wa mũonza ũndũ wa wĩa wake w’onthe ũla watethasya. #Kuma 20.11; 31.17; Aevl 4.4. 3Na Ngaĩ aathima mũthenya wa mũonza, na oovathan’ya wĩthĩwe mũtheu; nũndũ nĩw’o wathũmũie ũndũ wa wĩa wake w’onthe ũla Ngai watw’ĩkĩthisye na wombie.
4Ii nĩ nzyawa sya matu na nthĩ yĩla syatw’ĩkĩthiw’e, mũthenya ũla Yeova Ngai wombie nthĩ na ĩtu. 5Na kutyaĩ kamũtĩ ka kĩthekanĩ kambĩte kwĩthĩwa nthĩ, o na nyũnyi sya kĩthekanĩ ityambĩte kũmea; nũndũ Yeova Ngai ndauĩtye mbua nthĩ: o na kũtyaĩ mũndũ wa kũĩma nthĩ: 6ĩndĩ mũumbĩ wambataa kuma nthĩ, na kuasya manzĩ ĩũlũ wa nthĩ yonthe. 7Na Yeova Ngai oomba mũndũ na kĩtoo kya nthĩ, na amũvevea mĩthũmũ ya thayũ manyiũũnĩ make; na mũndũ atw’ĩka kyuu kĩ thayũ. #Mwa 3.19; 7.22; Yovu 33.4; Mũta 12.7; 1 Ako 15.45,47.
Mũũnda wa Eteni
8Na Yeova Ngai avanda mũũnda ngalĩko ya wumĩlonĩ wa syũa, nthĩnĩ wa Etenĩ; na nĩkw’o wamwiie mũndũ ũla wombie. #Mwa 13.10; Isa 51.3. 9Na Yeova Ngai amesya mũthanganĩ kĩla mũtĩ wendeeasya kwoneka, na mũseo wa kũya; mũtĩ wa thayũ naw’o mũũndanĩ katĩ, na mũtĩ wa kũmanyĩthya ũseo na ũthũku. #Mwa 2.17; 3.22; Ũvu 22.2,14. 10Na ũsĩ waumĩte Eteni wa kũnyithya mũũnda; na kuma vau wataanĩsya, watw’ĩka mbũsĩ inya. 11Syĩtwa ya ũla wa mbee nĩ Visoni: nĩw’o ũthyũlũlũkĩte nthĩ yonthe ya Avila, kũla kwĩ thaavu; #Mwa 25.18; 1 Sam 15.7. 12na thaavu wa nthĩ ĩsu nĩ mũseo: ve veteliumu na tũvila twa nzumalati. 13Na syĩtwa ya ũsĩ wa kelĩ nĩ Ngioni: nĩw’o ũthyũlũlũkĩte nthĩ yonthe ya Kusi. 14Na syĩtwa ya ũsĩ wa katatũ nĩ Itekelĩ: nĩw’o ũvĩtĩle mbee wa Asũli. Na ũsĩ wa kana nĩ Euvalati. #Nda 10.4. 15Na Yeova Ngai oosa mũndũ, na amwia mũũndanĩ wa Eteni oseũvasye na kũsũvĩaa. 16Na Yeova Ngai amwĩaĩa mũndũ, akĩmwĩa, Wa kĩla mũtĩ wa mũũndanĩ nũtonya ũya o ũndũ ũkwenda: 17ĩndĩ wa mũtĩ wa kũmanyĩthya ũseo na ũthũku, ndũkaye: nĩkwĩthĩwa mũthenya ũla ũkaya waw’o ndũkatĩa ũkw’a.
18Na Yeova Ngai asya, Ti ũseo mũndũ ethĩwe e weka; nĩngũmũmbĩa mũtetheesya ũmwaĩle. 19Na kuma mũthanganĩ Yeova Ngai oombie kĩla nyamũ ya kĩthekanĩ, na kĩla nyũnyi ya yayaya; nake atwaĩa mũndũ one ũndũ wĩsyĩta: na o ũndũ wetie kĩla kyũmbe kĩ thayũ, noyo syĩtwa yakyo. #Mwa 1.20,24. 20Na mũndũ atw’ĩĩa indo syonthe masyĩtwa, na nyũnyi sya yayaya, na kĩla nyamũ ya kĩthekanĩ; ĩndĩ kwondũ wa ũ mũndũ kũtyaaoneka mũtetheesya ũmwaĩle. 21Na Yeova Ngai akomethya mũndũ too mũnene, na akoma; nake aumya wau ũmwe wake, na akwantan’ya nyama vandũ vaw’o: #Mwa 15.12; 1 Sam 26.12. 22na wau, ũla Yeova Ngaĩ waumisye mũndũnĩ, oombie mũndũ mũka, na amũtwaĩa ũ mũndũ. 23Na mũndũ asya, Ũũ yu nĩ ĩvĩndĩ ya mavĩndĩ makwa, na nyama ya mwĩĩ wakwa: akeetwa Mũndũ mũka, nĩkwĩthĩwa nĩwaumiw’e nthĩnĩ wa Mũndũ mũũme. #Mwa 29.14; Asi 9.2; 2 Sam 5.1; 1 Ako 11.8; Aev 5.30. 24Kwondũ wa ũu mũndũ mũũme akatia ĩthe na nyinyia, na akalũman’ya na mũka wake: nao makeethĩwa mwĩĩ ũmwe. #Mt 19.5; Mko 10.7; 1 Ako 6.16; Aev 5.28–31. 25Na me elĩ maĩ athei, mũndũ mũũme na mũka, na maiaasonoka.
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956