Lûqa 12
12
Dirîyey Ra Xo Bipawê
(Matta 10:26-33)
1Fina hezarana merdimî çorşmedê Îsay di arêbîyaybî pêser, winî bolî bî ki înan pêjewbînî pay kerdê. Îsa sifte ageyra telebandê xo ew înan rê wuna va: “Amîndê Ferîsîyan ra xo bipawê, no amînê dirîye yo! 2Çîyo ki nimite yo, o do bivijyo duz ew çîyo ki mîyanikî yo, o pêro do bizane yo. 3Qandê coy qiseyê ki şima tari di vatê, ê do pêro rojdihîr di biaşnawyê. Ew şima çiçî kêberan pey di jewerî goşa vato se, o do fekan ra vila bo.”
Metersê
(Matta 10:28-33)
4“Ezo şima dostandê xo rê vana, êyê ki bedenî kişenê ew ey ra vêşî nêşenê teba bikerê, înan ra metersê! 5Hima ez şima rê vaja, şima do kamî ra bitersê: Oyo ki verî ganê kesî gêno ew dima zî şeno kesî çekero cehnim, şima ey ra bitersê. Ezo şima rê vana, ey ra bitersê! 6Kes panj mirîçikî, di quruşîya nêroşeno, winî nîya? Ew Ellay nînan ra qe jûwa ci xo vîra nêkerda. 7Hima Ellay çim di, şima bol mirîçikan ra deha vêşî qedrî yê. Qandê coy metersê, porro ki seredê şima ya zî, o pêro amorde yo.
8“Ez şima rê vaja: Kamo ki merdiman ver di mi qebul kero, Lajê Însanî do zî melekandê Ellay ver di do ey qebul kero. 9Hima kamo ki merdiman ver di mi înkar kero, o do zî melekandê Ellay ver di winî înkar bo. 10Kamo ki Lajdê Însanî rê kufir kerdo, o gunayê ey do ef bo. Hima kamo ki Rihdê Mibarekî rê kufir kerdo, o gunayê ey do ef nêbo.
11“Eki rojê şima ancenê sînagogan, hukumdaran û hakîman ver, wexta qaxu megîrê ki şima do uja di se vajê ew senî neheqey ra bireyê. 12Çiki qiseyê ki îcab kenê, a çeq di Riho Mibarek do ê qisan bîyaro şima vîrî.”
Axmaxo Ki Zengîneyda Xoya Paye Keno
13Şêligî mîyan ra jewerî veynda Îsay, va: “Mehlîmê mi, birardê mi rê vaj, mêraso ki pêrdê ma ra mendo, wa ey mina bara kero.”
14Îsay zî ey rê wuna va: “Ey merdim, kamî mêrasdê şima sero no heq dayo mi?” 15Bahdo Îsay înan rê va: “Xo heme çimveyşaney ra bipawê! Çiki zengîney emrê însanî derg nêkena.”
16Ew Îsay înan rê na mesel va: “Wextê di jew merdimêndo bol zengîn beno, erdê ci bol mexel dano 17ew no merdim xo bixo rê vano ‘Ez do se kera? Cayê mi çinî yo ki ez do hendayê tenî kotî arêda pêser.’ 18Dima vano ‘Ez zana se kera, ez do embaranê xo birijna ew herunda înan di xo rê girdanê ci viraza! Ew ez do nê tenî ew zexiredê bînîya pîya heme embarandê xo di arêda pêser. 19Wexta ez do gandê xo rê vaja: Ganê mi, to bol serran rê texmînê xo kerdo. Nika zerrîda weşa bûr, bişim ew bewnî kêfdê xo!’
20“Hima Ella ey rê wuna vano: ‘Ey axmax! Ganê to do emşo to ra peyser bigêrîyo! Çîyo ki to arêdayo, o do kamî rê bimano?’ ”
21Bahdê na mesel Îsay şêligî rê va: “Êyê ki tim xo rê mal arêdanê pêser, hima Ellay het di tebayê ci çinî yo, soyinê înan wuna beno.”
Qaxu Megîrê
(Matta 6:25-34, 6:19-21)
22Îsay telebandê xo rê zî wuna va: “Ay ra ezo şima rê vana: Qaxuyê emirdê xo megîrê, mevajê ma do çiçî bûrê ew çiçî xo ra dim! 23Çiki no gan werdî ra qedr o, ew no beden zî çinay ra qedr o! 24Bewnîrê mirîçikan ra, ê ne karrenê, ne arêdanê, ne embarê ci, ne zî axurê ci estê, ew fina zî Ella înan keno mirdî. Ew şima ê mirîçikan ra bol qedrî yê! 25Şima ra kam pey qaxu-girotena şeno emrê xo deqeyê derg kero? 26Eki hukmê şima nêkekî rê zî çinî yo, winî şima yê çiçî rê qaxuyê çîdê bînî gênê?
27“Bewnîrê, vilikê gem senî benê girdî! Ê yê karê nêkenê ew rêştan nêrêşenê. Hima ez şima rê vaja: Silêman hend zengîneyda xoya fina zî zeydê jûwerda nînan çinayo weş xo ra nêdabi. 28Îmanê şima kemî yo, vaşo ki ewro vilik dano ew meşt çebîyeno adir, fina zî Ella çinayo wuna weş dano ey ra se, winî bizanê ki O do heqûnheq çina şima ra do. 29Qaxu megîrê ew mevajê ma do çiçî bûrê û bişimê. 30Miletê nê dinyay tim û tim nê çî dima şinê. Halbik Pîyê şima zano, şima mehtajê nînan ê. 31Şima verî Hukumdareyda Ellay dima şirê, wexta nê pêro do xora bideyê şima.
32“Bola werdîkek, ti meters! Çiki Pîyê şima yo zerrî ra Hukumdareya xo dano şima. 33Çiçî şima esto, ey biroşê ew perranê ci bidê feqîran! Xo rê pêleko ki kihan nêbeno ew axret di zengîneya ki nêqedîyena, ay arêdê pêser. Uja di xirxiz çinî yo bitiro ew pepikî çinî yê ki bûrê. 34Çiki xezîneyê şima kotî d'o se, zerrîya şima do zî uja di bo.”
Qandê Ê Dinyay Hadrey Bê
(Matta 24:43-51)
35“Wa mundîya şima piştî bo ew çilaya şima zî a ci vistî bo! 36Zeki xizimkarî ki axayê ci şîyo veyve ew ê yê raya ey pawenê, winî ki çimhal axayê ci kêberî biceno se, ê bişê ey rê kêberî akerê. 37Werrekê ê xizimkaran ki axayê ci wexto ki peyser yeno, hewna ê ayay ê ew ê yê raya axay pawenê! Ez şima rê raşta ci vaja: O do wexta verbanik#12:37 Yazî: berbanik girêdo xoya ew xizimkaran veyndo sifre û do bixo înan rê xizmet bikero. 38Eki axa nîmedê şew di, yazî şefaqî rew yeno ew xizimkaranê xo hewna ayay vîneno se, werrekê înan!
39“Hima nay bizanê: Eki jew wihêrê keyî bizano xirxiz çimhal yeno, wexta o nêverdano xirxiz keyedê ci mîyan kewo. 40Şima zî tim winî hadrey bê! Çiki, çeqa ki şima yê Ey qe nêpawenê, Lajê Însanî do a çeq di bîro.”
41Petrûsî pers kerd va: “Rebbî, tî yê na mesel ma wekîlan rê tenya vanê, yazî tî yê ma heminan rê vanê?”
42Rebbî zî ey rê wuna va: “Xizimkarêndo raşt û biaqil kam o? Wihêrê ci do nê xizimkarî xizimkarandê bînan sera kehya kero ew o zî wextdê ci di nan û aw bido înan. 43Werrekê ê xizimkarî, wexto ki wihêrê ci yeno keye, ey karî sero vîneno! 44Ez şima rê raşta ci vaja: Wihêrê ci do malê xo hemî bido ey dest. 45Hima eki no xizimkar xo pîze di vajo ‘Axayê mi do hewna berey bîro.’ Qandê coy o do bûro, bişimo, serxoş bo ew xizimkarandê bînan ro do. 46Wexto ki axayê ci peyser ageyra, qe no xizimkar a roj û sehat nêzano. Axayê ci do ey rind koteg ro do, bahdo ey çekero bêîmanan mîyan ew o do înana pîya ezabê xo banco.
47“Xizimkaro ki meramê axadê xo rind zano, hima fina zî hadre nîyo ew meramê ey nêkeno, o do bol ezab banco. 48Hima jewêno ki nêzanayiş ra girweyê çewtî keno ew kotegî keno heq, o do tayn kotegî bûro. Çiki kamî rê vêşî deyayo, o do ey ra vêşî buwazîyo. Kamî rê bol çî amanet deyayo, nê merdimî ra fina hend çî do peyser buwazîyo.”
Wextê Qerarî
(Matta 10:34-36)
49“Ez ameya ki erdî sero jew adir wekera, kaşka wa nika ra kil nê adirî kewtayê! 50Hima gerek ez verî xo waftîz kera, ew hetanî no waftîz bîro ca, tenganeya mi bol gird a! 51Şima yê vanê qay ez ameya ki silametey bîyara erdî ser? Nê, ezo şima rê vana, ez ameya ki merdiman pê ra abirna. 52Neya tepya, eki jew keye di panj merdimî estê, ê do di hetî bê, hîrê teney do kişta jewî di bê ew di teney do zî kişta bînî di bê. 53Pî do fikrê lajî ew laj do zî êdê pêrdê xo qebul nêkero. May do fikrê keyner ew keyna do zî êdê mar qebul nêkero. Vistrû do fikrê veyver ew veyv do zî êdê vistrûwer qebul nêkero.”
Hendik Firsen o To Destid'
(Matta 16:2-3; Matta 5:25-26)
54Îsa fina ageyra milet ew şêligî rê wuna va: “Wexto ki şima weynenê rojawan ra jew hewr o şino cor, şima a çeq di vanê ‘Yaxer o yeno’ ew winî beno. 55Naqor, vayê veraroj ra yeno, şima vanê ‘O do germ bo’ ew o zî winî beno. 56Şima dirî yê! Çiki şima weynenê erd û azmîn senî aseno, fahm kenê, vanê, ayam do wuna bo. Ew senî beno, şima yê mahneyê nê wextî nêzanê?
57“Şima yê hewna çi bixo nêzanê ki çiçî raşt o? 58Jewêno ki ti ci rê deyndar ê ew ey ti dayê mahkema, çend to dest ra yeno, hendik tî yê ray ra, eya umiş bi. Eki ti winî bîrê hakîmî ver, hakîm do to bido qerdîyanî dest ew o do zî to çekero hepis. 59Ez to rê vaja, hetanî ti quruşê soyinî zî nêdê, hinî ti uja ra nêşenê bivijyê!”
© (Active), Wycliffe Bible Translators, Inc. All rights reserved.