Nya-mangaji Mirningiya Jujiba 39
39
Jujiba kulu riku-wangu ki-Budiba
1Nya-mangaji Jujiba, karakarra kala-ka linji-wulungku linjikulinji-nganjinyu ki-Yijmayil, nakaringu ki-awarala Kinin kala-ka, jibiya Kinin ka-arri nya-mangaji, kala-ka bajinju Yijiba juju angula. Kulu nya-mangaji alka, wirdi alka yiku ki-king, na-wini alka Budiba, kilu-bayima Jujiba baji Yijiba.
2Kulu ka-arri jawina barra jinangu Jujiba, nyikungu jawina ki-Budiba. Ka-arri jabungka yiku yurrngumantha baki ka-arri walkurr ki-barrawula ki-Budiba marda. Wirdiwalangu Kada ka-arri yilaa ki-Jujiba yurrngumantha. Ngaliwa Jujiba ka-arri waki ngaliwa kilu-yabima nya-mangaji awara yiku ki-Wirdiwalangu ki-Kud. Marringaya awara barra ka-arri wumba ka-arri jabungka baji Jujiba.
3-4Kila-nganthaninya ki-Budiba, jinangu Jujiba kiwa-ninya jabungka kalngi yabi. Kilu-lhaa kalngi marringaya jinangu, ka-ngayama yiku, kulu baku barra kilu-yibarra ki-Budiba yiwa nganthawu alunga, kilu-yibarra wirdi ngulakari yilaa, kangka kilu-lhaa jinangu Jujiba ki-Budiba, Wirdiwalangu Kud ka-arri yilaa ki-Jujiba kulu kilu-yabima awara yiku baji barra.
5Bajingu kilu-mirlirlmirlirlma awara baji ki-Wirdiwalangu, kilu-yabima barrawu arndaarnda baki awara lukuluku badiki winkanda, kilu-yabima wiji kangka ka-arri baji Jujiba, wirdi nganthawu li-jawina ki-Budiba baji ki-awarala wiji.
6Kulu Budiba, kumba-wudurruma kulu ka-lhuwarri jabuwu, ngala Jujiba ka-arri jirrinymantharra ki-awarawu wiji, kilu-yibarra ki-Budiba wirdi alunga liyi-wuluwu wiji, wirdi ki-awarawu wiji Kulu kala-kala Jujiba linji-wulungku, “Kalngiya marringaya jinangu mirningiya, ndiwa marringayangurru, yabiyanyka!”
7Kulu rra-mangaji, riku-wangu ki-alkawu ki-Budiba, kanda-ninya baji ki-barrawula yukulyukumantharra awara. Kanda-nganthaninya jinangu barra Jujiba, kanumba-wukanyi nanda-wurdu, “Nya-marringaya, nya-yabi nya-ja, nya-rlikarlika!” Kulu bajingu kandu-mijanga barra kandu-mijanga kulu nungkarnarrku barra kandu-yalbanga jinangu Jujiba wula walkurru. “Kali-nmala walkurr!” 8Ngala yiwa Jujiba, kumba-ngarrarnma anku, ka-wukanyi anku, “Ngabiyarra! Waraba karni-biyarru walkurr yindaa kangka karnili-yibarra jabungka marnaji yiwa nyungkinku-wangu. Karnili-yibarra ngarna wirdi marnaji ki-awarawu wiji. 9Ngarna wirdi barranamba yiwa wirdi marnaji. Ngayamantharra yinda ruthuruthu yiku rriku-wangu jirnilu-ningumanji ngatha. Kulu kurdardi barra karna-wardimarru wakulamba awara yiku. Kulu kurdardi mili karna-wardimarru wakulamba yiku awara ki-Yijanku ki-Kud.”
10Barra yurrujurru kandu-yalbanganthaninya jinangu Jujiba, kandu-yalbanganthaninya wula walkurru miyilmiyil, ngala ka-ngajbirri anku, kumba-milmirilangu anku, wakangu barra ka-arri.
11Ngala baku, ka-ngalba ki-barrawula wakilu kulu waraba alunga nuwalarrkulu liyi-jawinawu, ka-arri baji arrkula yiwalumba. 12Kulu kanda-arri ndiwi barra manhanthawu yiku, “Kali-nmala walkurr kangka kurdardi alunga!” Kanda-ayayanu manhanthawu yiwa. Kandu-manhu nyala jumbala yilaa ngala yiwa ka-wuluma, ka-wuluma winkandu yarlajka, ngala minja nya-mangaji jumbala kila-nda wambu marlijinda andaa barra.
13Ngalanda kanda-kala jumbala nyikungu marlijinda andaa kulu Jujiba wulumantharra winkandu, 14ngalanda kanda-wajba alunga liyi-jawinawu, lankungu. “Marrirru! Kawayi! Nya-karra jinangu jumbala, nyikungu ki-Jujiba. Wardimbangu nya-mangaji. Nya-ja barra nya-Yiburu wumba kanyila-ka marnajinju nyungathanyu-wangungku, jilu-wardimanji awara ngambalanga nyungku-ja. Yiwa kiwa-ngalba arndaarndalu marnajinju kulu kumba-ayayanu nmanthawu majkarra ngathangka ngala ngarna karnamba-yiwama. 15Karnamba-yiwama kurdandu, kulu kiya-wuluma winkandu,” nganinya kanda-arri. Kandu-warndima anda kurdandu alunga.
16Kulu kandu-manha nya-mangaji jumbala nambalu lhurrku wumba ka-wani nyanku-wangu Budiba, nya-mangaji wirdi nyikungu ki-Jujiba. 17Kandu-mirnima barra yiku nya-mangaji jumbala kulu kandu-warndima nganambajilulu yiku, “Ngabinya! Kabu nya-karra jinangu jumbala. Kiya-wingka ngathangkalu nya-mangaji nya-Jujiba, nya-mangaji nya-Yiburu wumba kinya-kanhu marnajinju, yiwa kiya-wingka. Kulu karnilu-yalbanga ngatharra katharra-nmanma walkurr, 18ngala ngarna, karnamba-ngarrarnma yiku kulu karnamba-yiwa yiku, karna-wardanka. Kulu kilu-murdirri barra jinangu jumbala, kila-nda ngathangka kulu kiya-wuluma winkandu.”
19Jinangu barra, ka-wardirri na-wurdu barra ki-Jujiba marda barra ka-yinjathirri kalngiya yiku, kangka kandu-warndima kurdandu rrungkiku-wangu, kandu-warndima kurdandu. 20Kulu kalili-jirrinyma, kalu-yibarra Jujiba baji ki-burijin, ki-burijin alunga liyi-mbangu wumba kalu-wardima awara yiku ki-king, baji aluwa ka-arri Jujiba, rdirrirrantha barra arndaarnda.
21Kulu bawuji barra ka-arri arndaarnda yurrngumantha jinangu Jujiba. Ngala ka-arri Wirdiwalangu Kud yilaa, ka-yabirri na-wurdu yiku ki-Jujiba baji, kilu-manmarralanganthaninya yurrngumantha, kulu kilu-yabima awara baji arndaarnda yiku ki-Jujiba, kilu-yabima marda wirdi ki-burijin, kilu-yabima na-wurdu, yiwa ngayamanthawu yiku ki-Jujiba. 22Kulu baji wumba kalilu-yukumanthaninya li-ja li-wulu arndaarnda jina mirningiya wirdi, kila-kala jinangu Jujiba kalngi marringaya ka-arri baji aluwa, baji barra kiwa-ninya yurrujurru, kulu kila-kala barra nyungku-ja ki-wirdinju kulu ka-wukanyi yiku ki-Jujiba, “Ngarna wirdi kalirna-yukumanji nganthawu awara ngala yinda jirna-yibarranji ngulakari ngathangka, yinda ngalanganthawu li-wulu lukuluku marnaji arndaarnda.”
23Namba kili-jirrinyma Jujiba ki-wirdinju kulu ka-ngayangayarri yiku jinangu Jujiba. Ka-arri yabi yiku, yukumantharra awara wiji. Kila-nda Jujiba kalngiya wirdi kangka Wirdiwalangu Kud ka-arri yilaa ki-Jujiba, yabimanthawu awara barra yiku, mirlirlmirlirlmanthawu awara wumba ka-arri jabungka barra baji jinangu Jujiba.
© 1981, Wycliffe Bible Translators, Inc. All rights reserved.