Sawmus 4
4
Kitki usuh uti kabayka kuri?
1Kiyavwiye nuwohkiga, uya amnihun kaytwa nuwnuh. Pisnewa wadithebdih nuhawkan. Ku aysaw nah abet mbeyne pis amnihpen. Kuri, nah ayap pit akiw adahan pis amnihun timap nuviryepkawni.
2Yis hiyegviyenevwi, nah wakaymni adahan ku pariye yikehni kane kabay. Aysawhki ayivwi yis mahivwihunnek? Aysawhki ayivwi yis awna iwit waditnevyenen numinuh? Aysawhki ayivwi yis awna wasaymkanenwa numinuh?
3Kiyenabay ku ig Kiyavwiye Uhokri Dehetniye avuriw neras ku pariye wewnevwi gikak. Ig timapnan ku aysaw nah amnihswa git.
4Ku yis ka batek akak pahavwi gihiyekemni, ka yi muwaka kiyimwihwa nikak adahan in ka taraksasevyima. Ku aysaw yis dukugis ivegminanay yihiyekemni ba in akakma kibeyne hiyakemniki kahadbe yis ka kiyimanema.
5Kehnabay ku pariye kabaykanenwa. Ini humaw ke yikanbe git Kiyavwiye Uhokri. Uyay kamaxwa givitit Kiyavwiye.
6Ay amadga inin ka aynsima hiyeg awna: “Kitki usuh uti kabayka kuri?” Piwnteknewa, Kiyavwiye! Uguhnaba usuh akak pihepka abutni.
7 Kibeyne, pis keh nah batek mpiynevevye. Nah ka aynsima batekte mpiya hiyeg ku pariye hiyepnevwi gamutrakis aymuhwa kabayntiwa.
8Ku aysaw nah dukugis, nah himak kabayntiwa. Nah ka kiyimanema akak ariknawnama. Mmanawa pisnewa ay nukakuh, Kiyavwiye. Pisnewa nukamaxten.
© 2018, Wycliffe Bible Translators, Inc. All rights reserved.