MARK 6
6
Nazaret Jesu Deihlouhna
(Matt. 13.53-58; Lk. 4.16-30)
1Huan huai a kipan a pawt a, a omna kholam a tungta a; a nungzuite’n a zui uhi. 2Khawlni a honghi a, kikhopnain ah thu a hilh a; mi tampi a thu zate’n, “Hiai min hiai thu koi a kipan a muh ahia? Hiai mi kiang a pilna piak bang pilna ahia? A khut in hichi tel a thillamdang a hih bangchidan ahia?” a na chi uhi. 3Hiai mi Mari tapa, Jakob, Joses, Juda leh Simon sanggampa, singlem bawlpa ahi ka hia? A sanggamnute leng hiai a i kiang ua om ahi kei ua hia?” a chi ua, lamdang a sa mahmah uhi. Huchi in, a tung ah a lungkim kei uhi. 4Jesu’n a kiang uah, “Zawlnei zaw amah kholam ah, amah inkawte lak ah, amah inn kia loungal ah pahtawi louh in a om ngeikei” a chi hi.
5Huan, midamlou tawmchikte tung a khut koih a a hihdam kia loungal huai ah thil thupi ahihkei hi. 6A gintak louh uh lamdang a sa mahmah hi. Huan, thuhilh kawm in khuate a tawn vialvial hi.
Sawltak Sawmlehnihte Sawlkhiakna
(Matt. 10.5-15; Lk. 9.1-6)
7Huan sawmlehnihte a sam a, nihnih in a sawlkhia a; dawininte tung a thuneihna leng a pia hi. 8A zinna ua ding in chiangkhun kia loungal bangmah tanghou leh kawlzal leng, a kawnggak ua dangka tawilouh ding a chi bikbek hi. 9Khedap bel but ding a chi a; puanak nih silh kei un, a chilai hi. 10Huan a kiang uah, “Koipeuh ah leng na tunna inn uah, huai kipan na pawt mateng uh tung kinken un 11Huan koi khua peuh in a hon kipahpih kei ua, na thu uh a ngaihkhiak kei ua leh huai a kipan na pawt chiang un, amau mawhpaih ding in, na khepek nuai ua leivui kai na tatkhe ding uh” a chi hi. 12Huchi in a paikhia ua, mite a kisik ding uh ahi chih a gen uhi 13Dawi tampi leng a delhkhia ua, damlou tampi leng thau a nilh ua, a hihdam uhi.
Baptispa Johan Sihna
(Matt. 14.1-12; Lk. 9.7-9)
14Huan kumpipa Herod in a naza a, a min a than ziak in, “Baptispa Johan, misi lak apan thounawn a, huaiziak in huai thilhihtheihnate’n amah a sem ahi, a chi hi.
15Midangte’n bel, “Elijah ahi, a chi ua; midangte’n, malai zawlneite bang zawlnei khat ahi” a chi uhi.
16Herod in bel a na zak in, “A lutang ka tanpa ngei, hong thounawnta ahi,” a chi hi. 17Herod in a unau Philip zi Herodia ziak in mi a sawlkhia a, Johan a mansak a, suangkulh ah hen in a na khumkhinta hi. Herodia zi in a na neita ngal a. 18Johan in, Herod kiang ah, “Na unaupa zi na neihsak sianglou ahi” a na chih khit ziak in.
19Huaiziak in Herodia in amah a mudah a, hihlup a ut a, himahleh a hih theikei hi. 20Herod in, Johan midiktat leh siangthou ahi chih a theih ziak in amah a kihta hi, amah a en a, a thu a zak in, thil tampi a hih a, kipaktak in a ngaikhia hi.
21Huan Herod in a pian ni’n a mi thupite, sepaihheutu liante, Galili gam a miliante ading a zana Ankuang a luilai in hunlemtang a hong omta hi. 22Herodia tanu a honglut a, a lam a, Herod leh a Ankuang umpihte a kipaksakta hi. Kumpipa’n numei naupangnu kiang ah, “Na deihdeih hon ngen in, k’on pe ding” a chi hi. 23“Bangpeuh n’on nget phot, ka honpe ding, ka gam kimkhat nangawn leng” chi in a kiang ah a kichiam hial hi.
24Amah a pawt a, a nu kiang ah, “Bang ka ngen dia?” a vachi hi. A nun, “Baptispa Johan lutang” a na chi hi.
25Huan amah kintak in kumpipa kiang ah a valut paha, “Kuang in Baptispa Johan lutang n’on piak pah ka ut” chi in, a ngen hi.
26Huan kumpipa a lungkham mahmahta a; himahleh a kichiamna leh a Ankuang umpihte ziak in a sel nuam kei hi. 27Huan kumpipa’n amah vengte lak a sepaih khat a lutang vala ding a thupia in a sawlpah hi. Amah suangkulh ah pai in a lutang a vatan kheta hi. 28Huai lutang kuang in a hontawi a, numei naupang kiang ah a pia a, huan numei naupang in a nu kiang ah a peta hi. 29Huan a nungzuite’n a zak un, a luangla in, han ah a vuita uhi.
Sawltakte Kikna Leh Mipi Sang Nga Vakna
(Matt. 14.13-21; Lk. 9.10-17; Jn. 6.1-14)
30Huan sawltakte Jesu kiang ah a hong kikhawm ua, thil bangkim, a thil hihpeuh uleh a thuhilh peuh uh, a honghilh uhi. 31Aman a kiang uah, “Noumau kia in gamdai mun ah a tuam in hong unla, khawl tadih un” a chi hi. Mipi a tam a, a kuan leh a pai a kiphamat ua, an nangawn leng a ne mankei uhi. 32Huchi in gamdai mun ah long in a paimangta uhi.
33Mite’n a pailai uh a mu ua, mi tampi in amau a thei ua, khochih apat huai ah khe in a taikhawm ua, a na makhelhta uhi. 34Huchi in amah hong paikhiak in mipi tampitak a muta a, ching ding neilou belamte bang a hih ziak un a lainat mahmah a, thu tampi a hilhta hi. 35Huan ni a kai mahmahta a, a nungzuite a kiang ah a hong ua, “Hiai gamdai mun ahi a, ni a kaita mahmah hi. 36I kim a loute leh khuate ah hoh a, a nekding uh banghiam bek a lei theihna ding un amaute paisak ta in” a chi uhi.
37Aman bel a kiang uah, “Noumau nekding pia un” chi in, a dawng hi. Amau a kiang ah, tanghou makhai za nih man valei in nekding peding ka ding uam?” a chi uhi.
38Aman a kiang uah, “Tanghou phel bangzah na nei ua? Hon en dih ua” a chi a. Huan a neihzah uh a theihtak un, “Nga leh ngasa nih toh” a chi uhi.
39Huan aman, avek un, loupa hing tung ah a pawlpawl a tusak ding in a kiang uah thu a pia hi. 40Vual za khat, sawmnga, zel in a tu uhi. 41Huan aman tanghou phel nga leh ngasa nih a la a, vanlam en in a vualzawl a, tanghou phelte a balkhama, a ma ua lui ding in a nungzuite kiang ah a pia a; ngasa nih leng huaite tengteng lak ah a hawmzak hi. 42Avek un a ne ua, a kham chiat uhi. 43Huan tanghou leh ngasa nente bawm sawmlehnih a dim hi. 44Tanghou phel nete pasal piching ngen sang nga ahi uh.
Tui Tung ah Jesu Khe In Pai
(Matt. 14.22-33; Jn. 6.15-21)
45Huan mipi a kikhensak nung in galkhat lam a Bethsaida khua a na pai masa ding in a nungzuite long ah a tuangsak teitei hi. 46Amau a kikhensak nung in thum ding in tang ah a hohta hi, 47Nitaklam a hong hih in, long dil laitak ah a omta a, amah kia in gam ah a om hi. 48Long kalh a mangbang in amaute a mu a, huih in a hilou lam ah a sep hi. Huchi in zanven lina ding kuan in dil tung a khe a pai in amau lam a honzuan a, amau paisuak san a tum hi. 49Himahleh amah dil tung a khe a pai a muh un sikha sa in, a kikou khia uhi. 50Avek un amah a mu ua, a lau mahmah uhi. Himahleh aman amau a houpih paha, a kiang uah, “Khamuangtak in om un, keimah ka hi, lau kei un” a chi hi. 51Huan long ah a kiang uah a tuangtou sam a, huih a dai maimah hi. Huan lamdang a sa mahmah uhi. 52A lungtang uh a khauh ziak in tanghou beu thillamdang thu a ngaihtuah ban kei uhi.
Gennesaret A Hihdamna
(Matt. 14.34-36)
53Huan galkhat lam a kai un Gennesaret gam a tung ua, luipiau ah long a khih uhi. 54Long a kipan a pawt nung un mite’n amah a na theipah uhi, 55Huai gamkim tengteng ah a tai ua, a om chih a zakna peuh uah damloute a lupna un a honzawng hial uhi. 56Huan khoneu leh kholian ah khopi leh khota leh koipeuh ah leng a lutna ah damloute, dawlmun ah a lumsak ua, a puanmong bek khoihsak din a ngen ngutngut uhi. Huan amah khoih peuhmah a dam uhi.
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.