Matiu 6
6
Bona'i enehe'mosemofihi hapa'a
1Lenali kaba hu bati hilo. Lenali hetofa hapatini asaga boana'magihi enubulo enali be galabe lite li huto hite lolo mehilo. To lenali ya hilana kokulumalugu Afotinifitogati mina'a melilana'mu yabe.
2To fe'noha'a meni'ise bomofihi ana'ina he'moto emilube'mu nohutomo, kai fagalo bona'magi mono nonugu hila to kapo napagu hila nehana'a huto bona enubugu fi yotili katili ito bula ola mehubo. Ya hilata nehana bona'iya enali boana'magi bu lagalabe lite hilata nehabe. Nani lusiga luto lu nolepube. Enali alihi melilana mina'ani yatai alite neminabe. 3To fe'noha'ani menilina bona'i enehe'malube'mu nohutomo legeso huto fala kito suguna'i lolo hubo, to kayahi lamaga'agati ya hilube'mu nohutomo kayahi soga'a lu meemibo. 4To kai ya huto fenene huto suguna'i lolo huletogomo Afokafu kokulumalugu nohinauba asaga suguna'na bu go baga ilata bouba bu kogoloto alihi mina kimilina'mu yabe.
Nunumumofihi hapa'a
Lk 11:2-4
5Kai nunumu hilube'mu nohutomo fagalo bomagi hilata nehana suhi kai mehubo. Enali mono nonugu ho tite nehite nunumu lilata nehabe, to hepalugu sipi kapo i loe lae hu'ehinalo bite bona enubugu nehite nunumu hilata nehabe. Nani lusiga luto lu nolepube. Enali mina'ani ali'ahabe. 6To kai nunumu hilube'mu nohutomo legeso huto kose nohakagu tiloto kafeka li hekini loloto Afokafitoga numuna hu emitogo ai fala kito nohinati keheli ketalibe. To ai Afokafu asaga suguna'i ninana bu golata bouba bu kogoloto analo nona'a kimilibe.
7To lenali numuna hilune'mu nehitemo kegeiyo bona'magi nehana'a hite yatamalo kaga babu lite melilo. Enali babu kaga linogoti Hu'mau nunumuti keheli bati hilibe lite lilata nehabe. 8Lenali enali suhi lite enemege'i memalalo. Nunumu mehi'ahago Hu'ma Afotinifihi kaga lu emilana'a komopatinigu abu go su holata nohibe. 9Lenali ma lite numuna hu emilo: Afotiga, kokulumalugu minane, kigika hetofa huto fato minalibe. 10Kai kapoka ai huto hino, luto nolune. Enali kabaga liyafa hite kokuluma agoya hi nekimigo lali melugu ana suhi huto kabaga liyafa huto kofokehi halune'mu nolune. 11Kai yatai nose'nati limibo. 12To kai foipanati li he'mi letobo, to lali ana huto bona'magi foipana nehiletana li he'mi epalalune. 13Kai sipi fi taga huse'nagu lele'mo memoloto foipanamofihi afo'afitogati lele'mo lubuto bibo.
14Kehelilo. Lenali bona'magitoga foipana li huto hu epele'ahana lenali li he'mi epelenogo, ana huto kokulumalugu Afotinifu lenali foipanatini li he'mi lepalalina'mu yabe. 15To lenali boana'i enali foipana'ani li mehe'mi epalana ana huto kokulumalugu Afotinifu lenali foipanatini li mehe'mi lepalalina'mu yabe, Yesu lu epi'ehina yabe.
Nose'na mo sisemofihi hapa'a
16Lenali mono ka'mu lite nose'na mo site neminetemo fagalo bomagi hilata nehana suhi hite lenokaba li sibina mehilo. Enali enokaba li sibina hilata nehanaya asaga boana'magi bu enegelete nose'na mo si'ahabe lite lu epalalabe lite nehabe. Nani ma'naka luto lu nolepube. Enali ya hilata nehana bona'magi mina'ani ali'ahabe. 17Ya huto ni'inagi kai nose'na mo sito nominotomo okakagu mesebe nofoloto kokabaluga nagami koto li kosaba huto humofa'na hubo. 18Ya hitogo boana'magi enali ya huto nose'na mo si'ehina bo menohibe lite lilana'mu yabe. Ya huletogo Afokafu fala kito fenene nohuto asaga'na bu golata nohinauba alihi hetofa mina'a kimilina'mu yabe.
Hetofana li nupa hulatamofihi hapa'a
Lk 12:33-34
19Lenali ma melugu hetofa hatofa fe'nohatini li nupa mehilo. Ma melugu molepa kafamagi hiti to kagopa logose'nauba anana anana li sibina hulata nohigo to guminalo bomagi kafe sigite gumina felelata nehabe. 20Ya hu'ehina lenali kokulumalugu'natini li nupa hilo. Asaga'na kokulumalugu nina ai kagopa melogolata nohibe, to molepa kafauba menolata nohibe, to guminalo bouba kafe sigito tito gumina melilata nohibe. 21Yogo fe'nohaka ni'ilinaga asaga yupahi komopaka minolata hilina'mu yabe.
Kugufakamofihi fana meha'a
Lk 11:34-36
22Lubumoya lugufamofihi libi'a legi huto ni'ibe. Kubukauba bati huto ni'itomo asaga kugufakaloga i besa lo baga ilata nohibe. 23To kubuka sibina hu'ehigomo asaga kugufakalo metepu i baga noibe. To kailugu fana mehena ninauba aku'i metepu hapi fito gilotomo analo sipi metepu i baga noibe.
Koko pana'uba loe bona'mofihi lili'na melilata nohibe
Lk 16:1; 12:22-31
24Koko pana'i moneuba loe bolo moneko kumu lili'na lilata menohibe. Ya hilina ai mone bomofihi lili'na li bati nohuto mone bomofihi lili'na li bati mehilina'mu yabe. Lenali Hu'mamofihi lili'nalo bo'a neminete efapofihi lili'nalo bo'a moneko kumu meminalo.
25Ya'mu luto nani lu nolepube. Lenali nagami'i to nose'na nete minalana'mufi to gukete lenugufalo li hekelete minalanamu'i lenelesa nolinogo lenekesa yigiba yigiba mehilo. Bati huto minose'nauba nose'na ho'ehifi to bati huto minose'nauba guketemofihi ho'ehibe? 26Lenali nama helo lili hilata nehanamagihi bu enagalo. Enali nose'na foyagu hekelelete limo limo melete nelata menehabe. Hu'ma Afotinifu kokulumalugu nominanauba nose'na'ani epilata nohibe. Lenali nama enebege ligite nehana menekehelifiye? 27Hiya bomaka minomo bilata kana'agu kelesanaguti minalata ni'ibe?
28To hena hibe lite lenali gukete li hekelete minalana'amu'i lenekesa yigiba yigiba hilata nehabe? Lose tose'na fegutoga minolata nohina enali hena hena huto tilata nehafi lenali bu galo. Enali lili'na'ani lila to gukete'ani li hekelela menehabe. 29Nani lusiga luto lu nolepube. Solomoni fe'noho bo minana'a huto gukete'a ma lose tose kifinamagi li nehekalana'a huto li hekoloto memino'ehina yabe. 30Yatai huto hilete yago fenene hilete nehana lose tose kifi'namagihi Hu'mau gukete'ani hu epololata nohibe. To lenali'iba ana huto lenele'mo bati huto guketetini mehu lepalalina ni'ifihe? Lenegekesa menina bona'i nehafi?
31Ya hu'ehinagi lenali nose'na nalana'mufi to gukete li hekalalana'mu lenekesa yigiba yigiba hilete lenelesa melino. 32Enali mono ka mekehelise bona'magi asaga ya'manana'mu mege'i lifite kene ilata nehabe. Ya hu'ehina kokulumalugu Afotinifu asaga'na lilanana ya huse'na lilanagi luto akeheli'ehibe. 33Ya hu'ehinagi kai yata'a Hu'mamofihi kapo'alo li kubulo moloto mege'i meletogo ai gelo biloto asaga'na bati'a kimilina'mu yabe. 34Ya hu'ehinagi yagomo'mu hena'ni hilube luto kekesa yigi babu melubo. Hu'mau yagomo kaba hu ketalibe. Kai moneko moneko kanamu'i kekesa kehelito minobo.
© 1982, Wycliffe Bible Translators, Inc. All rights reserved.