If you have would like a copy of this version please contact info@davaraudiobibles.org

The Gofa Bible, CC-BY-SA-4.0, The Word for the World International and The Word for the World Ethiopia. (Text). Gofa Audio Bible, CC-BY-SA-4.0, Davar Partners International, 2018. (Audio).

ጌሻ ማፃፋ

The Word for the World International and The Word for the World Ethiopia

ፆሳይ ኮይሮ ሳሎታነ ሳአ መስ። ሄ ዎደ ሳእ ጊጎናነ አይብካ ባይና መላ ደኤስ። ም ቢታ ማእዳ ዎልቃማ ሃታ ቦላ ደኤስ። ፆሳ አያናይ ሃፈ ቦላራ ቃፄስ።
ሄሳፈ ጉየ፥ ፆሳይ፥ “ፖኦይ ሀኖ” ያግን፥ ፖኦይ ሀንስ። ፖኦይ ሎኦ ግድዳይሳ ፆሳይ በእስ፤ ፖኡዋ ማፐ ሻክስ። ፆሳይ ፖኡዋ፥ “ጋላስ” ግድ ሱንስ፤ ቃስ ማ “ቃማ” ግድ ሱንስ። ሳእ ቃምስ ዎንትስ፤ ሄስ ኮይሮ ጋላስ።
ሄሳፈ ጉየ፥ ፆሳይ፥ “ቦላራ ደእያ ሃ ጋርሳን ደእያ ሃፈ ሻክያ ሳሎ ጉፋንይ ሀኖ” ያግን ሀንስ። ፆሳይ ሳሎ ጉፋን ጊግስድ፥ ሳሎ ጉፋንፈ ቦላራ ደእያ ሃ ጋርሳን ደእያ ሃፈ ሻክስ። ፆሳይ ሄ ጉፋንዋ፥ “ሳሎ” ግድ ሱንስ። ሳእ ቃምስ፤ ዎንትስ፤ ሄስ ናምአን ጋላሳ።
ሄሳፈ ጉየ፥ ፆሳይ፥ “መላ በሳይ ቆንጫናዳ ሳሎፐ ጋርሳን ደእያ ሃ ኡባይ እስ በሲ ሺቆ” ያግን ሀንስ። ፆሳይ ሄ መላ በሳ፥ “ቢታ” ግድ ሱንስ፤ ቃስ እስ በሳን ሺቅዳ ሃ፥ “አባ” ግድ ሱንስ። ያትድ፥ ፆሳይ ሄስ ሎኦ ግድዳይሳ በእስ። ሄሳፈ ጉየ፥ ፆሳይ፥ “ቢታይ ም ማታ ዶልሶ፤ ዘረ አይፈይ ደእያ ካነ ዘረ አይፈይ ግዶን ደእያ ም ዶሎ” ያግስ፤ ሄሳዳካ ሀንስ። ቢታይ ም ማታ እያ ቆሞን ቆሞን ዶልስስ። ፆሳይ ሄስ ሎኦ ግድዳይሳ በእስ። ሳእ ቃምስ ዎንትስ፤ ሄስ ሄን ጋላስ።
ሄሳፈ ጉየ፥ ፆሳይ፥ “ጋላሳ ቃማፈ ሻካናዉ ፖኦት ሳሎን ሀኖ። ኤንቲ ቃማ፥ ጋላሳ፥ ዎደነ ላይ ኤርሳናዉ ማላ ግዶ። ቢታ ቦላ ፖአና መላ ኤንቲ ሳሎ ጉፋንን ሀኖ” ያግስ፤ ሄሳዳካ ሀንስ። ፆሳይ ናምኡ ግታ ፖኦታ መስ። አዊ ጋላስ፥ አጌን ቃማ ፖአና መላ ኦስ። ሄሳዳካ ፆልንቶታ መስ። ፆሳይ ኤንቲ ሀ ሳአ ቦላ ፖአና መላ ሳሎን ዎስ። ሄስ፥ ጋላስነ ቃማ ሃራና መላነ ፖኦ ማፐ ሻካና መላሳ። ፆሳይ ሄስ ሎኦ ግድዳይሳ በእስ። ሳእ ቃምስ ዎንትስ፤ ሄስ ኦይዳን ጋላስ።
ሄሳፈ ጉየ፥ ፆሳይ፥ “ደኦይ ደእያ ዱማ ዱማ መተት ሃን ዳሮ፤ ካፎትካ ሳአፐ ቦላራ፥ ሳሎ ጉፋንፈ ጋርሳን ፕራ” ያግስ። ያትድ ፆሳይ አባን ደእያ ግታ ዶአታ፥ ሃ ግዶን ዎፅ ቃፅያ መተታ ኡባነ ፓልያ ካፎታ ኡባ እያ ቆሞን ቆሞን መስ። ፆሳይ ሄስ ሎኦ ግድዳይሳ በእስ። ፆሳይ ኤንታ፥ “የለትተ፥ ዳርተ፥ አባ ኩምተ፥ ካፎት ቢታ ቦላ ዳሮ” ያግድ አንጅስ። ሳእ ቃምስ ዎንትስ፤ ሄስ እቻሻን ጋላስ።
ሄሳፈ ጉየ፥ ፆሳይ፥ “ደኦይ ደእያ መተት ኤንታ ቆሞን ቆሞን፥ መሄታ፥ ሳአራ ጎሸትያ መተታነ ዶአታ ኤንታ ቆሞን ቆሞን ቢታይ ከሶ” ያግን ሀንስ። ሄሳዳ ኦድ ኤንታ ኡባ መስ። ፆሳይ ሄስ ሎኦ ግድዳይሳ በእስ።
ሄሳፈ ስምን፥ ፆሳይ፥ “አሰ ኑና ዳንስድ አነ መኦስ። ኤንቲ አባ ሞሉዋ፥ ሳሎ ካፎታ፥ ቢታ ቦላ ዎፅ ቃፅያ መተ ኡባ ሃሮ” ያግስ። ሄሳዳ ፆሳይ አሰ ባና ዳንስድ መስ። እ አሰ ፆሰ ዳንስድ መስ፤ ኤንታ አደነ ማጫስ ኦድ መስ።
ፆሳይ ኤንታና፥ “የለትተ፥ ዳርተ፥ ሳአ ኩምተ፤ ሃርተ። አባ ሞሎ፥ ሳሎ ካፎታነ ቢታ ቦላ ዎፅ ቃፅያ፥ ደኦይ ደእያ መተ ኡባ ሃርተ” ያግድ አንጅስ።
ሄሳፈ ጉየ፥ ፆሳይ፥ “ታኒ ቢታ ኡባ ቦላ ዘረ አይፈይ ደእያ ካ ኡባነ ዘረ አይፈይ ግዶን ደእያ ም ኡባ ህንተዉ እማስ፤ ሄስ ህንተዉ ካ ግዶ። ቃስካ ሀ ሳአን ደእያ መሄነ ዶአ ኡባስ፥ ሳሎ ካፎ ኡባስነ ሳአራ ጎሸትያ መተ ኡባስ ምያባ ግዳና መላ፥ ጭልኦ ምነ ማታ እማስ” ያግስ፤ ሄሳዳካ ሀንስ። ፆሳይ ባ መዳ ኡባባካ ፄልያ ዎደ ዳሮ ሎኦ ግድዳይሳ በእስ። ሳእ ቃምስ፤ ዎንትስ፤ ሄስ ኡሱፑን ጋላስ።

聆聽 መተ 1