Tavaꞌu 2
2
1Lataua mukoinu loxotolo ilou lia mo ta mimii latala aloxo ne mukalu. 2#Eva 4:4, 10 #Mul 20:11Xe no voxo muxatele tamei la anu muma'ila xo anu mukalusou xaixai noxou. 3Musosovosou voxo muxatele tamei ne lexe anu voxo tavuna noxou xo anu mukalusou xaixai noxou xe no voxo ane ne la sou anu muma'ila.
Adamu Ilee Iva
4Nana sou Lataua mukoinu loxotolo ilou lia ne aloxo 'o.
No voxo ane Lataua IAUE#2:4 IAUE ne anu Lataua ualasou e ane'i ta Iutaia imoxou'u aloxo ne. mukoinu loxotolo ilou lia, la 5mimii iouiou ane uleleme no lia loxo ia'eia'e xe kamakala ne, uleme uao. Xo anu ukalanu la'iua ulu'e no lia mo itema vile sou uxaxai no lia kalumo uao. 6Tani pitapita'usi xo lexa a uxalixali utetelo no lia latanusi o.
7 # 1Ko 15:45 Io ili'i la sou Lataua IAUE mukoinu itema vile no anu lia. Xe mutauu tauuxu sou mauli mu'unalai no kusinou, la sou itema ne anu mutulu.
8Xe ili'i la sou Lataua IAUE muxalixu ovuovu lailaixe no xale lia ne Eden no xalee mulai loxo no xalee ane aso uxaxali utelo no anu. Itema e anu mukoinu ne, anu mulai mu'italonu no xalee lia ane ne. 9#Pal 2:7; 22:2, 14Anu muxalixu ovuovu iouiou lailaixe muleme no nano no lia xalee ane ne la munene'a la muxalixu tematemanu lailaixe misevile sou ta'o'ou. Ovu ane ulosinge mauli xe ane sou ulosinge lavulavu sou talavu no anu mimii ma'ia ane laixe xe mii ma'ia ane masua.
10Lexa luuxu vile mupaa ne Eden sou u'oxonu mimii no xale lia ane ne uleme laixe. Lexa ne musiali mulai va'axu la sou mukalipala'a la muxalixu lexa aiinu tami'a. 11Vile ilemele lexe Pisoni, ane misiali mixixaoxao tuala vile tila ilemolu lexe Avila. 12Lavo'o ilemolu lexe “xoulu” mo vile ne laulauoinu, ilemo lexe “onikisi”, mixalisou no lia xalee ane ne. Ta mii tamei ne lamolisi'a tatila misevile. Ovu vile kalumo muleme lai ne. Luuxu ne tuma'u lailaixe misevile.
13Lexa tamei sou ne ilemele lexe Xioni, ane misiali mixixao tuala vile tila ilemolu lexe Kusu. 14Lexa tatalusi'a ne ilemele lexe Taixilisi. Ane misiali milai loxo no xalee ane aso uxaxali utelo no anu ne Asiria. Xe tami'asi'a ne ilemele lexe Iupileitisi.
15Xe ili'i la sou Lataua IAUE mulai mu'italonu itema ne no xalee lia ne Eden sou uxoxoo uxaxai ane xe usaxisaxila'u xalee lia ane ne. 16Lataua muavuti la muvikalanu aloxo 'o, “Ovuovu ane muleme no xalee lia 'o ne, nini na'ou ngiangiaxu ukalusi, 17ia ovu ane sou ulosou itema vile lavulavu no anu mimii ma'ia laixe xe mimii ma'ia ane masua ne, na'ou uasi. Xo maasi xe nini na'ou la nini nasoli manina.”
18Xe ili'i la, la Lataua IAUE muvikala aloxo 'o, “Itema anusisi uxoxoo loxo la laixe uasi. Eni akoinu menexu vile sou ilou ixoxolu sou usu'usu'ulinu.” 19La sou anu muno'u lia 'o sou mukoine'i ta mimii iouiou ane imauli no voxosila mo ta ngiangiala no anu. Mukoine'i mukalu la sou muno'a milai noxou itema ne sou anu molu mumoxo'u ualaualasi'a vilevilesi. Ta mimii iouiou ane ne ilo'a ta ngiangiala vilevilesi ualaualasi'a ne anu itema molusi mumoxo'a no anu. 20Anu itema mumoxo'u ualaualasi'a ta mimii iouiou ne ilo'a ta ngiangiala mukalu, ia vile noxi'a ne uxali menexu sou usu'usu'ulinu uasi.
21Ioxe, IAUE Lataua muavuti la mu'oxonu itema ne la muai ne muva'ava'amimi avile. Muai muva'ava'amimi aloxo ne, io ulavu ua. Lataua mune'e mulaanu alamanu vile no vainu. Mulaanu mukalu, la musovolou xiasinu ilou alamanu tanixu no vainu itema ne, 22io muno'u alamanu ne mulai sou mukoine sema vile no anu. Mukoine mukalu la muno'e milai noxou mulu ne. 23Xe anu iou muvaxa loxo 'o la sema eie mine'e mixali noxou 'o. Xe anu muavuti la muvikala aloxo 'o,
“Anu! Mukalu soxu! Eni tangaxo maninasou ane.
Xine ilou xiasine ne molu ane noxilo 'osi.
Lataua muno'u ane noxilo 'o la sou ane Anu mukoine no anu.
Eni amoxoe lexe ‘sema’, xo ane mipaa ne no anu xilelisi.”
24 # Mat 19:5; Mak 10:7-8; 1Ko 6:16; Ep 5:31 Tava'u aloxo ne la sou ane, itema u'umesi'a momu ilee nenu sou ulai ilee semau ixolu ipita sou ixali vilesisi. 25Ane'i ilou itoxu uasi ilou mixoo vitanisi, ia ilou imaela uasi.
© 2013, Wycliffe Bible Translators, Inc. All rights reserved.