SAN LUCAS 22
22
Rente ca̱de se ta̱ca̱ din se preso Dihvo vo Jesucristo
1Cuahn che a cochi nino vihco ro yudo, ro che reh ihyan pa̱n che ametah ya̱ yahn ne, 2chidocuya̱n ndina̱n ma̱n, sa̱hn devano ley che dirun Moisés ma̱n ne, renuhn ino se ta̱ca ca̱hno se Dihvo vo ca̱va che hua cadino ihyan ya̱n, te va̱h se che co ta̱n ye.
3Chenda̱ chundah Judas Iscariote, a̱ma cha sa̱hn che chi cuande se va̱n ihyan che ndichio chahn, 4ne chahn se na̱n chidocuya̱n ndina̱n ma̱n, sa̱hn ndina̱n yahn policía che redin se cuda̱do ya̱co chahte ma̱n, ne ra̱hn se te co neca̱h se Dihvo vo ta̱h sa̱hn chahn. 5Chi yeno sa̱hn chahn, ne nte ca̱de se nduco se che ca̱h se tume sa̱hn. 6Ca̱h Judas ndudo yahn se sa̱hn chahn, ne nuhn ino se ta̱ca̱ co neca̱h se Dihvo vo ca̱va che hua cadino ihyan ya̱n.
Vihco ro yudo
7Nda̱ vihco ro yudo, ro che reh ihyan pa̱n che ametah ya̱ yahn. Ro min ne, nihnde ca̱de che rihno ihyan a̱ma itecuche lihn ca̱va che co te vedino. 8Dihvo vo ne, dechuh ye Pedro nduco Jua̱n, ne ra̱hn ye:
―Cuahn nchuhn, cuihcoya̱n ne che chuh vo che cuande yahn ro yudo.
9Tumerune ihyan chahn:
―¿Ti nahn ne che ca̱hcoya̱n nuhn ne?
10Ndahconan Dihvo vo:
―Ura che conda̱ nchuhn viya̱n ne, nta̱ca ne a̱ma sa̱hn che nda se a̱ma cuhtenune. Quendi nchuhn sa̱hn min nde vah na̱n che conda̱ se, 11ne ca̱hma ne co ne ihyan che va̱co ye min: “Dechuh Ihyan Ricuahn nuhn che tumerune nuhn ndih: ¿Ti va cua̱rto na̱n che cheh ye nduco ihyan apóstol yahn ye che cuande yahn ro yudo ne?” 12Tuhme na̱hma ye a̱ma cua̱rto chahte nchuhn che a va ya̱n. Min cuihcoya̱n nchuhn che chuh vo nduco vih.
13Chahn ihyan chahn, ne nta̱ca ye nducuahn che ra̱hn Dihvo vo ri ye ihyan, ne chihcoya̱n ye che cheh ye che cuande yahn ro yudo.
14Cuahn che nda̱ ura che cheh ye ne, chihnde Dihvo vo na̱n mesa nduco ihyan apóstol yahn ye, 15ne ra̱hn ye ri ye ihyan chahn:
―A̱ma nahn chéh nduco nchuhn che cuande yahn ro yudo numanahn che ametah ca̱hno se u, 16te rá̱hn rí nchuhn te ametah ndaconan chéh, nde nda̱ ro che conahn nducó che ndihco ca̱de Dendiohs, ne conán na̱n che rihquentiyon ye.
17Tuhme cheta̱h ye a̱ma va̱so vino, neca̱h ye nundihve cuahn Dendiohs, ne ra̱hn ye:
―Cota̱h nchuhn, cuih ne nduco vih. 18Rá̱hn rí nchuhn te ametah ndaconan cúh vino yahn uva, nde nda̱ ro che conahn vederihquentiyon yahn Dendiohs.
19Cheta̱h ye pa̱n me, ne neca̱h ye nundihve cuahn Dendiohs. Tuhme ndeh ye, ca̱h ye ihyan chahn, ne ra̱hn ye:
―Che tuhca̱ redín ne, conahn che cuahnecún che ca̱hno ihyan u ca̱va che ndevahn nchuhn. Tihca̱ cheh nchuhn ca̱va che ca̱hco ran ne che reneca̱hco ne u.
20Chihno cheh vino ye ne, ndaconan cheta̱h ye va̱so vino me, ne ra̱hn ye:
―Chu ne, yun yáhn che reca̱h dito ndudo ra che nda̱hco ca̱de Dendiohs. Va che cora ca̱va nchuhn.
21’Meniyon ne, sa̱hn che neca̱h se u ne, da̱ma reh se nducó. 22Cua̱co te ca̱hno ihyan u che rinducó nducoya̱ca ihyan, nduhca̱ che a nihnde ca̱de. Ate yah rí ca̱va sa̱hn che neca̱h se u.
23Tuhme cana̱n tumerune vih ihyan chahn cha ye che tihca̱ din ye.
Rente ihyan apóstol nduco vih cha ye che tahque cona̱n ye
24Chihno min ne, rente ihyan apóstol nduco vih cha ye che tahque cona̱n ye. 25Tuhme ra̱hn Dihvo vo ri ye ihyan:
―Adecoduhno rey ne, a̱ma yudo rihquentiyon ye nación yahn ye, ne sa̱hn intiyahn ne, rendeva ihyan yavena̱n se. 26Ate va̱n nchuhn ne, hua co tihca̱, te cha nchuhn che tahque quenun ya̱n ne ne, co ne nduhca̱ a̱ma sa̱hn yuno, ne cha nchuhn che tahque ndina̱n ne ne, co ne nduhca̱ a̱ma mozo. 27Condedecadino ne duh che tahque ndina̱n. ¿A ihyan che va ye na̱n mesa, reh ye, o sa̱hn deca̱hya che redin se cuda̱do numanahn che reh ye? ¿A ndiyu ihyan che va ye na̱n mesa, reh ye che tahque ndina̱n ye? Ate condihche nchuhn. U ne, nduhca̱ a̱ma ihyan che redin ye ntiyon yahn nchuhn.
28’Ro ro che chuhríhn ne, a nchuhn che chinduco ne u. 29Chemin che nduhca̱ che te Chidá vederihquentiyon, quenan cumá ne, namin té vederihquentiyon, cuahtenan cuma ne 30ca̱va che chuh vo ma̱n, cuh vo ma̱n, da̱ma nduco vih, ro che ca̱hcantiyón, ne cuahte ne techeca̱de ne yahn ihyan nación yahn Israel, nduh che ndichio nda̱ta yahn ye.
Dihvo vo Jesucristo ne, ra̱hn ye te ca̱hma Pedro te hua rendihche ye ihyan
31Namin ra̱hn Dihvo vo ri ye Pedro:
―Simón, Simón, cuihque cuda̱do, te chundah ne, chica se Dendiohs ca̱va che tumerande se nchuhn nde na̱n che nda̱hco ndiya se nchuhn. 32Ate u ne, cová̱h cave ca̱va che hua a̱ma yune no ca̱hcoman. Cuahn che ndaconen cotehne ne, cueneca̱h yan chedave yahn ihyan che ritahno ye u.
33Ndahconan Simón, ne ra̱hn ye:
―Dihvé, va vedeyenó che conducó ndih, andahre conún va̱coya̱hn nduco ne ma̱n, andahre cóh da̱ma nduco ne ma̱n.
34Ate ra̱hn Dihvo vo ri ye ihyan:
―Pedro, rá̱hn rí di te ura che ametah cuah tuh ne, cahme ino yune te hua rendihche u.
35Tuhme ra̱hn Dihvo vo nduco nducoya̱ca ihyan chahn:
―Cuahn che dechúh nchuhn che nde dino, nde morral, nde inda̱co, hua quenda ne ne, ¿deh chinda yahn ne ne?
Ndahconan ye:
―Hua dehva chinda yahn nuhn.
36Tuhme ra̱hn Dihvo vo ri ye ihyan chahn:
―Ate ma̱n ne, ndete che va dino yahn nchuhn, cuiquenda ne, ndete che va morral, cuiquenda ne. Cha nchuhn che ametah espa̱da yahn ne ne, cuendihcue ne tino rendiche ne, cua ne a̱ma. 37Rá̱hn rí nchuhn te va che conahn ndudo cuh che a ndirun yáhn: “Ca̱hma ihyan te ihyan min ne, ihyan nunde ye.” Nducuahn che a ndirun che va che cuahno có ne, va che conahn.
38Tuhme ra̱hn ihyan chahn:
―Dihve nuhn, nga̱ o espa̱da, va yahn nuhn.
Ndahconan ye:
―Nduco sih ne, a va.
Getsemaní
39Chihno min ne, cuahn Dihvo vo Cuete Olivo nduhca̱ che a rahn ye, ne cuahn ihyan apóstol nduco ye. 40Cuahn che nda̱ ye min ne, ra̱hn ye nduco ihyan chahn:
―Cova̱h nchuhn ca̱va che hua dinahn ne cuahn che tumarande chundah nchuhn.
41Tuhme chihco rino Dihvo vo ihyan chahn, ne cuahn ye ca̱na na̱n me. Min chehntihya ye, cova̱h ye, 42ne ra̱hn ye:
―Chida má̱n, ndete che nahn ne ne, cuehnevi ne che va che chuhríhn. Ate hua co nduhca̱ che náhn. Co nduhca̱ che nahn ma̱n ne.
43Tuhme nda̱ a̱ma ángel che chica ye vahchetero, ne neca̱h ya̱n ye chedave yahn Dihvo vo. 44A̱ma chuhrihn ye che rendedecadino ye, ne tahque dito cova̱h ye. A̱ma chi ye nuneya̱n nduhca̱ yun, ne ra nde ndiya̱hn.
45Chihno cova̱h ye ne, ndaconan ye na̱n che chenun ihyan apóstol chahn, ne nta̱ca ye ihyan che vateya̱do ye, te a̱ma ndi cuno ye che ra̱n ye. 46Tuhme ra̱hn ye ri ye ihyan:
―¿Dehco che vateya̱do nchuhn? Cuenecuan ne, cova̱h ne ca̱va che hua dinahn ne cuahn che tumarande chundah nchuhn.
Din se preso Dihvo vo Jesucristo
47Nde ametah cuihno ca̱hma ye cuahn che nda̱ a̱ma ya̱hn sanda̱do nduco sa̱hn policía che redin se cuda̱do ya̱co chahte, ne nda̱hna̱n Judas, a̱ma cha sa̱hn che chi cuande se va̱n ihyan che ndichio chahn. Chahn nda̱ sa̱hn min na̱n Dihvo vo ca̱va che tena̱n se ihyan. 48Tuhme ra̱hn Dihvo vo ri ye sa̱hn:
―Judas, ¿a nahn tenan u, ne nduco tihca̱ necah u che rinducó nducoya̱ca ihyan ne?
49Cuahn che ndihchero ihyan apóstol che tihca̱ ri ne, tumerune ye ihyan:
―Dihve nuhn, ¿a cuahn nuhn sa̱hn sih nduco espa̱da ne?
50A̱ma cha ihyan chahn ne, chahn ye a̱ma sa̱hn deca̱hya yahn chidocuya̱n che tahque ndina̱n, chaconda̱h ye revan se la̱do ta̱h cua̱co se. 51Ate ra̱hn Dihvo vo:
―Hua cuhma nchuhn.
Tuhme nahn ta̱h ye revan sa̱hn min, ne ndonan. 52Ra̱hn Dihvo vo ri ye chidocuya̱n ndina̱n ma̱n, sa̱hn ndina̱n yahn policía che redin cuda̱do ya̱co ma̱n, sa̱hn intiyahn ma̱n:
―¿A cochi nchuhn nduco espa̱da ma̱n, nduco ya̱hn ma̱n, din ne preso u nduhca̱ sa̱hn duco? 53Ro ro quenún chete ya̱co chahte va̱n nchuhn, ne hua din ne preso u. Ate ma̱n ne, nda̱ ura yahn ne, ura che rihquentiyon chundah.
Ra̱hn Pedro te hua rendihche ye Dihvo vo Jesucristo
54Tuhme din sa̱hn chahn preso Dihvo vo, quenda se ihyan va̱co chidocuya̱n che tahque ndina̱n. Cuahn Pedro diyahn diyahn, quendi ye ihyan. 55Din sa̱hn chahn a̱ma va̱coya̱hn chevah, ne vatendi se, reca̱h ihno se sa̱hn. 56Tuhme ndihchero a̱ma ta̱hn deca̱hya che nduco Pedro, nti ye min. Ndihchero ndah te ihyan, ne ra̱hn te:
―Sa̱hnguh ne, chinduco se sa̱hn preso ca̱h.
57Ndahconan Pedro, ne ra̱hn ye ri ye ta̱hn:
―Nde hua rendihché ihyan.
58Namena̱n me ne, ndihchero ta̱ma se ihyan, ne ra̱hn se:
―Namin di, ndoque va̱n sa̱hn che rinduco se sa̱hnga̱h.
Ndahconan Pedro:
―Ndiyu u.
59Chihno tenduh a̱ma ura ne, ra̱hn ta̱ma se:
―Cua̱co te sa̱hnguh ne, chinduco se sa̱hnga̱h, te sa̱hn Galilea se.
60Ndahconan Pedro:
―Nde hua devanó deh che rahn.
Nde ametah cuihno ca̱hma Pedro, ne cah tuh. 61Tuhme chaconan Dihvo vo, ndihchero ye Pedro, ne neca̱hco ye nduhca̱ che ra̱hn Dihvo vo: “Ura che ametah cuah tuh ne, cahme ino yune te hua rendihche u.” 62Tuhme ndihquenda̱ Pedro, ne a̱ma chaco ye.
Chahn se Dihvo vo Jesucristo
63Sa̱hn che redin se cuda̱do Dihvo vo ne, redin duche yahn se ihyan, ne rahn se ihyan. 64Dechiche se a̱ma tino na̱n ye. Rahn se ihyan, ne ra̱hn se:
―Cahme duh che chahn di.
65A̱ma ndeh na̱n ca dehtenduh ra̱hn se, din duche yahn se ihyan.
Quenda se Dihvo vo Jesucristo na̱n intiyahn
66Cuahn che a chi dave me ne, ndo da̱ma chidocuya̱n ndina̱n ma̱n, sa̱hn devano ley che dirun Moisés ma̱n, sa̱hn intiyahn ma̱n, ne quenda se Dihvo vo na̱n che cuhnde ca̱de yahn ye. 67Min tumerune se ihyan:
―¿A di ihyan che a va ca̱de che chi ye, ndedevahn ye ihyan iyehnse ne?
Ndahconan ye, ne ra̱hn ye ri ye sa̱hn:
―Ndete che ca̱hmá có nchuhn te u ne, nde hua cotahno ne. 68Ndete che va deh che tumeruné ne, nde hua ndahconan ne yáhn. 69Ate u che rinducó nducoya̱ca ihyan ne, a nun cuhndé la̱do ta̱h cua̱co Dendiohs, ihyan min che a̱ma yudo vederihquentiyon yahn ye.
70Tumerune nducoya̱ca sa̱hn chahn:
―¿A di che Da̱ya Dendiohs tuhme ne?
Ndahconan ye yahn se:
―A u. A ma̱n nchuhn ra̱hn ne meniyon.
71Tuhme ra̱hn se:
―¿Dehca din vo testigo? Nduco ndudo che tihca̱ ra̱hn se ne, a va. A ma̱n vo chihnevan vo.
© 1972, Wycliffe Bible Translators, Inc. All rights reserved.