Mateo 4
4
Diöblo tieyulmajmötocac Jesús
1Yecuöquenu Espíritu Sönto tiebicaluc Jesús ca ompa cöne nionöque chönte para ompa tieyulmajmötocas inu Diöblo. 2Hua cuöc amo otlacualuc cuarenta tunale hua cuarenta yohuale, sötiepa oteosebihuac. 3Hua cuöc oaseto inu tieyulmajmötocane, otieyelfe:
―Tlö teca teiconie Deus, xequejto ma ini nöncate teme ma mocuepacö pöntzi.
4Cache yejuatzi onöhuatihuac, oquelfejque:
―Tlajcuelulpanca:
Amo sa ca pöntzi cuale nemes sente tlöcatl,
cache quenesesitöroa de noche tlajtule tli quisa tiecamacopantzinco Deus.
5Yecuöquenu Diöblo otiepanulte ipa inu ciudad de Deus, que yaja Jerusalén, hua tietlejcabe hasta icuayuluc teopantle. 6Hua otieyelfe:
―Tlö tecaca teiconie Deus, xomocajcöhua hasta tlölpa. Pues ejqueyi tlajcuelulpanca:
Cualentitlanesque tieöngeles por mopampa,
hua metzajcoquesque ca inmöhua,
para que ejqueu mocxehua amo moteputlamesque ica teme.
7Jesús oquelfejque:
―Pues nuyejque tlajcuelulpanca: “Amo xetietantiöro Tlöcatzintle moDeus para abier tlö cuale quechihuasque”.
8Ocsajpa Diöblo tiebicac hasta icpac sente tepietl bieye, hua tieyejtete noche reinos hua naciones de tlöltecpactle, hua noche incualniexteles. 9Hua otieyelfe:
―Noche ini nönca temetzmacas tlö nixpa tomotlancuöquetzas hua teniechmabesutis.
10Yecuöquenu Jesús oquelfejque:
―Xebeya, Satanás, ipampa tlajcuelulpanca:
Yejuatzi Tlöcatzintle moDeus tetiemabesutis,
hua sa yejuatzi tetietequepanus.
11Yecuöquenu Diöblo tiecöjtie. Entunses oaseco öngeles hua tietequepanoöya.
Jesús quepiehualtejque tieteque ipa Galilea
12Sötiepa Jesús oquecajque que Xohuö ye oquetzajtzajque ipan cörsel. Entunses Jesús onecuepaluc ca inu tlöle de Galilea. 13Hua oquixoac de Nazaret, hua onemoaco ipa sente puieblo itucö Capernaum, que icaca itienco ötiescatl, cöne ica itlamejyo de inu tlöle de Zabulón hua de Neftalí. 14Ejqueu opasöre para ma mochihua tli oquejto inu tlayulepante Isaías. Pues oquejto:
15Inu tlöle de Zabulón, hua inu tlöle de Neftalí, ojtle tli pano itienco ötiescatl, ca nie löro de Jordán,
tlöle de Galilea cöne chajchönte meyactie tli amo cate de topuieblo.
16Noche inu giente tli yejyehuataya ca tlajtlayohuaquelestle pa inyulo oquejtaque bieye tlaniextelestle,
hua tli yejyehuataya ipa inu locör de tlayohuaquelestle de mequelestle, tlöbile oquentlaniextele.
17Desde cuöquenu opiehualuc Jesús para tlanunutzalus, hua quejtuloöya:
―Xomoyulcuepacö, ipampa ye ajaseco tunalte para Deus tlamandörurus nemotlac.
Jesús oquennutzque nöbe pescadurte
18Hua nejnemoatenemeya Jesús itlac ötiescatl de Galilea. Oquemejtaque unte icnijte: Semu, öque nuyejque mocuitea Piero, hua Andrés icni. Quetlajcaleya tarröya ijtec ötiescatl, pues yejua oyejyeya pescadurte. 19Hua oquemelfejque:
―Xeniechtocacö, hua nemiechchihualtis nenyesque nenpescadurte de tlöca.
20Yejua sa nima oquecöjtiejque intarröya, hua tietocaque. 21Hua cuöc opanoac de ompa oquemejtaque oc unte icnijte: yaja Jacobo, iconie Zebedeo, ca tiehua icni itucö Xohuö. Yejua oyejyeya ipan börco ca tiehua intajtzi, hua quenyejyectlöliöya intarröyajua ye otlajtlatzcotu. Hua yejuatzi quennutzque. 22Hua sa nima quecöjtiejque inu börco ca tiehua intajtzi, hua tietocaque.
Jesús quenmachtejque hua quenpajtejque meyac giente
23Hua biloatenemeya por noche inu tlöle de Galilea, hua otlamachtiloöya ipan inteopancuconehua de yejua. Tlanunutzaloöya de inu cuale tlamachestelestle de quiene Deus tlamandöruro. Hua otlapajtilutöya de noche cocolestle hua de noche tiecoco tli quepeaya giente. 24Hua caquesteya tieyectieniehuales ipa noche inu tlöle de Siria. Hua giente tiehualequelejque noche tlin cocolesyojque, tli quepejpeaya de noche sösantle cocolestle, hua tli quepejpeaya demunios, hua tli lucojte hua tli cojcultzetzi. Hua yejuatzi oquenpajtiloöya. 25Hua otietocaya meyac giente de inu tlölte de Galilea hua de Decápolis hua de inu ciudad de Jerusalén, hua de inu tlöle de Judea, hua de ca nie löro de inu ötlactle de Jordán.
© 1980, Wycliffe Bible Translators, Inc. All rights reserved