Mateo 15
15
Pa̱ire Co'aye Neñe
(Mr 7.1-23)
1Jerusalénpi fariseohua'i cui'ne cua̱ñese'e ye'yacohua'ipi daisicohua'ipi Jesús quë'rona tsio dani se̱i'ë:
2“¿Me yo'ojë më'ë ye'yacohua'i mai aipë cua̱ñese'e sehuocaiye pa̱ñe'ni, ja̱ yë'ta'a a̱o a̱ima'në jë̱ña tsoajë̱'ë, cua̱ñese'e?”
3Ja̱je cajëna, Jesupi se̱ji'i, ja̱ohua'ire:
“¿Cui'ne mësaru me yo'ojë Maija'quë cua̱ñese'e de'oye sehuocaima'pë pa̱i cua̱ñese'ere de'oye sehuoye'ni? 4Maija'quë cato capi: ‘Më ja'core cui'ne më ja'quëre ëjaohua'ire ñaquë pajë̱'ë.’ Cui'ne capi: ‘Pëca ja'quëre cui'ne pëca ja'core co'aye sa̱ñope caquë cato huani je̱o cua̱ñoja'quë.’ 5Ja̱je pa'iquëta'are mësarupi cayë pëca ja'quëre cui'ne pëca ja'core caye de'oji: ‘Tsoe si'aye yë'ë paye Maija'quëna i̱si saohuë. Ja̱je pa'ina, co̱caiye peoyë.’ 6Cui'ne ja̱je cacohua'ipi pëca ja'quëre pa̱nita'a pëca ja'core co̱caiye peoyë, cuasajë pa'iyë. Ja̱je yo'ojë Maija'quë cua̱ñese'ere do'i peoye ne huesoni coa pa̱i cayere sehuocaijë pa'iyë. 7¡Coa cacohua'i! Nuñerepa Maija'quëre quëacaiquë Isaías capi, mësaru ayere toyaquë ñeje:
8Iye pa̱i yë'ëre yë'opose'e oiyë,
I̱ohua'i joyo cato so'ore pa'ina.
9Mësaru Maija'quëre se̱ñe do'i peoye a'ë,
Pa̱ise'e cua̱ñeñepi huëojë yo'ojëna.”
10Ja̱ maca pa̱ire soini capi:
“De'hua asajë cuasa ti̱'ajë'ë. 11Yë'opoja̱'a cacaye cato pa̱ire co'a de'hua ma'ñe a'ë. Coa ai jerepa pa̱ire co'a de'huaye cato yë'opopi etaye a'ë.”
12Ja̱ maca i̱ ye'yacohua'ipi Jesús quë'rona tsio dani cahuë:
“¿Asaë, më'ë fariseo pa̱i më'ë cayere asajë oise'e?”
13Ja̱je cajëna, i̱pi sehuopi, ja̱ohua'ire:
“Yë'ë ja'quë, ma'tëmo pa'iquë ta̱ ma'ñe cato peo hue̱'ñarepa duta ja̱'ñe a'ë. 14Coa ñajë'ë, i̱ohua'ise'e pa'ija̱jë. Ja̱ohua'i cato ñaco ca̱ peocohua'i a'ë. Cui'ne ñama'cohua'ini cuacohua'i a'ë. Ja̱je pa'ina, ñama'quëpi cui'ne ñama'quëni sai saquë pani si'a jupë cojena du'iye pa'iji.”
15Pedropi ja̱ maca capi, Jesure:
“Quëajë̱'ë, më'ë quëase'e ayere.”
16Caquëna, Jesupi capi:
“¿Mësaruje̱ ja̱ yë'ta'a asa ti̱'ama'pë pa'iye? 17¿Huesëye, mësaru, si'a a̱o yë'opoja̱'a cacani ë̱tatu'una saise'epi jeteyo'je eta saiye? 18Ja̱je pa'iquëta'are yë'opoja̱'a etaye cato joyo pa'iyepi etaji. Ja̱'ë, pa̱ire co'ayerepa neñe. 19Ja̱je pa'ina, joyopi etaji, co'aye cuasaye, huani je̱o ëaye, nomi ëaye cuasaye, co'amaña ñañe, coa cosoye, cui'ne co'a coca caye. 20Iye a'ë, pa̱ire co'a de'huayerepa. Jë̱ña tsoajë̱'ë cua̱ñese'ere sehuoma'pë a̱iñe cato pa̱ire co'aye ne ma'ñe a'ë.”
Yequë Yeja Acopi Jesure Sehuoye
(Mr 7.24-30)
21Jesupi ja̱ropi etani saji'i, Tiro cui'ne Sidón yejana. 22Ja̱rote paco'ë, cananea nomio ja̱opi Jesús quë'rona cuico daco'ë, ñeje:
“¡Ëjaë, David mamaquë oijë̱'ë, yë'ë macare! Yë'ë mamacopi huati joyore hue'eco, ai ai yo'oco co'ayerepa.”
23Ja̱je catoje̱ Jesús ti a'ri mañaje sehuoma'ë saji'i. Saina, i̱ ye'yacohua'ipi dani i̱te se̱i'ë:
“Quëa saojë̱'ë, te'ija. Co'aye mai jeteyo'jeja̱'a cui daoco.”
24Cajëna, Jesupi capi:
“Maija'quë yë'ëre jëjo daopi, Israel pa̱ini caquë yëi ñama ne huesëse'eje̱ pa'ioni caquë.”
25Ja̱je pa'iquëta'are i̱ ña hue̱'ñana do're ja'runi cao:
“¡Ëjaë, co̱caijë̱'ë!”
26Ja̱je cacona, Jesupi capi, ja̱ote:
“De'oma'coa, mamajë a̱iconi a̱ore jioni jo'ya yaina a̱oto.”
27Ja̱je catoje̱ i̱opi i̱te cao:
“Ja̱je pa'ijë̱'ë, Ëjaë. Ja̱je pa'iquëta'are jo'ya yaije̱ a̱icohua'i a'ë, pa̱i a̱ni to̱ ne'ña mañaje.”
28Ja̱je cacona, Jesupi capi, ja̱ote:
“¡Nomio ta̱'ñerepa neñe pa'iji, cuasayë, më'ë! Më'ë yëse'e nese'eje̱ pa'ija̱quë.”
Caëna, i̱ti macapi i̱o mamaco co'yasico paco'ë.
Jesupi Ju̱'icohua'ire Jujuse'e
29Jesús ja̱ropi etani Galilea jaira të̱'tëpaja̱'a tëto sani cu̱tihuëna mëni ja̱rona ja'rupi. 30Ja̱rote pa'ina, jai pa̱i daë'ë, i̱ pa'i hue̱'ñana. Daijë dahuë, do'pëcohua'ire, ñama'cohua'ire, asama'cohua'ire, peo tupë̱are, cui'ne jai pa̱i yeque ju̱'icohua'ire dahuë. Dani i̱ quë̱o yë'quë macana oijëna, Jesupi jujupi, ju̱'icohua'ire. 31Pa̱i ña quëquëyerepa yo'opi, asama'cohua'ipi cui'ne coca cama'cohua'ipi asajë cajëna, nëcañoa peo tupë̱api de'ocohua'i po̱nëjëna, do'pëcohua'ipi cu'ijëna cui'ne ñama'cohua'ipi, ñacohua'i po̱nëjëna. Ja̱je yo'oquëna, ñajë Israel pa̱i Maija'quëre ai de'oji cajë sihuahuë.
Jesupi Cuatro Mil Ë̲mëohua'ire A̲opi
(Mr 8.1-10)
32Ja̱ maca Jesús i̱ ye'yacohua'ire soini capi:
“Teaye iye pa̱i mañare oi ñañë. Tres mu'seña pa'iji, i̱ño i̱ohua'i pa'iye. Ja̱je pa'ijë ti peoyë, i̱ohua'i a̱i mañaje. Ja̱je pa'ina, a̱ima'cohua'ire huë'ena jëjo saoye pa̱si'i saijë ma'ana dahuëra ju̱'ima'cohua'ini.”
33Caquëna, ja̱ maca i̱ ye'yacohua'ipi cahuë, i̱te:
“Ja̱je pa'iquëta'are ¿me i̱ño pa̱ije peo hue̱'ña a̱o hueroni a̱oñe'ni, jai pa̱ire pare?”
34Cajëna, Jesupi se̱ji'i:
“¿Je so̱ pan paye'ni, mësaru?”
Se̱ina, i̱ohua'ipi cahuë:
“Siete pan cui'ne a'ri maña tsiaya hua'ire payë.”
35Cajëna, ja̱ maca pa̱ire cua̱ñepi, yejana ja'ru sajë̱'ë caquë. 36Ja'rusi maca siete pan cui'ne hua'ire i̱ni Maija'quëre de'oji caquë se̱ji'i. Se̱ni tëjini i̱ ye'yacohua'ina se i̱sina, ja̱ohua'ipi pa̱ire se a̱ohuë. 37Ja̱ maca si'aohua'i a̱ni huajëhuë. Ja̱je pa'itoje̱ ja̱ yë'ta'a siete do'rohuë̱a a̱ni jujase'e nëaëna, ayahuë. 38I̱ti a̱isicohua'i cato cuatro mil pa̱i paë'ë, nomiohua'ire cui'ne tsi̱re cue̱cuema'pëna. 39Ja̱ jeteyo'je Jesús pa̱ire sai pëpa tëjini jai yohuëna aya mëni saji'i, Magdala yejana.
© 2012, Wycliffe Bible Translators, Inc. All rights reserved.