Génesis 14
14
So Abram nca'alaxatec so Lot
1Qaq se'eso na'a'q, so Amrafel nta'a ye Sinar, qaq so Arioc nta'a ye Elasar, qaq so Quedorlaomer nta'a ye Elam, qaq so Tidal nta'a ye Goyín. 2Qaq se'esoua nta'al deloctague' co'ollaxa so Bera, maye nta'a ye Sodoma, qataq so Birsa, maye nta'a ye Gomorra, qataq so Sinab maye nta'a ye Adma, qataq so Semeber maye nta'a ye Zeboyin, qataq so nta'a Bela, maye da lỹa le'enaxat Soar. 3Qaq se'esoua cinco nta'al, ỹauaxaỹaxana't co'ollaxa som nalleppi, huaña ye ca'amegue maye le'enaxat Sidín, maye nachaso aso Auaxai Leuaxai. 4Qaq imattrec co'ollaxa soua doce vi'iye da do'onataxaatracot so nta'a Quedorlaomer, qalaxaye co'ollaq ivita so vi'i trece, nache soomaye dataira'aguet somaye. 5Qaq so vi'i catorce, nache so Quedorlaomer qataq soua lỹa't nta'al maye huaqtapeegueta, soomaye nqo'oora ye 'alhua Astarot Carnayin, qaq huaña yemaye, nache loxonec som refaiitapi. Ime co'ollaxa qaltaq loxonec so zuziitapi huaña ye Jam, qaq so emiitapi qalaq loxonec co'ollaq huaña ye Savé Quiriatayin, 6qaq so horeopi qalaq loxonec co'ollaq huaña aye qasoxonaxapi ye Seir, qataq icaatac co'ollaxa iviraxatta'a ye ca'amegue ye Parán, maye huaqta'ai' yem toolec 'alhua. 7Qaq co'ollaq ñe'eguelaq so Quedorlaomer, qataq so nnaictague'pi somaye, nache nvira'a ye Enmispat, maye da lỹa le'enaxat Cades. Qaq huaña, nache loxonec 'enauac yem na'alhua so Amalec le'ecpi, qataq nataqa'en som amorreopi maye netaña co'ollaxa ye 'alhua Jasesón Tamar.
8Nache so nta'alpi maye ilotague' ye Sodoma qataq Gomorra, Adma, Zeboim qataq Bela, nache nqo'ona ye ca'amegue le'enaxat Sidín, nache deloguito soua nta'al, 9maye nachesoua soua Quedorlaomer, maye nta'a ye Elam, Tidal maye nta'a ye Goyín, Amrafel maye nta'a ye Sinar, qataq so Arioc maye nta'a ye Elasar, qaq se'esoua cuatro nta'al, deloguito co'ollaxa se'esoua cinco. 10Qaq so ca'amegue ye Sidín, huo'o co'ollaxa aso lchequepi nlaqchigui na 'eco' qo'oipaq lcha'q, ỹoqo'oye soua nta'al ye Sodoma qataq ye Gomorra co'ollaq datarec, nache tarengui asa'aso lchequepi. Qaq so laỹepi qalaq datauec co'ollaxa, taỹa aso qasoxonaxa.
11Qaq som doxonaxanpi, qalaq nache ỹacona co'ollaxa 'enauac so nallec, qataq so no'on nogoxoshetpi ye Sodoma qataq ye Gomorra, ime, qaq jec. 12Qaq nataqa'en ỹaconeua'a co'ollaxa so Lot, som lasoshec so Abram maye netaña ye Sodoma, qataq nataqa'en ỹacona so no'on logoxoshetpi somaye, ime, nache jec. 13Qalaxaye huo'o so ỹale maye qoỹet co'ollaxa, somaye da'aqtaxanem co'ollaxa 'enauac de'era so Abram som hebreo le'ec, maye netaña yem huaña aso qo'oipaqpi le'enaxat encina, maye lalamaxat so Mamre, som amorreo le'ec. Qaq so Mamre nache lqaỹa so Escol, qataq so Aner, qaq soomaye nache huaqtapeegueta naxa so Abram.
14Qaq so Abram co'ollaq ỹaỹaten da so lasoshec noxonec, nache laỹona't co'ollaxa so lalamaxat l-latacpi maye lañoqo' so lma' somaye. Qaq somayepi ivi' trescientos dieciocho ye lcata. Nache so Abram lỹatec co'ollaxa somayepi da icaalec se'eso nta'alpi, nache iviraxatta'a ye Dan. 15Qaq co'ollaq mashe pe, nache so Abram qataq so nalleppi, ique'elaxat da iloquiaxan so nta'alpi, nache icaatac iviraxatta'a ye Hoba, maye pa'aigue da sheu' ye huaqta'a't nỹecpi ye Damasco, 16nache deuotaxanec 'enauac som ỹache co'ollaxa somayepi. Qaq 'era da 'eetec so Abram da nca'alaxatec co'ollaxa so lasoshec Lot, qataq ñe'eguelaxaala't 'enauac so lalamaxatpi somaye. Qaq nataqa'en nca'alaxatec so 'alpi qataq so laỹepi shiỹaxauapi.
So Melquisedec ỹanem da no'on la'aqtac so Abram
17Qaq so Abram co'ollaq mashe ñe'eguelaq co'ollaq ime da loxonec so Quedorlaomer qataq soua nta'al maye nnaictagueto somaye, nache so nta'a ye Sodoma hueqata'aguet co'ollaxa somaye huaña so ca'amegue le'enaxat Save, maye nataqa'en le'enaxat Ca'amegue maye lalamaxat so nta'a. 18Qaq nataqa'en so Melquisedec som nta'a ye Salén, qataq ntaxaỹaxanaxanec da qaitaxaỹapegue' Ñim Lo'onatac 'Enauacna maye Nataỹaña 'Enauacna, somaye ỹacona aso nauole qataq so lataxa, 19nache ỹanem so Abram da no'on la'aqtac maye, 'eeta':
«Ñim Lo'onatac 'Enauacna, maye Nataỹaña 'enauacna,
ñim ỹo'ot co'ollaxa na piguem qataq ana 'alhua,
'am ỹanem qome ca lchoxonnataxanaxa,
20qataq qaỹo'oxoren qome Ñim Lo'onatac 'Enauacna, maye Nataỹaña 'enauacna
ñim 'am ỹanem co'ollaxa da 'oxonec so 'ampa'aguenaxauapi.»
Qaq huaña nache so Abram, ỹanem so Melquisedec, añi 'oonole ana diez 'enauac som lhuotaxanaxatpi. 21Qaq huaña nache so nta'a ye Sodoma 'enapega so Abram, 'eeta':
«Aỹem 'aỹa'anem qome na shiỹaxauapi, nache 'ano'ona'aguet na nogoxoshetpi.»
22Qalaxaye so Abram 'enapeco':
«Aỹem sanot co'ollaxa so ỹa'aqtac Ñim Nataxala', Ñim Lo'onatac 'Enauacna maye Nataỹaña 'enauacna, ñim ỹo'ot co'ollaxa na piguem qataq ana 'alhua, 23da aỹem saishet da huo'o ca sacona na 'aralamaxatpi, ivira'a ca lquet ca pela', yaqto' saishet qome da qonapec, da nache 'am da aỹem 'ausallaqchet. 24Aỹem saishet da huo'o ca sacona, nachaqsota som mashe chec nam ñalleppi. Qalaxaye nachenauate' naua ñenaictapegueto, Aner, Escol, qataq Mamre, naamaye huo'o qome ca ỹocona.»
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.