Lc 4
4
'Ajxnac prowal Jesús yuj win diablo
(Mt 4.1-11; Mr 1.12-13)
1A Jesús caw 'aych Yespíritu Dios 'a 'a, 'ix 'atx 'a a niwn a Jordán. 'Ix 'ijx 'at yuj Yespíritu Dios chi 'a jun lum cusltac lu'um. 2Chawinq'uin̈ x'aj ta', ax win diablo x'a'n prowal. Man̈x 'a tas 'ix sc'ux Jesús 'a jun tiempoal cha, caw x'och swejel. 3Xlajw cha, xyaln win diablo 'ixtc 'a 'a.
—'In Yunnal ach Dios, yuj cha, al 'a jun q'uen tic 'och cab' panil, xchi win 'a 'a.
4Palta xyaln 'a win 'ixtic:
—A Ch'an̈ Un̈ tz'ib'b'il cani, ata tzyal 'ixtic: Man̈ cojnoc yuj tas tzc'uxxi, pitzn on̈ec, [palta pitzn on̈c yuj smasnil tas tzyal Dios.] 'Ixta tzyal 'a Ch'an̈, xchi 'a winac.
5Xlajw cha, x'ijx 'at Jesús yuj win 'a jun niwquil tzalan. Yajn̈j wal cha, 'ix sch'oxn win smasnil jun tzo'n̈ niwc chon̈b' 'ay 'a yolyib'n̈q'uinl tic 'a 'a. 6'Ix yaln win 'ixtc 'a 'a:
—'Oj ach wa'ch yajlilc smasnil jun tzo'n̈ niwc chon̈b' tic. Caw niwn 'oj el'ch yu'uj. 'Ac'b'il jun tzo'n̈ tic 'a yol in c'ab', yuj cha, tztac' wa'n 'a mach 'aj tzin nib'j tzwac'a. 7Toto tzach 'em cumn 'ayin, tzaln a b'a 'ayin, 'oj wac' eco'oc jun tzo'n̈ tic smasnil, xchi win 'a 'a.
8Palta xyaln pax Jesús 'a winac:
—[Ach Satanás, 'ij 'el a b'a 'a in tz'ey.] Tzyal 'ixtc 'a Ch'an̈ Un̈ tz'ib'b'il cani: Cojn 'a Cajlil qui Diosalec tzeyal e b'a, cojn 'a tzeyac' servil, xchi 'a Ch'an̈ U'un̈, xchi Jesús 'a winac.
9Xlajw cha, x'ijx pax 'at yuj win diablo chi 'a Jerusalén, 'ix yi'n q'ue win 'a schon yatut Dios, 'ix yaln win 'ixtc 'a 'a:
—'In Yunnal ach Dios, yuj cha, jul 'ejm a b'a 'a sat lum cha, 10yujto tzyal 'ixtc 'a Ch'an̈ U'un̈:
'Oj ya' cot Cajlil eb' yángel ach stan̈woc.
11'Oj ach squetz chan̈ eb', sec man̈ comnoc tza tench oc 'a q'uen q'ue'en, xchi 'a Ch'an̈, xchi win diablo cha.
12'Ix yaln pax Jesús 'ixtc 'a winac:
—Palta tzyaln pax junx tic 'a Ch'an̈ U'un̈: Man̈ eyac' prowal Cajlil qui Diosalec, xchi 'a Ch'an̈, xchi Jesús.
13Ax win diablo cha, man̈x 'a junc xo prowal xnachj yu'uj, yuj cha, xyactn can win jun tiempoal.
'Elnc yich smunlj Jesús
(Mt 4.12-17; Mr 1.14-15)
14'Ix paxx Jesús 'a Galilea, caw 'aych Yespíritu Dios yet'oc, c'uxn xpucl yab'xil 'a jun lugar cha. 15'Ix 'ec' cuywjoc 'a junjn scapiya eb', ax eb' 'anma', c'uxn slaj yal eb' wach'il.
'Ayc' Jesús 'a Nazaret
(Mt 13.53-58; Mr 6.1-6)
16Xlajw cha, 'ix 'atx Jesús, 'ix c'ochx 'a Nazaret 'aj q'uib'nac. Ax 'a yic sc'ul 'iljelal, x'och 'a yol capiya, yujto 'ixta xon sley. 'Ix q'ue lin̈an#Lc 4.16 Tzq'ue lin̈n eb' yic tz'awtx spaxti Dios tz'ib'b'il cani. yic tzyawtn 'elt Ch'an̈ U'un̈. 17Yuj cha, xya'n eb' jun Ch'an̈ Un̈ 'a 'a, atn jun tz'ib'b'il can yuj jun schecb' Dios Isaías sb'i. 'Ix sjacni, sayn 'ajtil tzyal 'ixtic:
18A Yespíritu Cajlil, a 'ix ya'ch 'ayin, yujto sic'b'iln 'el yu'uj. Checb'iln cot yu'uj, yic tzwul walnc 'el wach' 'ab'x 'a eb' meb'a'. Tzwul waln 'el yab'xil colnb'il 'a eb' 'icha preso yaji. Tzwul in jacn pax sat eb' matz uj yilni; ax eb' 'aych junc tas 'a yib'an̈, tzwul wi'cn 'elt eb' 'a libre.
19An̈jtona', tzwul walnc 'eli, chajtlto xjaw stiempoal jun colnb'il tzyac' Cajlil, xchi Ch'an̈ Un̈ xyawtj 'elt Jesús 'a yojltac eb'.
20Xlajw cha, smacn pax Ch'an̈, 'ix ya'n pax 'a jun win 'ay yopiso 'a jun capiya cha. Xlajw cha, x'em wocan#Lc 4.20 Tz'em wocn eb' yic tzyaln 'el eb' spaxti qui Mam Dios. yic tzcuywj 'a eb'; ax eb' 'ayc' 'a yol jun n̈a, cha, c'uxn x'at q'ueln eb' 'a 'a. 21'Ix syamn 'och yaln 'el 'a eb' 'ixtic:
—A 'a jun c'u tic wan eyilni to wan yel'ch tas tzyal Ch'an̈ Un̈ tic, xchi 'a eb'.
22Ax eb' 'ayc' ta', c'uxn xlaj yal eb' wach'il. Caw 'ix sat sc'ojl eb', yujto caw wach' jun tzo'n̈ tas xyal 'a eb' cha. 'Ix laj yal-lanc eb' 'ixtic:
—'In yunnal José jun win tic. ¿'Aj xyij sjelnal tic jun? xchi eb'.
23Yuj cha, xyaln 'ixtc 'a eb':
—Tecn 'oj eyal 'ixtc 'ayin: Ach 'a'm remel, mun tzac' b'oxc a b'a quilnoc, til wal ab' tas xa b'o 'a Capernaum, b'o pax 'a qui chon̈b'ec tic quilnoc, 'oj e chic 'ayin.
24Wal yel tzwal 'ayex:
—May junc schecb' Dios 'ay yel'ch 'a sat eb' yit chon̈ab'. 25Tze na cot yab'xil win Elías pecti', chajtl 'e'nac. Nan̈l schan̈l ab'il man̈xtoc ya'jnac n̈ab', caw niwn wejl jawnc 'a yib'n̈ eb' 'anma smasnil. A 'a jun tiempoal cha, til wal eb' 'ix quit israelal chamnc yichmil, 26palta man̈oc 'a eb' 'ix 'aj schecjnac 'at Dios Elías chi colwjoc. An̈j 'a jun 'ix man̈ israeloc 'aj Sarepta 'a sla'nil Sidón, an̈jta c'ochnc colwjoc. 27An̈jtona', tze na cot pax yab'xil jun schecb' Dios Eliseo sb'i. Til wal eb' quit israelal yamchjnac yuj lepra. Palta may junc eb' b'oxnc yuj Eliseo cha, an̈j jun win man̈ israeloc 'aj Siria, Naamán sb'i, an̈j win b'oxnc yu'uj, xchi Jesús 'a eb'.
28Ax eb' 'ayc' yet' 'a yol capiya cha, yic xyab'n eb', caw xcot yowl eb' smasnil 'a 'a. 29Yuj cha, xlaj q'ue wan eb', 'ix sto'n 'el eb' Jesús 'a sti 'el chon̈ab'. 'Ix c'och eb' 'a sjolm jun pa'n 'a stz'ey schon̈b' eb' cha, yujto snib'j eb' cob' sjulb't 'a pa'n cha. 30Palta ax Jesús, ton̈j x'elcn 'a scal eb', x'atx cani.
A jun winc 'aj 'elnc jun demonio
(Mr 1.21-28)
31'Ix c'ochx Jesús 'a Capernaum 'a yol yic Galilea, ata xcuywj 'a eb' 'anma 'a sc'ul 'iljelal. 32Caw 'ix sat sc'ojl eb' yab'n jun tzo'n̈ cuynb'il cha, yujto a yic xyaln 'eli, 'ix checlji to caw 'ay yopiso yuj Dios.
33Ax 'a jun capiya 'aj 'ayc' cha, ata 'ayc' jun winc 'aych jun demonio 'a 'a, 'ix q'ue yaw jun demonio chi 'ixtic:
34—Jesús 'aj Nazaret, 'actj on̈ can on̈. ¿Tas aln ec 'ayn̈ on̈? ¿Tom tzach jaw wul on̈ a satcn 'el on̈? Wojtac mach ach, ach tic sic'b'ilch 'el yuj Dios, xchi win 'a 'a.
35Yuj cha, 'ix tumwj 'a win demonio chi 'ixtic:
—Tz'in xa chi, 'eln̈ 'a winac, xchi.
Yajn̈j wal cha, xtelw can 'at t'ocnjoc win yuj jun demonio cha. 'Ixta to b'i'an, x'el jun demonio chi 'a winac. Palta may jac x'i'n can winac. 36Ax eb' 'ayc' ta', caw 'ix sat sc'ojl eb' yiln jun cha, 'ix laj yal-lanc eb' 'ixtc 'a 'a:
—¿Tas laj wal yaj jun tzo'n̈ paxti tic xyal tic? A wal jun tic, caw 'ay yopiso, 'ay spoder ya'n mandar ewin demonio, 'in tz'el ewin yu'uj, xchi eb'.
37Yuj cha, c'uxn xpucl yab'xil Jesús 'a scal eb' 'anma 'a jun tzo'n̈ lugar 'a sla'nil cha.
B'oxnac 'ix sn̈i Pedro yuj Jesús
(Mt 8.14-15; Mr 1.29-31)
38'Ix 'elt Jesús 'a yol capiya cha, 'ix c'och 'a yatut Simón. Ax 'ix sn̈i Simón cha, caw tzcham 'ix yuj c'a'l yab'il. Yuj cha, 'ix tew 'och eb' 'a Jesús sec tzyac' b'oxc 'ix. 39Yuj cha, 'ix c'och lin̈n 'a stz'ey 'ix, stenn 'och wan jun c'a'l yab'il cha. Yajn̈j wal cha sicb' 'a 'ix, 'ix q'ue wan 'ix, xya'n servil 'ix eb'.
Til wal eb' b'oxnac yuj Jesús
(Mt 8.16-17; Mr 1.32-34)
40Ax 'a yic yemc'ual, c'uxn x'ijx cot eb' ya'ay 'a 'aj 'ayc' Jesús. Chucchc yab'ilal tz'i'n junjn eb'. 'Ix stzayn 'och sc'ab' 'a junjn eb'. 'Ixta to b'i'an, xlaj b'ox can eb' yu'uj. 41Til wal eb' 'aj 'ix yij 'el ewin demonio, xlaj yalnc chan̈ ewin demonio chi 'ixtic:
—Ach tic, Yunnal ach Dios, xchi ewin 'a 'a.
Palta 'ix stenn 'och wan Jesús ewinac, ma'ix schaj paxtinc ewinac, yujto yojc xon ewinac to a Cristo.
'E'nc Jesús yal-l spaxti Dios*r* 'a yol yic Galilea
(Mr 1.35-39)
42Ax 'a yic sacb'i, 'ix 'at Jesús 'a sti 'el chon̈ab', 'ix c'och 'a 'aj may 'anma'. Palta ax eb' 'anma', xlaj 'at eb' sayq'ui, 'ix c'och eb' 'a 'aj 'ix c'och cha. Caw xtew 'och eb' 'a 'a, yujto tznib'j eb' matz 'ati. 43Palta xyaln 'a eb' 'ixtic:
—Yowlal tz'ec' wal-l pax wach' 'ab'x 'a eb' 'anma 'a jun tzo'n̈ xo chon̈ab', sec 'oj yab' pax eb', chajtl tz'aj eb' yoch 'a yol sc'ab' Dios. Yuj wal jun tic checb'iln coti, xchi 'a eb'.
44Yuj cha, x'ec' yalnc 'el spaxti Dios 'a junjn capiya 'a yol yic Galilea cha.
Biblia Chuj San Sebastian © Sociedades Bíblicas Unidas, 1999.