San Mateo 7
7
Ná käꞌan yo xaꞌa kuachi inka naꞌa
(Lc. 6:37-38-41-42)
1Saa ndi̱kaꞌan Jesús káchi ra saa:
―Känaꞌa un xaꞌa inka naꞌa, ta ni Ndioxi ta ïkan ra saa xiꞌin un. 2Tá kuꞌva káꞌan un xaꞌa inka naꞌa, saa ikan Ndioxi xiꞌin un. Mií kuꞌva xíniñuꞌu un xiꞌin na, kuniñuꞌu ra xiꞌin un. 3¿Ndachu ndíꞌi ni ini un xaꞌa miꞌí loꞌo ndíkaa nuu na taꞌan un? ¿Ta köo kíꞌin un kuenta xaꞌa nduku chee ndíkaa nuu mií un? 4Tá tu ndíkaa iin nduku chee ni nduchi nuu mií un, ta ¿unkua ikan un kaꞌan un xiꞌin ñani un: “Ñani, taxi loꞌo ná tava i mií loꞌo ndíkaa nuu un”, kachi un xiꞌin ra? 5Xiꞌna xíniñuꞌu un tava un nduku chee ndíkaa nuu un, saa kuchiñu koto vaꞌa un, tava un miꞌí loꞌo ndíkaa nuu ñani un. ¡Ndachu uvi ni ini un!
6’Täxi ndo ñaꞌa i̱í ndaꞌa kiti tina, koto ndo ndiko koo ri tiin ri ndóꞌo̱. Ta ni ya kuika kúu mií ndo, ta käta ndo ya nuu kiti kini, koto ka kuañu ndoso ri ya.
Ndá kuꞌva nduku yo nuu Ndioxi
(Lc. 11:9-13; 6:1)
7Saa ndi̱kaꞌan Jesús, káchi ra saa: ―Ndúku ndo ñaꞌa ya xíniñuꞌu ndo nuu Ndioxi, ta taxi ra ya ndaꞌa ndo. Saa ndinduku ndo ñaꞌa nuu ra ta niꞌi ndo ya. Kani ndaꞌa ndo yeꞌe, ta kuna ra ya nuu ndo, kiꞌvi ndo. 8Saa chi ndiꞌi naꞌa ndúku ñaꞌa kúmani nuu na, nuu Ndioxi ta níꞌi na ya ndúku na nuu ra, ta ndiꞌi na ndúku ñaꞌa nuu ra ta níꞌi na ya ndúku na, saa ndiꞌi na káni ndaꞌa yeꞌe, ta xúna ra yeꞌe nuu na. 9Tá kúu mií ndo, na íyo iin seꞌe, tá ndúku na xita vaꞌa kuxi na nuu ndo, ta ¿maa táxi ndo yu̱ú kaxi na? 10’Án tá ndúku na tiaka nuu ndo kuxi na, ta ¿án tíin ndo iin kiti ko̱ó ta táxi ndo ri ndaꞌa na kaxi na? 11Va ni ndóꞌo̱ ivi kuachi ku ndo, ta xíni ndo taxi ndo ñaꞌa vaꞌa ndaꞌa seꞌe ndo. Ta ndisaa ka vi Iva yo Ndioxi ra íyo nuu ndivi, taxi ra ya vaꞌa ndaꞌa na ndúku ñaꞌa nuu ra.
12’Yakan tá kuꞌva kúni ndo ikan naꞌa ya vaꞌa xiꞌin ndo, saa xíniñuꞌu ndo ikan ndo ya vaꞌa xiꞌin na. Saa kua xáa súvi ndo ley ya ta̱a ra Moisés xiꞌin nda profeta xinaꞌa ―káchi Jesús xiꞌin na.
Ichí nuu kutaku naꞌa xiꞌin Ndioxi
(Lc. 13:24)
13Saa ndi̱kaꞌan ka Jesús xiꞌin na, káchi ra saa:
―Xaꞌa ndo ndee ya kiꞌvi ndo yeꞌe ya táñu ni. Saa chi íyo inka ichí ya ndíka ni, ta ndíka ni yeꞌe ya, ta ichí yóꞌó kuaꞌan ya nuu ndiꞌi xaꞌa naꞌa, ta kuaꞌa ni naꞌa kuaꞌan ichí yóꞌó. 14Ta táñu ni yeꞌe xiꞌin ichí kuiín ya kuaꞌan nuu kuchiñu koo naꞌa kutaku na xiꞌin Ndioxi, ta loꞌo ni naꞌa níꞌi ichí táñu yóꞌó, ta ndíkun na ya ―káchi Jesús.
Vaꞌa ndikuni yo nda vata tá kuꞌva ndíkuni yo itun kuiꞌi
(Lc. 6:43-44)
15Saa káꞌan tuku Jesús xiꞌin na, káchi ra saa:
―Kuenta ni koo ndo chi íyo nda profeta nda vata, nda káꞌan síkaꞌán Ndioxi ini nda kaꞌan nda tuꞌun yuꞌu ra. Ndíkani ini ndo xaꞌa ya luvi ni sínaꞌa nda ta vaꞌa ni nda káꞌán ndo, chi íin nda tá kuꞌva íyo kiti levo vita ni ini. Sundi kuenta ni koo ndo chi süvi ya ndaa kua íin nda saa, nda tá íyo iin kiti ndivaꞌi kueꞌe ni va saa íyo ini nda. 16’Ta vaꞌa ndikuni ndo nda xaꞌa ya íkan nda. Tá íkan nda ya väꞌa ta saa kundaa ini ndo xiꞌin nda, süvi nda sínaꞌa tuꞌun Ndioxi ku nda. Chi tá kúu itun iñu ta küvi kana kiti uva ndaꞌa nu, án kiti higo, ta küvi kana ri ndaꞌa itun viꞌnda. 17Saa tu itun vaꞌa, ta kuiꞌi vaꞌa kúun ndaꞌa nu, ta ítun väꞌa ta kúun kuiꞌi väꞌa ndaꞌa nu. 18Ndiꞌi itun vaꞌa ta küvi kuun kuiꞌi väꞌa ndaꞌa nu, ni itun väꞌa ta küvi kuun kuiꞌi vaꞌa ndaꞌa nu. 19Tá kúu ndiꞌi itun köo kúun kuiꞌi vaꞌa ndaꞌa, ta taꞌnda nu. Ta saa kuꞌun nu kee nu nuu ñu̱ꞌu̱ koko nu. 20Tá íyo itun xiꞌin kuiꞌi, saa íyo naꞌa xiꞌin ñaꞌa ya íkan na. Tá kuꞌva ndíkuni yo itun kuiꞌi, saa ndikuni ndo nda vata xaꞌa ya vata íkan nda ―káchi Jesús xiꞌin na.
Na kiꞌvi koo xiꞌin Ndioxi
(Lc. 13:25-27)
21Saa káꞌan tuku Jesús, káchi ra saa:
―Íyo naꞌa káꞌan xiꞌin i: “Yóꞌo̱ ku ra chee, ra xáꞌnda chiñu nuu nde”, káchi na xiꞌin i. Sundi süvi ndiꞌi na ikán ku na kiꞌvi koo nuu xáꞌnda chiñu Ndioxi. Ndisaa na xáa súvi ya káꞌan Iva i Ndioxi ra íyo nuu ndivi ku na kiꞌvi koo xiꞌin ra. 22Kivi vaxi tá ná xaa nani Ndioxi kuachi xiꞌin na ñuu ivi, ta kuaꞌa ni na kaꞌan xiꞌin i, kachi na saa: “Tata, ndi̱xika nde ndi̱kaꞌan ndoso nde tuꞌun un xiꞌin naꞌa, ta xiꞌin kivi un ta̱va nde tachi nduvaꞌa kúu mií na ta suvi ni xiꞌin kivi un i̱kan nde yatuꞌun xiꞌin na”, kachi na. 23Ta yeꞌe ndikuiin i kaꞌan i xiꞌin na, kachi i saa: “Nda iin ichí köo ndóꞌo̱ ndi̱xini i, kuátaꞌa ndo nuu i, saa chi süvi ndóꞌo̱ vaꞌa ku ndo”, kachi i xiꞌin na ―káchi Jesús xiꞌin na.
Uvi nuu kuu na ñuu ivi
(Lc. 6:47-49; Mr. 1:22)
24Saa ndi̱kaꞌan tuku Jesús xiꞌin na, káchi ra saa:
―Ná ndituꞌun i xiꞌin ndo ndá kuꞌva íin na xíni soꞌo tuꞌun káꞌan i, nda tá káa iin taa ra ndíchi xiní, ra si̱kuaꞌa veꞌe sata kava yu̱ú teꞌe ni, saa íin na. 25Ndee ni ku̱un savi sata veꞌe ikán, ta xa̱ꞌnu ni nduta tañuꞌu xaꞌa ya, saa ka̱ni ni tachi sata ya, ta nda iin ya köo ndi̱ndoꞌo ya xaꞌa ya ndee ni tuun tíin xaꞌa kava yu̱ú nuu ínuu ya. 26Tá íyo iin taa ra köo ndíchi xiní, ra si̱kuaꞌa veꞌe nuu yoti, saa íin na xíni soꞌo tuꞌun káꞌan i, tá köo xáa súvi na ya káꞌan i xiꞌin na. 27Ndee ni ku̱un savi sata ya, ta ndi̱xinu tañuꞌu xaꞌa ya, saa ka̱ni ni tachi sata ya, ta köo ndíkundee ya xaꞌa ya si̱kuaꞌa na ya nuu yoti, ñaa ndi̱kava ya ndi̱ꞌi xaꞌa ya ―káchi Jesús xiꞌin na.
28Tá sindiꞌi ndi̱kaꞌan Jesús xiꞌin na, ta ndi̱kanda ni ini na xi̱ni soꞌo na tuꞌun ya sínaꞌa ra. 29Saa chi sínaꞌa ra, nda tá kuꞌva sínaꞌa iin taa ra kúu mií chiñu ndee ni, ta köo sínaꞌa ra tá kuꞌva sínaꞌa nda maestro nda sínaꞌa ley Ndioxi ya taa ra Moisés xinaꞌa.
Active: ©Wycliffe Bible Translators, Inc. All rights reserved.