Luk 4
4
Satan, ɔkʉ wʉ mɛkpe, asol Zisɔs
1Ndalɛsɛ Zisɔs âkiili va kɛ Ɛzɔl yɛ Zodan, Mʉndʉ wʉ Ofilikpamɛ alɛ nɔnʉn, atɛŋɛ ɔn kɛ oci wʉ ɔlɛ kɛ owemi. 2Wʉ Zisɔs âlɛ kini, Satan, ɔkʉ wʉ mɛkpe, asol ɔn afe ati afaalɛ. Kɛ afe ayɔɔ amemi, aya ɔmanɛ ga, izonu ɛnɔŋg ɔn kaka.
3Saŋ Satan akaŋɛ nɔnʉn ala, “Ikil yɛ wʉlɛ Wanɛ wʉ Ofilikpamɛ, kaŋɛ nɛ igonu iyee nɛ ikiil ɔyɛ.”
4Kpa Zisɔs agɔl nɔnʉn ala, “Ɔ̂saŋgɛ kɛ oŋgwe wʉ Ofilikpamɛ ala, ‘Kɛlɛ ɔyɛ oconu ɛnɛ oyel nɛ ɔnʉl álɛ ɔyɛma ga.’”
5Saŋ Satan aŋgiee za nɛ Zisɔs kɛ oci wʉ onel tɛla kɛ ago, saŋ miaŋgaŋ ase, ate ɔn ɛswaŋɛ imemi kan ɔtalɛ. 6Akaŋɛ nɛ Zisɔs ala, “Mána we ɔtavɛ kɛ ɛswaŋ iyee imemi nɛ vɛnalɛvɛ yɛsɛvanavɛ yɛ vɛ̂lɛ kini kpaa, kici yɛ ɔtavɛ vɛ ɛswaŋɛ iyee imem ɔ̂na kɛ ovo kaŋgɛghɛ. Asɔ, mawʉ nɛ ɔtavɛ vɛ mána ɔnʉl ɔmɔnɛmɔ wʉ mɛlii. 7Mána we vɛnalɛvɛ yee vimem ikil yɛ wʉcivili mɛ.”
8Zisɔs agɔl ala, “Ɔ̂saŋgɛ ala, wácivili kɛ Ɔkʉ Ofilikpamɛ owuwu, ɔnʉ oconu nɛ wácivili.”
9Satan atɛŋɛ ɔn kɛ Zelusalem, ayʉmʉ nɔnʉn kɛ oci wʉ onel kɛ ago saŋ ofo kɛ Ɛca iyɛ Ofilikpamɛ, akaŋɛ nɔnʉn ala, “Ikil yɛ wʉlɛ kɛlɛ Wanɛ wʉ Ofilikpamɛ, viŋge fan nɛ wʉ́gba kɛ ɛyaŋ. 10Kici yɛ ɔ̂saŋgɛ ala,
“‘Ofilikpamɛ ɔ́vɔl nɛ vɔzɛnda-gbalgbal ɔnavɛ
ala ɔ̃wandɛ we cuwee.
11Vákɔl we kɛ ago
ndalɛsɛ wáka-yɛsa masɛ ɔkasɛghɛ kuŋgughu kɛ igon ga.’”
12Zisɔs agɔl ala, “Ɛmʉ iyɛ Ofilikpamɛ ɛkaŋɛ ala, ‘x-Wawaa Ɔkʉ Ofilikpamɛ owuwu kɛ mɛsol ga.’”
13Wʉ Satan âkule mɛsol ɔnavɛ ɛwaa imemi, asɛɛl ɔn kaka kɛ ɔkambɛlɛ wʉ ɛyana ɛ́kɛ-lɛ.
Zisɔs ahee ɔtʉmʉ ɔna kɛ ɛyaŋ iyɛ Galili
14Zisɔs akiil za kɛ ɛyaŋ iyɛ Galili, ɔtavɛ vɛ Mʉndʉ wʉ Ofilikpamɛ ɔ̂lɛ nɔnʉn, ɔtɛlɛ wʉ kɛ ito kɛnaghɛ ozend kɛ ɛyaŋ imem. 15Ate vɛnʉl vɛnalɛvɛ kɛ aca avo, saŋ ɔnʉl ɔmɔnɛmɔ asɛgha ɔn.
Vɛnʉl ɔtɛna Zisɔs kɛ ɔswaŋ wʉ Nazalet
16Aza kɛ Nazalet fɛsɛ ôneli ɔn. Kɛ ife yɛyeŋena, aza kɛ ɛca iyɛ vɛ Zu, ndalɛsɛ kâlɛ iyeli ɛna. Saŋ acoolu ɛsɛla, wʉ ayegh ɛmʉ iyɛ Ofilikpamɛ. 17Ɔna ɔn oŋgwe wʉ Azaya, ɔnʉl wʉ atɔwa kici yɛ Ofilikpamɛ, asaŋgɛ. Ndalɛsɛ afalɛ oŋgwe, aza fɛsɛ ɔ̂saŋgɛ ala,
18“Mʉndʉ wʉ Ofilikpamɛ awʉ namɛ
kici yɛ âcɔw mɛ ala,
mɛ̃vɔlʉ ɔtɛlɛ wʉsɛɛ kɛ nɛ vɛnʉl vɛ ɛcianɛvɛ.
Âtɛma mɛ ala mɛ̃vɔlʉ kɛ nɛ vɛnʉl vɛ ɛyaa mɛla ɔ́tɛfa vo,
nɛ ɛvɔlana vapilesi, mɛla vákɛ-yen,
nɛ iyeŋenavɛ kɛ nɛ vɛnʉl vɛ okindigh vo,
19nɛ mɛla kabi wʉ Ofilikpamɛ ɔ́wal vɛnʉl ɔnavɛ.”
20Akusulu oŋgwe wɔɔ, ana kɛ nɛ ɔnʉl wʉ ɔtʉmʉ kɛ ɛca iyɔɔ, saŋ acaal kɛ ɛyaŋ. Vɛnʉl omwem vɛ ɔ̂lɛ kɛ ɛca ɔpɛma asi kɛ ɔn. 21Saŋ ahee ɛkaŋana navo ala, “Amʉ ayɛ mɛyegh kɛ Oŋgwe wʉ Ofilikpamɛ ayɔɔ âva cɛb kɛ asi ayunu.”
22Vɛnʉl omwem ɔtɔw asɛghɛ kɛ ɔn, ɔyaaŋɛ kɛ ɔtɛlɛ wʉsɛɛ wʉ osime kɛ uno ɔna. Ofii ala, “Kɛlɛ wanɛ wʉ Zosef awee ga?”
23Zisɔs akaŋɛ navo ala, “Cɛb-cɛb nátɛfa nini mɛ ɛkan yee, ‘Ɔnʉl wʉ akʉsa vɛnʉl, ãkʉsʉ ɔmɛnɛ ɔna!’ Návɔl nini mɛ kpaa anu ala, ‘Yeli fan ɔswaŋ owuwu, vɛnalɛvɛ yɛ sɛŋgwa ala wʉ̂yel kɛ Kapanʉm yɔɔ.’”
24Aza isi avɔl ala, “Mɛvɔlā anu kacɛb mɛla, ɔmɔ agɔlā ɔnʉl ɔmɔnɛmɔ wʉ atɔwa kici yɛ Ofilikpamɛ kɛ ɛyaŋ ɛna ɛŋga ga. 25Cil nini anu ala, oke-kusevi ɔlɛ-lɛ kɛ Iselel kɛ cɛŋ kɛ ɔkambɛlɛ wʉ Ɛlazia. Kɛ ɔkambɛlɛ wɔɔ, ɔvɛla ɔna ga anyʉmʉ ataalɛ nɛ ɛtɛnd, asɔ ɔmɔnɛmɔ fan ɔtalɛ ɔwasɛ wee, akol ɔyɛ wʉ áya nɛ ɔ́kɛma ɔn ga. 26Kpa Ofilikpamɛ ɔtɛma ɔn kɛ nɛ ɔmɔ vo ga, kpa kɛ nɛ oke-kuse wʉ asime kɛ ɔswaŋ wʉ Zalɛfat kɛ ɔtalɛ wʉ Sidon. 27Vɛnʉl vɛ ɛmanda ɔ̂lɛ kɛ Iselel kɛ cɛŋ kɛ ɔkalaka wʉ Ilisia, ɔnʉl wʉ atɔwa kici yɛ Ofilikpamɛ, kpa Ofilikpamɛ ɔkʉs ɔmɔ vo ga. Ɔkʉs kɛlɛ Naman kɛ ɔtalɛ wʉ Siliya.”
28Vɛnʉl omwem vɛ ɔ̂lɛ kɛ ɛca iyɛ vɛ Zu, wʉ ɔŋgwa asɔ, asɛma acɔ vo adaal, 29ɔmʉwa ɛsɛla, ɔkʉŋgʉsʉ ɔn kɛ ɔswaŋ ovo. Ɔtɛŋɛ mʉwa nɔnʉn kɛ ɛzwaŋ yɛ kɛ ɛkɔŋgʉ iyɛ ôtumu ɔswaŋɛ ovo, ndalɛsɛ váta ɔn kini. 30Kpa Zisɔs awo kɛ atɛŋatɛŋɛ ovo, amʉwa.
Zisɔs asimi mʉndʉ wʉcɔcɔ
31Ife ɛmɔ Zisɔs asen za kɛ Kapanʉm, ɔswaŋɛ ɔmɔ kɛ ɛyaŋ iyɛ Galili. Kɛ ife yɛyeŋena ahee iteena vɛnʉl. 32Kasɛva vɛnʉl kaka kɛ ɔmanɛ kɛɛ atee, kici yɛ ɔtɛlɛ ɔna ɔ̂lɛ nɛ ɔtavɛ.
33Kɛ ɛca iyɛ vɛ Zu, ɔnʉl wʉ mʉndʉ wʉcɔcɔ ânyɔlʉ ɔn kɛ ɛyʉl, akoo gbaŋ kɛ nɛ Zisɔs ala, 34“Eey! Ini wʉliye kan nɛ asu, Zisɔs wʉ kɛ Nazalet? Wʉ̂va kɛ wʉ wáyɛva asu? Mɛcil otu ɔnʉlʉ wʉ wʉlɛ. Wawʉ kɛ ɔnʉl wʉ Ofilikpamɛ ɔtɛma, wʉ ayele ɛcɔcɔɔ ga.”
35Zisɔs alʉwa nɔnʉn ala, “Caal sweŋ! Sime kɛ ɛyʉl ɛna!” Mʉndʉ wʉcɔcɔ ata ɔnʉl wɔɔ kɛ ɛyaŋ kɛ asi ayɛ vɛnʉl omwem, saŋ asime mʉwa wʉ ayel ɔn ɔmanɛ ga.
36Ɛyʉlʉ ɛcia vɛnʉl omwem vɛ ɔ̂lɛ fini, ɔkaŋɛ nɛ valindi ala, “Ini ŋgɛghɛghɛ ɛnɛ ɛlɛ kɛ amʉ ayɛ ɔnʉl wee? Anaā mʉndʉ vacɔcɔ obe nɛ ɔtavɛ, nɛ ósime mʉwa.” 37Asɔ, ɔswaŋɛ ɔmɔnɛmɔ wʉ ɔ̂lɛ kpʉmbɛlaŋ, vɛnʉl ɔvɔl valindi vɛnalɛvɛ yɛ Zisɔs âyeli.
Zisɔs akʉs vɛnʉl cɛŋ
38Wʉ Zisɔs âmʉwa kɛ ɛca iyɛ vɛ Zu kɛ ife yɔɔ, aza kɛ ɔswaŋ wʉ Saimʉn. Akol ɛŋgwan wʉ okeyi wʉ Saimʉn sɛ alɛ awaŋgɛ kpi-kpi, ɔkɔl uno nɛ Zisɔs ala, ãkʉsʉ ɔn. 39Aza-coolu kɛ ɛfan iyɛ ɛnaŋgɛghɛ, alʉwa nɛ awaŋgɛ wɔɔ, akule. Saŋ fini, ahee ikulena vo ɔyɛ.
40Wʉ ɛyaŋgɛ ikule zaa, vɛnʉl ɔva nɛ vɛnʉl ovovu omwem vɛ ɔ̂lɛ nɛ vawaŋgɛ kɛ itu-itu. Zisɔs apɛma avo ana kɛ ɛyʉl iyɛ ɔnʉl ɔmɔnɛmɔ wʉ awaŋga, akʉs ɔn.
41Mʉndʉ vacɔcɔ kpaa osime kɛ ayʉlʉ ayɛ vɛnʉl cɛŋ, ɔ̂lɛ kɛ ɛliaana ala, “Owe kɛlɛ Wanɛ wʉ Ofilikpamɛ!” Kpa alʉwa navo, ana ɛyana ala õvuu ɛmʉ ga, kici yɛ ôcil ala ɔn ɛnɛ alɛ Ɔkʉ Klais.
42Wʉ ɔsʉ ɔ̂wʉʉ nɛ odulu-dulu, Zisɔs aza kɛ owemi wʉyʉŋgʉlana. Vɛnʉl ɔ̂lɛ kɛ iliyena ɔn, wʉ ôyeni kɛ ɔn, ɔkan sɛ váyel sɛnɛ asaŋ kɛ navo ga, 43kpa akaŋɛ navo ala, “Akɛ kɛlɛ keŋ-keŋ, mávɔl ɔtɛlɛ wʉsɛɛ wʉ Ɔtʉlʉ vɛ Ofilikpamɛ kɛ ɛswaŋ iyidi kpaa. Itind yɛ Ofilikpamɛ ɔtɛma mɛ ɛnɛ ɛlɛ yɔɔ.” 44Asɔ Zisɔs azaa kɛ isi kɛ ɛvɔlana ɛmʉ iyɛ Ofilikpamɛ kɛ aca ayɛ âlɛ kɛ ɛyaŋ iyɛ Zudiya.
©️2024 Luke Initiative for Scripture Translation