Luke 19
19
Jesu nia Zacchaeus
1Jesu Jericho nángnop eq kacheyta. 2Eshina phunta qhoktey ajong piq miing tha Zacchaeus ta angta etho piq rapney tanglom angta. 3Piq aa Jesu ri utang aa ta siin ma nukta, etharin piq atong hal miqwa angta etho miqtang daqhan angta ethi rangma Jesu tha kapkhi moq angta. 4Req piq miqtang jakho náng jol eq sycamore phokbang bang kho thináng qhung eq Jesu tha siin ma tathinta, Jesu tha eshi lam sho hun lamtey angta. 5Jesu eshitáng tho sey thu atho, piq aa aluk náng siin eq Zacchaeus ma batta, “Zacchaeus, kalo haq náng kaphu, chammatakoi thaney aa nga bahim o tong ching.”
6Zacchaeus haq náng kalo kata etho rapney sungrang eq Jesu tha piq him náng solwan ta. 7Miqtang aa etha siin eq jashit rongkap eq batta, “Iri miqwa raa ashey ngarey miq him náng tong ma ka aa!”
8Zacchaeus aa lang eq Teyhungwa ma batta, “Teyhungwa tat u! Nga ilik angin chamtan aa riwang tangko raa tangshit tangma kot náng, etho nga miq ma dipkup táng ta ang ajo, ning ma takbali ahan kotnáng.”
9Jesu aa piq ma batta, “Thaney aa iri him ro lun thutapha, chammatakoi iri miqwa raa tho Abraham phi aa lí. 10Miqna Sa raa matwang angtey tang sha bima etho ning raa thalun ma thutapha.”
Cha nginti raaqshiton
(Matthew 25:14–30)
11Miqtang aa piq raaq tatchey atho, Jesu aa raaqshiton batta. Piq Jerusalem relna sey angta etho Shkewa Mungtan kalo thutapha ta miqtang aa tathinta. 12Req piq aa batta, “Ashey ajongwa angta bara alo haq náng lungwang angma kata etho him náng wey wel ma tathinta. 13Piq chuwang wey moq jakho usanga wa tang wa asi hal eq aro ro cha nginsa kot eq batta, ‘Nga thuwey phamong ling takot kang chey ro ang inn.’ 14Etharin usamhaq wang miqtang aa piq tha miiksuk ta, req ning aa thoksil tattey takat ta, ‘Í aa iri miqwa raa lungwang angma nuk mi.’
15 “Eshi miqwa tha lungwang ma ang eq wey welta. Leythu eq piq aa sanga tang tha hal eq raaqkhat kota, etho ning thima ngin takot kang thiwang chamtan kapta ta sam ma tathin ta. 16Phang wang wa tha ka eq batta, ‘Tatalteywa, ba cha nginsa ashey thiwang nga cha nginsa asi wey kap táng.’ 17Piq aa batta, ‘Daqhal thun, nang raa jaqhal sanga! Nang amaan dan na kamtey, nga nang ma asi ajong samhaq bajak táng o shing ma kopha náng.’ 18Adak sanga tha wey ka eq batta, ‘Tatalteywa, barang ashey cha nginsa thiwang nga banga cha nginsa kap táng.’ 19Eshi sanga wa thima tho piq aa batta, ‘Nang ma banga ajong samhaq kopha náng.’ 20Adak sanga tha wey thu eq batta, ‘Tatalteywa, ira ba cha nginsa tha, nga ira khatlo o thup eq shing táng. 21Nga nang ma ucho ang phang chammatakoi nang raa rapney aheng miq. Nang aa shing mu sha tunsom u etho nang aa bara won mu angtu shiwang khan u.’ 22Piq aa eshi sanga thima batta, ‘Nang jashit sanga! Ba raaq ni raaq wang hun nga tashit phanáng! Nga raa aheng miqwa ta nang aa usam eq phu, nga shing mong sha tunsom ang etho bara nga won mong táng sha khan náng. 23Irimal ang ajo icha nginsa tang thi nang aa ngin shing ching na thajoq shing mu chamlang ma angtu? Thajoq shing eq tu jo nga iriwang ahan ngin kap wang táng.’ 24Etho piq aa eshina rong langta tang thima batta, ‘Piq ching wang cha nginsa ni som inn etho utang sanga jakna asi cha nginsa aa eshima kot inn.’ 25Etharin ning aa piq ma batta, ‘Tatalteywa, piq ching na asi cha nginsa atha!’ 26Piq aa wey batta, ‘Nga nim ma batphang, bari ching na athatey thima ahan rapkot eq ching etho bari ching na chamtho ahung ethitey ching wang ujakna amaan dan tat ang aa sha tho thaji som ching. 27Etho, iralwa tang chamtan rong ang aa barey nga lungwang angma ning nukmoq angta, ning thaji shi ináng irel o thoksol eq tatik inn.’”
Jerusalem náng lerong tom eq nop aa
(Matthew 21:1–11; Mark 11:1–11; John 12:12–19)
28Jesu aa iri raaq tang raa bat eq Jerusalem náng ning jakho kho kata. 29Piq Olive haqkan na Bethphage etho Bethany relnáng sey thu atho, piq aa ujiphantey wani jakho takat ta, 30iri raaq raa batta: “Nimni jakho wang qhim eshináng ka shin; etho eshináng thushin jo, nimni aa ashey moksa bari kho o utang tho tat thak tong wey moq tha tuk shing atha khi shin nin. Eshi qhang eq ináng hum kat shin phin. 31Nimni ma miq eq chamlang ma qhang shin ta pit ajo, piq shima bat shin, ‘Tangteywa tachu aa.’”
32Ningni lamna ka chey atho eshináng thu eq Jesu aa ningni ma chamal ta batta thimal hun kapta. 33Ningni aa moksa thabon atha qhang atho tangteywa ningni thima batta, “Nimni aa iri chamma qhang shin?”
34Ningni aa thawel batta, “Tangteywa tachu aa.” 35Etho ningni aa moksa tha Jesu ching thináng hum katta. Ethi jio ning aa khat tha chok eq mokkho tho shing eq Jesu tha ethikho tho tatong ta. 36Piq ukat sey ang chey atho, miqtang aa khat tha lam o rong damta.
37Piq Jerusalem relnáng sey thu atho, lam tha olive haqkan khung na angta, ujiphantey tang daqhan rong thawan thu eq ning aa chamlang patja jaksom khita tang thima Shkewa ma kechu ajong kot eq ring eq jajong aa tasapsey ta: 38“Shkewa lungwang ma sunmaan ko aa bara Teyhungwa miing o thutapha! Mungtan na nungmay etho Shkewa ma phun amun cham ang aa!”
39Etho chamtey tey Phorisi tang miq waan thiwang Jesu thima batta, “Tatalteywa, ba jiphantey tangma shu shu eq tong ma bat u!”
40Jesu aa thawel batta, “Nga nang ma batphang iri tang raa shu shu ang ajo tim aa long tang raa wey ring na.”
Jesu Jerusalem ma qhap aa
41Piq ajong samhaq relnáng sey thu atho, samhaq tha siin eq qhapta, 42etho batta, “Nungmay rangma thaney aa chamlang som ching aa ta nim aa samtin o daqhal ang wangta! Etharin thanga ethitang tha nim aa khimin! 43Rangham sha thupha na baluk o nim ralwa tang aa longpal hun eq nim thaji sha timchak phanin, hangko thabali wang nim sha tangchak eq sakchak phanin. 44Ning aa nim thaji raa etho nim pall mongna miqtang chamtan sha tho tashit chak phanin; tim aa long ashey tho khakla katáng na shing moq angna chammatakoi Shkewa nim thalun ma thupha rangham tho nim aa chamtho sam min ang tin.”
Jesu rangnuk him náng ka aa
(Matthew 21:12–17; Mark 11:15–19; John 2:13–22)
45Etho Jesu rangnuk him náng ka eq eshina thangsang tey tang ang aa tha phanta, 46Ning thima batta, “Ira Asang likwit na taka aa ‘I rangnuk him sha romtam him ta raaq na’ etharin nim aa ira ahut apang tang tapu ma kaley tin.”
47Salwet Jesu aa rangnuk him náng ka eq tatal ta. Ajong tingwa tang, Thong tataltey tang, etho solwa tang aa piq tha tatik ma bita. 48Etharin ning aa irimal somma chamtho kap moq angta, chammatakoi thaji miqtang aa piq tung aa raaq battan aa sha tin ko eq tat tey tang chen angta.
CC BY-NC-ND 4.0