Luke 16
16
Aso alat ngin shingtey
1Jesu aa ujiphantey tang ma batta, “Tanglom washey ma ulik angin shingtey sanga angta. Piq aa tanglom wa ngin tathun aa ta tangteywa aa tatta. 2Ethima piq aa ngin shingteywa tha hal eq batta, ‘Nga batung araaq miq ching wang iri chamta kap tat ang? I lik angin wang nang aa chamlang somlo tu thi nga ma batphu chammatakoi iri jio nang i ngin shingtey ta thamiing mu sey angnu.’ 3Ungin shingteywa aa tathinta, ‘I tangteywa nga jaksomlot wang ulat sey chak phanáng. Nga thanga chamlang sey náng? Nga haq khitma rongmoq etho dantun ma rakri ang. 4Thanga nga chamlang som ching atha nga usam eq ang. Irimal ang ajo ijaksom raa ahung sey angna, nga ma inokwa tang atha barey nga ning him o tatong phanáng.’ 5Req piq aa eshi miqtang thaji tha halta barey utangteywa jakwang ngin rong namta. Piq aa jakho wang wa thima phang pitta, ‘I tangteywa jakwang nang aa chamtan namtu?’ 6Piq aa batta, ‘Shashey ting olive naman.’ Ngin shingteywa aa piq thima batta, ‘Ira ba liklo. Nang aa iri som eq rokbanga ting ta kaley ka u.’ 7Ethi jio piq aa jee wang wa thima wey pitta, ‘Nang aa chamtan namtu?’ Piq aa batta, ‘Tuk hajatshey ban.’ Ngin shingteywa aa piq thima batta, ‘Ira ba liklo. Nang aa shaashat tuk ta kaley ka u.’ 8Iri rangma eshi tangteywa aa ngin shingteywa tha jashit somlo eq tho aso alat ta tasungsap ta; chammatakoi alit alang na tongtey miqtang wang eq tho iri mingkang haqna tongtey tang atho mingkang jaksom na rapney aso alat rong sompey aa.”
9Etho Jesu aa batta, “Iri rangma nga nim ma batphang: iri mingkang haq wang tanglom tang jamoq karok kara tong inn, etho thaji raa uthun sey ang ajo ning aa nang baluk o tho thun moq ang aa thi him náng cham hal phu. 10Bari miq rey aming jaksomlot sha jaqhal eq somlo na, piq aa ajong jaksomlot tang sha tho jaqhal eq hun somlo na; bari miq rey aming jaksomlot o hutdip eq aa sha ajong jaksomlot otho hutdip hun eq na. 11Iri rangma, nim aa iri mingkang haq ngin raa jaqhal eq shinghung min ang inn jo nim aa asing ngin tang sha chamal ko nin? 12Etho adak miqtang tangwang o nim aa hanpey inn ta jin takhimin ang inn jo bara nim rang sha nim ma utang eq ko pha nin?
13 “Utang eq tho tangtey ani qhawa ma jin ang moq angna. Piq aa ashey sha miiksuk eq na etho washey shima tinmat eq na; etha ang moq o ang ajo, piq ashey jaktáng o jaqhal eq tong na etho washey tha shingchak eq na. Nim sha Shkewa ni likti ngin sang thani qha ma jin ang min ang nin.”
Jesu raaq wan aa
(Matthew 11:12,13; 5:31,32; Mark 10:11,12)
14Phorisi tang aa iri raaq tang raa tat eq, ning aa Jesu raaq thima titngit kung ta, chammatakoi ning ngin ma tinma ta. 15Jesu aa ning ma batta, “Nim raa hun miqtang jakho o nim ni nim ma jaqhal takhi inn etharin Shkewa nim tinmong sha usam eq phin. Chammatakoi miqtang eq barima jaqhal tathin aa sha Shkewa chikrik aa.
16 “Moses thong etho rangsamal tang aa phanchan sha John jungthalam nángduk angta; iri jio Shkewa Mungtan tungtang aqhal phanchan aa etho thaji irináng kachang chang aa kapha. 17Etharin thong wang aming raaq matwang sha, mungtan nia mingkang matwang ma achol.
18 “Bari miq rey uhimteynu shingchak eq adak nu sha tun kapna piq sha sathuk ta angna; etho bari miqnu raa uhimteywa shingchak ta eshi nu sha tun kap ajo eshi miq sha tho sathuk angna.”
Tanglom miq etho Lazarus
19 “Ashey tanglom miq angta barey rapney thangchan hal khat jin sampey ta etho salwet jaqhal phaksat phaksa eq tong ta. 20Eshina ashey rapney tangshit hal miq angta, piq sha Lazarus ta thamiingta, piq haan na uma chen angta etho piq tha eshi tanglom wa him kalung phang o jin thok shingta. 21Tanglom wa chamlang phaksat eq bichak aa sha tunphak náng ta piq aa utin na tathinta. Hi tang tho thu eq uma tha jin mìkta. 22Eshi tangshi wa tha utik sey angta etho rangkamwa tang aa piq tha tunsom eq mungtan na Abraham kang o tatong ta. Eshi tanglom wa tha tho utik sey angta, etho piq tha haqbung o bungta. 23Etho walmungtan na, bari katang na piq rapney tsamnang chey ta, eshiwang piq aa aluk náng tun siin atho alo na Abraham jamna Lazarus tong chey atha khita. 24Piq aa jujong aa ring eq batta, ‘Iwa Abraham! Nga ma tinshi phu, etho Lazarus aa ujakshi ni jung o tim eq iphali ri takki ma takat phu, chammatakoi nga iro walna rapney tsamnang ang.’ 25Etharin Abraham aa batta, ‘Isa, tat tasik u, nang atharang tong tok o nang ma thaji jaqhal chen kota, etho Lazarus ma thaji jashit chen kota. Thang aa piq ina jakchol wat eq tong chey aa etho nang esho rapney tsamnang ang chey u. 26Iri náng eq tho, hiqtang jaktung na ashey rapney ajong hal haqbung kha, iri wang utang tho ira jan eq ináng jin ka phamin etho eshiwang utang tho esha jan eq ináng jin ka phamin ang phanin.’ 27Eshi tanglom wa aa batta, ‘Etha otho, Iwa Abraham tinshit wang Lazarus ri iwa him náng takat u. 28Esho, ino tang wa banga. Piq ka eq ning ma bat kata ta ang ajo ning iri rapney tsamnang ro nak cham kapha.’ 29Abraham aa piq ma batta, ‘Bano tang ma battan tey Moses nia rangsamal tang atha; bano tang aa ning raaq sha utat eq ching.’ 30Tanglom wa aa batta, ‘Iriwang ang moq angna, iwa Abraham! Etharin chamtey utik sey ang jio wey lun eq ning ma battan ajo ning ngarey wang kaley na.’ 31Etharin Abraham aa batta, ‘Ning aa Moses nia rangsamal tang raaq tha tho tat moq sey ang ajo, chamtey utik jio weylun eq tat battan ajo tho tat moq sey angna.’”
CC BY-NC-ND 4.0