John 19
19
1Pilate aa Jesu tha thalo eq kantha o ru khak eq thawat ta. 2Ralkoltey tang aa su khopok hun eq piq kho tho tapok ta, etho piq ma asimkhat tasam ta. 3Piq relnáng ka eq rong raaq ta, “Jehudi tang lungwang alo cham tong u!” Etho piq tha báng watta.
4Pilate ran náng thalat eq miqtang ma batta, “Siin inn, nga piq wang cham ajat khi mong ta nim aa sam rangma nga piq raa nim relnáng wey sol kat taphang.” 5Jesu sut khopok etho asimkhat tha sam eq ran náng thalat katapha. Pilate aa ning ma batta, “Siin inn! Iri miq raa.”
6Ajong tingwa tang etho rangnuk him bantey tang aa piq tha khi atho, ring eq batta, “Piq ni bólq o botchak u! Piq ni bólq o bokchak u!”
Pilate aa ning ma batta, “Nim aa hun som eq ból o botchak inn chammatakoi nga piq ro aja khi mong.”
7Jehudi tang aa piq ma thawel batta, “Piq raa jin tikwat ma í ma tho thong atha, chammatakoi piq aa piq ni piq sha Shkewa Miqwasa ta batta.”
8Pilate aa iri raaq tang raa kap tat atho, piq rapney wey chota. 9Pilate himmong náng wey solwan eq Jesu ma pitta, “Nang bari wang aa?” Etharin Jesu aa chamtho bat moq angta.
10Pilate aa Jesu ma batta, “Nang i jamoq wan phamu i? Nga nang raa jin qhap eq phanáng, etho bólq o jin bot eq ma tarong atha ta nang aa sam mu i?”
11Jesu aa thawel batta, “Rangwang tarong komoq angta jo nang ma ikhom o som ma chamtho ahung ang wangta, ethirangma barey nga bajak náng kota, ning ngarey tha ahan.”
12Eshi rangham wang Pilate aa piq tha qhap ma tathin chey ro eq ta, etharin Jehudi tang ring eq batta, “Nang aa piq raa qhapchak ujo, nang Rome ajong lungwang nokwa ang mu. Utang eq piq ni piq ma lungwang ta raaq aa, piq sha Caesaer ralwa.”
13Iri raaq raa tat atho, Pilate aa Jesu tha ran náng solkat ta etho longdàm katang khaphung tongching na tong ta. Longdàm shima Hebrew raaq na Gabbatha ta raaq aa. 14Eshi saal tha Ulit kut aa kan ma kacha saal angta, etho rangham tha rangney angta. Pilate aa Jehudi tang ma batta, “Siin inn, ira nim lungwang.”
15Etharin ning uring angta, “Piq ri solkat u, piq ri sol kat u, bólq o botchak u!”
Pilate aa ning ma batta, “Nga nim lungwang raa bólq o botchak ang i?”
Ajong tingwa tang aa thawel batta, “Í ma lungwang ashey dang etho piq tha Caesar.”
16Etho Pilate aa Jesu tha, bólq o botchak rangma ning jak náng kochak ta.
Jesu bólq o botchak aa
(Matthew 27:32–44; Mark 15:21–32; Luke 23:26–43)
Ning aa Jesu tha sol chuwan ta. 17Jesu ubólq tha som eq, “Miqkho haq” náng thula kata. Hebrew raaq na iri haq raa “Golgotha” ta raaq aa. 18Eshina ning aa piq tha etho piq jamoq ani miq tha bólq na bot ta, ashey tha aqhit na, etho ashey tha aqhat kona etho Jesu tha jaktung na. 19Pilate aa bólq khona lik wit eq tharap ta. “Nazareth wang Jesu, Jehudi tang Lungwang” ta eshina thawit ta. 20Daqhan Jehudi miqtang eq esha phat ta, chammatakoi Jesu bólq na botta katang tha ajong samhaq relna angta; etho lik ka tha Hebrew raaq na, Latin raaq na etho Greek raaq na taka ta. 21Jehudi ajong tingwa tang aa Pilate ma batta, “‘Jehudi tang Lungwang’ ta nak wit u, etharin irimal wit u, ‘Iri miq rey batta, nga Jehudi tang Lungwang.’”
22Pilate aa batta, “Nga wit táng sha, wit táng sey.”
23Ralkoltey tang aa Jesu tha bólq na bot jio, piq khat tha som eq phal bali ma ching eq phalro ro ning aa somta. Ethi jio ning aa rangkho samqhong tha somta bara aluk wang anim náng thula chíng ta. 24Ethirangma ning jaktung thina wanta, “Hiqtang aa ira chíng mi, etharin utang ma ang ching shi iro lik kana sak i.” Ira Asang likwit na taka ta sha tahom rangma angta,
“Ning aa ikhat tha ning jaktung na phal ta,
etho rangkho samkhong thina lik tha ka eq sakta.”
Ethirangma ralkoltey tang aa iri jaksom tang raa somta.
25Jesu bólq rel shina unu etho utok, Clopas himteynu Mary, Mary Magdalene lang ta. 26Jesu bara ujiphantey ma tinma ta, etho unu lang atha khi atho, unu ma batta, “Miqnu siin u, ira ba sa miqwasa.”
27Piq aa ujiphantey ma batta, “Siin u, ira ba nu!” Ethi jiwang sey eshi ujiphantey they piq tha uhim náng sol chuwan ta.
Jesu tik
(Matthew 27:45–56; Mark 15:33–41; Luke 23:44–49)
28Ethi jio, Jesu aa thaji tha tahom angta ta samta etho Asang likwit na chamta batta sha tahom angma batta, “Nga junglal ti ang.”
29Eshina chik shey aqhi suti chi shingta, ning aa khat tom tha sutichi sho tim eq hyssop uking sho shing eq unung o tatit ta. 30Jesu aa sutichi tha ling eq batta, “Tahom sey angta.”
Etho Jesu aa kho tha thanim eq utsija tha shingchak ta.
Jesu sám thina su aa
31Eshi saal sha Sabbath ma kacha saal angta etho hanphung sha bólq na ang moq angma, thatom jaa shi tukwat eq bólq wang cham som kat pha ta Jehudi tang aa Pilate ma batta, chammatakoi eshi Sabbath saal tha ajong Sabbath saal angta. 32Ralkoltey tang ka eq, phang miqwa nia adak miqwa jaa tha tukwat ta bara Jesu jamoq bólq na botchak ta. 33Etharin Jesu relna sey thu atho, Jesu tik sey angta tha khi atho, piq jaa tha tukwat moq angta. 34Etharin ralkoltey tang ashey they paq eq usám tho suta, ethiwang jaktha tahi ni jung thalat ta. 35Utang eq esha khita, piq aa miikkhi kochey aa, etho piq miikkhi tha asing, piq aa asing batta ta piq aa usam eq aa, irimal ang ajo nim aa uhan eq nin. 36Iri raaq raa Asang likwit na batta tha tahom ang rangma angta, “U king aa rang tha tukwat moq angna.” 37Adak likwit na tho ubat eq ta, “Bara paq eq usám o sutta sha miqtang aa piq chíng konáng siin na.”
Jesu tha bung aa
(Matthew 27:57–61; Mark 15:42–47; Luke 23:50–56)
38Arimathea wang Joseph Jesu jiphantey angta etharin piq shu shu eq ujiphanta angta. Piq Jehudi tang ma ucho angta. Joseph aa Jesu máng sha som kat ma Pilate ma batta. Pilate aa piq ma som kat u ta batta. Etho piq ka eq umáng tha som chuwan ta. 39Jakho Jesu jamoq rangpal o katteywa, Nicodemus tho Joseph jamoq kata. Piq aa tuk roktom tan rol atim angam chi etho myrrh nia aloes thanol atha som kat ta. 40Ning aa Jesu máng tha etho Jehudi tang thong aa ley mal piq tha atim angam chi jamoq anup qhaklo eq jup ta. 41Jesu bólq na botta katang sha, ashey pal angta, etho eshi pal shina ashey anal long bung angta, eshina utang máng tho shing moq angta. 42Eshi saal tha Sabbath saal jakho angta etho ning aa Jesu tha eshina bung ta, chammatakoi eshi longbing tha arelna angta.
CC BY-NC-ND 4.0