John 16
16
1 “Nim kam wang jináng nak cham wel inn ta iri raaq tang raa batta phang. 2Ning aa nim sha synagogue tang wang latchak phanin, etho rangham thu chey pha, baluk o nim tatiktey tang Shkewa rangma nong i ta tathin na. 3Ethimal ning aa chamlang ma batna takoi ning aa Iwa tha sammoq etho nga raa tho sam moq. 4Etharin iri tang raa chamlang ma batta phang takoi rangham sha sey thupha jo nga bat taphang tang sha nim aa tasik nin.”
Asang Tsija jaksom
“Nga nim ma phang wang iri raaq tang batpha mong angta phang chammatakoi nga nim jamna ang táng. 5Etharin nga thanga i takatteywa relnáng wang chey ang; etho nim wang chamtey ngama chamtho pit pha min, ‘Nang bari náng kachey u?’ 6Nga batta phang raaq tang shima nim tin rapney shit aa. 7Etharin nga nim ma asing sing batphang, nga wàng sha nim rangma aqhal angna, chammatakoi nga wàng mong ang ang jo Rapnongtey nim relnáng kapha moq angna. Etharin nga wàng ang jo nga piq sha nim relnáng takat phanáng. 8Piq thu eq mingkang raa ngarey wang etho asing wang etho khaphung tung aa raaq wang mòl na. 9Ning ma ngarey tung aa raaq ma kha na chammatakoi ning aa ngama han phamong. 10Asing tung aa raaq wang ning ma kha na, chammatakoi nga Iwa relnáng wàng chey ang etho nim aa nga wey khipha min sey ang nin. 11Ning ma khaphung tung aa raaq wang kha na, chammatakoi mingkang lungwang raa jin phung sey ta.”
12 “Nga nim ma iri pheynáng eq tho daqhan raaq bat ching, etharin nim aa thanga jin nán min. 13Baluk o Asing Tsija kapha jo, nim raa thaji asing o solkat phanin, chammatakoi piq tinuk o raaq moq angna, etharin piq aa chamlang tat na esha raaq na, etho ukat ang phana raaq sha nim ma batko na. 14Piq aa nga ma phun amun kona, chammatakoi piq aa iching wang chamlang tat ta tha nim ma bat na. 15Chamlang Iwa rang, eshi tang thaji sha irang; eshirangma nga bat taphang, piq aa iching wang somlo eq nim ma bat na.”
Tsamnáng sha sungrang ma kaley
16 “Chomrey jio nim aa nga khipha min sey ang nin, etho chomrey jio nga wey khipha nin.”
17Ujiphantey wang chamtey jaktung na wanta, “Piq aa hiqtang ma chamlang ta bat aa, ‘Chomrey jio nim aa nga khipha min ang phanin, etho chomrey jio nga wey khipha nin? Chammatakoi nga Iwa relnáng wang chey ang?’” 18Ning jaktung na wey wanta, “‘Chomrey jio’ ta piq aa raaq bat aa ni chamlang ma raaq aa? Piq aa chamlang ta bat aa raa hiqtang aa sammi.”
19Ning aa ngama pit ma ta ta sam eq Jesu aa ning ma batta, “Chomrey jio nim aa nga khipha min sey angpha nin etho chomrey jio nga wey khipha nin ta nga batta phang raaq shima nim jaktung na tapit pi nin i? 20Nga nim ma asing sing batphang, nim uqhap angnin etho nim lakkhuk tip eq qhap nin, etharin mingkang sungrang angna. Nim tin rapney shitna, etharin nim tsamnáng sha sungrang o kaley na. 21Miqnu baluk o no khi ma ta ajo piq tsamnang ang aa chammatakoi piq rangham sha thupha, etharin piq aa nijangsa sha jin chang aa sey ajo mingkang ro miq ashey changta ta sungrang wang eq tsamnang sha wey tasik moq sey. 22Ethimal nim thanga tsamnang inn, etharin nga nim jamoq wey tachong ang phanáng, etho nim tin sungrang wang shey tina, etho nim sungrang sha utang eq tho jinnal moq sey angna.”
23 “Ethisal tho nim aa nga ma chamtho pit pha min ang phanin. Nga nim ma asing sing batphang, nim aa Iwa ching wang imiing o chamlang chu inn jo tho piq aa nim ma kot na. 24Thanga náng thula nim aa imiing o chamtho chu min. Nim sungrang tahom ma chu inn etho nim aa ukap eq nin.”
Mingkang jin
25 “Nga iri raaq tang raa raaqshiton o batta phang, etharin rangham uthok ang chey pha, nga nim ma raaqshiton o wey batpha mong sey ang phanáng, etharin alang eq nim ma Iwa raaq bat phanáng. 26Ethisal tho nim aa imiing wang chu nin. Nga Iwa ma nim rangma batta ta bat pha mong. 27Chammatakoi Iwa hun nim ma tinmat aa, chammatakoi nim ngama tinma ang phin etho nga Shkewa ching wang thuta phang ta nim aa uhan eq tin. 28Iwa chingko wang nga mingkang náng kata phang; nga mingkang raa shingchak eq Iwa relnáng wang chey ang.”
29Ujiphantey tang aa batta, “Siin u, thanga nang aa lak eq bat u, etho raaqshiton o batmu. 30Thanga í aa usam eq i, nang aa thaji sam eq u, utang eq tho nang ma pitpi wey pha mu jakho nang aa usam eq u. Iri raaq ma í aa han eq i, nang Shkewa chingko wang thuta phu.”
31Jesu aa tat eq ning ma batta, “Thanga nim aa han eq inn i? 32Siin u, rangham tha thu chey pha, uthok sey angta pha, thanga nim thaji nga raa shingchak eq taphal eq nim ni nim him náng rong jol chuwang nin etho nga chen sey ang náng. Etharin nga chen ang mong, chammatakoi Iwa i jamna. 33Nga iri raaq raa chamma batta phang takoi nim aa nga o nungmay cham kap inn. Mingkang ro nim ma tsamnáng, etharin tin thajong inn! Nga mingkang raa ujin sey táng.”
CC BY-NC-ND 4.0