Acts 7
7
Stephen raaq aa
1Etho ajong tingwa tang solwa aa Stephen ma pitta, “Ira asing i?”
2Stephen aa batta, “Iwa etho ino nia ipho tang tat inn! Hiqtang tey aa wa Abraham Haran náng ka eq tong wey moq jakho Mesopotamia na angta tho phun amun Shkewa piq ma takhita. 3Etho piq ma batta, ‘Ba mung etho ba himtey tang ni shingchak eq nga nangma bari haq raa takhi phang eshi haq náng ka u!’ 4Irimal wang piq aa Chalbean mung tha shingchak eq Haran náng tong kata. Abraham wa tik jio Shkewa piq ma ethi haq náng sol kat eq tatong ta bari haq na thanga nim tong inn. 5Shkewa Abraham ma amaan sa haq tho kot moq angta, etha o tho Shkewa piq nia phi aa lí tang ma iri haq raa konáng ta rangtum ta. Shkewa baluk o ira batta ethi rangham tho Abraham ma susa ahung ang wey ta. 6Shkewa piq ma irimal batta: ‘Ba phi aa lí tang adak mungna tong na. Eshina ning pang shabali qha angna etho ning rapney tatsamnang eq tatong na. 7Etharin ning qha ma shingtey phan tha nga khaphung náng, ethi jio ning eshi mung wang thalat eq iri mung ro nga raa shumnuk phanáng.’ 8Etho Shkewa Abraham ma hankhup qhan ma raaqkhak kot ta. Req Abraham aa Isaac chang atho saal ashat jio hankhup qhan ta; Isaac sha Jacob wa, etho Jacob sha hiqtang asi ani phan wa.”
9“Jacob miqwasa tang aa ning no Joseph ma ngel ta etho qha angma piq sha Egypt náng sang chakta. Etharin Shkewa piq jamna angta, 10etho piq aa Joseph tha tsamnang wang thalun ta. Joseph Egypt lungwang Pharaoh jakho náng thu atho, Shkewa piq ma thunglam aqhal kot ta etho lungwang piq ma unuk angta. Eshirangma lungwang aa piq tha thaji Egypt mung nia piq lungwang him o jaktáng shingtey ma hunta. 11Eshi jio Egypt nia Canaan mung thina shong aa cham angta, bara eshiwang rapney tsamnang ta. Hiqtang tey aa wa tang rangma phaksat kap moq angta. 12Egypt na phaksat atha ta Jacob aa tat ta, piq aa hiqtang tey aa wa tang sha jakho eshináng takat ta. 13Rangham adak na ning eshináng kata tho Joseph aa upho tang ma piq utang aa ta tasam ma kot ta, etho irimal wang lungwang Pharaoh aa Joseph himtey tang tha sam ta. 14Eshi jio Joseph aa uwa Jacob nia uhimtey tang bara roksanat banga angta eshi tang sha Egypt náng katma raaq thabat ta. 15Jacob Egypt haq náng kata, eshina piq nia hiqtang tey aa wa tang nia miqwasa tang tha ti ta. 16Ning hanphung tang tha Shechem náng hol katta bari haqna Abraham aa ngin wang Hamor miqwasa tang jakwang rita eshi máng bungching na ning sha bung ta.”
17“Shkewa Abraham ma rangtum tahom rangma arelna thuta tho, Egypt na hiqtang miqtang chan ta etho daqhan sey angta. 18Ethi jio, Egypt na adak lungwang angta bara Joseph tha sam moq angta. 19Piq aa hiqtang tey aa wa tang jamoq dipkup ta etho ning jamna rapney jashit dangjang ta, etho ning nijang sa tang tha tatik chak ma him wang ran náng bichak ma kachang chang aa batta. 20Ethi rangham tho Moses changta; etho piq tha Shkewa jakho na shamqhal thun angta. Japitom náng thula piq uwa him na rimta. 21Etho piq baluk o shingchak ta tho, lungwang Pharaoh miqnu sa piq tha tunsom eq usa mal tachat lot ta. 22Etho Moses ma Egypt thaji thunglam tha taphat kot ta etho piq raaq tang na etho jaksom tang na rapney cha lota.”
23“Moses baluk o pang rokbali angta; piq aa Israel pho notang jamoq chamli ang ta tha piq aa sam eq ma tathin ta. 24Egypt washey eq ning ashey jamoq jashit dangjang aa tha piq aa khita, ethirangma eshi miqwa tha nok nongta etho Egypt miqwa tha tatik chak ma mángkho chuta. 25Moses aa tathin ta, umiqtang sha thalun ma Shkewa piq tha takat ta ta miqtang aa usam eq na ta tathin ta, etharin ning aa sam moq angta. 26Saal dak o piq aa ani Israel miq thawat atha khita, etho piq aa ning jaktung o thamang ma batta, ‘Tatshin, chamma irimal thawat shin? Nim ni raa sapho ni.’ 27Etharin uwat tey washey aa Moses tha thum eq pitta, ‘Nang ma í jaktáng shingtey nia phungwa ma utang eq shingta phu? 28Baja Egypt miq tatik tu thimal nga raa tho tatik ma tathin u i?’ 29Moses aa ira tat eq Egypt wang jol eq Midian haq náng winwa mal tong kata. Eshina piq miqwasa ani changta.”
30“Pang rokbali jio, Sinai haqkan rel jatqhip na wal jung chey aa thina ashey rangkamwa takhita. 31Ira khi eq Moses rapney patja eq urelnáng rap ka eq siin kata. Etharin piq aa Teyhungwa raaq tatta, 32‘Nga raa ba tey aa wa tang Shkewa, Abraham, Isaac, etho Jacob Shkewa.’ Moses cho eq jin siin moq sey angta. 33Teyhungwa piq ma batta, ‘Ba jaaqhong ni chok u, chammatakoi bari na nang lang u ira asang haq. 34Egypt na i miqtang rapney tsamnang atha nga khi táng. Nga ning qhap ngey aa tha tat táng etho nga ning sha qhap ma thu taphang; kaphu, nga nang Egypt náng takat phang.’”
35“Iri Moses raa Israel miqtang aa ira raaq eq shingchak ta, ‘Nang ma í jaktáng shingtey nia phungwa ma utang eq shingta phu?’ Shkewa piq raa hun ning sha jaktáng o shingtey angma nia thaluntey angma Moses ma jatqhip na wal jung takhita rangkamwa tungkang o takatta. 36Piq aa ning sha Egypt mung wang latta etho Egypt mung na ashang jungna etho pang rokbali haq jatqhip kan na rapney patja nia patja maal takhi ta. 37Iri Moses rey Israel tang ma batta, ‘Shkewa nim pho notang wang nim rangma nga mal ashey rangsamal takat na.’ 38Piq aa Israel miqtang sha jatqhip na thajoq ta; piq Sinai haqkan na rangkamwa jamoq raaq wan ta etho hiqtang tey aa wa tang jamoq angta; etho piq aa atharang rollung raaq kap eq hiqtang ma kot ta.”
39“Etharin hiqtang tey aa wa tang aa piq raaq tatma nuk moq angta. Ning aa piq tha chik eq ning tin na Egypt náng wey wel ma tathin ta. 40Req ning aa Aaron ma batta, ‘Í ma rangwa tang hun kotphu barey í sol na. Egypt haq wang í soltey iri Moses aa chamlang angta tha í aa sammi!’ 41Req ning aa ashey maan shila hun eq eshi shila rel tho pinthong kot ta; etho ning aa chamli somlo aa eshirangma kut aa kan ta. 42Ethirangma Shkewa ning thiwang ngik chuwang ta; etho rangsamal tang likdap na thawit ta thimal ning aa rangwang tasey tang sha shumnuk ma shingchak ta;
‘Israel miqtang! Nim aa jatqhip na pang rokbali,
jatngam tang tha duk eq pinthong kot tin tha, irangma ang moq.
43Nim aa rangwa Molech taap tha somlo tin,
Etho nim aa tasey rangwa Rephan shila tha hun tin;
Etho nim aa eshi shila tang sha shumnuk tin.
Eshirangma nim sha qha angma Babylon haq sha thalit sol kat phanin.’”
44“Hiqtang tey aa wa haq jatqhip na tong rangham tho ning jaktung na Shkewa bulang taap angta. Shkewa Moses ma chamal hunma raaqkhat kot ta ethimal hun esha hunta. 45Ethi jio, hiqtang tey aa wa tang aa eshi bulang taap tha kapta etho ning Joshua jamoq kachey atho Shkewa ning jakho na ethi mung ral miqtang sha phan rangham tho ning aa Shkewa bulang taap sha tun som ta. Etho David rangham náng duk eshi Shkewa bulang taap tha eshina angta. 46David aa Shkewa tinmat kapta, etho Jacob Shkewa tong rangma nga ma tahun phu ta piq aa chuta. 47Etha otho Solomon aa piq rangma him tahun ta.”
48“Etharin Ajong Shkewa miq eq hunta him shina tong moq. Rangsamal aa bat aa thimal,
49‘Teyhungwa bat aa, Rangmuntan raa i tongching.
Etho mingkang raa i jaa shingching haq.
Nim aa nga ma chamal him jin hun kot phanin?
I nángtong him bari na angna?
50Iritang raa nga hun mong ang táng i?’”
51“Nim tinchet miqtang! Nim tin kaley wey min etho nim naq eq tat min! Nim aa nim tey aa wa tang mal Asang Tsija sha miiksuk inn. 52Rangsamal tang wang utang sha nim tey aa wa tahikham moq angta i? Etho ning aa Shkewa thoksil tattey tang sha tatik chak ta, barey piq asing sanga thok tung aa raaq batta. Nim aa iri asing sanga tha thalo tin etho tatik chak tin. 53Rangkamwa wang kot aa Shkewa thong tha nim aa hun somlo tin; etharin nim aa hun ira tat min ang tin!”
Stephen long eq pat eq tatik chak aa
54Jehudi rongh miqtang they iri raaq tang raa tat eq ning Stephen ma khata, etho ning aa paa tha tachik kakta. 55Etharin Stephen shey, Asang Tsija wang shey eq mungtan konáng siinta, etho Shkewa phun amun, etho Jesu Shkewa jakqhat kona lang atha khita. 56Piq aa batta, “Siin inn, nga mungtan thalak atha etho Miqna Sa Shkewa jakqhak kona lang atha khi táng!”
57Rapney jajong wang ring eq Jehudi rongh miqtang aa jak eq naq tha hopta. Etho thaji jol eq Stephen relnáng kata. 58Ning aa piq thalo eq samhaq hang náng solkat ta etho piq tha long eq patta. Etho miikkhi tey tang ning khat tang tha chok eq Saul ta miing aa jaro washey rel o shingta. 59Etho ning aa Stephen tha long eq pat chey ta, etho piq ira bat eq romtam chu chey ta, “Teyhungwa Jesu, i tsija ri tunsolphu!” 60Piq shong tong eq jajong aa hal raaq ta, “Teyhungwa, iri ngarey ri ning o nak shing u.” Etho ira bat eq piq tita.
CC BY-NC-ND 4.0