Acts 5
5
Ananias nia Sapphira
1Ananias ta ashey miqwa angta, bara uhimteynu Sapphira jamoq kara eq ning ni aa haq tha sangta. 2Etharin, uhimteynu jamoq raaq kara eq amaan dan ngin tha ning ni aa shingta etho udak ngin tha som eq apostle tang ma kot ta. 3Peter aa piq ma batta, “Ananias, nang aa batin tha Thangwa ma tashey kot eq, Asang Tsija tha chamma dip tu etho haq thang amaan tha chamma shing tu? 4Ethi pik tha sang wey mu jakho baráng angta; sang eq bara uthang tha tho baráng hun. Etha otho chamma nang aa irimal somlo u? Nang aa miq ma dip mu angtu; nang aa Shkewa ma hut dip tu!” 5Ananias iri raaq tang raa tat eq hun ngak eq tita; etho iri raaq tattey tang tha ucho angta. 6Jarowa tang aa thu eq piq máng tha khak ta etho raang o som kat eq bungta.
7Atom rangham jio uhimteynu aa chamli angta tha sammoq ang eq himmong náng wangta. 8Peter aa piq ma pitta, “Bat phu, nang nia ba himteywa eq iritan ngin o hun pik sang shin tin i?”
Piq aa batta, “Inn, ira hun kapti.”
9Req Peter aa piq ma batta, “Chamma nang nia ba himteywa aa Teyhungwa Tsija tha tari ma kashey rum wan shin tin i? Thanga bara bahimteywa bung kattey tang tha kalung kang na lang aa, etho ning aa nang raa tho sol kat phanu!” 10Kalo piq Peter jathong na ngak eq tita. Jarowa tang himmong nang wang eq piq tita tha khita, etho piq tha som kat eq uhimteywa rel o bung katta. 11Thaji mondoli etho iri raaq raa tattey tang rapney chota.
Patja jaksom somlo aa
12Apostle tang jak wang rapney patja jaksom etho daqhan maal miqtang jaktung na takhi chey ta. Thaji uhantey tang Solomon wohimbuk shina jin tachong ta. 13Adak miqtang aa ning tha rangka ta etha otho ning jamoq rum ma ucho angta, etharin miqtang aa ning tha rangka ta. 14Etho Teyhungwa ma uhantey tang daqhan miqnu nia miqwa tang thaji ning uwaan na tharum chey roq eq ta. 15Peter lamna qhing ajo ujakkhang sha ning haan khona cham tham aa ta miqtang aa atak tang tha lam náng solkat eq jibching tang etho qham tang o thawol ta. 16Jerusalem rel samhaq tang wang tho daqhan miqtang atak asa etho anaan tsija rum aa tang tha sol eq thajoq ta etho thaji tha taqhal ta.
Apostle tang tahikham
17Ajong tingwa tang solwa etho unokwa tang, bara Saddusi waan tang wang angta, ethi tang tha apostle ma rapney ngeljo ta etho ning aa chamli somma tathin ta. 18Ning aa apostle tang tha lo eq chuk náng sakta. 19Etharin rangpal tho Teyhungwa rangkamwa chuk aa thaji kalung tang tha lakta etho ran náng solkat eq batta, 20“Ka inn, Rangnuk him náng langka eq, iri anal rollung raaq tang ri thaji miqtang ma bat inn.” 21Ning aa ira tat eq, rangnap kha o Rangnuk him náng ka eq thaji miqtang ma tatal kot ta. Ajong tingwa tang solwa etho unokwa tang thu eq ning aa Jehudi rongh na wan ma Israel miqlang tang tha thajoq ta; ning aa apostle tang chuk wang solkat phin ta batta.
22Etharin chuk bantey tang ka eq chukna apostle tang ahung ta khita etho Jehudi rongh náng wey wel eq batta. 23“Í baluk o chuk náng thuti, chuk kalung tang jaqhal eq sak chol etho chuk bantey tang kalung kang na lang aa tha khiti, etharin í aa chuk kalung tang lak ti tho himmong na utang tho ahung angta!” 24Rangnuk him bantey tang solwa etho ajong tingwa tang aa ira tat atho apostle tang thi chamli angta ta ning rapney patja ta. 25Etho ashey miqwa thu eq ning ma batta, “Tat inn, nim aa bari miqtang raa chuk náng sak tin ethi miqtang aa Rangnuk himna miqtang ma tatal kotchey aa!” 26Solwa eq umiqtang jamoq ka eq apostle tang tha wey solkat ta, etharin ning aa kachang chang aa somlo moq angta chammatakoi miqtang aa long eq tho mokpat eq phani ta chota.
27Ning aa apostle tang tha wey thok sol eq Jehudi rongh o thalang ma kot ta etho ajong tingwa tang solwa aa ning ma pit pita. 28Piq aa batta, “Í aa nim ma iri miqwa miing som eq nak tatal kot inn ta bat taphi. Etharin siin inn, nim aa chamli somlo tin! Nim aa thaji Jerusalem sha tatal eq tashey tin, etho í aa piq sha tatik ti ta nim aa tathin inn!”
29Peter etho adak apostle tang aa thawel batta, “Í aa Shkewa raaq tat ching, eshi phey náng eq miq raaq tat ching ang moq. 30Nim aa bólq na Jesu tha botchak tin, hiqtang tey aa wa Shkewa piq sha utik wang wey thajey ta. 31Israel miqtang tin kaley kot ma etho ngarey wang tolchak ma Shkewa piq tha Solwa nia Thaluntey ma hun eq ujakqha kona tun shingta. 32Í iri tung aa raaq ma miikkhi kottey, etho Asang Tsija tho miikkhi kottey, bara Shkewa piq raaq tattey ma kot ta.”
33Jehudi rongh na tongtey miqtang aa iri raaq raa tat eq rapney khata ethi rangma ning aa iri apostle tang raa tatik eq chak ma tathin ta. 34Jehudi rongh na Gamaliel ta ashey Phorisi miq angta bara thong tataltey etho thaji miq eq piq tha rangka ta. Piq shat eq apostle tang tha raan náng solkat ma batta. 35Etho piq aa rongh na batta, “Israel miqtang, iri miqtang jamoq chamli som ching shi jaqhal tathin eq somlo inn. 36Chammatakoi saal shey ni jakho Theudas ta ashey miq nim jaktung na atha, piq ni piq sha ajong miq ta batta etho shabali miqtang piq jamna angta. Etharin, piq tha tatik chak ta, etho chamtan miqtang aa piq jiphanta, ning thaji tha matwang angta. 37Ethi jio, miing wit neynap tho Galilee wang Judas langta; piq aa daqhan miqtang tha ujiphantey ma kot ta, etharin piq tha tho tatik eq chak ta etho ujiphantey thaji tha phal chakta. 38Eshirangma nga nim ma batphang, iri miqtang wang alo na tong inn. Etho ning chen shingchak inn. Iri tinthin raa tia jaksom raa miqtang chingko wang ang ajo matwang angna. 39Etharin Shkewa wang ang ajo, nim aa ning sha jin min ang nin. Nim Shkewa jamoq thawat inn thimal kot ching ang moq.”
Thaji Jehudi rongh miqtang na Gamaliel raaq tha tatta. 40Ning aa apostle tang tha himmong náng halta etho kan eq watta. Jesu miing o somlo eq miqtang ma bat moq angma ning ma batta; etho ning tha kat ma kot ta. 41Jehudi rongh wang ran náng thalat eq, apostle tang tin sungrang ta chammatakoi Shkewa aa ning ma Jesu miing o tsamnang rangma witta. 42Etho salwet, rangnuk him na etho miq him na, ning aa Jesu raa hun Khristo ta tungtang qhal phanchan ta.
CC BY-NC-ND 4.0