लूका 10
10
बहत्तर चेल्लैं का घलाया जाणां
1इसके बाद्दाम प्रभु यीशुऐं बहत्तर#10:1 बहत्तर कुछ लेक्खैं म सत्तर जणे बताओड़े हैं। जणैं कु होर ठहराया, अर जिन-जिन जाघ्घैं म अर शैहरैं म उनु आप जाणां थिया ओठ्ठै इनकु दो-द्दो करी आपकै थ पैहलै घलाये। 2#मत्ती 9:37,38अर उनकु घलाणैं थ पैहलै यीशुऐं उनथै कैहया, “फसल तो घणी है, पर मजदूर थोड़े हैं, इसकरी फसला के मालक प्रभुआ थ मीन्त करो, कि वो फसला किया कटाइय्या वास्तै मजदूरैं कु घलावैं। 3#मत्ती 10:16जावो, अर याद राक्खो, हूँ थमकु भेड्डैं ज़ू भेड़ियैं के बिच्चा म घलाया करता हैं। 4थम ना तो बटुआ, ना ही झोळी, ना चप्पल लवो, अर ना ही सफरा म किसी का हाल बुझ्झो। 5जिस किसी भी घरा म जाओ ओठ्ठै अन्दर जाणैं थ पैहलै कहो, ‘इस घरा का भला#10:5 भला सही अनुवाद्दा म शान्ती शब्द इस्तमाल करोड़ा है। होवै’। 6अगर कोइ भी ओठ्ठै इस बरकता क लायक होग, तो थारी बरकत उसपर लाग्गी जाग, नाही तो थारै धौरै वापस आई जाग। 7#1 कुरि 9:14; 1 तीमु 5:18उसी ही घरा म रहिय्यो, अर जो काइं उनथै मिलै, वोही खाओ-पियो, क्योंकि मजदूर आपकिया मजदूरीया क लायक है, हर एक्की घरा म ना फिरीयो। 8अर जिस शहरा म थम जाओ, अर ओठ्ठै के लोक थमकु अपणावैं, तो जो काइं भी वो थमकु खाणैं कु दवैं, वो ही खाइय्यो। 9अर ओठ्ठी के बिमारैं कु सूल करीओ, अर उनथै कहो, ‘परमेश्वरा का राज थारै धौरै आया है।’ 10#प्रेरि 13:51अर जिस शहरा म थम जात्ते हो, अर ओठ्ठै के लोक थारा आदर ना करैं, तो उस शहरा किऐं गळियैं म जाई कहीयो, 11#मत्ती 10:7–14; मर 6:8–11; लूका 9:3–5‘थारे शहरा कि माट्टी जो म्हारे पाँवैं म लाग्गी है, उसकु हम थमकु चिताणैं वास्तै झाड़ते हाँ, तोभी थम या समझी लो कि परमेश्वरा का राज थारे बिच्चा म आई पौंहच्या है।’ 12#मत्ती 11:24; मत्ती 10:15हूँ थमकु साच्चैं ही कहता हैं कि, फैसले के दिना म उस शहरा का हाल सदोम शहरा थ भी बुरे होंग।”
मन ना फिराणैं आळैं पर हाय
(मत्ती 11:20–24)
13“हाय थारै पर खुराज़ीन अर बैतसैदा शहर! जो प्रभावशाल्ली काम थारे बिच्चा म करे गये, अगर वो ही काम सूर अर सैदा शैहरैं म करोड़े होवते, तो वो बोरीयैं के कापड़े घाल्ली अर राक्खू म बैठ्ठिकना कदौका मन फिराई लेत्ते। 14पर फैसले के दिना म थारे हाल्लैं थ सूर अर सैदा शैहरैं के हाल ज्यादा सैहणैं लायक होंग। 15अर हे कफरनहूम, क्या तौं स्वर्गा ताइं उठाया जाँग? नाही बल्की तौं पताळा म थल्लै जाँग।
16 #
मत्ती 10:40; मर 9:37; लूका 9:48; यूह 13:20 “जो कोइ थमकु सुणता है, वो मेरीयाँ भी सुणता है, अर जो कोइ थारीयाँ नाही मान्नै, वो मेरीयाँ भी नाही मान्नै, अर जो कोइ मिस्कु नाही मान्नै, वो मेरे घलाणैं आळे कु भी नाही मान्नै।”
बहत्तर चेल्लैं का पुठ्ठा आणां
17अर वो बहत्तर जणे खुश होई पुठ्ठे आई कैहणैं लाग्गी गये, “हे प्रभु तेरे नावाँ थ तो दुष्टात्मा भी म्हारे हुकम मानतियाँ हैं।”
18यीशुऐं उनथै कैहया, “हूँ शैतान्ना कु आसमान्ना थ बिजलिया ज़ू थल्लै पड़तोड़ा देख्या करया । 19सुणो, मैं थमकु साँप्पैं अर बिछुऐं कु ऐडिया थल्लै दबाणैं, अर बैरी शैतान्ना किया सारीया ताकता पर हक देवोड़ा है, काइं भी थमकु चोट नाही पोंहचाइ सकै। 20पर थम इस्थै खुश ना होइय्यो, कि दुष्टात्मा थारे हुकम मानतियाँ हैं, पर इस बात्ता थ खुश होइय्यो कि थारे नाम स्वर्गा म लिखोड़े हैं।”
यीशुआ का खुश होणा
(मत्ती 11:25–27; 13:16,17)
21अर उसी वक्त यीशु पवित्र आत्मा थ भरी गया अर खुश होई कैहया,
22 # यूह 3:35; यूह 10:15 “मेरे बाप्पैं सारा काइं मिस्कु सौंप्पी दिया है, अर कोइ नाही जाणैं कि बेट्टा कोण है, पर सिर्फ बाप जाणता है, अर बाप कोण है सिर्फ बेट्टे क अलावा या भी कोइ नाही जाणैं, या फेरी वो जिस्कु बेट्टैं बताणैं वास्तै चुणया है।”
23फेरी यीशुऐं उनकै वळ मुड़ीकना सिर्फ चेल्लैं थ कैहया, “धन्य हैं वो आँख्खी, जो इन बात्तैं कु देखतियाँ हैं, जो थम देख्या करते हो। 24क्योंकि हूँ थमकु कैहता हैं कि, घणैं नबीयैं अर राजैं चाहया, कि जो बात्तां थम देखते हो वो भी देक्खैं, पर कोइन देक्खी सके, अर जो बात्तां थम सुणते हो वो भी सुणैं, पर कोइन सुणी सके।”
आच्छे सामरीया का उधाहरण
25 #
मत्ती 22:35–40; मर 12:28–34 देक्खो, एक बारी एक यहूदी शास्त्री यीशुआ कु फसाणै वास्तै कैहणैं लाग्गी गया, “हे गुरू, हमेशा कि जिन्दगी पाणैं वास्तै हूँ क्या करैं?”
26इसपर यीशुऐं कैहया, “इस बारे म नियमा म क्या लिखोड़ा है? अर तौं उसकु किदा पढ़ता हैं?”
27उनु जवाब दिया कि, “तौं आपके प्रभु परमेश्वरा थ आपके पूरे दिला थ अर पूरीया जान्नी थ अर पूरीया ताकता थ, अर आपकिया पूरीया अकली थ प्यार कर, अर आपके पड़ोसिया थ आपकै जैस्सा प्यार राख।”
28यीशुऐं उसथै कैहया, “तौं ठीक ही कैहता हैं, इदा ही कर तौं जीवता रैहैंग।”
29पर उनु अपणे-आप्पा कु सही दिखाणैं वास्तै कैहया, “तो फेरी मेरा पड़ोस्सी कोण है?”
30यीशुऐं उसकु एक उधाहरण देई कैहया, “एक इन्सान यरुशलेम शहरा थ यरीहों वळ जाया करया, अर उसकु डाकुऐं घेरी लिया अर उसके कापड़े काढ्ढी खोस्सी लिये, अर उसकु मारी-कुट्टी अधमरा करी छोड्डी चले गये। 31अर इदा होया कि उसी रस्ते थ एक याजक जाया करया, अर उसकु देक्खिकना मुड़ी चल्या गया। 32अर उसी ज़ू एक लेवी भी आया, अर वो भी देक्खी मुड़ीकना चल्या गया। 33पर ओठ्ठी एक सामरी यात्री उसकै धौर आया, अर उसकु देक्खिकना उसपर तरस खाई। 34अर वो उसकै धौर आया, अर उसके जखमैं पर जैतुन्ना का तेल अर दाखरस लगाई उसकै पटियाँ बाधियाँ, अर उसकु आपके पशुआ पर बिठाई एक्की धर्मशाळे म लेई गया अर ओठ्ठै उनु उसकी सेवा करी। 35दूसरे दिन उनु दौ चाँदिया के सिक्के काढ्ढी उस जाघ्घा के मालका कु दिये, अर उसकु कैहया, ‘इसकी सेवा करीयैं अर अगर तेरा होर काइं भी इसपर लाग्गै, तो हूँ चिकु वापस आई देई दैंग।’”
36यीशुऐं इतना कहिकना उसथै बुझ्झया, “इब तेरीया समझा म जो डाकुऐं म घिरया थिया, उसका पड़ोस्सी इन तीन्नै माहला कोण है?”
37पिछैं शास्त्रीयैं कैहया, “वोही जिनु उसपर तरस खाई।” यीशुऐं उसकु कैहया, “जा, तौं भी इदा ही कर।”
यीशुआ का मार्था अर मरीयमा क घरै जाणां
38 # यूह 11:1 अर पिछैं जिद वो जाया करे, तो यीशु एक्की गाँवाँ म गया, अर मार्था नावाँ किया एक्की औरतैं आपके घरा म उसका आदर करया। 39अर उसकी एक मरीयम नावाँ कि बाहाण थी, जो प्रभुआ के पाँवैं म बैस्सीकना वचन सुणया करी। 40अर मार्था उनकी खात्तर-दारीया कि त्यारी करीकना हारी गई, पिछैं वो यीशुआ धौरै आई कैहणैं लाग्गी गयी, “प्रभु क्या चिकु मेरी कोइ फिकर कोइना?, कि मेरीयैं बाहणैं मिस्कु एक्कलिया कु काम करनै वास्तै छोड्डी राक्खी है? इसकरी इस्कु कैहै कि मेरै सात्थी काम्मा म हाथ बटावै।”
41पिछैं यीशुऐं कैहया, “मार्था, हे मार्था, तौं घणीयैं बात्तैं कि फिकर करती अर घबराउती हैं। 42पर एक बात जरूरी है, अर उस आछिया बात्ता कु मरीयमै चुणी लिया है, जो उसथै खोस्या कोइन जावै।”
New Life Literature