Lukas 19
19
Yesus Sakius inim ogagagwa wene
1At Yesus o Yeriko nunggwigya lagagirik, mbikit wagyama, 2ap ambi inis Sakius pemerintah enake yoparip wonggalisagwi menda enasin inggis mondok werek welagagi.
3At akoen, “Yesus andi, nggarogo ovagak?” yiluk, bikhagiluk, ogagagi ovara eyave dul, eke, avakwa wisane homagoma, bikhaup meyan agagi.
4Meyan agya lagagimu, “Yesus sup yi vaga wasogon higi,” yiluk, il hagiluk, at endak vupuk lagya lagagirik, yo vaga inggigi.
5Yo vaga inggigirik werekma, At Yesus andenam ari wagya lagagirik, il ilik lagya dugwit, “Sakius wai. Yogak An hat hamwa laup imbitirikmu, hodo wambuma.” 6Yugugu lagagimu, Sakius ako mbikit yo vaga en wambu wagya lagagirik, heyaga wakbaluk, endawi sek vaga amwa lagagwa.
7It avakwa en Yesus iperen lagwi inugu lagagwarik, enanggin-enanggon yugu dugwit, “Ap weyak ogasiga menda inimat amwa lendagwi yi bigisanes!”
8Yugu lagagwama, at Sakius en it wisane inivaga Nenowa Yesus yugugu dugwit, “Ai Nasin. An nangge-nangge higirogo ap ininggidek halok, wogerayogon. Eke, ap yewes okbugu lagi ako, enangge ambi dek okbugu lagi halok, avoloma 4 hudi wogirigya, ap ambi adik angge dek okbugu lagi halok, avoloma 4 hudi wogirigya, ogarisogon o.”
9Yugugu lagagimu, At Yesus en, “Hat ogo hombao Averakam Ala ovaga vanggabaluk avyarat imbitigi ako hak, hat yogak An novaga vanggabaluk avyarat nembeten andi vaga, hat haburi hinim yogak yi vaga Ala en henagap wendakhinipas. 10An Ap-At Endaklagagis yi, it avakwa yelemele yagagwa ako havedogo enagap wendarigiluk, wagagis o,” yiluk, yugogogi.
Yoparip mbusi emas vaga wakhegek yugeragagi wene
(Matius 25:14-30)
11It avakwa ako enaruk hunggusigik, Yesus en wene wakhegek ambi yugeragagi. Andi, At Yesus o Yerusalem vage horok ari wagya lagagimu, it avakwa en “Ala avema bisaligama mbikit sigam arisogon ai,” umbutwi ako yedok inigu lagagirik, wene wakhegek yi yugeragagi. 12Yugirigya dugwit, “Ap inis werek ambi en, ‘An o adumu andoma lagya neyalok, ap ombok o yoma vagago dogogiluk mondok okbaninggya dogomwima, neyami vaga wasogon,’ yiluk, 13lagiluk, ogagya dugwit, at ayelomani eneyave 10 yanggup yugirigya lagagirik, wagu lagagwama, ayoparip mbusi emas menda 10 higirogo, ap ambi yoparip mbusi emas ambi wogorigya, ap ambi yoparip mbusi emas ambi wogirigya, wogirigya dugwit, ‘An wagatek neyagek, nayoparip yi vaga yi menda ndi menda hunit nagu dugwit, ambi lobalhidugu dogones.’” #19:13: At yoparip mbusi emas wogeragagi andi, yavup saut henggam ogagarikmu onggo wogerelagwi ndatak wogeragagi.
14“Yugirigya lagagirik, lagagi. Lagya hegek, it nin at avema menda en at enanggon adigat umbutu dugwit, ‘At ap yi, nenasin inis ombok akluk, o yoma vagago dogop nenanggon,’ yiluk, yugeralapwak yiluk, enaori lakbogogwa.”
15“Lakbogogwa ako yugera lagagwa ovara, hegek, ap ako inis ombok it enamwa andoma vagago dogopwak yiluk mondok okbagu lagagwama, amwa eyami vaga wagya lagagirik, ‘Nayoparip ako vaga it maren lobalhedagao inisami?’ yiluk, ayelomani ayoparip wogeragagi ako yanggup yugeragagi.”
16“Yanggup yugirigya lagagimu, ayeloman endak wagagi akoen, ‘Ai nasin. Hayoparip woknigigin ako vaga ambi inim 10 lobalhidigi.’”
17“Yugugu lagagimu, asin en, ‘Ai nabut wa! Nayeloman hat mondok sek adigat ogagen. Maduk ogarup ovara, hegek, des erogo ogarit lagya lagen atma, yogak o kota 10 hudi vagago dogonyok yiluk, mondok okbagaliga.’”
18“Yugugu lagagimu, ayeloman ambi ambetaga wagya lagagirik, ‘Ai nasin. Hayoparip woknogogin ako vaga ambi inim 5 lobalhidigi.’ 19Yugugu lagagimu, asin en, ‘Andi halok, hat o kota 5 hudi vagago dogop.’”
20-21“Yugugu lagagimu, ambi ambetaga wagya lagagirik, ‘Ai nasin. Hat hendawi hanggidik an nilup atma, eke, hendawi hanggidik dugwit, haren bagetek ovara, wigya, eke, awi lisinggitek ovara, enggen yugup mbalhidigya, ogasiga atma, nalon en hayoparip nasum elola yidik vagago welagi ako yi o,’ yiluk, yugogogi.”
22“Yugugu lagagimu, asin en ayeloman ako yugugu dugwit, ‘An ogarup yukhogogis ovara, an nane sagalisiga hat nayeloman weyak ogasiga yi, hane yegen ako vaga hanggadi wakbagasogon. Nendawi nanggidik dugwit, bagetek ovara, wigya, eke, awi lisinggitek ovara, enggen yugup mbalhidigya, ogasiga hat hilup agindik ovara, 23an wagya neyalok, nayoparip inim, vagago dogop onggo inim, an wa wasogon ai, yiluk, it avakwa enayoparip ombok arupwak yiluk, ogasagwi menda ako, wogeregetek nggarogo yiluk welagagin?’”
24“Yugugu lagagirik, avakwa at inim agarwik ako yugirigya dugwit, ‘Nayoparip vagago agarik ako haurogo ap yoparip 10 lobalhedagas ako wogeres.’”
25“Yugirigya lagagimu, iren, ‘Ai nasin. At andi, ayoparip ovok 10 agarik!’”
26“Yugugu lagagwama, aren, ‘Hit menda ambi agarik halok andi, ambi inim ovaga hondalogo wokhirigya hagup. Eke, hit menda ambi dek halok andi, ambukumat agarik ako haurogo hidigya hagup o. 27Eke, it ninim ogorek dugwit, “At nenasin inis ombok akluk, o yoma vagago dogop, nenanggon,” yagao ako andi, woginiviluk wagu dogomundik, nil neyagek, enares,’ yugeragagi,” yiluk, Yesus en avakwa ako yugeragagi.
“Nenasin inis ombok yi aro,” yagan wagagwa wene
(Matius 21:1-11; Markus 11:1-11; Yohanes 12:12-19)
28Yesus en wene andi yugirigya lagagirik, At endak o Yerusalem lagyama, ane welagwi menda inim lagu dugwit, 29o Betepage inim, Betania inim, ndom inis Saitun avema andoma horok ari lagagwarik, At ane welagwi menda eneyave mberen lakbugu dugwit, 30“O valekma akilisim ari lamwira, wam keledai eyak, ap ao ovaga hora yegetek menda ambi hugu dogomundik, yunggwi yidugup akom veralogo yoma wolok omano. 31Eke it avakwa andoma en, ‘Hit nggarogo yiluk keledai andi veralisagwi?’ yukhiruguselok, hiren yugurugu dugwit, ‘Nit Nenasin keledai hogop en, “Welales,” yukneragamu, wa wagyo,’ yugerano,” yiluk, lakbogogi.
32It lakbogogi ako, lagu lagagwarik, yugeragagi ako ndatak halagagwa. 33Hugu lagagwarik, keledai eyak ako veranggusim, it ap enanggom keledai werek akoen, “Keledai andi, nggarogo yiluk, veralisagwi?”
34Yugurugu lagagwama, iren, “Nit Nenasin keledai hogop en, ‘Welales,’ yukneragamu, wa wagyo,” yugurugu lagagwarik, 35wolok Yesus adema ba wagagwa. Ba wagu lagagwarik, enayum sogwesum nggolalogo wam keledai ambot vaga ndabagu lagagwarik, Yesus ako wam keledai ambot vaga horakbagagwa. 36Horakbagu lagagwama, Yesus lagya hegek, it avakwa enayum sogwesum mbigalogo sup ombok vaga ndabalin wagagwa.
37Ndabalin wagu lagagwama, o Yerusalem horok ari wagusigik, sup ndom Saitun wambu wendagwima akoma avakwa At ane welagwi menda ovok erogo en nggarogo ogarubuk menda wisane ogarit lagya ako inil hugu lagagwarikmu, enadenggen en amitmit yagan wagu dugwit, Ala inis siyabaik wagagwa. 38#Mazmur 118:26 yokhanes. Ala inis siyabaik wagu dugwit:
“Nenasin Ala inis vaga wandiga yi, inis siyabelagwi o!
At mbogot vaga winimen agarik akoen, nenendawi dambubininggas atma,
At Ala inis mondok siyabelagwi o,”
yiluk, yagan wagagwa.
39Yagan wagwi ako, it Varisi menda ninen avakwa wisane wonggalari wagagwa ako enanggelekma en Yesus yugugu dugwit, “Ngguru wai. Hane welagwi menda yi, mbereran.”
40Yugugu lagagwama, Yesus en, “Avyak! It avakwa yi, enane yegetek duklipmu en, helep yi, Ala inis siyabagu duklip, yiluk, yukheraliga,” yugeragagi.
O Yerusalem higya lagagirik, yup yagagi wene
41Yugirigya lagagirik, o kota Yerusalem horok ari wagya lagagirik, il higya dugwit, yup yagagi. 42Yup yagya dugwit, “Hit Yerusalem menda yi, yogak yi vaga henendawi ugun wadokdek adenggen dogop yiluk, nggarogo okbigigaup hinilup duklipmu en, ai, okbigigelap ovara, yogak hinil hagup en yiluk, hwilago agarik.”
43-44“Hirenen ‘Ala yogak yiat nenadema waga o,’ yiluk, yedok hegetek atma, henamwa Yerusalem en wunggu hinisaoen, it hinim ndup ogorek en eve helep leget walinogo bugugwis, eloma-yoma en, yumu-yagamu en, ndup okhinivuguluk, horok ari wagwi, ogagu dugwit, henawi helep vaga valek yi, helep ovaga dambuk ogarek iligik andi ambiat ogo dogosogonbuk. Masalogo bagu dugwit, Ala yi hudiat nenadema waga o, yiluk, yedok hegetek atma, habut-hogwa hinim ovok erogo mondok degerogo bigigaup vage vanggo yi warugwi o,” yiluk, yugeragagi.
Yesus Ala awi valekma dugwit haryogo wibogogi wene
(Matius 21:12-17; Markus 11:15-19; Yohanes 2:13-22)
45Andi yugerelok, Ala awi valek mbumbumu nunggwigya lagagirik, it avakwa yi menda ndi menda onggo hunisagwi menda akoma haryogo wibugu dugwit, 46#Yesaya 56:7 yokhanes. “Ala en ‘An nawi valek yi, “Samban ogasagwima yiat dogosogon,’” yiluk, yagagi dirup warek agarik ovara, o yi, hiren, ‘Ap enonggop wokbaluk, hwilaklari nunggwisagwima’#Yeremia 7:11 yokhanes. ovagak ogagep,” yiluk, yugeragagi.
47Yesus hup-dingga Ala awi valekma wene mamulirigya lagagi. Mamulirigya lagagi ovara, it imam-imam enasini inim, it Ala wene vagago agarwik menda inim, it avakwa enasini inim, At Yesus waruguluk, ogagagwa ovara, 48avakwa en At wene yugirigya ako enendawi hunik ogagu dugwit, inil At adigat vurek atma, nggarogo warubuk erek halok, mbup yagagwa.
