Luk 8
8
Tav'et inelnal avmhmah an a Iesu
1Itauatah a si lera iv'el kadav'a arna v'anu lil m'a v'anu papa udlani, kavrp'ep'a v'nen p'as na v'anuan Atua kav'iv'ani. M'ertuan arnal lman iru (12) avsapei. 2#Mat 27:55,56; Mak 15:40,41; Luk 23:49.Laha, tav'et kinkin a Iesu itmhmah sarei anr arna m'etienar, katsran sera m'im'iln stu avlak a nlr, hir avlev' siar kinkin kavtau ani kavp'auri. 3Nahar iv'i a Meri, avr ti iv'i tav'et a Maktala, la m'im'iln stu isaru avruh a nln ha, kav'i a Suana, iv'i a naun a Husa, iv'i mlin na parian a Erut, m'ei a Susana, m'er tav'et uraur inelnal.
A Iesu isran v'nen ivrur dui isran m'et na sei
(Matiu 13:1-9; Mak 4:1-9)
4Naran nelnal avstudau avandan arna v'anu udlani kavrama atlera kavp'lt asnn, isran v'nen kavr ti a, 5“Dui iamk iv'el a ti ipasran m'et na sei al pitvet. Naran israni, nki irs a p'ak navanel. Laha, m'ertu avv'el kavpasi, m'anh na p'knaran avrama kavtpluluei kavhani. 6Nki irs arna nav'et. Naran ispal, im'aran, sena ti ui nadep' ihei. 7Nki irs arna nut makau lun iak iter. Naran arspal iv'amk, makau iharev'kar m'et na nava sei. 8V'eti teruraur irs arna nadep' p'as, kaspal kadasi katu navan inelnal iv'amk.” Naran itsran sera v'nen lera, iv'ara kavr ti a, “M'ertu drlnan iak a ti iparn sei, ipav'rn ani.”
?A Iesu isran v'nen sena v'ata?
(Matiu 13:10-17; Mak 4:10-12)
9Laha, arm'ertuan avmiman ani kavvr ti a, “?V'nen ksrani hara iv'iv'en v'ata?”
10 #
Aisaia 6:9. Ivrpranr kavr ti a, “Atua ittu sarei a kam'i a ti pavrndu v'nen tutuah na v'anuan Atua, v'eti asnr m'ertu uraur Kana nsran v'nen uaki. A ti apavla sei, v'eti akavledaui, kavrn sei, v'eti akavrndaui.
A Iesu iv'iv'en v'nen israni ivrur dui isran m'et na sei
(Matiu 13:18-23; Mak 4:13-20)
11V'nen nsrani iv'iv'en si laha, M'et na sei iv'i v'nenan Atua. 12Nki a p'ak navanel avv'i m'ertu avrn v'nen p'as. Sarei, a Sitan ima kalev'la v'nen p'as a nlr, imahei ti apavv'ahi dav'a ti Atua ipalev'lar arna si stuar. 13Nki arna nav'et avv'i m'ertu avrn v'nen p'as kavrn ip'as ani, v'eti uarr ihei. Avv'ahi iap'arei, v'eti naran si kinkin iendinar avrars. 14V'eti nki irs a nut makau lun iak iter, avv'i m'ertu avrn v'nen p'as kavsapa navanelar, dav'a der, nav'et m'a si p'as arna silv'ienar itukarr, kani ti navar iahma katarep'. 15V'eti nki irs arna nadep' p'as, avv'i m'ertu nlr ip'as kavviviln, kavrn v'nen pas kavuadei, kavtu navar, kavhua arna v'ahienar.
Mavtutuan nut ren
(Mak 4:21-25)
16 #
Mat 5:15; Luk 11:33. M'ertu kinkin iatu nap' a lait katavkari a pakit, v'aha kataui a nv' nipal, v'eti itaui eia arna m'lnen, a ti m'ertu la apavrama eim ha, apavp'a lait. 17#Mat 10:26; Luk 12:2.Sena ti si udlani atutuani, nelnal apavrndaui, si udlani itutuah ipater arna nut m'auar. 18#Mat 25:29; Luk 19:26.Sena si lera, pavv'ahur mamh nut kvv'rn ani inap'ei, sena ti m'ertu iak a sei apatu sei mau ani, v'eti m'ertu iahiak a sei apalev'la sei av'ah ti iak ani.”
A unian m'er titiatah nan a Iesu avtala ani
(Matiu 12:46-50; Mak 3:31-35)
19Laha, a unian m'er tv'aln avrama, v'eti ahavrndu ti apavmima asnn, sena ti nelnal avp'tirkari. 20Laha, m'ertu kinkin avvr ani kavvr ti a, “A uniam m'er tv'alm avlak av'aran kavrn ti apavlah.”
21V'eti ivrpranr kavr ti a, “M'ertu avv'rn a v'nenak kavsapei, hir avv'i a uniak m'er tv'alk.”
Nalen m'a nauei aran sei a Iesu ivri
(Matiu 8:23-27; Mak 4:35-41)
22Arna napn iamk, Hin m'er m'ertuan avrav'a al nauak iamk, laha ivr anr kavr ti a, “P'vlu naui lil kavrav'a a tv'eliel.” Sarei, kavv'el. 23Kavv'el dav'a a Iesu im'etrdul. Laha, nalen lil ilaph arna naui lil, kani ti nauak ilini a nauei, nut pa ti ipatpl. 24Laha, avrama asnn kavsp'ei kavvr ti a, “Mlin, Mlin, p'vmln ra.”
Laha, ithal kav'ana hua m'a nalen m'a nahu na naui lil. Sarei, nahu na naui lil irs, nut itamat udlani. 25Laha, ivr anr kavr ti a, “?Inap'i hin kaavv'ah Kana?”
Laha, avdedrn kavtah ani kavvrvr a hir kavvr ti a, “?Aulera iv'i Dui inap'i? Sena ti iv'ana m'a nalen m'a nauei, arsapa v'nenan.”
A Iesu itp'ev' m'im'iln stu
(Matiu 8:28-34; Mak 5:1-20)
26Sarei, avier utar m'ertu a Katara, iter a tv'eliel na nut a Kalili. 27Naran a Iesu ima aut, dui iamk arna v'anu lera, la m'im'iln stu ilak a nln ip'arei ha, ima asnn. Iaua klus, ialak al nmah ml, v'eti ilak al navap atin m'ertu a nln. 28Naran ilei a Iesu, iv'ara eia kasisihpu kaiaul asnn, kav'ana eia kavr ti a, “Iesu, kv'i a Natn Atua ilil kalak eia. ?Kma a ti pan v'ata a kana? Nmiman anh ihua, manp'ilen kana.” 29Hin ivr si lera sena ti a Iesu itv'ana sarei m'a m'im'iln stu kavr ti iparuh a nln. Sena ti m'im'iln stu iuei iel mhmah. Laha, ahu lm'an m'a tln a sen kavp'auri, v'eti hin irdus sen nen, laha m'im'iln stu itp'av'i iv'a arna nut kaka.
30A Iesu imiman ani, kavr ti a, “?Naham iv'i ak?” Hin ivr ti a, “Nahak iv'i a Nelnal,” sena ti m'im'iln stu istudau avlak a nln. 31Laha, hir avmiman ani ihua, kavvr ti imatu v'nen a ti apavrav'a arna nut stu iv'i tah p'arei.
32Pua istudau avtalu atlera arna mrnut. Laha, avmiman ani ihua kavvr ti ipam'ahu a ti apavrav'a a nlr. Sarei, im'ahu anr. 33Naran m'im'iln stu avruh a nl dui lahara, avrav'a a nl pua. Laha, pua udlani hara avvrvr ihua kavsasr a p'ak ptha kavrars al nauei kavtpl, kavram'a.
34Naran dui avmsnen pua avla sei itu hin, avruh kavrav'a arna v'anuar m'a nut itertalu atlera, kavvrp'ep'ei. 35Laha, nelnal avrama a ti apavla sei itu hin. Naran avrama asn a Iesu, avla ti au la m'im'iln stu avruh a nln hara, ilak ms asn tln a Iesu, kaua klus ml, ptn itp'as, laha avdedrn. 36Laha, m'ertu atvla sera si lera avvr anr nelnal kavvrur dui m'im'iln stu avlak a nln hara, nut ima kap'as ml inap'ei. 37Sarei, nelnal udlani avlak unanut arna v'anu a Katara avmiman ani ihua kavvr ti iparuh asnr, sena ti avdedrn ihuadau. Laha, iv'a al nauak kadahum'alet.
38Dui la m'im'iln stu avruh a nln hara imiman ani ihua kavr ti ipalak asnn, v'eti a Iesu itap'ei a ti ipahau ml kavr ti a, 39“Pav'a a utam kavrp'ep'a nut Atua iten sera pari lil asnm inap'ei.” Sarei, iv'el kavrp'ep'a si udlani a Iesu ien ani arna nut udlani arna v'anuan.
A Iesu iani ti tav'et pa iamk isilv' ml kan mamh tav'et ier klusan
(Matiu 9:18-26; Mak 5:21-43)
40Dav'a, naran a Iesu im'alet ml, nelnal avrn ip'as a ti apavlav'i, sena ti hir udlani avtrahi. 41Laha, pavrni, dui iamk, nahan iv'i a Sairus, iv'i dui lil na nmah tamat, ima asn a Iesu kasisihpu kaiaul asn tln, kamiman ani ihua a ti ipama al nmahan. 42Sena ti a natn tav'et iamk dudau asnn, paian inal lman iru, nut pa ti iparhap'ni.
V'eti naran a Iesu iv'el, nelnal avsini istudau. 43Tav'et iamk, m'etiena tav'et iani din irarev' iel dav'a pai inal lman iru, itsran sera nav'etan udlani asn tukta, v'eti ahavmhmah ani. 44Hin itauatah kaier kaka klusan a Iesu. Iv'amk m'a ti din la irarev' hara ihiris.
45Laha, a Iesu ivr ti a, “?Hin ak ier Kana?”
Naran nelnal avvr ti iav'i hir, hin a P'ita m'er m'ertu avlak m'ei avvr ti a, “Tisa, nelnal avp'tirtalu anh kavsinh ihuadau. Inap'i hin kvr ti a, ‘?Hin ak ier Kana?’ ”
46V'eti a Iesu ivr ti a, “Ihei, m'ertu iamk ier Kana, sena ti nrndu ti nut huak kinkin iln Kana kan parei.” 47Naran tav'et lera ila ti ikatutuah ml, ivrdedrn kadama kasisihpu kaiaul asnn, kavrp'ep'ei arna nah nelnal nut iari kadama kap'as ilahml inap'ei.
48Laha, ivr ani, kavr ti a, “Vnpak, parn ipap'as, v'ahien p'asam iani kp'as ml. Pahau arna tamat.”
49Naran idv'ana uam, m'ertu iamk iendan al nmaha dui lil na nmah tamat lahara kavr ani, kavr ti a, “A natm tav'et itam'a sarei, mauadeda tisa lera ml.”
50V'eti naran a Iesu irn si lera, ivr ani, kavr ti a, “Madedrn, pav'ah Kana uaki, dav'a ipama kap'as ml.” 51Laha, naran ier nmah, iam'ahu a ti m'ertu kinkin apavrama eim, v'eti a P'ita, a Sim'is m'ei a Sun m'er a tetian m'ei a unia tav'et pa uaki. 52Nelnal avvalau kavtakal sena tav'et pa, v'eti a Iesu ivr ti a, “Mavtakal, hin iahm'a, v'eti im'etrdul uaki.” 53V'eti hir avvtma kavsip'lani, sena ti avrndu ti itam'a sarei.
54Laha, itap'er avrav'a av'aran, kauada lm'a mardel kav'ara ani, kavr ti a, “Tav'et pa, pathal.” 55Sarei, m'im'iln ima ml, iv'amk m'a ti ithal. Laha, a Iesu itu v'nen anr a ti apavtu tim'ah ani. 56A tetian m'ei a unian artah ani istudau, v'eti ivrkarr ihua a ti amarvrp'ep'a si lera a m'ertu kinkin.
© 2023 Presbyterian Reformed Church of Australia