Sun 6
6
A Iesu imsnen m'ertu avv'i tausen ilm' (5,000)
(Matiu 14:13-21; Mak 6:30-44; Luk 9:10-17)
1Itauatah a si lera a Iesu iln nut kadav'a a tv'eliel na naui lil a Kalili, nahan uraur iv'i nauei a Taipirias. 2Laha, nelnal avstudau avsapei, sena ti avla m'akarien lilil iani aranar m'ertu si ianr. 3Sarei, a Iesu iv'a eia arna ptha kalak atlera m'er arm'ertuan.
4Ihih naran na Pasuva iv'i tim'ahar m'ertu a Isrel. 5A Iesu iklau kala ti nelnal istudau avrama asnn, kavr an a P'iliv' kavr ti a, “?P'vul p'ret ip'i, a ti nelnal laha apavhani?” 6Imiman si lera a ti ipandinei uaki, sena ti Hin itrndu sera sei ipani.
7A P'iliv' ivrprani, kavr ti a, “Ipavr ti apul p'ret, ulien nen ipav'i 200,000 vatu ikamsnen m'ertu a ti apavhan papa ani uaki.”
8M'ertuan a Iesu iamk nahan iv'i Adru, titiatah nan a Saimun P'ita, ivr ani, kavr ti a, 9“Mardel pa iamk atlaha iua p'ret ilm' avani a pali, m'a tilau papa iru. V'eti si lera iav'i si ipamk, sena ti avnelnal istudau.”
10Laha, a Iesu ivr ti a, “Pavani ti m'ertu laha apavlak a nadep'.” Nut nen nina iak. Laha, dui nen avihih tausen ilm' (5,000) avlak a nadep'. 11Sarei, a Iesu ilev' p'ret kavr ip'as an a Mlin Eia sanan, katau anr arm'ertuan, sarei hir avtutau anr nelnal la avlak hara. Kani inap'i lera ml m'a tilau lahara. Laha, avhani inep'a nut avrni inap'ei. 12Naran nelnal avrapd, ivr anr m'ertuan kavr ti a, “Pavtupien tk tim'ah iter, a ti m'avutakm a pnen.” 13Sarei, avtupien tk tim'ah kavnen naten lil inal lman iru (12) ilini. Si lera iter naran nelnal atvhan sera p'ret la avani a pali arlm' hara. 14Itauatah naran nelnal avla m'akarien lil a Iesu iani, avvr ti a, “!Avrdaui, Aulera iv'i Pruvet la avr ti ipama arna nadep' ha!”
A Iesu iv'el arna nauei
(Matiu 14:22-27; Mak 6:45-52)
15Naran a Iesu irndu ti hir itv'i ti apavrama kavtp'i a ti ipav'i mlin lilar, Hin iln nut kamamk uaki kadav'a arna ptha.
16Naran itv'i sera knarev', arm'ertuan a Iesu avrav'a auei asn naui lil. 17Kavrav'a arna nauak sena ti avrn ti apavrav'a a tv'eliel arna nut a Kapaniam. Nut itam't sarei, v'eti a Iesu iahv'a asnr. 18Dav'a nalen irp kani ti nauei ima kahua istudau kanep'a nata. 19Arm'ertuan avparel al nauei, dav'a kavier kilumita ilm' v'aha ilm'sei, kavlei a Iesu iv'el arna nauei kamima asn nauak, kavdedrn. 20V'eti ivr anr kavr ti a, “Kana uaki, mavdedrn.” 21Laha, avrn ti apavlav'i ipama arna nauak. Iv'amk m'a ti nauak ier a nut avrn ti apavrav'a aranan.
P'ret la iendan eia ha
22M'ih nen ardu la avp'tir a tv'eliel na nauei ha avrndu mamh ti nauak uaki iamk itater lei atlahatu, kavla ti a Iesu iahv'a arna nauak m'er arm'ertuan, kavrndu ti hir avln nut, a Iesu iasapar. 23V'eti nauak kinkin avdan a Taipirias kavrama aut ihih nut la nelnal avhan p'ret hara, itauatah a ti a Mlin ivr ip'as sanan. 24Naran nelnal avla ti a Iesu m'er arm'ertuan ahaviak atlera, avrav'a arna nauak kinkin kavrav'a a Kapaniam kavtala ani. 25Naran nelnal avpaslei a Iesu a tv'eliel na naui lil, avmiman ani kavvr ti a, “?Tisa, kma atlaha v'aran?”
26A Iesu ivrpranr kavr ti a, “Kana nvrdaui, nvr a kam'i, kvtala a Kana, iav'i sena ti kvla m'akarien lililak, v'eti sena si laha uaki, sena ti kvrapd a p'ret kvhani hara. 27Mavm'akar sena tim'ah la ipama kastu uaki, v'eti pavm'akar sena tim'ah la ipater p'arei kav'i silv'ien ikahiris naran. Tim'ah lera Kana nv'i Net M'ertu p'etu kam'i, sena ti Atua, iv'i a Tetiak, ittu sera nut hua a Kana.”
28Laha, avmiman ani kavvr ti a, “?Kam'em' p'van v'ata sena ti p'van parian Atua?”
29A Iesu ivrpranr kavr ti a, “Sei Atua irn ti pavani, iv'i ti pavv'ah Kana, sena ti Hin itep'a Kana.”
30Laha, hir avvrprani kavvr ti a, “?V'eti Nakm kan m'akarien lil v'ata, a ti p'vlei kavv'ahah? ?Kan m'akarien v'ata? 31#Avruh 16:4,15; Npin 78:24.A tetiad tituei avhan mana arna nut kaka, inep'a ti Paivul ivri, Hin ilev' p'ret la iendan eia ha katau anr avhani.”
32Laha, a Iesu ivr anr kavr ti a, “Nvrdaui, nvr a kam'i, A Musis iatu kam'i p'ret la iendan eia ha, v'eti a Tetiak itu kam'i p'ret dau iendan eia hilaha. 33Sena ti p'retan a Mlin Eia iv'i Hin la iendan eia kadama arna nadep' ha, katu silv'ien anr nelnal arna nadep'.”
34Laha, avvr ani kavvr ti a, “Mlin, patu kam'em' p'ret lera ipel.”
35Laha, a Iesu ivr anr kavr ti a, “Kana nv'i p'ret na silv'ien. M'ertu ima asnk ikarn nam'er naran kinkin. M'ertu iv'ah kana ikarn navan naran kinkin. 36V'eti inep'a ti ntvr sarei a kam'i, ktvla sera Kana, v'eti kaavv'ah Kana. 37M'ertu udlani la a Tetiak itu Kana ha, apavrama asnk. M'ertu udlani la apavrama asnk ha, nkasranr ml av'aran. 38Sena ti Kana ndan eia kadama a nadep', iav'i sena ti p'en sei Kana uaki nrni, v'eti sena ti p'en sei Hin la itep'a Kana ha irni. 39Si laha iv'i sei a Tetiak itep'a Kana irni, a ti nkakasmn ki ipamk arna m'ertu udlani Hin itu Kana, v'eti sena ti p'ani ti hir udlani apavsilv' ml, arna napn itauatah dau. 40Si laha iv'i sei Hin la itep'a Kana ha irni, a ti hir udlani la apavla Kana, nv'i a Natn Atua, kavv'ah Kana ha, apavlev' silv'ien ikahiris naran. Laha, Kana p'ani ti ipathal ml arna napn ipatauatah dau.”
M'ertu arna v'anuan ahavv'ahi
41Arm'ertu a Isrel avv'ana stu kavvruri, sena ti Hin ivr ti a, “Kana nv'i p'ret nendan eia kadama a nadep'.” 42Laha, avvr ti a, “?Nsarei Aulera iv'i a Iesu, kav'i a natn a Susev', v'aha? Nvrndau a tetian m'ei a unian. ?Inap'i hin ivr ti iendan eia kadama a nadep'?”
43Sena si lera a Iesu ivr anr kavr ti a, “Kam'i mavv'ana stu kavvrur Kana. 44M'ertu kinkin ikahma asnk, ipavr ti a Tetiak, la itep'a Kana ha, ikarv'i ti ipama asnk. Laha, Kana p'ani ti ipathal ml arna napn itauatah dau. 45#Aisaia 54:13.Arpruvet tituei avulul ani kavvr ti a, Atua ipav'iv'en sei anr udlani. Sena si lera m'ertu udlani la avvrn v'nenan a Tetiak kavrndaui ha, hir avrama asnk. 46Si lera iavr ti dui kinkin itla sarei a Tetiak. Kana uaki la ndan asnn ha, ntla sarei a Tetiak. 47Nvrdaui, nvr a kam'i, m'ertu iv'ah Kana ilev' silv'ien ikahiris naran. 48Kana nv'i p'ret na silv'ien. 49Arm'ertarep'am'i tituei avhan mana arna nut kaka. Hilaha atvram'a sarei. 50Ki laha iv'i p'ret la iendan eia kadama a nadep'. M'ertu ipahani ikahm'a. 51Kana nv'i p'ret la isilv' iel ha, nendan eia kadama arna nadep'. Ipavr ti m'ertu ipamk ipahan p'ret lera, hin ipasilv' ipel. P'ret p'etau ani iv'i p'akk, p'etau anr m'ertu arna nadep' a ti apavsilv' ani.”
52V'nen lera iani ti arm'ertu a Isrel avv'lv'al kavvr ti a, “?Aulera ipalev' p'akn katu nakd p'vhani ipanap'i?”
53Laha, a Iesu ivr anr kavr ti a, “Nvrdaui nvr a kam'i, pavvr ti mkavhan p'akk kavm'n dik, nv'i Net M'ertu, silv'ien ikahter a nlm'i. 54M'ertu ipahan p'akk kam'n dik, hin ilev' silv'ien ikahiris naran. Laha, Kana p'ani ipathal ml arna napn ipatauatah dau. 55Sena ti p'akk iv'i tim'ah dau, dik iv'i naui dau apam'ni. 56M'ertu ihan p'akk kam'n dik ip'lt mamh m'a Kana, Kana np'lt mamh m'ei. 57A Tetiak isilv' iel katep'a Kana, Kana nlev' silv'ien asn a Tetiak. Inap'i lera m'ertu ihan p'akk, hin ipalev' silv'ien asnk. 58Si lera iv'i p'ret iendan eia kadama a nadep'. Ianep'a mana arm'ertarep'am'i tituei avhani, v'eti hilaha atvram'a sarei. V'eti m'ertu ipahan p'ret laha ipasilv' dav'a ikahiris naran.”
59A Iesu ivr si lera naran iv'iv'en sei al nmah tamat a Kapaniam.
M'ertuan avstudau avlni
60Naran m'ertuan avstudau avrn v'nen lera, avvr ti a, “V'nen lera ihua. ?Hin ak irndu ti ipav'rn ani?”
61V'eti a Iesu itrndu sarei arna nln a ti m'ertuan avv'ana stu kavvrur sei ivri, kavr anr kavr ti a, “?Nsarei v'nen lera iani ti kvrars? 62?V'eti ipanap'i, ipavr ti kam'i pavla ti Kana, nv'i Net M'ertu, p'av'a eia arna nut nlak tituei? 63M'im'iln P'as uaki itu silv'ien, p'ak m'ertu ikamhmah a m'ertu arna si kinkin. V'nen udlani nvr a kam'i iv'i v'nena M'im'iln P'as kav'i silv'ien. 64V'eti m'ertu kinkin asnm'i ahavv'ahi.” (Sena ti a Iesu itrndu sarei itauamu hir ak asnr ahavv'ahi, katrndu sarei hin ak ipataui al lm'ar m'ertu avlep'lei). 65Laha, ivr ti a, “Sena si lera ntvr sarei a kam'i, ti m'ertu kinkin ikahmk ikahma asnk, ipavr ti a Tetiak ikatu nut hua ani.”
66Sena si lera, m'ertuan avstudau avlni kavm'alet, ahavsapei ml. 67Sarei, a Iesu ivr anr arm'ertuan arnal lman iru (12) kavr ti a, “?Kam'i kvrn ti pavsapar kavln Kana, v'aha?”
68 #
Mat 16:16; Mak 8:29; Luk 9:20. Laha, a P'ita ivrprani, kavr ti a, “?Mlin, p'vrav'a asn ak? Nakm uaki kua v'nen na silv'ien ikahiris naran. 69Kam'em' nvv'ahah katvrndu sera ti Nakm kv'i a Kristu, kav'i a Natn Atua la isilv' ha.”
70A Iesu ivrpranr kavr ti a, “Kana ntv'li sera kam'i kvnal lman iru, v'eti kam'i ki iamk iv'i a Sitan.” 71Ivrur a Sutas Iskariut, iv'i a natn a Saimun. Sena ti hin iv'i lman iru na m'ertuan, v'eti ipataui al lm'ar m'ertu avlep'lei.
© 2023 Presbyterian Reformed Church of Australia