TOKSAKHAIH 12
12
Pacaekhlaekhaih Pop Aep
1Hi tue thuemtham ah Herod#12:1 Herod Sangpahrang: Herod Agrippa 1, Palestin prae boih ukkung to ni. Sangpahrang mah Khrihca kangkom thungih kami thoemto to pacaekhlaek amtong. 2Johan ih amnauk Jaem to songsen hoiah a hum. 3Ahi mah hae Judah kaminawk to palung anghoesak tito a hnuk na-ah Piter to doeh naeh hanah angcaeng. (Hi hae Tae thuh ai Takaw Poi tue nathungah a oh). 4Piter to a naeh o pacoengah thongim ah pakhrak o, toah to risa longpalito rip kaom risabu palito mah cong hanah anihcae ih ban thungah a paek o. 5Topongah Piter loa thongim thungah a suek o, to-e Khrihca kangkom thungih kaminawk mah anih hanah Sithaw khaeah palungthin tang hoiah khophoeh pae o.
Piter Thongim Hoitoah A Loih
6Herod mah mipui hma-ah ka tacawt haih han boah tiah a thuih ih tue pha ai duem ah Piter loa congkung risa longhnetto salak ah to a iih. Sumqui hnetto hoiah pahlet o moa thongim khongkha ah congkung risa longhnetto mah a cong hoi. 7Poek ai puiah Angraeng ih vanmi longto loa toah to angdoet moa thongim akhaan thung to aang phaeng. Vanmi mah Piter ih palaeng ah to ahuenh pae, anglawtsak moa, “Angthawk mue mue!” tiah a naa. Vaipang ta-ah Piter ban pongih sumqui to angkhram pae roeprap. 8Topacoengah vanmi mah, “Kaengkaeh to kacak ah angzaeng aloa khokbuen to angbuen ah,” tiah a naa. Piter loa totitoah a sak moa vanmi mah, “Kahni to angkhuk aloa kai hnukah na baang ah,” tiah a naa. 9Piter loa thongim thung hoitoah tacawt moa a hnukah to a baang, to-e vanmi mah a sak ih to tangtang maw vai tito doeh panoek ai; hnuksakhaih ih ka hnuh ah ni a dawn. 10Risa conghaih khongkha hmaloe hoi a pahnithaih ih to a poeng hoi pacoengah hnukkhuem ah vangpui thungah caehhaih ih sum khongkha to a phak hoi. Khongkha loa angmah koeh ah am-ong halat moa a tacawt hoi. Loklam to pazui hoi poe moa vanmi mah Piter to a caehtak ving roeprap.
11Topacoengah Piter loa angmah khaeah hmuen ka pha to dawnkop let moa, “Vaihi loa loktang ni tito ka panoek boah! Herod ih hmuensak thaihaih thung hoi Judah kaminawk mah a nuiah coenghsak hanah koeh ih amsakhaih ih boiboih thung hoitoah loihsak hanah Angraeng mah angmah ih vanmi to ang patoeh,” tiah a thuih.
12Totiah hmuen ka om to panoek na-ah Johan Marka amno Meri im to a caeh, toah to kami paroeai angzoh o cu o moa khophoeh o. 13Piter mah tasabang ih thok to takhuek moa a tamtoeh Roda naa pae ih mah paong hanah a caeh. 14Piter ih lok to a nawt na-ah anghoe phi moa thok to paong aiah amlaem let moa tasabang ah Piter angdoet, tiah a naa. 15Anihcae mah, “Namthu!” tiah a naa pae o. To-e anih mah tangtang ni, tiah a thuih khruek pongah anihcae mah, “Anih ih vanmi kalang mue!” tiah a naa pae o.
16Tona thuemah Piter mah thok to tabaeh toemoe. Hnukkhuem ah loa anihcae mah thok to paong o moa anih to a hnuk o na-ah a dawnrai o. 17Lok tuentaek aiah oh duem hanah ban hoiah matsak o moa Angraeng mah kawbangmaw thongim thung hoitoah a loihsak tito a thuih pae o. “Ahi hae Jaem hoiah taangca thoemtonawk khaeah thui pae oah,” tiah a naa; topacoengah kalah bangah to a caehtak.
18Akhawnbang a phak na-ah Piter loa kawbangah maw oh ving boah vai, tiah congkung risanawk salak thungah katingai lokpunghaih ih to a oh. 19Herod mah anih to pakrong hanah lok a paek, to-e hnuh o thai ai. Topongah congkung risanawk to lok a duengh o moa hum hanah lok a paek.
Topacoengah Herod loa Judea prae to tacawt tak moa Sisaria vang ah to tue zetta a patoh.
Herod Duekhaih
20Herod loa Tair hoi Sidon kaminawk nuiah katingai palungphui; topongah ato kaminawk loa angqum o cu moa anih khaeah to a caeh o. Hmaloe koek ah sangpahrang im ih ukkung Blastas to anihcae bang kangpang haih hanah pacae o. Topacoengah Herod im ah a caeh o moa angdaehhaih sak hanah a thuih o, kawmawtiah anihcae ih prae mah caknaek hakhaih ih loa sangpahrang ih prae thung hoitoah ni angzoh.
21Ani patoephaih ih ni ah Herod loa angmah ih sangpahrang khukbuenh hoiah amthoep, angmah ih angraeng tangkhang nuiah anghnut moa mipui khaeah lok a thuih. 22“Lok ka thuikung hae kami na ai ni, sithaw ni,” tiah a hangh o. 23Herod mah Angraeng to khangzahaih paek ai pongtoah Angraeng ih vanmi mah vaipang ta-ah a boh mat. Anih loa alungnawk mah cak moa a duek.
24Tona thuemah Sithaw lok loa pung tahang aep moa a qoengh tahang aep aep.
25Barnabas hoi Saul loa tok topacoeng hoi boah pongtoah Johan Marka to angzoh haih hoi moa Jerusalem hoitoah#12:25 hoitoah tihae thoemto banrikcabu pongah loa bangah tiah oh. amlaem o.
Asang Khongso New Testament in Eastern Khumi © Bible Society of Myanmar, 2023.