Kɛkolu 19
19
Pɔli ka Samakan Kein lase Ɛfɛsi teme
1Apolosi tɛɛ Kolɛnti waate min nɔ, Pɔli ka Esiya koovi lɔtimin ka taa se Ɛfɛsi so kɔnɔ. A do ka limaniyamɔɔ dɔlu ye je, 2ka wolu maɲininga, a vɛɛ: «Ài na limaniyala waate min nɔ, jalasa Nii Sɛnɛyanin na jiila ài kɔkan?»
Ai ka Pɔli javi, ai vɛɛ: «Ɛnɛn, kaipa mɔ ma Nii Sɛnɛyanin ko mɛn ba bene.»
3Pɔli do k'ai maɲininga, a vɛɛ: «Ài na makoli suu mindɛ le sɔlɔnna wo lɔ?»
Ai vɛɛ: «Yaya ya makoli suu.»
4 #
Matiyu 3.11; Malɛkɛ 1.4, 7, 8; Luka 3.4, 16; Yohana 1.26, 27. Pɔli do vɛɛ ai yɛ: «Yaya tɛɛ mɔɔlu makola ji kɔlɔ ka bɛn ai dajoo mafalinko ma, a v'a fɔla ko mɔɔ min natɔ a kɔ, min taanin kɛla Isa le, ai yi limaniya wo ma.»
5Wo mɛn ai bolo, ai ka makoli sɔlɔn mɔ Tii Isa tɔɔ lɔ. 6Pɔli k'a bolo la ai kɔkan mingɛ, Nii Sɛnɛyanin ka jii ai kɔkan. Ai do ka kuma damina kan gbɛlɛlu lɔ ani ka kelaya kɛ. 7Kɛ́ wolu bɛ lakafonnin tɛɛ mɔɔ tan ni fila (12) jate le le.
8Kalo sawa kɔlɔ, Pɔli tɛɛ taala Aladalibon na ka kuma mɔɔlu fɛ josolagbeleya boloma, k'i lɔja k'ai lakunfa Ala ya masaya ma. 9Kɛɛ a dɔlu kunnɔ ka gbeleya ka to limaniyabaliya lɔ, ka kuma yon fɔ Isa ya siya ma jama ɲakɔlɔ. Wo lɔ, Pɔli ka bɔ ai fɛ, ka taa Isa kɔbiladennu le Tilanusi ya kalankɛbon na, ka to ai kalanna je lon bɛ. 10A do ka to wo la san fila kɔlɔ, haan fɔɔ Esiya duulen bɛ ka mɔ Tii kumakan mɛn, Jahudiya ni Gɛlɛkika bɛ.
11Ado Ala tɛɛ kawananko ba siyama kɛla Pɔli fɛ. 12Hali Pɔli ya ɲalɔtɛɛfaani ni aa baalekɛfaanilu, a tɛɛ vɛ minu bila a ma, ai tɛɛ taala wolu le jangalotɔlu fɛ, ado wolu ya jangalolu tɛɛ basila, ani jinajuulu tɛɛ bɔla jinatɔlu lɔ.
13Jahudiya timintiminkɛba dɔlu tɛɛ je, minu tɛɛ jinalu gbɛnna mɔɔlu lɔ. Lon dɔ, wolu ka jinajuulu gbɛnko lɔsuma ka bɔ mɔɔlu lɔ mɔ Tii Isa tɔɔ lɔ, ai v'a fɔla ai yɛ: «M'ài jamalila Isa tɔɔ le lɔ, Pɔli yi min ya ko lasena!» 14Jahudiyalu ya salakalase kuntiiba min tɔɔ tɛɛ ko Sekeva, wo denkɛ wolowulan ne tɛɛ wo kɛla. 15Kɛɛ wo fɔ ai bolo, jinajuu dɔ vɛɛ ai yɛ: «Ǹ ka Isa lɔn. Ǹe do yi Pɔli ya ko kalama. Àilu do? Jene y'ài le?»
16Wo fɔ, jinatɔ k'i kɛ ai kan ka fanga sɔlɔn ai bɛ ma. Ai do vɛ bɔlila ka bɔ bon na, ai falimakolon ni ai madiminnin ne.
17Wo mɛn Jahudiyalu ni Gɛlɛkikalu bolo Ɛfɛsi so kɔnɔ, ai bɛ ka siyan kosɛvɛ, ado mɔ Tii Isa tɔɔ ka magbiliyali sɔlɔn. 18Mɔɔ minu tɛɛ vɛ limaniya, wolu siyama ka na k'ai dalabɔ ai kɛkolu ma. 19Mɔɔ minu tɛɛ wɔimaya kɛla, wolu siyama ka na aiya wɔimaya sɛvɛlu le ka wolu ɲɛnin jama ɲakɔlɔ. Sɛvɛ wolu sɔɔn bɛ lakunnin ka bɛn wɔligbɛ gbana waa biloolu (50 000) jate le ma. 20Wo boloɲa ma, mɔ Tii kumakan ka to jɛzɛnna ka fanga sɔlɔn.
Ɛfɛsikalu ka mulutu teme
21Ko wolu bɛ timinnin, Pɔli k'a latɛɛ ko a yi Maseduwani ni Akayi koovilu lɔtimin ka taa Jelusalɛmu. A do vɛɛ: «M̀'ɛ sena Jelusalɛmu, wo kɔ, fɔ ǹ'i se Lɔmu fana.» 22Wo ma, a ka a madɛmɛnba fila lataa a ɲa Maseduwani, minu taanin kɛla Timote ni Elasitusi le. Ale gbu ka to Esiya koovi lɔ waateni kɔlɔ.
23Wo waate lɔ, so la ka maamaa bakɛ ka bɛn Isa ya siya ma. 24Siyaki dɔ tɛɛ je, min tɔɔ tɛɛ ko Demetiliyusi. Aiya joomoso min tɔɔ tɛɛ ko Aatemesi, a tɛɛ wo ya batobon sawulalu ladanna wɔligbɛ le le. Demetiliyusi ni a baaledenɲɔɔlu tɛɛ tɔnɔ ba le sɔlɔnna baale wo lɔ. 25Lon dɔ, a ka a baaledenɲɔɔlu ladɛn, ani minu tɛɛ baale suu wo kɛla. A do vɛɛ ai yɛ: «Kɛ́lu, ài k'a lɔn m'i tɔnɔ ba le sɔlɔnna baale min nɔ. 26Àilu gbu v'a ye ani k'a mɛn Pɔli yi min fɔla, ko joo minu ladannin mɔɔlu bolo, ko wolu tɛ foi le. Kuma wo vɛ mɔɔ siyama lɔ aiya joo bilako la Ɛfɛsi so kɔnɔ jan, ani faida Esiya koovi fan bɛ lɔ. 27Wo kɛtɔ kɛla sabu le ka maa baale magbeya, ani fana ka maa joomoso Aatemesi batobon lafeya, ani ka ale gbu dalaya majii, ale min yi batola mɔɔlu bolo Esiya ni dunuɲa fan bɛ lɔ.»
28Jama ka wo mɛn mingɛ, ai k'ai josolakuna bubale ka gbanɔ damina, ai vɛɛ: «Ɛfɛsikalu ya joomoso Aatemesi buɲayine!» 29Wɔyɔkan wo ka so fan bɛ lamaamaa. Pɔli taamaɲɔɔ fila minu tɛɛ Gayusi ni Alisitakusi le ka bɔ Maseduwani, jama k'i kɛ wolu kan telemanin k'ai fɔnfɔn ka taa ai le so ladɛnkɛya lɔ. 30Pɔli gbu tɛɛ a fɛ k'a jɛlɛ jiya jama la, kɛɛ Isa kɔbiladennu k'a dansii. 31Esiya koovi ɲamɔɔ dɔlu fana tɛɛ je, minu tɛɛ Pɔli tɔvalu le. Wolu ka samakan lataa a ma k'a madiya ko a kà taa ladɛnkɛya lɔ. 32Wo waate, wɔyɔkan ba tɛɛ bɔla ladɛnkɛya lɔ, bɛ tɛɛ ai ta fɔla. Ai siyama tɛɛ ma aiya ladɛn kun lɔn. 33Komi Jahudiyalu tɛɛ vɛ Alɛzandele lalɔ jama ɲakɔlɔ, wo lɔ, a dɔlu tɛɛ ai milila ko ale le nɔ yi. Alɛzandele do v'a bolo jatela ko jama yi jeden fɔsa a a kumanɔbɔ ai yɛ. 34Kɛɛ jama k'a ye mingɛ ko Jahudiya le a le, ai bɛ ka gbanɔ kelen ne lɛlɛ fila jate kɔlɔ, ai v'a fɔla: «Ɛfɛsikalu ya joomoso Aatemesi buɲayine!»
35A laban nɔ, so sɛvɛlikɛba ka se ai masawalila. A do vɛɛ ai yɛ: «Ɛfɛsikalu, bɛ k'a lɔn ko Ɛfɛsi so le joomoso ba Aatemesi ya bon lamalaba le, ani a sawula min jiinin ka bɔ sangbolo lɔ, kɛlɛ? 36Komi sɔsɔyali tɛ se bilala ko minu lɔ, wo lɔ, ài yi jeden. Ài do kà ko kɛ ài kunfɛ! 37Kamasɔlɔn ài na kɛ́ minu lanala jan, k'a talan ai ma foi suɲa joobatobon na, kumatɛ ka lafeyalikan fɔ maa joomoso ma. 38Wo lɔ, ni Demetiliyusi ni a baaledenɲɔɔlu y'a fɛ ka mɔɔ dɔ makojiya, kuntiilu yi je ani kititɛɛlonnu lɔnin. Fɔ ai yi taa wo ɲabɔ wolu le fɛlɔ. 39Ni do telemasɔɔli gbɛlɛ y'ài bolo, wo ɲa yi bɔle maa ladɛn ba lɔ ka bɛn maa seliya ma. 40Mɔ na ko min kɛla bi, ni mɔ m'alama, ai natɔ kiti bilala mɔ la k'a fɔ ko mɔ vɛ mulutu, k'a talan a dailu tɛ mɔɔ suu suu kɔnɔ k'a ɲafɔ.» 41A wɔlinin wo bɛ fɔla, a ka jama labila.
Manya Bible Translation, © SIM International, 2023