Kɛkolu 16
16
Timote ka bila Pɔli ni Silasi fɛ teme
1Wo kɔ, Pɔli ni Silasi ka se Dɛlɛbɛ so kɔnɔ, ka bɔ je ka taa Lisitile. Kɛ́ dɔ tɛɛ je Isa kɔbiladennu tɛma, min tɔɔ tɛɛ ko Timote. A ba tɛɛ Jahudiya limaniyamɔɔ le le, kɛɛ a fa tɛɛ Gɛlɛkika le le. 2Limaniyamɔɔlu bɛ tɛɛ Timote tɔɔ ɲuma le fɔla Lisitile ni Ikoniyɔmu solu kɔnɔ. 3Pɔli tɛɛ a fɛ Timote yi taa ai fɛ, kɛɛ je Jahudiya bɛ tɛɛ k'a lɔn ko a fa tɛɛ Gɛlɛkika le le. Wo le k'a kɛ, Pɔli ka Timote makɛnɛkɛ. 4Wo kɛ, Pɔli nu vɛ timintiminna solu wotɛ, ai vɛ dandɛɛli kɛla limaniyamɔɔlu yɛ ka bɛn ko wolu latelenko ma, minu latɛɛnin keladennu ni ɲamɔɔlu bolo Jelusalɛmu. 5Wo boloɲa ma, limaniyajamalu sɛmɛ tɛɛ donna limaniya lɔ, ai do ma tɛɛ kafonna lon bɛ.
Ala ka Pɔli kelaya teme Maseduwani
6Komi Nii Sɛnɛyanin tɛɛ vɛ Pɔli nu dansii Ala kumakan lasenko la Esiya koovi lɔ, wo lɔ, ai ka Filigiya ni Galatiya koovilu lɔtimin. 7Ai senin Misiya koovi dan na, ai k'i lɔja ka don Bitiniya koovi lɔ, kɛɛ Isa Nii Sɛnɛyanin ma diɲa wo ma. 8Wo lɔ, ai ka Misiya koovi lɔtimin ka taa Tolohasi so kɔnɔ. 9Wo lon su lɔ, Ala ka ko dɔ lajɛlɛ Pɔli ɲa ma. A do ka Maseduwanika kɛ́ dɔ lɔnin ye, wo v'a madiyala, a vɛɛ: «Na i yi mɔ madɛmɛn Maseduwani koovi lɔ.» 10Ko wo la ka jɛlɛ Pɔli ɲa ma mingɛ, mɔ ka mɔ lɔbɛn telemanin ka Maseduwani siya mina, kamasɔlɔn mɔ ka la a la k'a fɔ ko Ala vɛ mɔ kela ko m'i Samakan Kein lase je mɔɔlu ma.
Lidiya ka limaniya teme
11Mɔ ka don kulunba kɔnɔ Tolohasi so kɔnɔ ka mɔ telen Samotilase kɔɔtɛmaduu la. Wo kɛnɛbɔlon, mɔ ka se Neyapolisi so la. 12Mɔ ka bɔ je ka taa Lɔmukalu ya so dɔ la, min tɔɔ yi ko Filipi, min yi Maseduwani koovi fan kelen so ba dɔ le. Mɔ ka tele dana kɛ je. 13Nɔningɛlon senin, mɔ ka taa kɔɔ dala so kɔma, a tɛɛ mɔ jii ma k'a fɔ ko mɔ kɛtɔ Jahudiyalu ya Aladaliya dɔ yena je. Wo kɛ, mɔ k'i sii ka kuma damina moso dɔlu yɛ, minu ladɛnnin tɛɛ je. 14Mɔɔ minu tolomalɔnin tɛɛ mɔ la, ai lɔ mɔɔ kelen tɔɔ le tɛɛ ko Lidiya ka bɔ Tiyatila. Alabatoba le tɛɛ a le, min tɛɛ faani daagbɛlɛnnu felela. Mɔ Tii k'a josokun laka k'a ladiɲa Pɔli kumakannu ma. 15Ale ni aa bonnamɔɔlu makonin kɔɔ kɔlɔ, a k'a fɔ mɔ yɛ k'a magbeleya, a vɛɛ: «Ni ài yi ǹ jatela mɔ Tii ya limaniyamɔɔ bɛlɛbɛlɛ dɔ le, ài yi na, ài yi jiya ǹa bon na.» A do ka to a magbeleyala haan fɔɔ mɔ ka diɲa a ma.
Ai ka Pɔli ni Silasi bila kaso la Filipi teme
16Lon dɔ, mɔ taatɔla Aladaliya lɔ, jɔnsingbili dɔ ka mɔ labɛn. Jina dɔ tɛɛ a lɔ, min tɛɛ fɛlɛnnikɛ see dila a ma. Aa jɔnfalu tɛɛ tɔnɔ ba le sɔlɔnna ka bɛn a ma. 17A do vɛ bilala mɔ ni Pɔli nu kɔ ka to gbanɔla, a vɛɛ: «Masa Taala ya bɔidennu le ne, minu yi kisiko siya lasena ài ma.» 18Singbili ka to wo la tele siyama kɔlɔ. Kɛɛ lon dɔ, Pɔli josola ka kuna a ma. A do k'i ɲa tilimin k'a fɔ jina yɛ, a vɛɛ: «Ǹ'i jamalila Masa Tɔɔmasenin Isa tɔɔ lɔ, ǹ ko, i yi bɔ a lɔ!» Jina do ka bɔ singbili lɔ telemanin.
19Aa jɔnfalu k'a ye mingɛ ko aiya tɔnɔ sɔlɔnɲa vɛ tiɲa, ai ka Pɔli ni Silasi mina k'ai fɔnfɔn ka taa ai le so tɛma ɲamɔɔlu ɲakɔlɔ. 20Ai do k'ai lalɔ Lɔmu ɲamɔɔlu ɲakɔlɔ k'a fɔ, ai vɛɛ: «Mɔɔ minu vɛ maa so ɲaami. Jahudiya le ai le, 21minu yi mɔɔlu kalanna laana dɔlu la, minu ladaannin tɛ ǹu Lɔmukalu ma, kumatɛ ka mɔ bolo sii ai kɔlɔ.»
22Wo fɔ, jama v'i wulila Pɔli ni Silasi kanma, ado ɲamɔɔlu ka jamali di ko k'aiya faanilu bɔ ai kanna, ani k'ai gbasi gbusan na. 23Ai wɔlinin ai gbasila bubale, ai k'ai bila kaso la, ani ka jamali di kasobon lakanaliba ma ko a ai lakana kpekpe. 24Ka bɛn jamali wo ma, a ka Pɔli ni Silasi bila kasobon kɔnɔlɔbon na, k'ai sennu gbaan kulun na.
Kasobon lakanaliba ka limaniya teme
25Sutala lɔ, Pɔli ni Silasi tɛɛ Ala dalila ka baiti la a yɛ, kasoden tɔlu tolomalɔnin vɛ ai la. 26Telemanin, duukolo ka jaajaa gbiligbili ka kasobon lamaamaa. Wo kɛ, da bɛ la ka ka, ani nɛɛ jɔlɔkɔlu ka bɔ kasodennu bɛ la. 27Kasobon lakanaliba ka kunun mingɛ ka kasobon dalu lakanin ye, a ka aa siyamifan labɔ a jɛlɛ faako lɔ, kamasɔlɔn a tɛɛ a kɔnɔ kasodennu vɛ bɔli. 28Kɛɛ Pɔli ka gbanɔ a ma, a vɛɛ: «I kà ko kɛ i jɛlɛ la! Mɔ bɛ yi jannɔ.»
29Wo kɛ, kasobon lakanaliba ka fitina makili ka taa Pɔli ni Silasi ma ɲagba le, k'i kɛ ai sen kɔlɔ, a lɔ vɛ jaajaala. 30A do ka Pɔli ni Silasi labɔ banama k'ai maɲininga, a vɛɛ: «Ǹ kuntiilu, ǹ'i mindɛ kɛ fɔsa ǹ'i kisi?»
31Pɔli ni Silasi k'a javi, ai vɛɛ: «I yi limaniya mɔ Tii Isa ma. Wo vɛ kɛla, i yi kisile, ile ni iya bonnamɔɔlu bɛ.» 32Ai do ka mɔ Tii kumakan lase ale ni aa bonnamɔɔlu bɛ ma. 33Wo waate kelen su lɔ, kasobon lakanaliba ka Pɔli ni Silasi ta k'aiya daalu lako. Wo kɛ, ai ka ale ni aa bonnamɔɔlu bɛ mako ji kɔlɔ telemanin. 34A do ka taa Pɔli ni Silasi le aa bon na, k'ai faana. Sawa ba le tɛɛ ale ni aa bonnamɔɔlu bɛ la, kamasɔlɔn ai tɛɛ vɛ limaniya Ala ma.
35Kɛnɛ bɔnin, so ɲamɔɔlu ka sɔdasilu lataa kasobon lakanaliba fɛlɔ, ai vɛɛ: «Kɛ́ wolu bila.»
36Wo lɔ, kasobon lakanaliba vɛɛ Pɔli yɛ: «Ɲamɔɔlu vɛ samakan lana ko ka ile ni Silasi bila. Wo ma, ài yi taa hɛlɛ lɔ.»
37Kɛɛ Pɔli k'a fɔ sɔdasilu yɛ, a vɛɛ: «Hali Lɔmu duulen ka kɛ mɔ le, ai na mɔ gbasila bala le lɔ, k'a talan ai ma maa kiti tɛɛ, ka ban ka mɔ bila kaso la. A yi di vɛ, ai y'a fɛ ka mɔ bila doon nɔ? Wo tɛ bɛn feu! Fɔ ailu gbu yi na ka mɔ labɔ jan!»
38Wo fɔ Pɔli bolo, sɔdasilu ka taa wo lase ɲamɔɔlu ma. Ai k'a mɛn mingɛ ko Pɔli ni Silasi yi Lɔmu duulen ne le, ai ka siyan. 39Wo le k'a kɛ, ai ka taa Pɔli ni Silasi fɛlɔ ka jo di ai ma k'ai labɔ kaso la, ka ban k'ai madiya ko ai yi bɔ so kɔnɔ. 40Ai ka bɔ mingɛ kaso la, ai ka taa Lidiya ya bon na ka limaniyamɔɔlu ye je. Ai wɔlinin wolu sɛmɛdonna, ai ka taa.
Manya Bible Translation, © SIM International, 2023