MARKUS 6
6
Jesus itulak i Nasaret
(Mat 13:53-58; Luk 4:16-30)
1Itadingken Jesus ingan e, mulih ia ku kutaNa. Ikut pe ajar-ajarNa. 2Sanga wari Sabat ibenaken Jesus ngajar i bas rumah pertoton. Kalak si nterem si megi pengajarenNa kemamangen, nina, “I ja nari nge pemetehNa e? Kepentaren kai nge si lit i bas IA? Kuga banci tanda sengget si bagenda jadi arah tanNa? 3Ma kin IA tukang kayu, anak Maria, senina Jakup, Joses, Judas ras Simon? Ma i jenda kin turangNa pe?” E maka itulak kalak ndai Jesus.
4Nina Jesus man kalak e, “Sekalak nabi ipehaga i japa pe, tapi adi ikutana, i tengah-tengah keluargana ras i tengah-tengah jabuna, lang.” #Joh 4:44
5I Nasaret e, Yesus la erbahan sada tanda sengget pe, seakatan pepalem piga-piga kalak sakit alu namaken tanNa ku babona. 6Mamang kal ate Jesus sabap la lit kiniteken kalak ndai.
Isuruh Jesus ajar-ajarNa si sepuluh dua kalak
(Mat 10:5-15; Luk 9:1-6)
Jenari lawes Jesus ngajar ku kuta-kuta sekelewet Nasaret. 7IdiloNa ajar-ajar si sepuluh dua, janah isuruhNa dua-dua kalak sendalanen. IberekenNa man ajar-ajar e kuasa pelawesken setan, 8janah ipedahiNa nina, “Ola kai pe baba i bas perdalanndu seakatan ciken. Ola baba roti, ntah gajut-gajut, ntah duit i bas kantongndu. #Luk 10:4-11 9Banci kam erselop, tapi ola dua lapis bajundu.” 10Tole nina Jesus, “Adi i bas sada kuta ialo-alo kalak kam kesilang i bas rumahna, i jelah kam ngayak kam berkat ka ku kuta si deban. 11Tapi adi i bas sada ingan la kam ialoken kalak ntah la kam ibegikenna, tadingkenlah ingan e, janah apusi pe abu si leket i bas nahendu. Enda pagi sada tanda bukti si jadi saksi man bana.” #Perb 13:51
12E maka lawes ajar-ajar ndai, iberitakenna man kalak si nterem gelah jera kalak si nterem ibas dosa-dosana nari. 13Melala setan ipelawesna janah nterem kalak sakit isapukenna alu minak pepalemsa. #Jak 5:14
Kematen Johanes Peridiken
(Mat 14:1-12; Luk 9:7-9)
14Raja Herodes pe megi berita kerna Jesus, sabap ku japa pe enggo terberita gelarNa. Piga-piga kalak ngatakenca, “Johanes Peridiken enggo keke ibas si mate nari, e maka ngasup IA erbahan tanda-tanda sengget.” #Mat 16:14; Mrk 8:28; Luk 9:19
15Nina ka kalak si deban, “IA me Elia.” Bage pe lit ka ngatakenca, “IA sekalak nabi, bali ras nabi-nabi si gelgel e.”
16Sanga ibegi Herodes kerna perbahanen Jesus nina, “IA kap Johanes Peridiken, si enggo kusuruh gelah itampul kerahungna. Tapi genduari enggo nggeluh mulihken.” 17Herodes enda me ndube si nuruhsa maka Johanes Peridiken itangkap, igariken janah ipenjaraken erkiteken Herodias. Herodias ndehara seninana Pilipus, si enggo ibuatna jadi ndeharana. #Luk 3:19-20 18Herodes pernah iajarken Johanes Peridiken nina, “La patut iempoindu ndehara seninandu!”
19Perbahan e nembeh ate Herodias janah ibunuhna pe atena Johanes Peridiken. Tapi la surung perbahan Herodes engkawali ia. 20Herodes mbiar ngenehen Johanes Peridiken sabap ietehna Johanes Peridiken kalak bujur ras badia. Meriah pe ukurna megiken pengajaren Johanes Peridiken, amin gia megati mela akapna ibahan isi pengajaren e.
21Sanga peringeten wari tubuh Herodes, ibahanna pesta, janah iundangna pegawai-pegawaina, puanglima-puanglima ras pembesar-pembesar i Galilea nari. 22Kesempaten enda ipergunaken Herodias. Sanga e landek anak Herodias, e maka meriah kal ukur raja ras temue-temuena. E maka nina Raja man anak ndai, “Kai sura-surandu kataken man bangku, maka kubereken.” 23Ersumpah pe Herodes nina, “Kai pe ipindondu kubere, aminna gia setengah ibas kerajanku enda!”
24E maka ndarat diberu ndai nungkun man nandena nina, “Kai dage kupindo nande?” Erjabap nandena, “Pindo takal Johanes Peridiken.”
25Minter mulihken diberu ndai ngadap man raja nina, “Ateku maka genduari iberekenndu man bangku takal Johanes Peridiken tare pinggan.”
26Ceda kal ate raja, tapi la ia pang nulak pemindon enda, nginget sumpahna i lebe-lebe temuena. 27Minter isuruhna sekalak juak-juakna ngelegi takal Johanes Peridiken. E maka lawes juak-juak ndai ku penjara, itampulna kerahung Johanes Peridiken, 28jenari ibabana takal e tare pinggan, janah iberekenna man diberu ndai. Ibereken diberu e ka takal ndai man nandena. 29Kenca ibegi ajar-ajar Johanes Peridiken kerna si e, reh ia ngelegi maitna, jenari ikuburkenna.
Jesus mere man lima ribu kalak
(Mat 14:13-21; Luk 9:10-17; Joh 6:1-14)
30Mulih ka kerina rasul-rasul ndahi Jesus. Iturikenna man Jesus kai si enggo ibahanna ras kai si enggo iajarkenna. 31Perbahan nterem jelma rehen, lanai sempat Jesus ras ajar-ajarNa man. E maka nina Jesus man ajar-ajarNa, “Ota kita ku ingan si teneng, gelah banci kam pekesahken kentisik.” 32Jenari berkat ia kerina tare perahu ku ingan si melenget.
33Tapi sanga i bas perdalanen, nterem jelma ngidahsa. Itandai kalak pe Jesus. E maka ibas kerina kuta nari berkat kalak erdalan ku ingan si i tuju Jesus, janah leben pe kalak si nterem seh asa Jesus. 34Kenca nusur Jesus i perahu nari janah kenca idahNa jelma si nterem, mekuah ateNa sabap jelma si nterem e bali ras biri-biri si la lit permakanna. E maka ibenaken Jesus ngajari jelma si nterem alu erbage-bage pengajaren. #Bil 27:17; 1Raj 22:17; 2Kro 18:16; Esek 34:5; Sak 10:2; Mat 9:36 35Sabap wari nandangi gelap, e maka reh ajar-ajarNa ndahi IA nina, “Ingan enda melenget, janah wari pe enggo nandangi ku gelapna. 36Suruhlah kalak enda lawes, gelah banci itukurna nakanna i kuta-kuta sekelewet enda.”
37Ngaloi Jesus nina, “Kam lah mereken nakanna.”
Nina ka ajar-ajarNa, “Pala lawes kami nukur nakan alu erga dua ratus duit pirak guna kalak enda?”
38E maka isungkun Jesus ajar-ajarNa nina, “Piga lit roti i bas kam? Cuba nehen!” Kenca inehen ajar-ajar ikatakenna man Jesus nina, “Roti lima ngkibul, janah ikan dua.”
39Jenari ikataken Jesus man ajar-ajar, gelah kerina kalak si nterem kundul erterpuk-terpuk i bas mbalmbal si meratah e. 40E maka kundul kerina erterpuk-terpuk, lit seratus, lit lima puluh kalak sada terpuk. 41Kenca bage ibuatNa roti si lima ras ikan si dua ndai, ertoto IA ikatakenNa bujur man Dibata. E maka icepik-cepikNa roti e, iberekenNa man ajar-ajarNa gelah ielaken man kalak si nterem. Ikan si dua ndai pe iberekenNa man kalak e. 42Maka man me kerina seh besur. 43Kenca elah man, ipepulung ajar-ajar roti ras ikan si iba, buena lit sepuluh dua sumpit. 44Teremna dilaki si man ndai kira-kira lima ribu kalak.
Jesus erdalan i babo lau
(Mat 14:22-33; Joh 6:15-21)
45Kenca bage, minter isuruh Jesus ajar-ajarNa nangkih perahu gelah leben berkat ngepar ku Betsaida. Jelma si nterem pe isuruhNa mulih. 46Kenca berkat ajar-ajarNa lawes IA ku sada uruk-uruk janah ertoto IA i je. 47Kenca wari enggo gelap, perahu ndai enggo seh i tengah-tengah dano, tapi Jesus sisada i daraten. 48Idah Jesus maka mesera iakap ajar-ajar engkayuhken perahuna ngelawan angin si nungsang perahu e, e maka kira-kira jam telu erpagi-pagi reh Jesus erdalan i babo lau ndahi ajar-ajar; menam ibentasi Jesus kalak ndai. 49Tapi sanga idah ajar-ajar IA erdalan i babo lau, iakapna begu, 50e maka serko ia kerina perbahan biarna. Sabap kerina ia ngidahsa e maka sengget kal ia. Minter ngerana Jesus nina, “Tetapkenlah, ukurndu! Aku nge enda, ola kam mbiar.” 51E maka idatasi Jesus perahu ndai, janah angin pe ngadi. Mamang kal ate ajar-ajar, 52sabap kerna roti ndai pe langa iangkana janah la ia ngasup ngukurisa.
Erbage-bage penakit ipepalem Jesus i Genesaret
(Mat 14:34-36)
53Seh me ia i lepar, i Genesaret. I je itambatkenna perahu e. 54Asum berkat nadingken perahu, minter itandai kalak Jesus. 55Kiam kalak si nterem ngelegi keluargana si penakiten janah ilanjana tare tilam. Ku ja Jesus lawes ku je me ibabana. 56Ku ja pa pe Jesus reh, ku dusun-dusun, ku kuta-kuta, ntah ku kota-kota, nterem kalak si penakiten itaruhken kade-kadena ku pasar-pasar janah ipindona alu mesangat man Jesus gelah kalak si sakit e banci ndadap uisNa lah gia. Janah kerina kalak si ndadap uis Jesus jadi malem.
Batak Karo Bible © Indonesian Bible Society, 2003.