Luk 3
3
Jɔn Oru-raku oyuɛ ɛyɔ
(Mt 3:1-12; Mk 1:1-8; Jn 1:19-28)
1Ndi esi ju rokura ndi Tibɛriɔs ɔra Ɔkɨm Ɛmaŋ: Pɔntiɔs Pailɛd ɔra oni retu Judia, Hɛrɔd oni retu Galili. Mɨnɛ ɔma ɔmɔ Filib mɔ ɔra oni retu Ituria na Trakonitis; Lisanias mɔ ɔra oni retu Abilin, 2Anas na Kaifas bɛbara bakɨm-bakɨm bajɔmɔ-kɔya bani Jus. Na kegbunci Ɛbrɔkpabi ɛtanɛ na Jɔn wɔ Sɛkaria ŋɔ ɔra na kwabani babɔbatumɛ. 3Jɔn orua mbari Manja Jɔdan, ɔkanɛ bani ya, “Sugɛ nu kosi bobi mɨnɛ baru nu raku, fɛŋɛ Ɛbrɔkpabi kuɛgbɛ esugɛ nu na bobi bonua.” 4Kɛmanci barɛ na kɛkpa-manrɛ ɔkanɛ-rotuma Ɛbrɔkpabi Aisaya:
“Oni ɔrakaka otibɛ remu na kwabani babɔbatumɛ:
“Yuɛ nu ɛyɔ yɔgɛ Ɔkɔ-Rokuku,
si nu rɔfa nduokoci rotumɛ kɔŋ.
5Kɨni nu kɛdɛmɛ nancinɛ,
mɨnɛ tabara nu rokuku rɔrɛnɛ na rokikɨri nandunɛ.
Nabɛ nu ifa nji ira kpɛnkanɛ-kpɛnkanɛ,
mɨnɛ sinu bokukubi bɔyɔ botumɛ lɛll.
6Bani rokuku ndɨm kubafɛ rɛnyaŋɛ Ɛbrɔkpabi.”
7Ɛrɨm bani bajaga baruŋɛ ɛyɛ Jɔn ya orubɛ raku, nsu Jɔn ɔkanɛ bɛ ya, “Anu bɔ bɔbɔgoboyima! Yɛnɛ mɔ ɔjama nu ratu ya kuminsɔrɔ rasinkanɛ ndɛ rakowu? 8Yɔgɛ ramaɛ ranua rakɔgɛ ya minsugɛ kosi bobi. Mɨnɛ kabɨnɛ nu kɔkanɛ bɔkpaju bonua ya minsi na kɛtɨbi Abraham. Nkanɛ nu, Ɛbrɔkpabi ɛfɔn nsɨm kocimɛ rata ndɛ ratumɛ bɔ Abraham. 9Ɛya ɛyɔm na iyi beti, keti nancinɛ nci kɛbɔ keŋuga brika raduna kubagbɛgɛ bamaga mɨnɛ batuba rika roku.”
10Ɛrɨm bani mbɛ basɨna Jɔn ya, “Resi nyan yɛ?”
11Jɔn ɔkanɛ bɛ ya, “Oni naŋɔnɛ ŋɔ ɔfɔnɔ rakpa rafa, yɔgɛ mɔ ɔjɛ oni ŋɔ ɔbɔokifɔnɔ kunɛ, mɨnɛ ŋɔ ɔfɔnɔ bedidi yɔgɛ mɔ oyibanɛ na ŋɔ ɔbɔokifɔnɔ.”
12Ndi batama bagbuga-retu bawu ya orubɛ raku, basɨna mɔ ya, “Ɔkpɛbɛ, ayu resiŋɛ nyan?”
13Jɔn ɔkanɛbɛ ya, “Katama nu bagbuga bacia mbɛ jugi bakpɛɛ.”
14Mɨnɛ baju-reku bajuju basɨna mɔ, “Nsu ayu-ɛ? Resiŋɛ bu?”
Jɔn ɔkanɛ bɛ ya, “Katama nu bani bagbuga na nsɨm, mɨnɛ karigɛ nu bani ratanɛ. Yɔgɛ mbu bakpɛɛ nu bobigɛ nu.”
15Bani babɨnɛ kɔfɔn korigɛ-etima, mɨnɛ kodinɛ-botima, ara Jɔn mɔ ɔra Ɔnyaŋɛ-rokuku. 16Jɔn ɔkanɛ bɛ ya, “Ami nruŋɛ nu raku na mani, nsu oni ŋɔ ocia mi ɔrakaka oŋuɛ. Nkiyiba mbigɛ tumkɔŋaɛ irigi birɛ-ikari bɛmɔ. Amɔ kuoru nu raku na Keriragi-kɛkɔ mɨnɛ na roku. 17Ɛkɔb-rasa ɛramɔ na ibɔ nji ofuga bɔkpa ɔsɛ mɨnɛ otubɛrɛ bomu na ebuŋ ɛmɔ, nsu bɔkpa ɔkɨma na roku ndu rɔbɔrɔyɨmayɨma.” 18Na bɔyɔ nkɨm nkɨm Jɔn ɔkanɛ bani Brika Ramu Ɔkɨm-kaju mɨnɛ ɔkaba bɛ bafɔdkanɛ ramaɛ rabɛ.
19Nsu Jɔn otunɛ Ɔkɨm Hɛrɔd ya, “Ɛra gbabobi kɔsa Hɛrodias, ɔwa ɔma ɔmɔ.” Ɔkanɛ mɨnɛ ya Hɛrɔd osi birɛbebi bejuju ecii. 20Na kekurɛ kɛtɨbi, Hɛrɔd omura Jɔn na ɛtɔ-nkpɔkɔbi, mɨnɛ nfa na bobi mbu bociacia mbuosi.
Baru Jisɔs koku
(Mt 3:13-17; Mk 1:9-11)
21Ndi owuru raku bani sɛn, oru mɨnɛ nku Jisɔs. Ndi Jisɔs ɔra ɔrɔbɔ njɔm, kaju-rɔja kayirɛ, 22Keriragi-kɛkɔ aya ebubugi keriɛ kɛnyɛgɛ mɔ. Mɨnɛ remu resi na kaju-rɔja ya, “Awu mɔ ara Wɔ omia ŋɔ etima. Nfɔnɔ kɔrɔmetima na awu.”
Bani kɛtɨbi Jisɔs bɨnɛ biyɛn
(Mt 1:1-17)
23Ndi Jisɔs ɔbɨnɛ rɛsɛ rɛmɔ, ɔra ju ɛram irɨma jubi. Oni naŋɔnɛ ɔrɔŋɛ ya wɔ Josɛb.
Nsu kɛtɨbi kɛmɔ kerua ntunɛ kecia Hɛli, 24wɔ Matad,
wɔ Lɛbai, wɔ Mɛlki,
wɔ Janai, wɔ Josɛb,
25wɔ Matatia, wɔ Ɛmɔs,
wɔ Nahum, wɔ Ɛsli,
wɔ Nagai, 26wɔ Maad,
wɔ Matatia, wɔ Sɛmɛin,
wɔ Josɛk, wɔ Joda,
27wɔ Joanan, wɔ Rɛsa,
wɔ Sɛrubabɛl, wɔ Sɛltiɛl,
wɔ Nɛri, 28wɔ Mɛlki, wɔ Adi
wɔ Kosam, wɔ Ɛlmadam, wɔ Ɛr,
29wɔ Josua, wɔ Ɛliɛsa,
wɔ Jorim, wɔ Matad, wɔ Lɛbai, 30wɔ Simiɔn, wɔ Juda,
wɔ Josɛb, wɔ Jonam, wɔ Ɛliakim,
31wɔ Mɛlia, wɔ Mɛna,
wɔ Matata, wɔ Natan,
wɔ Debid, 32wɔ Jɛsɛ,
wɔ Ɔbɛd, wɔ Boas,
wɔ Salmɔn, wɔ Nasɔn,
33wɔ Aminadab, wɔ Admin, wɔ Ani,
wɔ Ɛsrɔn, wɔ Pɛrɛs,
wɔ Juda, 34wɔ Jekɔb,
wɔ Aisik, wɔ Abraham,
wɔ Tɛra, wɔ Naɔ,
35wɔ Sɛrug, wɔ Rɛu,
wɔ Pɛlɛg, wɔ Ɛbɛ,
wɔ Sɛla, 36wɔ Kainan,
wɔ Afasad,
wɔ Sem,
wɔ Nua, wɔ Lamɛk, 37wɔ Mɛtusɛla, wɔ Ɛnɔk,
wɔ Jarɛd, wɔ Malalil,
wɔ Kɛnan, 38wɔ Ɛnɔs,
wɔ Sɛd, wɔ Adam,
wɔ Ɛbrɔkpabi. Kɛtɨbi Jisɔs kerua kpad ta kɛkakurɛ na Ɛbrɔkpabi.
©️2022 Luke Initiative for Scripture Translation