Génesis 4
4
Ti Caine xchi'uc ti Abele
1Ti vinique lic xchi'in ti yajnile, ja' ti Evae. Jech ti antse lic xchi'in yol. Laj yil jun squerem, ja' ti Caine. Xi laj yale: “Oy xa jcot jquerem. Ja' laj yac'bun ti Diose.” 2Ts'acal to un, laj svoq'ues ti Abele, yits'in ti Caine. Ti Abele naca ts'un chij lic yabtelan. Ja'uc ti Caine naca ts'unubajel ta banomil lic yabtelan.
3Ech' c'uc sjaliluc un, oy jun c'ac'al, ti Caine laj yich' batel ta smoton Dios sat ti c'usi sts'unojane. 4Ja' jech xtoc ti Abele laj yich' batel ta smoton Dios ti sba yol xchij ti lec t'ujome. Va'i un, ti Abele lec ilat yu'un ti Diose, lec ilat ti matanal laj yaq'ue.#Heb 11.4. 5Ja'uc ti Caine, mu jechuc ilat, mi ja'uc tsacbat ti matanal laj yaq'ue. Ja' yu'un un, ti Caine ep soc sjol ta j'ech'el. Yanijem ti sat ta j'ech'ele. 6Va'i un, xi i'albat yu'un ti Diose: “¿C'u cha'al ta xa'ilin, ti toj yanijem asat ta xapase? 7Ti lecuc ta xapas abae, xu' xatoy ti asate. C'u stu un, mu jechuc ta xapas. Jech ti mulile smalaoj xa yo' ta xayu'ninot. Manchuc mi jech un, xu' xatsal ti jechuque.”
8Ta yan c'ac'al un, ti Caine laj yic' batel ta paxyal ti Abel ti ja' yits'ine.#Mt 23.35; Lc 11.51; 1 Jn 3.12. Ti c'alal tey oyic xchibalic ta osiltique, jech ti Caine, tsac xut ti Abel ti ja' yits'ine, laj smil. 9Va'i un, ti Diose xi laj sjac'be ti Caine:
—¿Bu oy ti avits'in Abele?
Ti Cain xtoque xi laj staq'ue:
—Mu jna'. ¿Mi yu'un xavac'touc ti vu'un jbainoj ta sq'uele?
10Xi albat yu'un ti Diose:
—¿C'u cha'al jech laj apas le'e? Ti xch'ich'el avits'in ti laj xa amalbe ta banomile, x'avet xa ta xisc'anbun ti ac'o jchapanote.#Heb 12.24. 11Jech o xal un, bac avocol xacom o. Ta xaloc' batel ta banomil ti bu laj amalbe xch'ich'el ti avits'in ti vo'ot laj amile. 12Ac'o mi ta xavabtelan ti banomile, mu'yuc c'usi ta xayac'bot. Yu'un yalel muyelot ta banomil. Mi ja'uc jutebuc ta xata ti xlaet ta xava'i ti osile.
13Va'i un, ti Caine xi laj stac'be ti Diose:
—Mu cha'bel xcuch cu'un ti tsots vocol taje. 14Yu'un avi tana li' une, laj xa ajipun loq'uel ta banomil. Ta xlic ti ta xinamaj batel ta atojole, ti yalel muyelun ta banomile, ti mu jta jset'uc xlaet ta xca'i ti osile. Ja' yu'un un, ti buch'uuc no'ox ti ta xiyile ta xismil.
15Xi tac'bat yu'un ti Diose:
—Ti mi oy buch'u ta smilote, vuc-coj xjelav to ta xich' ti svocole.
Ja' yu'un un, ti Diose laj yac'be senyail ti Caine yo' jech ti stuque mu xlaj ta milel mi oy bu ta x'ilat yu'une. 16Jech ti Caine loc' batel ti bu laj sc'opon sbaic xchi'uc ti Diose. Bat nacluc ta Nod ti oy ta sloq'ueb c'ac'al yu'un ti Edene.
Snitilultac ti Caine
17Ti Caine laj xchi'in ti yajnile. Jech ti antse lic xchi'in yol, lic voc'uc, Enoc laj yac'be sbi. Ts'acal to un, ti Caine laj sliques jun jteclum ti ja' laj yac'be sbi Enoc jech c'u cha'al sbi ti xnich'one. 18Ti Enoque inich'naj, Irad sbi. Ti Irade inich'naj, Mehujael sbi. Ti Mehujaele inich'naj, Metusael sbi. Ti Metusaele inich'naj, Lámec sbi. 19Ti Lameque oy chib yajnil. Adá sbi ti june. Ti yane Zilá sbi. 20Ti Adae laj svoq'ues ti Jabal sbie, ti ja' totil me'il yu'unic ti buch'utic naca axibal na ti snaique, xchi'uc ti ja' jts'un vacaxetique. 21Ti Jabale, ayan jun yits'in ti ja' Jubal sbie, ti ja' totil me'il yu'unic ti buch'utic sna' stijic ti arpae, ti sna' xoq'uisanic ti amae. 22Yan ti Zilae laj svoq'ues ti Tubal-cain sbie, ti ja' jun jten-taq'uin loq'ue, yu'un oy c'usi ta sloc'taan ta c'anal taq'uin, ta tsatsaquil taq'uin. Ti Tubal-caine, ayan jun yixlel ti ja' Naamá sbie.
23Oy jun c'ac'al, ti Lameque xi laj yalbe ti Adae, ti Zilae, ti ja' yajniltaque:
“Ta xcalboxuc ava'iic,
laj jmil jun vinic yu'un laj syayijesun,
xchi'uc jun querem ti laj smajune.
24Yu'un mi ta x'ac'bat stoj vucub velta ti buch'u ta smil ti Caine,
jech ti buch'u ta xismilune,
ta x'ac'bat stoj vuclajuneb xchanvinic (77) ti vucube.”
Ti yoxibal xnich'on ti Adane ti laj yilic xchi'uc ti Evae
25Ti Adane lic xchi'in yan velta ti yajnile. Laj yil jun squerem. Laj yac'be sbi Set. Yu'un xi laj yale: “Ti Diose laj yac'bun yan jquerem ti ja' xq'uexol ti Abele, ti laj ta milel yu'un ti Caine.”
26Jech ti Sete laj yil jun xnich'on ti laj yac'be sbi Enós. Ja' tey lic ayanuc talel ti lic c'anbatuc vocol ti Diose.
Biblia en Tzotzil de Chamula, Chiapas, México © Sociedad Bíblica de México, A.C. 2000