Maatiusiup Aglangit 4
4
Jiisusiup Pijumisaaqtauninga
Maakusi 1:12-13; Luukasi 4:1-13
1Tavva Anirniup Jiisusi tasiuqpaa inuqanngittumut, uuktuqtauluni pijumisaaqtauqullugu Saataanasimut. 2Ullunik unnuaniglu 40-nik nirilaunnginnami, kaaliqpuq. 3Pijumisaarijiup tikippaa uqautillugu, “Guutiup Irnirikpatit, ukua ujarait niaquujannguqtilaukkit.”
4Jiisusiup kiuvaa, “Guutiup uqausinginni titiraqsimavuq, ‘Inuk niaquujatuinnarmik inuujjutiqanngilaq, Guutiulli uqausinginnik qaninganit anijunik tamainnik inuujjutiksaqaqpuq.’”
5Tavva Saataanasiup Jiisusi Jiruusalimmuarutivaa iglugasangnut ijjurnaittunut, qavviqtillugu tuksiarvigjuap puqtuniqpaanganut. 6Uqautillugu, “Guutiup Irnirikpatit, taununga ilingnik kataktilaurit, Guutiup uqausinginni titiraqsimangmat,
‘Aingiliiqutini tiliniaqpait pillutit;
Aggangmingnut tigumiarniaqpaatit,
Itigatit aanniqunagit ujaqqanut.’”
7Jiisusiup kiuvaa, “Guutiup uqausinginni titiraqsimagivuq, ‘Atanirmik Guutingnik uukturlugu pijumisaarijuksaunngilatit.’”
8Amma Saataanasiup Jiisusi aullarutivaa qaqqamut puqtujualungmut, takutillugu silarjuarmiut angajuqqauvinginnik takuminarninginniglu. 9Uqautillugu, “Tamakkualimaat tuniniaqpakka ilingnut, saannut siiqqurlutit tuksiarvigiguvinga.”
10Tavva Jiisusiup kiuvaa, “Saataanasi uvannit aullarit! Guutiup uqausinginni titiraqsimangmat, ‘Atanirmut Guutingnut tuksiaqtuksauvutit taanna kisimi pijitsiqtaksarivat!’”
11Tavva Saataanasiup qimakpaa; takugillu, aingilit Jiisusi upaglugu ikajuliqpaat.
Jiisusiup Pinasualirninga Galiliami
Maakusi 1:14-15; Luukasi 4:14-15
12Jiisusi tusarami Juanasiup tigujauninganik, Galiliamuaqpuq. 13Iglugasait Naasariiti qimaglugit Kapiirniami nunaqariaqtuqpuq, tasiup sinaaniittumi, Sipuluniup Naaptaliullu ilanganiittumut. 14Taimailauqpuq nalauttaijuup Aisaiasiup uqausingit nalautsiliqullugit, uqaqtut:
15“Sipuluniup nunanga, Naaptaliullu nunanga,
Imarmut turaangajuup aqqutinganiittuuk, Juartaniup
Akiani, Galilia Juutiunngittut nunangat,
16Tavvani inuit taaqtumiittut
Qaumajurjuaq takuvaat,
Tuquullu tarralininganiittunut qaumajuq saqqippuq.”
17Tavvanngat pigiarlugu Jiisusi ajuriqtuisivuq, uqarluni: “Qaqialirissi, Qilaup Ataniuvia qaglilirmat!”
Jiisusiup Iqaluksiuqtinik Sitamanik Qaiqujininga
Maakusi 1:16-20; Luukasi 5:1-11
18Jiisusi Galiliap tasirjuangata sinaagut pisugluni, takuvuq nukariingnik marruungnik, Saimuunimik Piitturuusimik taijaujuq qatanngutaaniglu Aanturuumik, nulujjirasuaqtuungnik tasirmut, iqaluksiuqtiugamik. 19Jiisusi taakkungnunga uqaqpuq, “Maliksinnga, inungnik iqalugasuktutitut pinasuaqtilaarassik.” 20Tavvainnaq nuluatik qimaglugit, Jiisusi maliksaqpaak.
21Tavvangat pisulirmigami, nukariingniktauq marruungnik takugivuq, Jaimisimik Juanasimiglu Sipitiup irningingnik, taakkuak umiamiippuuk ataatatik Sipiti ilagillugu, nuluamingnik angmajuijaijuuk, taakkuaktauq qaiquvaak. 22Tavvainnaq umiaq ataatatiglu qimakpaak, Jiisusi maliglugu.
Jiisusiup Ajuriqtuininga Aanniajuniglu Aaqqiksininga
Luukasi 6:17-19
23Jiisusi Galilialimaami namutuinnaq aiqattaqpuq, ajuriqtuivagluni Juutit ukpirnirmut katimavinginni, uqausiqarluni uqausirnik tusaruminaqtunik Guutiup Ataniuvinganik, ajjigiinngittunik aannialit qanimajullu inuit aaqqikpait. 24Tusaumajauliqpuq nunami Sirialimaami, inuit tavvunngaujjivut qanimajuqutimingnik, ajjigiinngittunik qanimmasiqaqtunik, iliqqusirluktuniglu, anirnirlungmullu itirviusimajunik, qiiqsuqpaktuniglu, nukiqanngittuniglu, Jiisusiup tamarmik aaqqikpait. 25Inugiakturjuat malikpaat Galiliamit Tikapuliisimillu, Jiruusalimmillu, Juutiamillu, Juartaniullu akianit pisimajulimaat malikpaat.
Eastern Arctic Inuktitut Bible (Romanized) © Canadian Bible Society, 2022-2023.