यहुन्ना 7
7
ईसू अन वींका भई
1ईंका केड़े पछे ईसू गलील में जातरा किदी। वो यहूदियाँ परदेस में जाणो ने छावतो हो, काँके यहूदी अदिकारी वींने मारबा की कोसीस कररिया हा। 2#वे.वि 16:13अन यहूदियाँ मनकाँ को झोपड़्या को तेवार#7:2 छोपड़्या को तेवार एक अस्यो तेवार हो जिंने यहूदी मनक हाक भेळी करन हात दनाँ तईं मनाता हा। नके हो। 3ईं वाते ईसू का भई वणीऊँ क्यो, “थूँ अटेऊँ यहूदियाँ परदेस परोजा, ताँके ज्यो काम थूँ करे हे, वींने थने मानबावाळा भी देक सके। 4यद्याँ कुई भी मनक प्रसिद वेणो छावे तो वो छुपन कई ने करे। थूँ यो काम करे हे, तो आपणाँ खुद ने दनियाँ का हामे परगट कर।” 5काँके वींका भई भी वींको विस्वास ने करता हा।
6तद्याँ ईसू वाँने क्यो, “मारा वाते अबाणू तेवार में जाबा का वाते सई टेम ने आयो हे, पण थाँका वाते हरेक टेम सई हे। 7या दनियाँ थाँकाऊँ नपरत ने राके हे, पण माराऊँ नपरत राके हे, काँके मूँ वाँका विरोद में केऊँ के, वाँका काम बुरा हे। 8ईं तेवार में थाँ जावो। मूँ अबाणू ईं तेवार में ने जावूँ, काँके मारो वाते सई टेम आलतरे ने आयो हे।” 9ईसू वाँकाऊँ ईं बात करन गलील मेंईस रेग्यो।
10ईंका केड़े जद्याँ वींका भई तेवार में पराग्या, तो वो भी छानो-मानो वटे परोग्यो। 11यहूदी अदिकारी तेवार में ओ केता तका वींने होदरिया हाँ के, “वो कटे हे?”
12ईसू का बारा में लोगाँ में छाने-छाने घणी बाताँ वी। कतराई तो केता हाँ, “वो भलो मनक हे।” अन दूजाँ केता हा के, “ने, वो तो लोगाँ ने भरमावे हे।” 13कुई भी मनक वाँका वाते खुलन बाताँ ने कर पारियो हो, काँके वीं लोग-बाग यहूदी अदिकारियाऊँ दरपता हा।
यरूसलेम में ईसू को उपदेस
14जद्याँ तेवार का आदा दन बीत चुक्यो हा, तो ईसू मन्दर में जान उपदेस देबा लागो। 15तद्याँ यहूदी अदिकारियाँ घणो अचम्बा किदो अन क्यो, “यो मनक अतरो कस्यान जाणे हे, यो तो आपणाँ अटे कदी भणवाई ने आयो?”
16ईसू वाँने क्यो, “ज्या हिक मूँ देरियो हूँ वाँ मारी ने हे, पण मने खन्दाबावाळा की हे। 17यद्याँ कुई वींकी मरजी पे चालणो छावे, तो वीं खुद ईं हिकऊँ जाण जाई के, या हिक परमेसर का आड़ीऊँ हे कन मारा आड़ीऊँ हे। 18ज्यो कुई आपणाँ आड़ीऊँ केवे हे वो खुद की बड़ई छावे हे पण ज्यो आपणाँ खन्दाबावाळा की बड़ई छावे हे वो हाँचो हे अन वींमें कई खोट ने हे। 19कई मूसे थाँने वेवस्ता का नेम ने दिदा हा? पण थाँकामूँ कुई भी नेम को पालण ने करे हे। तो थाँ मने मारबा की कोसीस काँ कररियाँ हो?”
20लोग-बाग वींने क्यो, “थाँरा में हुगली आत्मा धस्यी तकी हे। कूण हे ज्यो थने मारणो छावे हे?”
21ईसू वाँने क्यो, “में एक काम किदो हे अन थाँ हाराई अचम्बो करो हो। 22#उत्प 17:10सबद का दन थाँ मूसा की आग्या ने मानन जद्याँ थाँ मनकाँ को खतनो करो हो, तो थाँ भी तो सबद का दन काम करो हो। पण या रीत तो मूसा का पेल्याऊँ आपणाँ बड़ाबा की टेमऊँ चाली आरी हे। 23#यहु 5:9सबद का दन कणी मनक को खतनो करबाऊँ मूसा को नेम ने टुटे हे, तो थाँ मारा पे गुस्सा काँ करो हो के, में एक मनक ने सबद के दन पुरी तरियाऊँ हव कर दिदो हे? 24मुण्डा देकन न्याव मती करो, पण ठीक-ठीक न्याव करो।”
कई ईसू मसी हे?
25जद्याँ कुई यरूसलेम का रेबावाळा केबा लागा, “कई यो वोईस हे, जिंने लोग-बाग मारबा की ताक में हे? 26पण देको, यो तो चोड़े-धाड़े बाताँ करे हे अन कुई भी वींने कई ने के पारिया हे। कई यहूदी अदिकारी हाँची में जाणतो ने ग्या हे के, योईस मसी हे? 27ईंने तो आपाँ जाणा हाँ के, यो कटा को हे। पण हाँची में मसी आई, तो कुई ने जाणी के, वो कटाऊँ आयो हे।”
28तद्याँ ईसू मन्दर में हिक देता तका जोरऊँ क्यो, “थाँ केवो हो के, थाँ हाँची में मने जाणो हो अन यो भी जाणो हो के, मूँ कटा को हूँ। मूँ खुद आपणाँ आड़ीऊँ ने आयो, पण मने खन्दाबावाळो हाँचो हे। वींने थाँ ने ओळको हो। 29पण मूँ वींने ओळकूँ हूँ, काँके मूँ वींका आड़ीऊँ खन्दायो तको हूँ।”
30पछे वीं वींने पकड़णो छायो, पण कुई भी वींने हात ने लगा सक्यो, काँके वींके पकड़्यो जावा को टेम अबाणू ने आयो हो। 31पछे भी वीं भीड़ मेंऊँ घणा लोग-बाग वींपे विस्वास किदो अन केबा लागा के, “जद्याँ मसी आई तो वो जतरा परच्या अणी बताया हे अणीऊँ हेला ने बताई, कई वो अस्यान करी?”
ईसू ने पकड़बा की कोसीस करणी
32फरीसी जद्याँ मनकाँ ने ईसू का बारा में छाने-छाने बाताँ करता तका हुण्या, तो वणा अन मुक्य याजकाँ ईंस ने पकड़बा का वाते मन्दर का चोकीदाराँ खन्दाया। 33ईंपे ईसू क्यो, “मूँ थोड़ी देर तईं थाँका रेवूँ हूँ, तद्याँ मूँ मारा खन्दाबावाळा के नके पाछो परो जाऊँ। 34थाँ मने होदो पण मूँ ने लादूँ अन जटे मूँ हूँ वटे थाँ ने आ सको हो।”
35यहूदी अदिकारी एक-दूजाऊँ केबा लागा, “यो कटे जाबावाळो हे, जटे ईंने होदा अन यो ने लादी? कई यो युनानी नगराँ में जाई जटे आपणाँ मनक रेवे हे अन कई युनानी मनकाँ ने हिकाई? 36अन अणी बात को अरत कई हे ज्यो अणी क्यो हे के, ‘थाँ मने होदो, पण मूँ ने लादूँ,’ अन ‘जटे मूँ हूँ वटे थाँ ने आ सको’?”
जीवन देबावाळी नंद्याँ
37पछे तेवार के आकरी दन ज्यो खास दन वेतो हो। वीं दन ईसू ऊबो वेन जोरऊँ क्यो, “यद्याँ कुई तरियो वे तो मारा नके आवे अन पिवे। 38ज्यो कुई मारा में विस्वास केरी, जस्यान पवितर सास्तर बतावे हे के, ‘वींका मेंऊँ जीवन का पाणी की नंद्याँ वेबा लागा जई।’” 39ईसू या बात पुवितर आत्मा का बारा में किदी ही, ज्या वींपे विस्वास करबावाळा ने मलबावाळी ही। अबाणू तईं या आत्मा किंने भी ने मली ही, काँके ईसू आलतरे आपणी मेमा उटाया ने ग्या हा।
मनकाँ में फुट
40तद्याँ भीड़ मेंऊँ कुई ईं बाताँ हुणन क्यो, “हाँची में, यो परमेसर का आड़ीऊँ बोलबावाळो हे।”
41कुई दूजाँ मनक केरिया हा के, “यो मनक मसी हे।”
पण कुई केरिया हा, “मसी गलीलऊँ ने आई। 42कई सास्तर में यो ने लिक्यो हे के, मसी दाऊद का बंसऊँ अन बेतलेम गामऊँ आई, जटे राजा दाऊद रेतो हो?” 43अस्यान ईसू की वजेऊँ मनकाँ में फुट पड़गी। 44वणा मेंऊँ थोड़ाक जणा वींने पकड़ाणो छारिया हा, पण कुई भी वींके हात ने लगा सक्यो।
यहूदी अदिकारी ईसू को विस्वास ने किदो
45जद्याँ मन्दर का चोकीदार पाच्छा आग्या, तो मुक्य याजकाँ अन फरीसियाँ वाँकाऊँ पूँछ्यो, “थाँ वींने पकड़न काँ ने लाया?”
46वणा जवाब दिदो, “कुई भी मनक कदी अस्यी बाताँ ने किदी जस्यी वो करे हे।”
47अणीऊँ फरीसियाँ वाँकाऊँ क्यो, “कई थाँ भी तो ने भरमाया ग्या हो? 48थाँ यहूदी अदिकारियाँ कन फरीसियाँ मूँ किंने एक ने भी जाणो हो कई? जणी ईंपे विस्वास किदो वेवे? 49पण या मनकाँ की भीड़ ज्या मूसा का नेमाने ने जाणे हे। परमेसर को हराप ईंपे हे।”
50 #
यहु 3:1,2 निकेदुमस ज्यो पेल्याँ ईसू का नके ग्यो हो अन यो वणा फरीसियाँ मूँ एक हो, वणी क्यो, 51“आपणी मूसा का नेमा में कणी भी मनक की जद्याँ तईं वींकी पेल्याँ हुण ने लेवे अन हमज ने लेवे के, वो कई करे हे। वतरे वींने दोसी ने बणायो जावे हे।”
52वणा वींने जवाब दिदो, “कई थूँ भी गलील को हे? सास्तर में देक अन होद के, गलीलऊँ कुई भी परमेसर का आड़ीऊँ बोलबावाळो परगट ने वेबावाळो हे।” 53#7:53 कुईक पुराणी युनानी हातऊँ लिकी तकी पोत्याँ में आ आयत ने हे। ईं आयत में यो लिक्यो ग्यो हे के, पछे वीं हाराई आपणाँ-आपणाँ घरे पराग्या।
(c) 2010-2017, New Life Computer Institute. All rights reserved