យ៉ូហាន 4
4
គ្រែដៃ យីស៊ូ វ៉ា កទ្រី សាត សាម៉ារី មូយ រ៉ា
1គ្រែដៃ យីស៊ូ កន់ដ្រាគ់ ណោះ ឡើយ រៀន បូវ ផារីស៊ី ដុង ឝឹត ហ ឡា បើម ដូវ លុកស៊ិក ហ្នដើម វ៉ា បើម ឞ៊ុន ពង់ហូម ឌី ដាក អើន ជឺរ យ៉ាគ់ យ៉ូហាន 2យ៉ះ គ្រែដៃ យីស៊ូ តបើម ឞ៊ុន ពង់ហូម ឌី ដាក អាំ ឌី មែ អ៊ឺម ប៊ិច ឡូវ លុកស៊ិក ហ កឡឹ មិញ ឡា បើម ឞ៊ុន ពង់ហូម អ៊ែ។ 3សាគ់ ហ ណោះ ប៉ាគ់ អ៊ែ ឡើយ ហ ញឺស តើម ឝឹត ឃែត យូដា ជឹ កស៊ឹត ហ្មិះ ហ៊ឹ ឃែត ឝ៉ាលីលែ មូយ រន់ទុះ ឋាវ្គ។ 4ហ ត្រ រ៉ិ ដក់ ឌ្រុះ ឃែត សាម៉ារី។ 5អ៊ែ ឡើយ គ្រែដៃ យីស៊ូ រ៉ិ ឈឹង ដាល់ ម៉ា ប៊ឹះ ស្រ៊ុក ស៊ីខារ ទឹង ឃែត សាម៉ារី អ៊ែ។ ស្រ៊ុក អ៊ែ ណាគ់ ដាល់ ពដិះ មូយ ឞន #ពគ្រ. ៣៣:១៩; យស. ២៤:៣២យ៉ាគ់ យ៉ាកុប ឡា អាំ ឌី យ៉ូស៊ែប កួន កឡ ហ លម៉ាំង ពឋើម។ 6ណាគ់ ទឹង ឞន អ៊ែ ប៊ិច ដាក លុង យ៉ាគ់ យ៉ាកុប។ គ្រែដៃ យីស៊ូ តសូវ ឌី ហ ដក់ ចង៉ាយ អ៊ែ អ៊ែ ឡើយ ហ គូ ង៉ូក ទឹង ដាក លុង អ៊ែ ឞ៊ែត ម៉ា ប៊ឹះ តង៉ៃ ឆុង ឡើយ។
7សាគ់ អ៊ែ ប៊ិច កទ្រី សាម៉ារី មូយ រ៉ា រ៉ិ ឈិត ដាក។ គ្រែដៃ យីស៊ូ ម៉ាង ហ្មិះ ហ៊ឹ ហ រៀន៖ «អៃ ឡា ញែត ដាក សៃ ឍឺ»។ 8ខង បូវ លុកស៊ិក ហ រ៉ិ ដាំង រួត ព្រឈូគ ពួរ ហ៊ឹ ស្រ៊ុក អ៊ែ។ 9កទ្រី សាម៉ារី អ៊ែ ត្រណើវ ហ រៀន៖ «សៃ សាត យូដា។ ពឆិ ឌី សៃ ឡា ដាក ឝឹត អៃ ឡា សាត សាម៉ារី ពនែ?» ហ តង៉ា ពអ៊ែ ឌីខង មែ យូដា តរូគ ទិត ត អរែង ឌី មែ សាម៉ារី អ៊ឺម។
10គ្រែដៃ យីស៊ូ ត្រណើវ ហ រៀន៖ «ប៉ាគ់ សៃ សឝ៉ាវ អណាំ ឝឹត គ្រែដៃ វ៉ា សឝ៉ាវ ហ លឡា ឝឹត សៃ រៀន៖ “អៃ ឡា ញែត ដាក សៃ ឍឺ” អ៊ែ សៃ ម៉ា ឡា ដាក ឝឹត ហ មិញ អ៊ែ ឡើយ ហ ម៉ា អាំ ដាក ឡា បើម អាំ ញិវ ឌី សៃ»។ 11កទ្រី អ៊ែ ត្រណើវ ហ រៀន៖ «អ៊ឺ កន់ដ្រាគ់ សៃ តប៊ិច សនឺ ឆិ ម៉ា ឈិត ដាក នែ អ៊ឺម។ ដាក លុង នែ ឈ្រុ។ ឝឹត ឆិ សៃ ម៉ា បើម ដូវ ដាក ឡា បើម អាំ ញិវ អ៊ិន? 12ម៉ាត់ សអ៊ែ សៃ ទិះ ជឺរ យ៉ាគ់ យ៉ាកុប ឡា ម៉ិ យ៉ាគ់ លម៉ាំង លពឺង ង៉ាយ ឡា អាំ ដាក លុង នែ ឌី អ្យា? យ៉ាគ់ យ៉ាកុប ហ្នដឹប កួន ចូវ ហ ហ្នដឹប សនឺ បណាន់ ហ កគ់ ញែត ដាក លុង នែ ពទឺ»។ 13គ្រែដៃ យីស៊ូ ត្រណើវ ហ រៀន៖ «ហ ឆិ ឡា ញែត ដាក លុង នែ ម៉ា ណាគ់ ហឡាគ់ ឋាវ្គ 14ហាក់ឌី ហ ឆិ ឡា ញែត ដាក អៃ ឡា ម៉ា អាំ នែ ម៉ា តា ហឡាគ់ យ៉ាវ ដាក អៃ ឡា ម៉ា អាំ ឌី ហ នែ ម៉ា វឹរ ឝឹល តណើម ដាក កនុង ចាក់ ហ ឡា ញឺស ប្ល៉ុះ និះ បើម អាំ ហ ញិវ ឡូច អ្នសច»។ 15កទ្រី អ៊ែ ត្រណើវ ហ រៀន៖ «អ៊ឺ កន់ដ្រាគ់ ឡា អាំ ដាក នែ ឌី អៃ បក់ឌី អៃ ម៉ា តា ហឡាគ់ យ៉ាវ វ៉ា អៃ ម៉ា តា រ៉ិ ឈិត ដាក ហ្មិះ ទឹ នែ យ៉ាវ»។
16គ្រែដៃ យីស៊ូ ម៉ាង ហ្មិះ ហ៊ឹ ហ រៀន៖ «ហគ់ សៃ រ៉ិ កឡូវ ក្ល សៃ អ៊ែ ឡើយ ជឹ កស៊ឹត ហ៊ឹ នែ»។ 17កទ្រី អ៊ែ ត្រណើវ រៀន៖ «អៃ តប៊ិច ក្ល អ៊ឺម»។ គ្រែដៃ យីស៊ូ ម៉ាង ហ្មិះ ហ៊ឹ ហ រៀន៖ «សៃ រៀន “អៃ តប៊ិច ក្ល” ត្រ ឡើយ សៃ ម៉ាង ពអ៊ែ 18ឌីខង ពឋើម សៃ ប៊ិច ក្ល សើង រ៉ា ឡើយ វ៉ា កឡ សៃ ឡា គូ អរែង ណិះៗ នែ តត្រ ក្ល សៃ អ៊ឺម។ ប្រម៉ាង សៃ ឡា ម៉ាង នែ ត្រ ម៉ាត់ ម៉ាត ឡើយ»។ 19កទ្រី អ៊ែ ត្រណើវ ហ រៀន៖ «អ៊ឺ កន់ដ្រាគ់ តាម អៃ រ៉ាង សៃ នែ ត្រ ណាក់ ហាយ ប្រម៉ាង គ្រែដៃ។ 20យ៉ាគ់ យឺ អ្យា ខឿយ ហ្មបះ ដាំង គ្រែដៃ ណាគ់ ទឹង ចន់ឌូ នែ ហាក់ឌី វែ ហាយ រៀន ត្រ រ៉ិ ហ្មបះ ដាំង គ្រែដៃ ណាគ់ ទឹង មឿង យីរូសាឡឹម មិញ»។
21គ្រែដៃ យីស៊ូ ម៉ាង ហ្មិះ ហ៊ឹ ហ រៀន៖ «ឡា សៃ សឿ អៃ យ៉គ មីក ឞៀតៗ ឋាវ្គ វែ ម៉ា តា ហ្មបះ ដាំង គ្រែដៃ បើគ ណាគ់ ទឹង ចន់ឌូ នែ វ៉ា តត្រ ទឹង មឿង យីរូសាឡឹម អ៊ែ អ៊ឺម ពទឺ វែ ឡា ម៉ា ហ្មបះ អ៊ែ។ 22វែ សាត សាម៉ារី តណោះ សឝ៉ាវ ហ វែ ឡា ហ្មបះ អ៊ឺម។ អ៊ែ ឌី អ្យា មិញ អ្យា ណោះ សឝ៉ាវ ហ អ្យា ឡា ហ្មបះ ឌីខង ហ ឡា ណាក់ សវ៉ាក់ ពញិវ អ៊ែ ញឺស ឝឹត សាត យូដា។ 23ហាក់ឌី តង៉ៃ ប្រម៉ត់ ឞៀត ម៉ា ប៊ឹះ ឡើយ ណិះៗ នែ ឡើយ។ ណាគ់ ទឹង នែ មែ ឡា ណាក់ កដាប ហ្មបះ គ្រែដៃ បើគ ម៉ាត់ ម៉ាត មែ អ៊ែ ម៉ា កដាប ហ្មបះ គ្រែដៃ បើគ សយ ផវ យ៉ាង វ៉ា សយ កាន ឡា ត្រ ឌីខង បនិះ នែវ អ៊ែ ឡើយ គ្រែដៃ ឡា ដាំង បក់ឌី ហ្មបះ ដាំង ហ។ 24គ្រែដៃ ហ ផវ យ៉ាង។ អ៊ែ មែ ឆិ ឡា ហ្មបះ ដាំង ហ ត្រ ហ្មបះ ដាំង ហ សយ ផវ យ៉ាង វ៉ា សយ កាន ឡា ត្រ»។
25កទ្រី អ៊ែ ត្រណើវ ហ ឋាវ្គ រៀន៖ «អៃ ណោះ រៀន គ្រែដៃ មែស៊ី ម៉ា ប៊ឹះ ហ មែ ឡា ជុ ម៉ាត់ រៀន គ្រែដៃ គ្រិះ។ សាគ់ ហ អ៊ែ ឡា ម៉ា ប៊ឹះ ហ ម៉ា ហាយ កាន លែក អ៊ែ ឌី អ្យា»។ 26គ្រែដៃ យីស៊ូ ហាយ ឌី ហ រៀន៖ «ហ អ៊ែ អៃ ឡា ប៉ះ ម៉ាង អរែង វ៉ា សៃ នែ ឡើយ»។
27សាគ់ អ៊ែ បូវ លុកស៊ិក ប៊ឹះ។ មែ តៃ គ្រែដៃ យីស៊ូ ប៉ះ ម៉ាង អរែង វ៉ា កទ្រី មូយ រ៉ា ពនែ មែ កគឹន តណោះ ពឆិ ពអ៊ែ ឋូវ ហាក់ឌី តប៊ិច មែ ឆិ ឡា តង៉ា ហ រៀន៖ «ម៉ាត់ សៃ ម៉ាង ដាំង ឆិ អ៊ែ?» វ៉ា តា តង៉ា ហ រៀន៖ «ពឆិ ឌី សៃ ម៉ាច់ ហ្មម៉ាង អរែង វ៉ា ហ ឡា កទ្រី អ៊ែ?» អ៊ឺម។ 28អ៊ែ ឡើយ កទ្រី អ៊ែ ស្រ៊ឹម វ៉ាន់ ហ តាក់ ទឹង អ៊ែ ហ ជឹ មុត ហ៊ឹ ស្រ៊ុក អ៊ែ អ៊ែ ឡើយ ហាយ ឌី មែ ខំឡាំង រៀន៖ 29«អ៊ឺ វែ រ៉ិ ទឹ អ៊ែ អ៊ែ វែ ម៉ា តៃ បនិះ មរ៉ា ឡា ហាយ ឌី អៃ លែក ឆិៗ អៃ ឡា ដូវ បើម។ ហ អ៊ែ ប ត្រ គ្រែដៃ គ្រិះ តណោះ?» 30អ៊ែ ឡើយ មែ ញឺស ឝឹត ស្រ៊ុក អ៊ែ រ៉ិ ហ្មិះ ទឹ គ្រែដៃ យីស៊ូ។
31សំប្រ៊ុះ ឌី មែ ស្រ៊ុក ឡា រ៉ិ ទឹ ហ អ៊ែ បូវ លុកស៊ិក ចន់ដ្រា ហ រៀន៖ «រ៉ាប៊ី ចង់»។ 32ហាក់ឌី ហ ហាយ ឌី មែ រៀន៖ «អៃ ប៊ិច ចណា ចា ឡើយ ចណា នែ វែ តា សឝ៉ាវ អ៊ឺម»។ 33អ៊ែ ឡើយ បូវ លុកស៊ិក ម៉ិច ហ្មម៉ាង ហ៊ឹ អ្មបារចាក់ រៀន៖ «ម៉ាត់ ហ អ៊ែ ប ប៊ិច មែ រ៉ិ ឈូន ចណា ឌី ហ ឡើយ ដុង?»
34គ្រែដៃ យីស៊ូ ហាយ ឌី មែ រៀន៖ «បើម សយ ហ ឡា ចាត់ អៃ ប្រ៉ៃ រ៉ិ បើម បយ៉ឹស កាន ហ អ៊ែ ឡើយ ឡា ចណា អៃ។ 35ប វែ ខឿយ រៀន ពអ៊ែ ដុង? ៖ “ពួន ខៃ ឋាវ្គ ធុន ជ្រូត ម៉ា ប៊ឹះ ឡើយ”។ អៃ ហាយ ឌី វែ រៀន ហគ់ វែ ម៉ា ប្ល៉ើក រ៉ាង ស្រ៊ែ នែ រ៉ាង។ ហ ឌុំ ធឺច ឝ្រហ៊ឺម អ្យាគ់ ជ្រូត ឡើយ។ 36ហ ឆិ ឡា ជ្រូត ហ អ៊ែ ដូវ ចនែរ ឡើយ ប្ល៉ៃ ហ ឡា ជ្រូត អ៊ែ ព្រឌីវ ប៉ាគ់ បនិះ ឡា មុត សឿ ដូវ ញិវ ឡូច អ្នសច។ ពអ៊ែ ហ ឡា ណាក់ ប្រឹះ វ៉ា ហ ឡា ណាក់ ជ្រូត ម៉ា ហូក អរែង វ៉ា អ្មបារចាក់។ 37ត្រ ប៉ាគ់ មែ ឡា គូ ចំ ម៉ាង រៀន ប៊ិច មរ៉ា ឡា ប្រឹះ ប៊ិច មរ៉ា ឋាវ្គ ឡា ជ្រូត។ កាន មែ ឡា ម៉ាង អ៊ែ ហ ត្រ ម៉ាត់ ម៉ាត ឡើយ។ 38អៃ ចាត់ វែ ឡើយ អាំ រ៉ិ ជ្រូត ហ៊ឹ មឺរ វែ ឡា តា ពពឹត បបើម សបះ ប៉ាប អ៊ឺម។ មែ ដដិ ឡា ពពឹត បបើម សបះ ឡើយ អ៊ែ។ អ៊ែ ឌី វែ វែ ដូវ ជ្រូត សំបម មែ ឡា ពពឹត បបើម សបះ ប៉ាប ឋួរ អ៊ែ ឡើយ»។
39ប៊ិច មែ សាម៉ារី អើន រ៉ា ឝឹត ស្រ៊ុក អ៊ែ ឡា ដូវ សឿ មឹង ហ ញ៉ន ឌី កទ្រី អ៊ែ ឡា បើម ផញ៉ាន ឌី មែ រៀន៖ «ហ ហាយ ឌី អៃ លែក ឆិៗ អៃ ឡា ដូវ បើម អ៊ែ»។ 40ប៉ាគ់ អ៊ែ សាគ់ បូវ សាម៉ារី ញឺស រ៉ិ ប៊ឹះ ទឹ ហ ឡើយ មែ ឡា ហ គូ អរែង ឌី មែ។ ហ កគ់ គូ ទឹង អ៊ែ ដូវ បារ តង៉ៃ។ 41ប៊ិច មែ អើន រ៉ា ឋាវ្គ ឡា សឿ ញ៉ន ឌី ប្រម៉ាង គ្រែដៃ យីស៊ូ កឡឹ។ 42ដូវ អ៊ែ មែ ហាយ ឌី កទ្រី អ៊ែ រៀន៖ «ណិះៗ នែ អ្យា សឿ តត្រ ឌី ប្រម៉ាង សៃ យ៉ាវ អ្យា សឿ អ៊ែ ញ៉ន ឌី អ្យា ដូវ ដុង អ្យា កឡឹ វ៉ា អ្យា ណោះ រៀន ហ នែ ឡា ណាក់ សវ៉ាក់ ពញិវ បនិះ ទឹ ពដិះ គ្រែ នែ ម៉ាត់ ម៉ាត ឡើយ»។
គ្រែដៃ យីស៊ូ បើម អាំ ប្រ៉ាល់ កួន កឡ ហ ឡា ទិះ ក្រាគ់ ឡា បើម កាន ទឹង សឋិច
43ប្លូច ឝឹត បារ តង៉ៃ អ៊ែ គ្រែដៃ យីស៊ូ ញឺស ឝឹត អ៊ែ បក់ឌី ជឹ ហ៊ឹ ឃែត ឝ៉ាលីលែ 44(គ្រែដៃ យីស៊ូ ហ ហាយ ឋួរ អ៊ែ ឡើយ រៀន ហ ឡា #មថ. ១៣:៥៧; មក. ៦:៤; លក. ៤:២៤ណាក់ ហាយ ប្រម៉ាង គ្រែដៃ ទឹង ស្រ៊ុក ចារ ហ កឡឹ តប៊ិច មែ ឆិ ណាប់ធឺ អៀល ហ អ៊ឺម។) 45ពអ៊ែ សាគ់ ហ ដូវ ប៊ឹះ ហ៊ឹ ឃែត ឝ៉ាលីលែ មែ ឝ៉ាលីលែ ហាប់ ហ ញ៉ន ឌី #យហ. ២:២៣មែ ដូវ តៃ លែក កាន ហ ឡា បើម ទឹង មឿង យីរូសាឡឹម កនុង លវ៉ាង ឞ៊ុន ក្លង ហ៊ូត អ៊ែ ឌីខង មែ ដូវ រ៉ិ ហ៊ឹ ឞ៊ុន អ៊ែ ពទឺ។
46អ៊ែ ឡើយ គ្រែដៃ យីស៊ូ រ៉ិ ហ៊ឹ ស្រ៊ុក កាណា ឃែត ឝ៉ាលីលែ ឋាវ្គ។ #យហ. ២:១-១១ទឹង ស្រ៊ុក អ៊ែ ឡើយ ហ ឡា ដូវ តវឹរ ដាក អាំ វឹរ តវែ ឈឹងជែម អ៊ែ។ ណាគ់ ទឹង មឿង កាផានុំ ប៊ិច កឡ មរ៉ា ឡា ទិះ ក្រាគ់ ឡា បើម កាន ទឹង សឋិច កួន កឡ ហ ឈិ។ 47សាគ់ ហ ដុង រៀន គ្រែដៃ យីស៊ូ ញឺស ឝឹត ឃែត យូដា មុត ទឹង ឃែត ឝ៉ាលីលែ ឡើយ អ៊ែ ឡើយ ហ រ៉ិ ឡា ឡូម គ្រែដៃ យីស៊ូ អាំ ទឺស រ៉ិ វ៉ា បើម អាំ កួន ហ ប្រ៉ាល់ ហរ៉ាល់ ឌីខង ហ ឞៀត ម៉ា តាត់ សើម ឡើយ។
48គ្រែដៃ យីស៊ូ ហាយ ឌី ហ រៀន៖ «ប៉ាគ់ វែ តតៃ ឞន សឝ៉ាវ វ៉ា កាន ញ៉ម វែ ម៉ា តសឿ អ៊ឺម»។ 49ហ ឡា បើម កាន ទឹង សឋិច អ៊ែ ឡា ឡូម ហ រៀន៖ «អ៊ឺ កន់ដ្រាគ់ ឡា ទឺស រ៉ិ ណិះៗ នែ ប៉ាគ់ តា រ៉ិ កួន អៃ ម៉ា គែត»។ 50គ្រែដៃ យីស៊ូ ហាយ ឌី ហ រៀន៖ «ហគ់ ជឹ ទឹ អ៊ែ កួន សៃ ហ ម៉ា ញិវ ឡើយ»។ កឡ អ៊ែ ហ សឿ ប្រម៉ាង គ្រែដៃ យីស៊ូ ឡា ហាយ ឌី ហ អ៊ែ។ ហ កគ់ ញឺស ជឹ ឝឹត អ៊ែ ប្រើយ។ 51សាគ់ ប៉ះ ហ ទឺស រ៉ិ ទឹ អ៊ែ បូវ ឞាវ ហ ត្រមូះ ហ អ៊ែ ឡើយ ហាយ ឌី ហ ឝឹត កាន កួន ហ ឡា ញិវ អ៊ែ។ 52ប៉ាគ់ អ៊ែ ហ តង៉ា មែ ម៉ូង ឆិ ហ ឡា អ្ងហយ អ៊ែ។ អ៊ែ ឡើយ មែ ត្រណើវ ហ រៀន៖ «ម៉ូង មូយ ប្ល៉ាក់ តង៉ៃ ដម៉ាំង ហ ប៉ាត់ ឝ្រុន អ៊ែ»។ 53បើគ ហ ណោះ រៀន ប៉ះ អ៊ែ ឡើយ គ្រែដៃ យីស៊ូ ឡា ហាយ ឌី ហ រៀន៖ «កួន សៃ ហ ម៉ា ញិវ ឡើយ»។ ហ កឡឹ វ៉ា មែ ក្រាន ហ្នាម ហ លែក រ៉ា មែ សឿ មឹង គ្រែដៃ យីស៊ូ។ 54បារ រន់ទុះ ឌី នែ ឡើយ គ្រែដៃ យីស៊ូ ឡា បើម ឞន សឝ៉ាវ ឡា ឆង៉ាត់ សាគ់ ហ ឡា ញឺស ឝឹត ឃែត យូដា មុត ទឹង ឃែត ឝ៉ាលីលែ នែ។
Text Copyright © 2024 Wycliffe Bible Translators, Inc.
Audio Copyright ℗ 2024 EMU International