Luka 24
24
Yesu Tɛnyɛnyɛmɛ Denɔ Bekpuimɛ
1Ne kiwui tɛtɔpu nɛ ɔganɛ nɛ mɛ, nɛ kɛvulɔ pinii, badzɛ ba yɛkɔ bawa nɛ gɛ ba lɔ huhuhu gɛ ba bhɛtɛ klɛ ba vɛ odzre nɛ mɛ. 2Ba mɔ sɛ be glebe kɛklãngbu nɛ odzre nɛabha, 3pɔ gɛ be tsoku, ba dɛmɔ Apalete Yesu etsitsi. 4Kibelɛlɛ nɛ gɛ bedi kibui nɛ mɛ, kiwuididze ko banɔ tɛabha gɛ ba kpasɛ akpɛkpɛ dzidze mɛ gɛ atã anasɛ subhalɛlɛ fu nɛ ba lɛ ede. 5Nɛ balɛ kifusisi so badzɛ ba bubɔ akpɛ amɛesi kɛlɛ ayɛkɔ amɛ ekumu kesukpa, pɔ banyɛ be tsre alɛ asɛ, “Kideso gɛ nɔ pɛɛ anɔ lulu denɔ be tsitsi nɛ mɛ? 6Ama ɔkɛ̃ nɛ, atɛ lɔ! Nɔ baka kibui nɛ gɛ etsre nɔ, kibelɛlɛ nɛ gɛ aza Galeli: 7‘Anɔdzyrame Yi alasɛ tɛ ba yɛkɔ yɛ akpahwɛ kɔ ebuizizi bhɛbhɛtɛ banɔ, tɛ be yi klɛ tɛ alɔ nɛ kiwui kɛtramɛ nɛabha.’ ” 8Ɔkɛlɛ la baka yɛ ekibui.
9Gɛ be de ɔvubɔkɔ nɛ aba, ba ɖɔ ebui anɛ petee etsre Kɛfɔnɛtoli anɛ̀ banɔ gɔgɔɛ petee. 10Badzɛ balɛ dzi Maria Magadalena, Yohana, Maria Yakobo ye ni, anɛ ba gɔgɔɛ gɛ ba lɛ plɛnɔ alɛ gɛ ba ɖɔ ebuia nɛ etsre banɔkpɛkpɛ. 11Pɔ ba dɛ yɛkɛ badzɛ nɛ ebui nɛabhaŋa, alasɛ ba lɛ ebui ɖɛɖɔ nɛ edzi kɔ alɛ anasɛ kibui matimati. 12Pɔ, Petro, aba lɔ klɛ akpa nɛ kisi avɛ odzre nɛ ɔbha. Gɛ akpãwɔ̃di ɔlɛ mɛ, amɔ apɔtɛ tsyutsyuɛ̃ gɛ le li ɔkɛlɛ nɛ alɛ shuahwɛ klɛ ashɛ̃, ede bisi shu asɛ kide kɛlɛ ba.
Nɛ Kidzo Nɛabha Ɔvɛ Emmuasɛ
13Ɔtsɔ̃ nɛ nɛ kiwui lɛlɛ nɛabha banɔ tɛabha de balɛ mɛ bà vɛ ɔma bhli toli gɛ be klu asɛ Emmausɛ, tɛdzidzemɛ lɛ ɔtsɛkɔ tɛgene denɔ Yerusalɛm. 14Baa ɖɔaɖɔ nɛ aglɔ denɔ ebui nɛ petee gɛ laba nɛ shu. 15Gɛ ba ɖɔaɖɔ klɛ be bu ebuimɛ kɔ ɔhaglɔ, Yesu nahwɛ ekualɛ shi klɛ aga plɛnɔ alɛ, 16pɔ ba bhɛtɛ alɛ sɛ be tivu awɔ̃hu nɛ yɛ.
17Ebisi alɛ sɛ, “Kide shu nɔ ɖɔaɖɔ denɔ gɛ nɔ ga kidzo?”
Ba dzurɔ keŋu, klɛ bakpɛ amɛesi. 18Balɛ mayɛ̃ teli, gɛ be kulu asɛ, Kleopasɛ, ebisi yɛ asɛ, “Wɔ terikpo ko wonu efu nɛ Yerusalɛm gɛ otinyi ebu gɛ la bɛlɛmɛ nɛ ɔkɛlɛ nɛ́ ewuia nɛ mɛ?”
19“ Ebisi asɛ, Ebui ɖuweɖu?”
Be builɛenu asɛ “Denɔ Yesu gɛ ede Nazarɛtɛ.” Edzi atɔnu, gɛganɛ nɛ ebuiɖɛɖɔ mɛ tɛbhɛbhɛtɛ nɛ Kpaya amɛ nɛ̀ banɔ petee amɛ. 20Kpayaɔzakɔ ekusi anɛ̀ bulɔ bamani ba yɛkɔ yɛ akɔ sɛ tɛ be bu yɛ butsi pɔ, klɛ ba kplɛ yɛ nɛ osi shu, 21pɔ bu di dzoenu sɛ yɛ edzi agɛ ebe bhui Izraɛl ayɛkɛ. Klɛ kɛ gɛ kadɛ, ewui tata na nɛ gɛ ebuianɛ la bɛlɛmɛ. 22Kɛliabha vɛvɛ, bulɔ badzɛ teli ba kɔ bulɔ shuimɛ yɔ. Ba vɛ odzre nɛ mɛ kɛvlɔɛ nɛ 23pɔ ba dɛ mɔ anɔ tsitsi. Ba ba klɛ be tsre lɔ asɛ ba damɔ kibuiyinɔanɔ baxwɛdɛ gɛ ba ɖɔ se alɛ nɛ kpɛ̃. 24Ɔkɛlɛ bulɔ banɔ teli avɛ odzre nɛ mɛ klɛ ba mɔɛ lɛ anasɛ gɛ badzɛ nɛ ba ɖɔ, pɔ ba dɛ mɔ yɛ.”
25Yesu etsre alɛ se, “Kɛlɛ nɔ tinyibui, klɛ wunɔ idzyi ayɔ nɛ tɛyɛyɛkɛŋa nɛ ebui petee gɛ batɔnu na ɖɔ! 26Kɛma sɛ tɛ, Kristo amɔ ebuianɛ petee butɔ, klɛ tɛ etsoku yɛ kabhakpɛkpɛ nɛ mɛ?” 27Klɛ kesikpɛkpɛ nɛ Mose anɛ̀ batɔnu petee, ebu alesi kɔ alɛ kɛ gɛ ba ɖɔ nɛ Kpayaeplukpa nɛ mɛ denɔ yɛnahwɛ shu. 28Gɛ be tsobunɔ kɔxoe nɛ mɛ gɛ ba vɛ, Yesu abhɛtɛ anasɛ onugɛ avɛ otugba. 29Pɔ batrɔ yɛ abha gɛganɛ sɛ, “Za bulɔ bha, alasɛ ɔwlago lɔ na, kiwui nɛ bekɛ.” Kɛlɛso avɛ sɛ tɛ ada za balɛ ɔbha.
30Kibelɛlɛ gɛ aŋaɛdɔ nɛ alɛ, ayɛkɔ gbɛ̃gbɛvu, ehu ahwɛ, aya yɛ mɛ klɛ etenɔalɛ kɔ. 31Ɔkɛlɛ balɛ awɔ̃hu adanɛ klɛ ba kpɛ yɛ susu, klɛ alɛla nɛ balɛ amɛ. 32Be bisi ɔhaglɔ asɛ, “Bulɔ idzyi adɛ pɔɛ lɔ nɛ́ kibelɛlɛ gɛ aɖɔaɖɔ etsre lɔ nɛ kidzo nɛ mɛ klɛ adanɛ Kpayaeplukpa nɛ akɔ lɔ?”
33Ba lɔ zia klɛ betsodzi avɛ Yerusalɛm. Ɔkɛlɛ ba mɔ kɛfɔnɛtoli nɛ ba gɛ lɛ balɛ ɔbha nɛ xogo, 34klɛ ba ɖɔ sɛ, “Kɛgbɛagba lɛ nu! Apalete anyɛmɛ klɛ ebushuakasɛ Simɔn.” 35Ɔkɛlɛ ba tɛabha nɛ aɖɔ ebui nɛ gɛ lavɛ lɛabha nɛ kidzo nɛ mɛ etsre alɛ, klɛ nɛ kana gɛ ba mɔ Yesu akpɛ xãwu kibelɛlɛ gɛ ayɛ gbɛ̃gbɛvu nɛ mɛ.
Yesu Ebushuakasɛ Yɛ Baxwɛdɛ
36Kibelɛlɛ gɛ baka ɖɔaɖɔ denɔ ebuianɛ shu, Yesu nahwɛ alɔɛtiti nɛ balɛ shi klɛ aɖɔ tsre alɛ sɛ, “Ishuyuyɔ kɔ nɔ.”
37Be shuku klɛ be sifu sɛ, ba mɔ kɛtɔwui. 38Aɖɔ etsre alɛ sɛ, “Kideso gɛ nɔ mɔ tɔ, klɛ kideso gɛ nɔ tɛyɛkɛŋa nɛ wunɔ atɔkpui mɛ? 39Nɔ di mɛ bukpli nɛ mɛ nɛ̀ mɛ ɛtsrɛ. Mɛ nahwɛ naa! Nɔ hunɔ mɛ klɛ tɛ nɔ di, kɛdzya nɛ axwa ma kɛtɔwui ahwɛ, anasɛ gɛ kɛlɛ mɛ ahwɛ.”
40Gɛ aɖɔ kibui nɛ beke, akasɛ alɛ yɛ bukpli nɛ̀ yɛ ɛtsrɛ. 41Klɛ nɛ kibelɛlɛ nɛ tsyɛ ba dɛ yɛkɛ lɛabhaŋa alasɛ nɛ́ same nɛ kɛbhɛtɛ bi, ebisi alɛ sɛ, “Kɛdɔ tili lɛ wunɔ ahwɛ nɛ ɔkɛnɛ gɛ nɔ bɔ ŋa?” 42Ba kɔ yɛ kenimɛdzya tɛtɔ bhli, 43klɛ ayikɛ lɛ atã nɛ balɛ amɛ.
44Etsre alɛ sɛ, “Kibui nɛ mɛ tsre nɔ kɛlɛbe nɛ gɛ ɛza wunɔ bha: Kɛkanyaka gɛ ba ŋlɔmɛ elu denɔ mɛ shu alasɛtɛ kɛbɛlɛmɛ nɛ Mose Ɛshã, Batɔnu anɛ Ɛdzɛeplukpa.”
45Ɔkɛlɛ adanɛ balɛ kɛtɔkpu mɛ sɛ tɛ be nu Kpayɛbui nɛesi. 46Etsre alɛ sɛ, “Kibui nɛ la ŋlɔmɛ elu: Kristo aba mɔ butɔ klɛ aba nyɛmɛ denɔ betsitsi nɛ shi nɛ́ kiwui tramɛ nɛabha, 47klɛ kitemɛ tsyitsyina nɛ ebuizizi tsyitsye, ba baɖɔ nɛ yɛ nyimɛ kɔ amadi nɛ petee, kesikpɛkpɛ nɛ Yerusalɛm. 48Wunɔ nu bebuimɔɖɔ nɛ ebuia nɛ shu. 49Ɛba tɛsɛsɛ nɔ kɛgɛ mɛ Aka na ɖɔlu, pɔ nɔ za ɔma gbɛgbla nɛ mɛ, ɔdɔtɔnɔ kibenɔ gɛ ba bayɛkɔ kemi edenɔ owũsise enyumu kɔ nɔ.”
Owũsise Vɛvɛ
50Kɛlɛbe gɛ agbanɛ alɛ ekoeyi nɛ Betani be, efeke yɛ ɛhwɛ nɛ akpɛ abha klɛ ayula alɛ. 51Kɛlɛbe gɛ àyula lɛ, ashɛ̃ nɛ balɛ ɔbha klɛ ba yɛkɔ yɛ avɛ nɔ kabha nɛ owũsise. 52Kɛlɛ bakpɛ yɛ nyi nɛabha klɛ betsodzi avɛ Yerusalɛm nɛ samɛ. 53Klɛ kibenyɛbe ba za kpayavu nɛ mɛ, gɛ ba kpɛ Kpaya nyi nɛabha.
© Ghana Institute of Linguistics, Literacy and Bible Translation