Yohanɛsɛ 2
2
Yesu Etsyina Buni Budzi Bulu
1Nɛ kiwui tramɛ nɛabha adzɛ gbɛgbanɔ avɛ lɛabha nɛ́ Kana nɛ́ Galelia. Yesu yɛeni aza ɔkɔlɛ, 2klɛ Yesu anɛ yɛ badɔkpasɛ nɛ tsyɛ be klu alɛ kɔ adzɛ gbɛgbanɔ. 3Gɛ bulu nɛ beke, Yesu ye ni etsre yɛ asɛ, “Bulu vama balɛ ahwɛ.”
4Yesu ebisi yɛ asɛ “Eni mumɔa, kide so gɛ oklu mɛ ɔkɔ kibui nɛ?” “Kibe kana kɔ mɛ.”
5Yɛ eni etsre baxwɛdɛ nɛ asɛ, “Nɔ bhɛtɛ ɔtrɔ kibui nɔ nɛ gɛ ebe tsre nɔ nɛabhaa.”
6Nɛwã buni tsukpu tuhlo dzi ɔkɛlɛ, bu lɛ di mɛ Yuɖa nɛ be shui buni akpɛ gɛ ba yɛkɔ plu shu nɔ onu gɛ ba vɛ bugu ogu kɔ, ketsukpu kanyaka buni buplui denɔ afɛtabha ɔvɛnɔ afeti baku kalɛ mɛ.
7Yesu etsre baxwɛdɛ nɛ asɛ, “Nɔ shwui buni ɔkpɛ butsukpu nɛ mɛ”, so be shu buni nɛ akpɛ bulɛ mɛ bu yuku.
8Kɛlɛ etsre alɛ sɛ, “Ɔtsɔnɛ nɔ shui butuli obu ɔvɛnɔ apalete gɛ alɛ kiwui nɛ nu.”
Ba bhɛtɛ atrɔ kɛlɛabha, 9klɛ apalete gɛ alɛ kiwui nɛ nu etu buni nɛ gɛ butsyina dzi bulu nɛ di. Edi ti ɔkɔnɔ nɛ gɛ bu de, pɔ nɛlɛmɛ baxwɛdɛ nɛ gɛ be shwui buni xũ nɛ be ti. Kɛlɛ eklu adzɛnyine avɛnɔ ɛbha 10klɛ aɖɔ sɛ, “Anɔnyanɔ amɛna bulu gɛ bu pɛ̃ nɛ oputɔ nɔ klɛ kɛlɛede ba wɔ̃ɛ bu gɛ bu dɛ pɛɛ̃ gelee, pɔ wɔ nɛ ɔzɔ bala budzyɔgo dɛ ɔbɔtɔnɔ ɔtsɔ nɛ.”
11Kɛnɛ, kɛlɛ nu yɛ kɛbuiyiyinɔanɔ tɛtɔpu gɛ Yesu abhɛtɛ, nɛ Kana nɛ Galelia. Ebu yɛ shu bhubhui akasɛ, klɛ yɛ badɔkpasɛ ba yɛkɔ balɛ tɛyɛyɛkɛŋa akpɛ yɛ mɛ.
Yesu Agba Kpayavu Nɛ Mɛ
12Kɛlɛlɛ nɛede, Yesu ɛzhi avɛ Kapɛnaum anɛ̀ yɛeni, yɛ adzyalɛ anɛ́ yɛ badɔkpasɛ. Ɔkɛlɛ ba daza ewui bhliyi teli.
13Gɛ kibe nɛ na kɔ Yuɖanɛ nɛ Tɛfɛflɛwi, Yesu ewu avɛ Yerusalɛm. 14Nɛ kpayavu buka nɛ mɛ amɔ banɔ gɛ ba dɛ banɔɛtsuɛ, ibhoshi nɛ bagɔgɔwi klɛ babhlatɔ be dzi kesi ba tsrakɛ kɔba nɛ aglɔ. 15So ayɛkɔ ohui abhɛtɛ kɛtam gɛ ayɛkɔ akɛka banɔ petee bu nɛ kpayavu nɛ be, editabha ibhoshi nɛ banɔɛtsuɛ, eti bakɔba xwɛtsɛ nɛ kɛdɔ nɛabhaa gɛ ba dɛ dɔ nɛ abalɛ. 16Etsre bagɛ ba dɛ bagɔgɔwi nɛ asɛ, “Nɔ bu kɛdɔɛ nɛ okoeyi nɔ nɛ ɔkɛ̃! Kidzo ɖuweɖu nɔ mɔ gɛ nɔ tsyina mɛ Aka buvu nɛ odzi kedzi!”
17Yɛ badɔkpasɛ ba baka sɛ ba ŋlɔmɛ elu asɛ: “Awɔ̃hudzɛdzã kɔ wɔ vu ba tã mɛ.”
18Ɔkɛlɛ Yuɖanɛ ba pɛɛ denɔ yɛ ɔkɔ sɛ, “Kibuiyinanɔ ɖuweɖu ɔbɔ na lɔ ɔkasɛ gɛ kɛ ba kɔ sɛ wɔ kabhaŋɛŋa gɛ kɛlɛ wɔ ɔyɛkɔ bhɛtɛ ebui nɛ petee nɔ?”
19Yesu ebuilɛnu akɔ alɛ sɛ, “Nɔ yɛ kpayavu, klɛ ɛba tsodzi feke lɛ dzu kititi nɛ ewui tata mɛ.”
20Yuɖanɛ be tsre yɛ asɛ, “Ba yɛkɔ agɔ afɛtalɛ̃ nɛ tehlo edzu kpayavu nɛ, klɛ ɔɖɔ sɛ, obo feke lɛ dzu nɛ ewui tata mɛ?” 21Pɔ kpayavu nɛ bui gɛ aɖɔ, kɛlɛ nu yɛ ishuidzya. 22Kɛlɛede gɛ ba nyɛmɛ yɛ denɔ bekpui mɛ, yɛ badɔkpasɛ ba baka kibui nɛ gɛ aɖɔ. Ɔkɛlɛ ba yɛkɛ Kpayaplukpa nɛabhaŋa, nɛ ebui nɛ gɛ Yesu aɖɔ.
23Ɔtsyɔnɛ kibelɛlɛ gɛ Yesu aza Yerusalɛm nɛ́ Tɛfefla kiwuiŋɛŋa nɛabhaa, banɔ gelee ba mɔ ebuiyinanɔ dɔmumɔ gɛ abhɛtɛ klɛ ba yɛkɛ yɛ nyi nɛabhaŋa. 24Pɔ Yesu adɛ yɛkɔ yɛ shu atrɔ balɛ abha, alasɛ ɛnyi banɔ petee, 25Adɛ pɛɛ kibui mumɔɖɔ denɔ anɔ shu, alasɛ enyi kɛdɔnɔ gɛ kɛlɛ anɔ mɛ.
© Ghana Institute of Linguistics, Literacy and Bible Translation