Shiyanso 7
7
Inoonya ni fisansa fya malenga figubutukha mu nyi yoona
1Apo, uMutwa uNguluvi wámujovela uNuhu, “Yinjila mu shipugo na vaanu va mu nanda yaakho, kwa kiiva nakwaga yuuwe hela mu vaanu woona kiija uli mugolofu. 2Toola inkhanu soona sina sifwaya kihumisiwa ishadanda shina sishwali sive fungati fungati, indala ni ngoosi. Leelo, inkhanu sina sisifwaya kihumisiwa ishadanda shina sishwali, toola yimo yimo, indala ni ngoosi. 3Khanji toola inyuni shina sishwali fungati fungati. Gaha ndeeno baheene inkhanu soona ni nyuni soona, sisigale baaha pa nyi sisavane khanji. 4Pina sikhashila nsiku fungati, nikhaleeta inoonya yina yikhatoonya ishiminsi shoona ni shilo shoona kwa nsiku mashumi gana. Shila shiinu ishuumi shina nashiwumbaga pa nyi apa, nikhashibuda.” 5UNuhu wáagaha goona ngaja shina uNguluvi akhandi amulajiise.
6Uluhaavi lwa fisansa fya malenga ni noonya pina fyagubikhaga inyi, uNuhu akhandi afisiise maakha magana mutanda (600).
7UNuhu nu mudala waakwe, avanaakwe na vadala vaanave vayinjilaga mu shipugo, kiija vakulushe kiifwa kwa lufuwukho lwa malenga. 8Inkhanu sina sifwaya kihumisiwa ishadanda, inkhanu sina sisifwaya kihumisiwa ishadanda, inyuni na fyona fina fitambala pashaanya pa nyi, 9fyayinjilaga fivili fivili mu shipugo muna akwali uNuhu, indala ni ngoosi ngaja uNguluvi shina akhandi amulajiise. 10Insiku fungati saganile kishila, baheene inoonya ni fisansa fya malenga fyayansa kimemya amalenga inyi yoona.
Imfwa ya fiinu fyona fina fyumi
11Ilijuva lya ishumi ni fungati lya mwesi gwa wuvili gwa mwakha gwa magana mutanda (600), kihuma uNuhu pina wásawaagwa, ilijuva ilyo lilyene ifisansa ifikhome ifya malenga fyagubutukhaga kwa ngufu, amalyango ga noonya kihuma ku wulanga gadindukhaga. 12Inoonya yatoonyaga nsiku mashumi gana, ishilo shoona ni shiminsi shoona. 13Ilijuva lilila uNuhu nu mudala waakwe na vanaakwe, uSheemu, uHamu nu Yafeti na vadala vaanave vayinjilaga mu shipugo. 14Vayinjilaga aveene ni nkhanu soona isa mu lihakha, ifidiimwa fyona, shila shiwumbwa shina shitambala pansi, shila nyuni na shila shinya mapapanikho fina fishwali fyayinjilaga. 15Ifiinu fyona fina fyumi fyayinjilaga fivili fivili mu shipugo muna akhandi uNuhu. 16Fyayinjilaga ifidala ni figoosi ngaja shina uNguluvi wámujovaga uNuhu. Apo baheene uMutwa uNguluvi wámudindila umulyango.
17Inoonya ni fisansa fya malenga gayimemya inyi gakunukha kwa nsiku mashumi gana. Amalenga gayonjelelaga gatupula ishipugo pashaanya. 18Amalenga gayenjelela na kimema mandu, baheene ishipugo shayembeela pashaanya ya malenga. 19Amalenga gayonjelela mandu na kigubikha ifidunda fyona ifitali ifya mu nyi. 20Amalenga gayonjelela mbakha gagubikha ifidunda fyona ifitali, kihuma pashaanya ya fidunda shijelo sha liwokho mbakha ku nkhokholo ishumi na gasaanu. 21Shila shiinu ishuumi, inkhanu sa mu lihakha, ifidiimwa, inyuni, ifiinu fyona fina fitambala na vaanu, shila shiinu shaafwa. 22Shila shiinu pashaanya pa nyi, shina shituuya shafwisaga. 23Ndeeno, uMutwa uNguluvi wáabuda shila shiinu shina shuumi pashaanya ya nyi, avaanu, ifidiimwa, inkhanu isa mu lihakha, ifiinu fina fitambala mu nyi ni nyuni. Wásigalaga uNuhu na vaanu vina akhandi nawo ni fiinu fina akhandi nafyo hela mu shipugo. 24Amalenga gagubikha inyi kwa nsiku ligana limo na mashumi gasaanu (150).
© 2020, Wycliffe Bible Translators, Inc. All rights reserved.