Shiyanso 5
5
Ishisafi sha Adamu
1Isi mola sa shisafi sha Adamu. Ilijuva lila uNguluvi pina wávawumbaga avaanu, wávawumbaga kwa shihwano shaakwe. 2Wávawumbaga umugoosi nu mudala, wávayimiilila na kivatambulila ilitaawa lyanave “vaanu.”
3UAdamu wáganile kifisa maakha ligana limo na mashumi gatatu (130), wáasava umwana yuna ahwaneene nu mwene, wámutambulila ilitaawa lyakwe Seeti. 4UAdamu wáganile kimusava uSeeti, wákhalaga maakha magana munaana (800). Uluhaavi ulo, akhandi ana vaana avanji va shidiimi na va shihinja. 5Amaakha goona aga Adamu gina wákhalaga pa nyi apa, gaali maakha magana gonja na mashumi gatatu (930), baheene wáafwa.
6USeeti wáganile kifisa maakha ligana limo na gasaanu (105), wámusava uEnoshi. 7USeeti wáganile kimusava uEnoshi, wáakhala maakha aganji magana munaana ni fungati (807). Uluhaavi ulo, akhandi ana vaana avanji ava shidiimi na va shihinja. 8Amaakha goona gina wákhalaga uSeeti pa nyi apa, gaali maakha magana gonja ni lishumi limo na gavili (912), baheene wáafwa.
9UEnoshi wáganile kifisa maakha mashumi gonja, wámusava uKenani. 10UEnoshi wáganile kimusava uKenani, wákhalaga maakha aganji magana munaana ni lishumi limo na gasaanu (815). Uluhaavi ulo, akhandi ana vaana avanji ava shidiimi na va shihinja. 11Amaakha goona aga Enoshi gina wákhalaga pa nyi apa, gaali maakha magana gonja na gasaanu (905), baheene wáafwa.
12UKenani wáganile kifisa maakha mashumi fungati, wámusava uMahalaleeli. 13UKenani wáganile kimusava uMahalaleeli, wáakhala maakha aganji magana munaana na mashumi gana (840). Uluhaavi ulo, akhandi ana vaana avanji ava shidiimi na va shihinja. 14Amaakha goona aga Kenani gina wákhalaga pa nyi apa, gaali maakha magana gonja ni lishumi (910), baheene wáafwa.
15UMahalaleeli wáganile kifisa maakha mashumi mutanda na gasaanu, wámusava uYaaledi. 16UMahalaleeli wáganile kimusava uYaaledi, wáakhala maakha aganji magana munaana na mashumi gatatu (830). Uluhaavi ulo, akhandi ana vaana avanji ava shidiimi na va shihinja. 17Amaakha goona aga Mahalaleeli gina wákhalaga pa nyi apa, gaali maakha magana munaana na mashumi gonja na gasaanu (895), baheene wáafwa.
18UYaaledi wáganile kifisa maakha ligana limo na mashumi mutanda na gavili (162), wámusava uHenoki. 19UYaaledi wáganile kimusava uHenoki wáakhala maakha aganji magana munaana (800). Uluhaavi ulo, akhandi ana vaana avanji ava shidiimi na va shihinja. 20Amaakha goona aga Yaaledi gina wákhalaga pa nyi apa, gaali magana gonja na mashumi mutanda na gavili (962), baheene wáafwa.
21UHenoki wáganile kifisa maakha mashumi mutanda na gasaanu, wámusava uMetuseela. 22UHenoki wámuyinatilaga uNguluvi maakha magana gatatu (300). Uluhaavi ulo, akhandi ana vaana avanji ava shidiimi na va shihinja. 23Amaakha goona aga Henoki gina wákhalaga pa nyi apa, gaali magana gatatu na mashumi mutanda na gasaanu (365). 24Kwa kiiva uHenoki wámuyinatilaga uNguluvi, lulwene wáyajilinkhanaga, kiiva uNguluvi wámutoolaga.
25UMetuseela wáganile kifisa maakha ligana limo na mashumi munaana ni fungati (187), wámusava uLameki. 26UMetuseela wáganile kimusava uLameki, wáakhala maakha aganji magana fungati na mashumi munaana na gavili (782). Uluhaavi ulo akhandi ana vaana avanji ava shidiimi na va shihinja. 27Amaakha goona aga Metuseela gina wákhalaga pa nyi apa, gaali magana gonja na mashumi mutanda ni gonja (969), baheene wáafwa.
28ULameki wáganile kifisa maakha ligana limo na mashumi munaana na gavili (182) wáasava umwana. 29Wámutambulila umwana uyo ilitaawa lyakwe Nuhu,#5:29 Nuhu: Litaawa lya Shihebulaniya. Uluganulo lwakwe, kituuya kwa wunofu. kuno iijova, “Uyu yumwene akhatuyishilisa inumbula seesu kwa nsengo seesu isa malava makhome ga mawokho geesu mu nyi. Inyi iyi yoona uMutwa uNguluvi wáyiyiijilaga.” 30ULameki wáganile kimusava uNuhu, wáakhala maakha aganji magana gasaanu na mashumi gonja na gasaanu (595). Uluhaavi ulo, akhandi ana vaana avanji ava shidiimi na va shihinja. 31Amaakha goona aga Lameki gina wákhalaga pa nyi apa, gakhandi magana fungati na mashumi fungati ni fungati (777), baheene wáafwa.
32UNuhu wáganile kifisa maakha magana gasaanu (500), wávasava uSheemu, uHamu nu Yafeti.
© 2020, Wycliffe Bible Translators, Inc. All rights reserved.