ମାର୍କ 3
3
ଜିସୁ ଅରେନ୍ କିୟୁ ୱାର୍ତି ସର୍ହି ଲୋକ୍ତିଙ୍ଗ୍ ନେଗେଣ୍ତ୍ କିତାନ୍
(ମାତିଉ ୧୨:୯-୧୪; ଲୁକ ୬:୬-୧୧)
1ଜିସୁ ମାରିଡ଼େସି ପାର୍ତନା କିନି ଇଲୁଦୁ ସର୍ଆନ୍ । ଆବେ ଅରେନ୍ ଲୋକୁ ମାର୍ଆନ୍, ୱାନି ଉଣି କିୟୁ ୱାର୍ତା ମାର୍ଆତ୍ । 2ମାରି, ଜିସୁ ରମ୍ନି ଦିନ୍ତୁ ଆୟା ଲୋକ୍ତିଙ୍ଗ୍ ନେଗେଣ୍ତ୍ କିନାନ୍ନୋ ସିଲେ, ଇକା ସୁଡ଼ୁଦେଙ୍ଗ୍ ଇଜି ୱାର୍ ୱାନି ମୁସ୍କୁ କାଣୁକୁ ସୁଡ଼ୁଜିମାର୍ଆର୍, ଏଣ୍ତେସ୍କି ୱାର୍ ୱାନି ବିରୁଦ୍ତାନ୍ ଦୋସ୍ କିଦେଙ୍ଗ୍ ଆଟ୍ନାର୍ । 3ଆମା ୱାନିଦି କିୟୁ ୱାର୍ତା ସୋର୍ଆ ମାର୍ଆତ୍, ୱାନିଙ୍ଗ୍ ଜିସୁ ଇର୍ଆନ୍, “ରାଆ, ନାଣ୍ମି ନିଲ୍ଆ ।” 4ମାରି, ଜିସୁ ୱାରିଙ୍ଗ୍ ଇର୍ଆନ୍, “ରମ୍ନି ନାଣ୍ଡିଙ୍ଗ୍ ଇନି ପାଣି କିନିକା ନିୟମ୍ ମାନାତ୍ ? ନେଗେଣ୍ତ୍ କିଦେଙ୍ଗ୍ ନୋ ସେଏଣ୍ତ୍ କିଦେଙ୍ଗ୍ ? ଅରେନ୍ ଲୋକ୍ତି ଜିବନ୍ ରକିୟା କିନିକା ନୋ ସାପିସ୍ନିକା ?” ମାତର୍ ଲୋକ୍ଡର୍ ଆଲେତା ସରଆର୍ ।
5ଆବେଟ୍ ଜିସୁ ଲୋକା ଜିବନ୍ ଆଟ୍ୱାଆକା ଦୁଃକ୍ ଆଜି ରିସାଦାନ୍ ସାରିବେଡ଼୍ତି ୱାରିଙ୍ଗ୍ ସୁଡ଼ୁଜି କିୟୁ ୱାର୍ତି ମାର୍ଇ ଲୋକ୍ତିଙ୍ଗ୍ ଇର୍ଆନ୍, “ନି କିୟୁ ପେର୍ଆ ।” ୱାନ୍ ୱାନି କିୟୁ ପେର୍ତାନ୍, ମାରି ୱାନି କିୟୁ ନେଗେଣ୍ତ୍ ଆତାସର୍ଆତ୍ । 6ଇକା ସୁଡ଼ୁତାର୍ ନୋ ପାରୁସିର୍ ପାର୍ତନା ଇଲ୍ତାନ୍ ସହସି ସରଆର୍ ନୋ ଜିସୁଙ୍ଗୁଁ ସାୟା ମାର୍ଗା ଡାକ୍ତେଙ୍ଗ୍ଁ ଇଜି ୱାନି ବିରୁଦ୍ତାନ୍ ଆୟାଦାପ୍ରେ ହେରୋଦ ରାଜା ଦଲ୍ତି ନେତାରିୱାଲେ ୱାର୍ଗିଜି ସାତାର୍ ।
ସାମ୍ଦୁର୍ ପାଡ଼ି ଲୋକୁ ଉଣ୍ତାନିକା
7ଜିସୁ ୱାନି ସିସୁରିୱାଲେ ମିସାତାନ୍ ନୋ ଗାଲିଲି ସାମ୍ଦୁର୍ ପାଡ଼ି ସର୍ଆନ୍ । ମାରି ଗାଲିଲି ଗାଡ଼୍ତାନ୍ ନାଣ୍ତ ଲୋକୁ ସତା ରୋ ୱାନି ୱାଲେ ବୁଲାତାର୍; ମାରି ଜିହୁଦା, 8ଜିରୁସାଲାମ୍, ଇଦୋମ୍, ଜର୍ଦନ ଗାଡ଼୍ତି ଆୟା ପାଡ୍କା ମାନିକାର୍, ମାରି ସୋର ନି ସିଦନ୍ତି ସାରିବେଡ଼୍ତିଦାନ୍ ଲୋକୁ ୱିଜେରେ ୱାନି ପାଣିଦିମାଟା ୱେର୍ଆର୍ରୋ ୱାନି ଲାକ୍ତୁ ୱାତାର୍ । 9#ମାର୍କ ୪:୧; ଲୁକ ୫:୧-୩.ଆବେ ନାଣ୍ତ ଲୋକ୍ ଉଣ୍ତାତାର୍ଆକା, ଲୋକୁ ୱିଜେରେ ୱାନି ଲାକ୍ତୁ ୱାଜ ମାଟ୍ସି ସାଏର୍, ଆୟାଉଣ୍ତିଙ୍ଗ୍ ୱାନ୍ ୱାନି ସିସୁରିଙ୍ଗ୍ ୱାନି ଉଣ୍ତିଙ୍ଗ୍ ଉଣ୍ତ୍ରି ଇସ୍ରି ଡଙ୍ଗାଁ ଲାକ୍ତୁ ଇଡ୍ଦେଙ୍ଗ୍ ଇର୍ଆନ୍; 10ଇରିଙ୍ଗ୍ ଜିସୁ ଏସ ରୋଗ୍ତୁ ମାର୍ଇ ଲୋକାଙ୍ଗ୍ ନେଗେଣ୍ତ୍ କିତାନ୍ଆକା, ମାରି ରୋଗ୍ତୁ ମାନି ୱିଜେରେ ୱାନିଙ୍ଗ୍ ମୁଟ୍ତେଙ୍ଗ୍ ଇଜି ୱାନି ମୁସ୍କୁ ମାଟ୍ସି ସାଜି ମାର୍ଆର୍ । 11ମାରି, ତାଗ୍ଇଆତ୍ମା ଆସ୍ତିମାର୍ଇ ଲୋକୁ ଜିସୁଙ୍ଗୁଁ ସୁଡ଼ୁଜିମାର୍ଆର୍, ୱାର୍ ଜିସୁ ଆଗ୍ଡ଼ି ଆର୍ଜି ଆଉଲି ଆଜି ଇନ୍ଜିମାର୍ଆର୍, “ନିନୁନେ ମାପୁରୁଦି ମାରିସି ।”
12ଆବେଟ୍ ୱାନ୍ ଏନ୍ ଆକା ଏଙ୍ଗ୍ବା ଇନ୍ଇ ଉଣ୍ତିଙ୍ଗ୍ ୱାନ୍ ତାଗ୍ଇ ଆତ୍ମେଆଙ୍ଗ୍ ଆଟ୍ୱାଦାନ୍ ଆଦେସ୍ ସିତାନ୍ ।
ଜିସୁ ବାର ଲୋକାଙ୍ଗ୍ ସିସୁର୍ କିତାନ୍
(ମାତିଉ ୧୦:୧-୪; ଲୁକ ୬:୧୨-୧୬)
13ଆୟାୱେନ୍କା ଜିସୁ ଗରନ୍ ମୁସ୍କୁ ସର୍ଆନ୍ନୋ, ୱାଣ୍ତ୍ରୁ ଏମେ ଲୋକ୍ତିଙ୍ଗ୍ ବଦା କିତାନ୍ ଆୟା ଲୋକ୍ତିଙ୍ଗ୍ ୱାନି ଲାକ୍ତୁ କୁକ୍ତାନ୍ ମାରି ୱାର୍ ୱାନିବାନୁ ୱାତାର୍ । 14ଜିସୁ ବାର ଲୋକ୍ ସିସୁରିଙ୍ଗ୍ ବାସ୍କିତାନ୍, ଏଣ୍ତେସ୍ ୱାରୁ ୱାନିୱାଲେ ତେବାନାର୍, ମାରି “ୱାନ୍ ୱାରିଙ୍ଗ୍ ନେଗିକାବୁରୁ ପ୍ରଚାର୍ କିଦେଙ୍ଗ୍ ପୋକ୍ତାନ୍,” 15ମାରି ୱାର୍ ଦୁବେଆଙ୍ଗ୍ ପେର୍ଦେଙ୍ଗ୍ ଅଦିକାର୍ ପଇତାର୍ ।
16ଜିସୁ ଇୟା ବାର ଲୋକାଙ୍ଗ୍ ବାସ୍କିତାନ୍ ସିମୋନ୍, ଜିସୁ ଆମାୱାନିଙ୍ଗ୍ କି ମାରି ଉଣ୍ତ୍ରି ଦର୍ ପିତର୍ ଇଜି ସିତାନ୍; 17ଜେବଦୀଦି ରିଏର୍ ମାରିସିର୍ ଯାକୁବ ମାରି ୱାନି ତଡ଼ାନ୍ ଯୋହନ, ଆମାୱାରିଙ୍ଗ୍ ୱାନ୍ ବିନେରିଗୋସ୍, ବା ମିର୍ସି ଆଉଲି ଆନି ବାଦଡ଼୍ତି ମାରିସିର୍ ଇଜି ଦର୍ ସିତାନ୍; 18ଆନ୍ଦ୍ରିୟ, ପିଲିପ୍, ବାର୍ତଲମି, ମାତିଉ, ଥୋମା, ଆଲପିଦି ମାରିସି ଯାକୁବ, ଥଦ୍ଦୀୟ, କିଣାନିୟ ସିମୋନ, ଏନ୍ ଇସ୍ରାଏଲ୍ତିଙ୍ଗ୍ ଡ଼ିସିସ୍ କିଦେଙ୍ଗ୍ ବଦାକିଜି ମାର୍ଇ ଯିହୁଦି ଲୋକାମାଣ୍କୁ ଅରେନ୍ ମାର୍ଆନ୍ । 19ମାରି ଇସ୍କାରିୟୋତିୟ ଜିହୁଦା, ଆମାକାନ୍ କି ୱେନ୍କା ଜିସୁଙ୍ଗୁଁ ସାତ୍ରୁରି କିୟୁଦୁ ଆସ୍ପିସ୍ କିତାନ୍ ।
ଜିସୁ ମାରି ବାଲ୍ଜିବୁଲ୍
(ମାତିଉ ୧୨:୨୨-୩୨; ଲୁକ ୧୧:୧୪-୨୩; ୧୨:୧୦)
20ଇୟା ୱେନ୍କା ଜିସୁ ଏସିୱାଲେ ଇନ୍ଡ୍ର ଡ଼େସି ୱାତାନ୍, ଆବେ ନିସା ଲୋକୁ ଉଣ୍ତାତା ମାର୍ଆର୍ ଯେ, ଜିସୁ ମାରି ୱାନି ସିସୁର୍ ଖାଦି ଉଣ୍ତେଙ୍ଗ୍ ବା ଆଟ୍ଏତାର୍ । 21ଏସ୍ତିୱାଲେ ଜିସୁରି ଇନ୍ଡ୍ରଣି ଲୋକୁ ଇକା ୱେର୍ଆର୍ ଆୟାୱାଲେ ୱାର୍ ଜିସୁଙ୍ଗୁଁ ଡ଼େସି କୁକ୍ସ ଅତେଙ୍ଗ୍ ସରଆର୍, ଇରିଙ୍ଗ୍ “ୱାନି ତାଲା ପାଣି ସିଏଜିନାତ୍ ଇଜି ଲୋକୁ ୱାର୍ଜିସାନିକା ୱେର୍ଆର୍ ।”
22 #
ମାତିଉ ୯:୩୪; ୧୦:୨୫. ମାରି, ଜିରୁସାଲାମ୍ତାନ୍ ୱାତି ଏସୋ ସାସ୍ତ୍ରିର୍ ଇର୍ହାର୍, “ୱେନିଙ୍ଗ୍ ଦୁବେଆଣି ପେରିକାତ୍ ବାଲ୍ଜିବୁଲ୍ ବୁଡ଼୍ତା ମାନାତ୍, ତାନେ ସାକ୍ତିଦାନ୍ ଦୁବେଙ୍ଗ୍ ଡ଼ିସିସ୍ନାନ୍ ।”
23ଜିସୁ ୱାରିଙ୍ଗ୍ ଲାକ୍ତୁ କୁକ୍ତାନ୍ ମାରି ଉଣ୍ତ୍ରି କାତା ୱେର୍ସି ବୁଜା କିତାନ୍, “ସୟତାନ୍ ଏଣ୍ତେସ୍ ଶୟତାନ୍ତିଙ୍ଗ୍ ପେର୍ଦେଙ୍ଗ୍ ଆଟ୍ନାତ୍ ?” 24ନିଜେଦି ଦେସ୍ ଜଦି ନିଜେ ନିଜେରି ଦଳ ଲୋଇ ଜୁଦ୍ କିନାର୍, ଆୟା ରାଜି ତିର୍ ତେବାଦେଙ୍ଗ୍ ଆଟ୍ଏତ୍ । 25ମାରି, ଉଣ୍ତ୍ରିଇଲ୍ତି ଲୋକୁ ଜଦି ବାଗ୍ ବାଗ୍ ଆଜି ନିଜେ ନିଜେରି ଲୋଇରି ବିରୁଦ୍ତାନ୍ ନିଂଇତିଙ୍ଗ୍, ଆୟା ଇଲୁ ତିର୍ ତେବାଦେଙ୍ଗ୍ ଆଟ୍ଏତ୍ । 26ଆୟାୱାଜା, ଜଦି ଶୟତାନ୍ତି ରାଜି ବାଗ୍ ବାଗ୍ ଆଜି ନିଜେଦି ବିରୁଦ୍ତାନ୍ ନିଂଇତାତ୍ନି, ଆୟାକା ତିର୍ ତେବାଏତ୍, ମାତର୍ ତାନି ସାନିକା ୱାତାତ୍ନି ।
27“ମାତର୍ ଅରେନ୍ ବପୁମାନି ଲୋକ୍ତି ଇନ୍ଡ୍ର ଏନ୍ବା ଡ଼ୁଗୁଜି ଆଗ୍ଡ଼ି ୱାନିଙ୍ଗ୍ ତର୍ଏତିଙ୍ଗ୍, ୱାନି ସାମାନ୍ପତ୍ର ଡଂଆ କିଜ ଅତେଙ୍ଗ୍ ଆଟ୍ଏନ୍; ୱାନିଙ୍ଗ୍ ଆଗ୍ଡ଼ି ତର୍ତିଙ୍ଗ୍ ଗାଦେ ୱାନ୍ ୱାନି ଇଲୁ ଲୋଇ ଡଂଆ କିନାନ୍ ।
28“ନାନ୍ ମିଙ୍ଗିଁ ସତ୍ ଇଜିନା, ଲୋକ୍ତି ୱିଜୁ ପାପ୍ ମାରି ୱାର୍ ଏସା ନିନ୍ଦାମାଟା ଇନ୍ଜି ମାପୁରୁଙ୍ଗୁଁ ନିନ୍ଦା କିନାର୍, ଆୟାୱିଜୁ କେମା ଆନାତ୍; 29#ଲୁକ ୧୨:୧୦.ମାତର୍ ଏନ୍ ପବିତ୍ରଆତ୍ମାଦି ବିରଦ୍ତାନ୍ ନିନ୍ଦା ମାଟା ଇନାନ୍, ୱାନିଙ୍ଗ୍ ମାପୁରୁ ଏସାଙ୍ଗ୍ ବା କେମା କିଏନ୍, ଆୟା ଲୋକୁ ୱିଜୁଦିନ୍ତି ଉଣ୍ତିଙ୍ଗ୍ ଶାସ୍ତି ପଇନାନ୍ ।” 30“ଜିସୁଙ୍ଗୁଁ ତାଗ୍ଇଆତ୍ମା ଆସ୍ତା ମାନାତ୍” ଇଜି ଏସୋ ସାସ୍ତ୍ରିର୍ ଇର୍ହାର୍ ଆକା, ଜିସୁ ଇୟା ମାଟା ଇନ୍ଜି ୱାରିଙ୍ଗ୍ ବୁଝା କିତାନ୍ ।
ଜିସୁଦି ଆଇସି ମାରି ତଡ଼ାନ୍କୁ
(ମାତିଉ ୧୨:୪୬-୫୦; ଲୁକ ୮:୧୯-୨୧)
31ନାସ୍ତିୱାଲେ ଜିସୁଦି ୟାୟା ନି ତଡ଼ାନ୍କୁ ୱାତାରୋ ଆତ୍ରେ ନିର୍ହା ରୋ ଜିସୁଙ୍ଗୁଁ କୁକ୍ତେଙ୍ଗ୍ କାବୁର୍ ପୋକ୍ତାର୍ । 32ଆବେଟ୍ ୱାନି ସାରିବେଡ଼୍ତି ବାସ୍ତି ମାର୍ଇ ଲୋକୁ ୱାନିଙ୍ଗ୍ ଇର୍ହାର୍, “ସୁଡ଼ୁଆ, ମି ୟାୟା ନି ତଡ଼ାନ୍କୁ ମାରି ତାଙ୍ଗିଁକ୍ ଆତ୍ରେ ତେବାତେ ନୋ ନିଙ୍ଗିଁ ପଇଜିନେ ।”
33ମାତର୍ ଜିସୁ ୱାରିଙ୍ଗ୍ ଇର୍ଆନ୍, “ନା ୟାୟା ନି ତଡ଼ାନ୍କୁ ଏର୍ ?” 34ଜିସୁ ୱାନି ସାରିବେଡ଼୍ତି ବାସ୍ତି ମାର୍ଇ ଲୋକାଙ୍ଗ୍ ସୁଡ଼ୁଜି ଇର୍ଆନ୍, “ସୁଡ଼ୁଦୁ, ଇକାର୍ ଆଜିନାର୍ ନା ୟାୟା ନି ନା ତଡ଼ାନକୁ । 35ଏନ୍ଆପିନ୍ ମାପୁରୁଦି ମାଟା ମାନାନାନ୍, ୱାନ୍ ନା ତଡ଼ାନ୍, ତାଙ୍ଗିଁ ମାରି ୟାୟା ।”
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020